Feffetal Pok Me An Jiowa Mwicheich
“Ewe Koten kinamwe . . . epwe aunusochukemilo ren mettoch mi murinno meinisin, pwe oupwe apwonueta letipan.”—IPRU 13:20, 21.
1. Ifa chochoon chon fonufan, me fitemon leir ra fiti lamalam?
LON EWE ier 1999, chochoon chon fonufan a tori wonu bilion! Me ren ewe puk itan The World Almanac, mei wor 1,165,000,000 Chon Muslim; 1,030,000,000 Chon Katolik; 762,000,000 Chon Hindu; 354,000,000 Chon Buddhist; 316,000,000 Chon Pirostan; me 214,000,000 ra fiti ewe lamalam itan Orthodox.
2. Ifa lapalapen ekkewe lamalam ikenai?
2 Lupwen sia chechchemeni ifa ussun ekkena lamalam ra kaimufesen me ewe fitikoko lefiler, sia tongeni apasa pwe ekiekin ekkena fite puku milion chon lamalam meinisin a tipeeu ngeni letipen Kot? Aapw, “pun Kot, esap i emon Koten fitikoko, pwe koten Kinamwe.” (1 Korint 14:33) Iwe nge, ifa ussun noun Jiowa kewe chon angang won unusen fonufan? (1 Piter 2:17) Eu atittin a pwaralo pwe ‘Kot a aunusochuurolo ren mettoch mi murinno meinisin ren ar repwe apwonueta letipan.’—Ipru 13:20, 21.
3. Met a fen fis lon Jerusalem atun Pentakos, 33 C.E., me met popun?
3 Pwungun pwe chochoon ekkewe chon luku ir Chon Pwarata Jiowa esap anneta pwungun are mwaallin ewe lamalam me Jiowa esap ingeiti eu lamalam pokiten chommong aramas ra fiti. Kot ese filata Israel pokiten ir “chommong”. Ir ‘chokisikis seni meinisin.’ (Tuteronomi 7:7) Nge, Israel ese tuppwol ngeni Kot. Ina popun Jiowa a poputa le efeiochu ewe minefoon mwichefellin Chon Kraist atun Pentakos lon we ier 33 C.E. Ra fen kepit ren an Jiowa ngun mi fel me ra achocho le esilefeili ewe enlet ussun Kot me Kraist.—Fofor 2:41, 42.
Feffeita Fansoun Meinisin
4. Met popun kopwe apasa pwe ewe mwichefellin Chon Kraist loom a feffeita?
4 Atun ewe aewin senturi, ewe mwichefellin Chon Kraist a chok feffeita ren an afalafal lon minefoon fonu, foraloon chon kaeo, me lallapeloon weweochuun an Kot kewe kokkot. Ekkewe Chon Kraist loom ra feffetalapok ren ei saram lon pekin ngun mi kawor ren ekkewe taropwe mi pop seni ngunun Kot. Pokiten ar pochokkulelo ren an ekkewe aposel me ekkewe ekkoch chuuriir, ra apwonuetaochu ar angangen afalafal. Unusen ei uruwoo a fen makkeetiu lon ewe Tesin Krik.—Fofor 10:21, 22; 13:46, 47; 2 Timotiy 1:13; 4:5; Ipru 6:1-3; 2 Piter 3:17, 18.
5. Met popun an Kot mwicheich a feffeita ikenai, me met popu sipwe fetalapok ren?
5 Ussun chok ekkewe Chon Kraist loom, noun Jiowa kewe Chon Pwarata lon ei fansoun ra chokisikis me le poputaan. (Sekaraia 4:8-10) Lon ekkewe ipuku fite ier ra lo, ewe pisekin annet a ffat pwe ngunun Jiowa we a nom ren an we mwicheich. Pokiten sise fen lukuluk won an aramas pochokkul, nge won emmwenien ewe ngun mi fel, ach weweochuuti ewe Paipel me ach foffori letipen Kot a fen feffeita. (Sekaraia 4:6) Pokiten sia manau atun “ekkewe ranin le sopwoloon,” a mmen lamot ach fetalapok me an Jiowa mwicheich. (2 Timoti 3:1-5) Ach foffori ena epwe atufichi tumunuun ach apilukuluk me pwonuetaan ewe angangen pwarata ussun Muun Kot ekis meinisin won fonufan mwen taloon ei otot mi ngau.—Mattu 24:3-14.
6, 7. Ikkefa ekkewe ulungat minen feffeita lon an Jiowa mwicheich sipwe kaeo?
6 Ekkoch leich ra fen poputa le chiechi ngeni an Jiowa mwicheich wone, fiik, are wanik ier me loom. Loom, loom, io leir a tongeni anchangei watteeloon me feffeitaan ei mwicheich tori ei fansoun? Ekieki mwo ekkewe mettoch mi amwarar ra fen kuna lon uruwoon noun Kot kewe! Sipwe feioch lon pekin ngun ika sia ekiekisefalli met Jiowa a fen apwonueta ren noun kewe aramas mi kokkotolo lon eu kokkot mi theocratic.
7 A chung letipen Tafit lupwen a ekieki ussun angangen Jiowa kewe mi amwarar. A apasa: “Are upwe pwarata o aporausa usun foforum kewe, repwe chommong seni minne aramas ra tongeni alleani.” (Kol Fel 40:5) Sia ussun chok Tafit pokiten sise tongeni esile an Jiowa kewe foffor mi amwarar meinisin lon ach we fansoun. Iwe nge, sipwe ekieki ifa ussun an Jiowa we mwicheich a fen feffeita ren ulungat mettoch: (1) feffeitaan ewe saram lon pekin ngun, (2)ochuloon me watteeloon ewe angangen afalafal, me (3)ekkewe siwil mi fich lon kokkotun ewe mwicheich.
Kilisou Fan Iten Ewe Saram Lon Pekin Ngun
8. Me ren An Salomon Fos 4:18, ewe saram lon pekin ngun a fen atufichi ach miritiiti met ussun ewe Muu?
8 Lupwen sia ekieki ifa ussun Kot a fen akkasaramakich lon pekin ngun, a fokkun pwung minne a mak lon ewe puken An Salomon Fos 4:18: “Ewe al ekewe chon pwung ra fetal won a usun chok saramen unumweeran mi chok sasaramala tori a unusen ranila.” Sia fokkun kilisou ren feffeitaan ewe saram lon pekin ngun sia fen kuna! Ekkewe afalafal atun ewe mwichelap a fis lon Cedar Point, Ohio lon 1919, ra menlapei ewe Muun Kot. Ena Muu ewe mettoch Jiowa a aea ren an epwe epinalo itan me apwungalo pwungun an nemenem. Ewe saram lon pekin ngun a fen atufichi ach miritiiti pwe, seni Kenesis tori Pwarata, ewe Paipel a pwarata letipen Jiowa le epinalo itan ren angangen ewe Muu noun we a nemeni. Ina apilukulukun aramas meinisin mi tongei pwung.—Mattu 12:18, 21.
9, 10. Met sia fen kaeo lefilen 1920 me 1930 ussun ewe Muu me ussun ekkewe ruu mwicheich mi u fengen, me ifa ussun ei silei a fen alisikich?
9 Atun ewe mwichelap lon Cedar Point lon 1922, ewe chon afalafal, J. F. Rutherford, a pesei aramas le “esilei, esilei, esilei, ewe King me muun we.” Ewe lesen lon Ewe Leenien Mas minen March, 1925, itelapan “Poputaan Eu Muu,” a poraus ussun ekkoch minefoon weween ekkewe oesini mi weneiti fisitaan Muun Kot lon 1914. Ina ewe fansoun a pwal pwalo porausen ekkewe ruu mwicheich mi ufengen, an Jiowa me an Setan. Ewe fiu a fiffis lefiler, me sipwe peni ewe pekin mi wiin ika sipwe fetalapok me an Jiowa we mwicheich.
10 Ifa ussun ei saram lon pekin ngun a fen alisikich? Pokiten Muun Kot me ewe King, Jises Kraist, resap seni fonufan, sise tongeni pache ngeni. Lupwen sia imulo seni fonufan, sia pwarata pwe sia pekini pekin ewe enlet. (Jon 17:16; 18:37) Lupwen sia kuna ekkewe osukosuk lon ei otot mi ngau, sia kilisou pwe sise fiti an Setan mwicheich! A ifa me watteen ach feioch pokiten ewe menemenoch lon pekin ngun lon an Jiowa mwicheich!
11. Ifa ewe it seni Paipel noun Kot kewe aramas ra etiwa lon 1931?
11 Atun ewe 1931 Columbus, Ohio, mwichelap, a ffatolo weweochun Aisea 43:10-12. Ekkewe Chon Kaeo Paipel ra etiwa ewe it Chon Pwarata Jiowa. A ifa me watteen wiisach mi auchea le pwarata iten Kot ngeni aramas me atufichi ar kokkori itan me kuna ar amanau!—Kol Fel 83:18; Rom 10:13.
12. Menni saram lon pekin ngun ussun ewe mwich mi lapalap a pwalo lon 1935?
12 Mwen 1930, chommong lein ekkewe Chon Pwarata Jiowa ra osukosuk lupwen ra ekieki ussun ar apilukuluk ngeni mwach kkan. Ekkoch mi ekiekin manau lon lang ra fokkun ekiekifichi ekkewe afalafal lon ewe Paipel ussun eu paratis won fonufan. Eu poraus mi amwarar a katowu atun ewe 1935 Washington, D.C. mwichelap. Ewe poraus a weneiti ewe mwich mi lapalap lon Pwarata sopwun 7, me a awewe pwe ena mwich mi lapalap epwe fonueni ewe fonufan. Seni ena fansoun a lallapelo chok chochoon ekkewe aramas lon ena mwich. Sia pwapwa pwe porausen ena mwich mi lapalap ese chuen monomonelo senikich? Ach kukkuna chommongoloon ewe mwich mi lapalap ren aramas seni muu, einang, me kapas meinisin, a apochokkula ach mochen le feffetal pok me an Jiowa mwicheich.
13. Ifa ewe kapas eis mi lamot ewe 1941 mwichelap lon St. Louis a menlapei?
13 Ewe 1941 St. Louis, Missouri mwichelap, a menlapei ewe kapas eis mi lamot seni meinisin: Nemenemen lang me fonufan. Ina ewe kapas eis epwe muttir polu, me ewe ran mi aniuokkus lupwen epwe polu a muttirito. Pwal eu kapas eis mi lamot a fen awewe won lon 1941 a weneiti tuppwol. Piitaan ena kapas eis a atufichi ach pwarata filiach ussun an Kot nemenem.
14. Met sia fen kaeo ussun ekkewe samol lon Aisea 32:1, 2 atun ewe mwichelap a fis lon 1950?
14 Atun ewe New York City mwichelap lon 1950, sia tuchichin esissinata ekkewe samol lon Aisea 32:1, 2. A chung letipen aramas lupwen pwiich we Frederick Franz a apasa pwe ekkoch lein ekkewe samolun ewe fonufan sefo ra pwal fiti ewe mwichelap. Atun ena mwichelap me ekkewe mwichelap mwirin, ewe saram lon pekin ngun a tittinoch. (Kol Fel 97:11) Sia kilisou pwe ach we aal a “sasaramelo tori a unusen ranila”!
Feffeita Lon Ach Angangen Afalafal
15, 16. (a) Ifa ussun sia fen feffeita lon ach angangen afalafal lefilen 1920 me 1940? (b) Ikkefa ekkewe puk ra fen alisata ewe angangen afalafal lon ei fansoun?
15 Ewe oruuen mettoch an Jiowa mwicheich a feffeita lon, ach angangen afalafala ewe Muu me foraloon chon kaeo. (Mattu 28:19, 20; Mark 13:10) Pwe ei angang epwe fisoch, ewe mwicheich a akkachema ngenikich ewe lamoten ach awatteelo ach angangen afalafal. Lon 1922, pwiich kewe ra rong ewe pesepes pwe ir meinisin repwe fiti ewe angangen afalafal. Meinisin ra wiisen asarama ewe saram me pwisin fitalong ewe angangen pwarata ussun ewe enlet. (Mattu 5:14-16) Lon 1927, Raninfel a fen filita ewe ranin afalafal. Seni February, 1940, pwiich kewe ra poputa le anounou Ewe Leenien Mas me Consolation (iei itan Awake!) ngeni aramas won aal lon ekkewe leenien business.
16 Lon 1937 a katowu ewe kukkun puk itan Model Study. Ena puk a menlapei ewe lamoten ach sipwe chuurisefalli aramas me aiti ngeniir ewe enlet lon Paipel. Lon ekkewe ier mwirin, a lapelo ewe lamoten ach kaeo ngeni aramas. A fen pochokkulelo ei kinikinin ewe angangen afalafal lupwen ewe puk “Let God Be True” a katowu lon 1946 me Ewe Enlet a emmwenikich ngeni Manau Esemuch lon 1968. Iei sia nounou ewe puk Knowledge That Leads to Everlasting Life. Kaeo lon ena sokkun puk a awora eu longolongun sile seni Paipel mi lukuchar fan iten foraloon chon kaeo.
Feffeita Ren Siwil Lon Kokkotun Ewe Mwicheich
17. Me ren Aisea 60:17, ifa ussun an Jiowa we mwicheich a fen feffeita?
17 Ewe aulungatin mettoch an Jiowa mwicheich a feffeita lon a weneiti ekkewe siwil lon kokkotun ewe mwicheich. Me ren Aisea 60:17, Jiowa a pwonei: “Iwe, ami piras upwe siwili ngeni kolt, nge ami macha ngeni silifer. Ami mwuch upwe siwili ngeni piras, nge ami fau ngeni macha. Upwe seikata kinamwe pwe epwe samolunikemi, nge pwung epwe nemenikemi.” Ina popun, pwiich kewe ra sotun le amurinoolo ifa ussun repwe emmweniochu ewe angang me mammasaochu ewe pwin siip.
18, 19. Ikkefa ekkewe siwil ngeni kokkotun ewe mwicheich ra fel amurinnoolo ewe mwicheich?
18 Lon 1919 emon service director a kefilita lon eu me eu mwichefel a mochen kokkotochulo fan iten afalafal. Ei minefoon kokkot a fokkun alisata ewe angangen afalafal. Mwirin 1932, pwiich kewe rese chuen utut won io leir epwe wiisen elter me deacon. Ese chuen wor eu kokkot mi democratic lon ekkewe mwichefel. Pwal eu mettoch mi lamot a fiffis lon 1938 lupwen kefilitaan ekkewe chon angang meinisin lon ekkewe mwichefel a fis me ren eu kokkot a ekis kan ngeni kokkotun ar kefilita lon ewe mwichefellin Chon Kraist loom. (Fofor 14:23; 1 Timoti 4:14) Lon 1972, elter me ministerial servant ra kefilita le angang lon ewe mwichefel ussun chok ekkewe mwaal ra kefilita me loom. Ese chuen wor emon chok elter. Alon Filipai 1:1 me pwal ekkoch wokisin ra affata pwe chokkewe mi fich ngeni lapalapen elter repwe wiliiti eu mwichen elter.—Fofor 20:28; Efisus 4:11, 12.
19 Lon 1975 mei wor eu minefoon kokkot fan iten ewe Mwichen Sou Pwungupwung. Ra kokkotolo lon ekkoch kumi ren ar repwe emmweniochu angangen an Jiowa we mwicheich won unusen fonufan. Mei pwal wor kumi lon eu me eu Branch Ofes fan iten emmweniochun ewe angang lon leenier kewe. Tori iei, ra chuen kukkutta ifa ussun epwe tongeni fis amurinooloon ewe angang lon ewe ofesin lap me lon ekkewe branch ofes an ewe Watchtower Society fan iten ‘tumunuun ekkewe mettoch mi lamot seni.’ (Filipai 1:9, 10, New World Translation) Wiisen noun Kraist kewe chon masen siip a weneiti emmweniochun ewe angangen afalafal, asukula ewe mwichefel, me mammasaochun noun Kot pwin siip.—1 Timoti 4:16; Ipru 13:7, 17; 1 Piter 5:2, 3.
An Jises Emmwen
20. Ika sipwe feffetalapok me an Jiowa mwicheich, a lamot ach esinna met ussun wiisen Jises?
20 Ika sipwe fetalapok me an Jiowa mwicheich, a lamot ach esinna ewe wiis Kot a fen awiisa ngeni Jises, wiisen “mokuren ewe mwichefel.” (Efisus 5:22, 23) A pwal lamot minne a makketiu lon Aisea 55:4: “Nengeni, ua awisa pwe epwe souemwen me samolun mwu kana, epwe pwarata ngeni aramasen fanufan ai manaman.” Jises a silefichi ifa ussun epwe emmweni aramas. A pwal silei noun siip me ar kewe foffor. Lupwen a chosani ekkewe fisu mwichefal lon Esia, fan limu a fen apasa: “Ua sinei om kewe fofor.” (Pwarata 2:2, 19; 3:1, 8, 15) Jises a pwal silei ach kewe osupwang, ussun chok Seman we, Jiowa a sileer. Mwen Jises a fen awewe ifa ussun aramas repwe iotek, a apasa: “Sememi a sinei ami osupwang mwen ami tingor ren.”—Mattu 6:8-13.
21. Ifa ussun an Jises emmwen a pwalo lon ewe mwichefel?
21 Ifa ussun an Jises emmwen a pwalo? A pwalo ren ekkewe elter Chon Kraist, ekkewe “liffang.” (Efisus 4:8) Pwarata 1:16 a apasa pwe ekkewe elter ra nom lon poumwanin Jises, fan an nemenem. Ikenai, Jises a emmweni ewe kokkot fan iten ekkewe elter, ese lifilifil ika ra ekiekin feita lang are nonnom won fonufan. Ussun chok a fen awewe won lon ewe lesen mwen ei, ekkewe elter ra kefilita ren ngun mi fel me ren ekkewe alluk lon ewe Paipel. (1 Timoti 3:1-7; Taitos 1:5-9) Lon ewe aewin senturi, eu mwichen mwan mi asimau lon Jerusalem a fen angang ussun chok eu mwichen chon pwungupwung mi wiisen emmweni ekkewe mwichefel me ewe angangen afalafala ewe Muu. Ina ewe kokkot lon an Jiowa we mwicheich ikenai.
Feffetalapok!
22. Menni alillis a kawor ren ewe Mwichen Sou Pwungupwung?
22 Emon “chon angang mi tuppwol o tipatchem” a wiisen tumunu pisekin ewe Muu won fonufan. Ewe Mwichen Sou Pwungupwung an Chon Pwarata Jiowa a tupuni ena chon angang. (Mattu 24:45-47) Ewe Mwichen Sou Pwungupwung a akkom ekiekin awora fon me emmwen lon pekin ngun ngeni ekkewe mwichefel. (Fofor 6:1-6) Lupwen chienach chon luku ra feiengau, ewe Mwichen Sou Pwungupwung epwe tingor pwe eu society epwe awora alillis are forisefalli imw me Kingdom Hall mi tattakkis. Ika ekkoch Chon Kraist ra riaffou mwaal, repwe sotun le apochokkuleereta lon pekin ngun. Me lon “fansoun ese fich,” ra achocho le alisata ewe angangen afalafal.—2 Timoti 4:1, 2.
23, 24. Ese lifilifil ewe osukosuk a tori noun kewe aramas, met Jiowa a kan awora, me ifa ewe mettoch sipwe apposa letipach ngeni?
23 Ese lifilifil menni osukosuk epwe tori noun kewe aramas, Jiowa a akkawora mongo lon pekin ngun me emmwen mi lamot. Kot a pwal awora mirit me weweoch ngeni pwiich kewe mei wor wiiser fan iten feffeitaan me amurinnooloon kokkotun ewe mwicheich mi theocratic. (Tuteronomi 34:9; Efisus 1:16, 17) Fansoun meinisin Jiowa a awora minne sia osupwang ren ach sipwe apwonueta wiisach le foralo chon kaeo me ach angangen afalafal won unusen fonufan.—2 Timoti 4:5.
24 Sia lukulukoch pwe Jiowa esap likitalo noun kewe aramas mi tuppwol; epwe amanaueer seni ewe “riaffou mi lapalap” mi feffeito. (Pwarata 7:9-14; Kol Fel 94:14; 2 Piter 2:9) Mei wor popun sipwe akkamwochu ewe lukulukoch a nom rech akkom, tori ewe sopwoloon. (Ipru 3:14) Amwo sipwe apposa letipach le feffetalapok ren an Jiowa we mwicheich.
Ifa Ussun Kopwe Polueni?
• Met popun sipwe tongeni apasa pwe an Jiowa mwicheich a chok feffeita?
• Ifa ewe pisekin annet pwe weweochun poraus lon Paipel a feffeita fan iten noun Kot kewe aramas pokiten ewe saram lon pekin ngun?
• Ifa ussun ewe angangen afalafal a fen murinnolo?
• Ikkefa ekkewe siwil mi fich lon kokkotun ewe mwicheich?
[Picture on page 13]
Ussun chok Tafit, sise tongeni alleani angangen Jiowa mi amwarar meinisin
[Picture on page 14]
Noun Kot pwin siip a fen feioch seni ekkewe siwil lon kokkotun ewe mwicheich