Pwata Kopwe Ikkiotek?
“OUA fen tingor, nge ouse mwo angei, pun oua chok tingormwaal . . . Oupwe arap ngeni Kot, iwe, epwe arap ngenikemi.” (Jemes 4:3, 8) Alon noun Jises we chon kaeo Jemes epwe amwokutukich le ekieki ussun ekkewe popun sipwe iotek.
Iotek esap chok eu alen esilei ngeni Kot met sia osupwang ren. Lon an Afalafal won ewe Chuuk mi itefoulo, Jises a apasa: “Sememi a silei ami osupwang mwen ami tingor ren.” Nge, Jises a pwal apasa: “Oupwe titingorei, o epwe ngenikemi.” (Mattu 6:8; 7:7) Iwe, Jiowa a mochen ach sipwe ereni I met sia osupwang ren. Nge mei wor pwal ekkoch mettoch mi pacheri iotek lukun ena.
Chiechi mi enlet rese kan popporausfengen lon chok ekkewe fansoun ra osupwang ren och mettoch. Ra ekiekifengennir, iwe, epwe mammarita ar chiechifengen lupwen repwe pwarifengenni meefier. Iwe, a wor pwal eu popun sipwe ikkiotek mi lu seni ach sipwe chok tingor minne sia osupwang ren. A suuk ngenikich eu fansoun pwe sipwe apochokkula ach ririoch ngeni Jiowa ren ach pwarata ach tongei seni lon letipach.
Ewer, Kot a ngenikich ach tufichin iotek mi auchea pwe sipwe arap ngeni i. Epwe chok tongeni fis ena ika sipwe pwarata pwisin meefiach ngeni Kot nge sisap apiapini ekkoch iotek. A ifa me watten ach pwapwaan fos ngeni Jiowa lon iotek! Pwal eu, eu mwitun lon Paipel a apasa: “A pwapwa ren an ekkewe chon wenechar iotek.”—Proferp 15:8.
Ewe sou kol Asaf a eani ewe kol, a era: “Nge mi chok murinno ngeniei ai upwe arap ngeni Kot.” (Kol Fel 73:28) Iwe nge, ika sipwe arap ngeni Kot, epwe lamot ach sipwe fori och lukun ach iotek ngeni. Nengeni ifa ussun ewe poraus mwirin a pwarata ei mettoch:
“Emon me lein noun kkewe chon kaeo a apasa ngeni, ‘Samol, kopwe aiti ngenikem iotek.’” Jises a polueni: “Lupwen oupwe iotek, oupwe apasa, ‘Semach, itom epwe fel. Muom epwe feito.’” (Luk 11:1, 2) Epwe tufich ach we iotek epwe wor weween ika sisap akkom kaeo ifa iten Kot we me ifa ussun sipwe epinalo? Iwe, pwal eu, sipwe tongeni atipeeufengenni ach we iotek ngeni alon Jises kkewe ika sisap akkom weweiti meta an Kot we Muu? Weween ekkeei poraus epwe suuk ngenikich ika sipwe kaeofichi ewe Paipel. Minne sipwe kaeo epwe alisikich ach sipwe silei Kot me weweiti an kkewe al. Pwal eu, ach sileilo Jiowa Kot epwe ameef ngenikich pwe sia ririoch ngeni me apochokkulata ach mochen pacheoch ngeni. Iwe, epwe alisikich pwe sipwe foffos ngeni lon iotek.
Iotek Epwe Tongeni Pwakini Ekkewe Osukosuk
Ach amarata ach ririoch ngeni Jiowa epwe alisikich le pwakini ach kkewe osukosuk. Nengeni ifa ussun lon ekkewe poraus mwirin. Ra aiti ngenikich pwe ir kkewe mi ikkiotek ra tongeni apochokkula ar ririoch ngeni Jiowa.
Lon Brazil, emon fefin itan Maria a iotek ngeni Kot fan iten alillis. A mochen u ngeni ekkewe allukun aramasen fonuan pokiten a kuna likotupotup lein aramas. Maria a pwal mwo nge su seni puluwan we, noun kkewe, me imwan we. A pwal poputa le unumi safeien opuchopuch. Nge lupwen ese kuna pwapwa seni, a suuki letipan ngeni Kot me pwal iotek fan iten alillis.
Ekiselo chok, ruuemon Chon Pwarata Jiowa ra chuuri me ra ngeni Maria echo chassi The Watchtower, nge mei wor eu poraus ussun lamoten an emon nguuri emmwen seni Kot. A kku letipan, iwe, lon chok ena ran a poputa le kaeo ewe Paipel ren ekkewe Chon Pwarata. Lo, lo, lo, ena mettoch a emmwen ngeni ar chasefal ngeni an famili. Atun an watteta an kaeo ussun Jiowa, a mochen pwarata an tong ngeni. Maria a apasa: “Ua siwili lapalapen manauei. Puluwei me nei kkewe ra akkom u ngeni ai kaeo ewe Paipel. Nge lupwen ra kuna ekkewe siwil lon manauei, ra poputa le apochokkulaei.” Mwirin, Maria a fangelo manauan ngeni ewe Chon Auseling ngeni iotek pwe epwe angang ngeni.
Inaamwo ika puluen José a lioch me a wor an business mi murinno lon Bolivia, nge ese pwapwa. Lupwen a lisou-mwaal ren emon fefin, puluwan we a su seni. A unupuch me a meefi pwe esor lamoten manauan. José a apasa: “Ua poputa le iotek ren unusen letipei, ua eis met upwe tongeni fori pwe upwe apwapwai Kot. Mwirin och fansoun, Chon Pwarata Jiowa ra chuuriei lon ai we leenien angang me fos ngeniei ussun eu kkotun kaeo Paipel ese kamo, nge use mochen. Iwe, a fis fan ulungat. Iteiten fansoun ua iotek fan iten alillis, ekkewe Chon Pwarata ra feito. Iwe, ua ekieki pwe upwe auseling ika repwe liwinsefal fan eu. Ua fen alleani unusen ewe Paipel iwe, mei wor chommong ai kkewe kapas eis, nge iteiten fansoun meinisin ua pwapwa ren minne ra eani polu. Ai kaeo ussun Jiowa a awora ngeniei eu minefon popun manauei, me chienei kkewe lein ekkewe Chon Pwarata ra apochokkulaei ren ar kewe leenien appiru! Ua poutalo nei we girlfriend me chienei kkewe chon sakau. Mwirin ekis chok fansoun, ua liwiniti puluei me nei kkewe. Ua papataiselo lon 1999.”
Lon Italy, pokiten a osukosuk an Tamara pupulu, a ikkiotek fan iten tipatchem. I emon mi tipekoum pun a kuna kawet me a tou seni an we famili atun a 14 ierin. Tamara a apasa: “Ua kuna eu Paipel me poputa le alleani. Lon eu pwinin, ua allea pwe an emon ‘kuna tipatchem epwe ussun an kuna ekkewe pisek auchea.’ Ua iotek fan iten ena tipatchem. (Proferp 2:1-6) Sorotaan sosoran, ekkewe Chon Pwarata Jiowa ra chuuriei. Ua poputa le kaeo ewe Paipel rer, nge ua mang le apwonueta lon manauei minne ua kaeo. Lo, lo, lo, ua filata pwe upwe manaueni manauen Chon Kraist, iwe, ua papataiselo. Iei, am me puluwei we aua alisi ekkewe ekkoch le kuna feioch seni an Kot we tipatchem.”
Beatriz, emon mi tufich me pisekiek lon Caracas, Venezuela. Nge a mufesen me osukosuk watte lon letipan. Fan eu, pokiten an letipechou, a iotek fitu aua. Sorotaan sosoran, emon a etiki an we pel. Lon an mangau, a neneu lon ewe pwangen asam we pwe epwe pi lukun, iwe, a kuna ruuemon aramas fan ar kewe potoun afalafal. Iwe, a chok fanafanelo pwe repwe ekieki pwe esor aramas, nge me mwen ar feilo, ra tinalong echo taropwe fan ewe asam. A mak won: “Silei Om Paipel.” Mei tufich pwe ra feito ren poluen an kkewe iotek lepwinewe? A koko ngenir pwe repwe liwin. Ekiselo chok nge a poputa le kaeo ewe Paipel, iwe, mwirin och fansoun a papataiselo. Iei Beatriz a pwapwa, iwe, a aiti ngeni ekkewe ekkoch ifa ussun repwe tongeni kuna pwapwa.
Carmen a iotek ussun ar woungau. Mei wor engol nour kkewe me puluwan we, emon chon sakau itan Rafael. Carmen a apasa: “Ua sotun angang moni ren ai sopuni ufen aramas.” Nge a wattelo an Rafael ukkunumi sakau. “Ese fis tori ewe fansoun am aua poputa le kaeo ewe Paipel ren ekkewe Chon Pwarata Jiowa pwe puluei a poputa le siwil. Am aua kaeo ussun pwonen ewe Muu—pwe arapakan chok, Jiowa epwe awesalo nafangauen tufichin nonnom aramas me riaffoun an aramas nemenemengau. Iwe, a polu ai kkewe iotek ngeni Kot!” An kaeo ussun alen Jiowa a alisi Rafael pwe epwe ukkutiu seni an unumi sakau, iwe, a pwilitalong “ewe lapalap mi fo.” (Efisus 4:24) Ir me an we famili ra tufichin amurinnolo nonnomun manauer. Rafael a apasa: “Inaamwo ika am ause pisekisek, me esor pwisin imwem, nge mei wor tufichin manauem, me am mi pwapwa.”
Lupwen Epwe Polu Ekkewe Iotek Meinisin
A lamot ngeni ekkeei aramas iotek? Ewer! Iwe, en mi kuna pwe arapakan fansoun meinisin a polu ar kkewe iotek lupwen emon seni ewe mwichefelin Chon Kraist a alisir pwe repwe arap ngeni Jiowa Kot ren ar kakkaeo ewe Paipel?—Foffor 9:11.
Iwe, mei wor ekkewe popun mi murinno ach sipwe iotek. Arapakan chok, epwe polu ewe iotek pwe an Kot we Muu epwe feito me letipan epwe pwonueta won fonufan. (Mattu 6:10) Mwirin an Kot epwe alimetau seni ach ei fonufan ekkewe chon u ngeni, “ewe fonufan epwe urelo ren sileien Jiowa.” (Aisea 11:9, NW) Iwe, lon ena fansoun ir meinisin mi tongei Jiowa repwe pwapwaesini ewe “ngas mi ling an noun Kot kkewe.”—iwe, epwe wesewesen polu ar kkewe iotek.—Rom 8:18-21.
[Picture on page 7]
En mi silei ewe popun sipwe iotek?