Saram Seni Kot A Amoielo Rochopwak!
“En Jiowa ka awili ai rochopwak ngeni saram.”—2 SAMUEL 22:29, New World Translation.
“KOT a apasa: ‘Epwe saram.’ Iwe, a saramala.” (Keneses 1:3) Ren ekkena kapas, porausen ewe angangen forata mettoch lon Keneses a esissinata pwe Jiowa, i popunlapen ewe saram, nge ika ese wor saram, esap tufich an epwe wor manau won fonufan. Jiowa, i pwal popunlapen ewe saram lon pekin ngun, ewe a lamot pwe epwe emmwenikich won alen manauach. (Kol Fel 43:3) King Tafit a pwarata ewe riri lefilen ewe saram lon pekin ngun me manau lupwen a makkei: “Pun ewe puachen manau a nonnom reom; ren om saram am aua kuna saram.”—Kol Fel 36:9.
2 Orun 1,000 ier mwirin fansoun Tafit we, ewe aposel Paul a kapas ussun porausen ewe angangen forata mettoch meinisin. Ren an mak ngeni ewe mwichefelin Chon Kraist lon Korint, a apasa: “Pun Kot, ewe mi apasa: ‘Saram epwe tin lon rochopwak.’ ” Mwirin, Paul a pwarata pwe saram lon pekin ngun a riri ngeni sile seni Jiowa lupwen a sopweilo le apasa: “A pwal atina lon letipach, pwe epwe ngenikich ewe saramen sileilap ussun ewe lingen Kot seni won-mesen Kraist.” (2 Korint 4:6) Ifa ussun ei saram epwe torikich?
Ewe Paipel—Ewe Minen Atina Saram
3 Jiowa a akkaeuin awora saram lon pekin ngun ren an we Kapas, ewe Paipel. Iwe, lupwen sipwe kaeo Paipel me angei sile seni Kot, sipwe mut ngeni an we saram an epwe tineitikich. Ren ewe Paipel, Jiowa a atina saram ussun an kkewe kokkot me erenikich ifa ussun sipwe tongeni fori letipan. Ei mettoch epwe awora ngenikich popun manauach me alisikich le apwonueta minne a lamot ngenikich lon pekin luku. (Eklesiastis 12:1; Mattu 5:3) Jises a apochokkula lamoten ach sipwe pwakini ach kkewe osupwang lon pekin ngun lupwen a aloni alon ewe Allukun Moses, iwe, a apasa: “A makketiu, ‘Aramas resap manau ren pilaua chok, pwe ren iteiten kapas meinisin mi tou seni auen Kot.’ ”—Mattu 4:4; Tuteronomi 8:3.
4 Jises a riri ngeni ewe saram lon pekin ngun. Iwe, a era pwe pwisin i “saramen fonufan”, iwe, a apasa: “Are emon epwe feito mwiri, esap mo fetal lon rochopwak, pun epwe wor ewe saramen manau ren.” (Jon 8:12) Alon kkeei a alisikich le weweiti lamoten wisen Jises le esilei ngeni aramas an Jiowa we enlet. Ika sipwe tufichin tumunukich seni rochopwak me feffetal lon an Kot we saram, epwe lamot ach sipwe auseling ngeni meinisin minne Jises a apasa me tapweilo mwirin an we leenien appiru me minne a aiti ngenikich lon ewe Paipel.
5 Fitu ran mwen an we malo, Jises a pwal era pwe pwisin i ewe saram, iwe, a ereni noun kkewe chon kaeo: “Ewe saram epwe chok nonnom remi ekis fansoun. Oupwe chok fetal fansoun ewe saram a nom remi, pwe rochopwak ete torikemi. Ewe mi fefetal lon rochopwak ese sinei ia a feilo ie. Fansoun ewe saram a nom remi, oupwe luku ewe saram, pwe oupwe noun saram.” (Jon 12:35, 36) Ekkewe mi wiliti noun saram ra kaeo an ewe Paipel “kapas murinno.” (2 Timoti 1:13, 14) Iwe mwirin, ra nounou ekkeei kapas mi murinno pwe repwe luki pwal ekkoch aramas mi letipwenechar seni lon rochopwak ngeni an Kot we saram.
6 Ewe aposel Jon a makkei: “Kot mi saram, o ese fakkun wor rochopwak ren.” (1 Jon 1:5) Iwe, nengeni sokkofesenin saram me rochopwak. Ewe saram lon pekin ngun a popu seni Jiowa, me rochopwak lon pekin ngun ese mwo tongeni riri ngeni. Iwe, rochopwak a popu seni io?
Rochopwak Lon Pekin Ngun—Popunlapan
7 Ewe aposel Paul a kapas ussun “ewe koten fonufan.” Ren ekkena kapas, a wewe ngeni Setan ewe Tefil. Iwe, a pwal apasa pwe emonewe “a fen achunalo letipen ekkewe chon lukulukumang, pwe resap chuen tongeni kuna saramen ewe kapas allim usun ewe lingen Kraist, atewe mi lapalapeni lapalapen Kot.” (2 Korint 4:4) Chommong ra apasa pwe ra luku Kot; iwe nge, a chommongelo ir kkewe rese luku woren ewe Tefil. Pwata? Rese mochen luku pwe eu manaman mi ngau epwe tongeni etipetipa ekiekir. Iwe nge, ussun Paul a pwarata, mei wesewesen wor ewe Tefil, iwe, a etipetipa aramas pwe resap tongeni kuna saramen ewe enlet. An Satan tufichin arikalo ekiekin aramas a pwalo lon ewe kapasen oesini pwe i “ewe mi otupu fonufan meinisin.” (Pwarata 12:9) Pokiten an Satan kkewe foffor, ekkewe lapalap Aisea a oesini ussun a weneiti aramas meinisin iei, chilon chok ir kkewe mi angang ngeni Jiowa, a era: “Pun nengeni, rochopwak epwe pwoluela fanufan, nge kiroch epwe tori chon ekkewe mwu.”—Aisea 60:2.
8 Lon kiroch, ese tufich ach sipwe kuna och mettoch. Epwe mecheres an emon epwe mwaalilo lon an feffetal. Iwe, a pwal ina ussun ir kkewe mi nom lon rochopwak lon pekin ngun, iwe, repwe wewengau me rikirikfetal lon pekin ngun. Epwe tongeni pout senir ar tufichin esinna lefilen minne mi enlet me minne mi chofona, minne mi pwung me minne mi mwaal. Ewe soufos Aisea a kapas ussun ekkewe mi nonnom lon rochopwak lupwen a makkei: “Feiengau ngeni ekkewe mi apasa pwe minne a murinno a ngau me minne a ngau a murinno. Ekkewe mi awili rochopwak ngeni saram, nge saram ngeni rochopwak, pwal ekkewe mi awili ngeni arar minne a maras, nge ngeni maras minne a arar!” (Aisea 5:20, NW.) Pokiten ekkewe mi nonnom lon rochopwak lon pekin ngun ra nonnom fan etipetipaen ewe koten rochopwak, Setan ewe Tefil, repwe kaimu seni popunlapen ewe saram me manau.—Efisus 4:17-19.
Seni Rochopwak ngeni Saram—Ese Mecheres
9 Emon chon tuppwol itan Jop a kapas ussun ewe popun ekkewe mi ngau ra sani ewe kiroch lupwen a apasa: “Ewe chon lisowu a witiwit tori an epwe pwinila. Iwe, a pwoluela mesan pwe esap wor emon epwe silleni.” (Hiop 24:15) Ekkewe chon foffor-mwaal ra pwal nom lon rochopwak lon pekin ngun, iwe, epwe tufich ena sokkun rochopwak epwe watte an manaman wor. Ewe aposel Paul a apasa pwe fofforun lisoumwaal, fofforun sola, mocheisou, lalingau, me mochenia ra choufetal lein ir kkewe mi nonnom lon ena rochopwak. Nge ekkewe mi kuna saramen an Kot we Kapas repwe tongeni siwil. Paul a affata pwe a tufich ena sokkun siwil lon noun we taropwe ngeni ekkewe chon Korint. Chommong Chon Kraist lon Korint ra pin foffori fofforun rochopwak, nge Paul a ereniir: “Nge iei oua fen limochulo, o oua fen apinipinilo, oua fen kuna pung fan iten ach Samol Jises Kraist, o ren Ngunun ach Kot.”—1 Korint 6:9-11.
10 Lupwen emon epwe tou seni rochopwak ngeni saram, ese mwaal epwe lamot och fansoun pwe mesan kkewe repwe eoreni ttinochun ewe saram. Lon Petsaita, Jises a achikarata emon mwan mi mesechun nge fan kirikiroch, a fori ena mettoch ekis me ekis. “Iwe, a angei poun atewe mi chun, o a emmwenalo i lukun ewe telinim. A attufalong lon mesan kewe, o a iseta poun kewe won. Iwe, a eisini, ‘Ka tongeni kuna och mettoch?’ Atewe a neta, o a apasa, ‘Ua kuna aramas, nge ua nengenir ra usun chok ira mi fefetal.’ Iwe, a pwal iseta poun kewe won mesan, o atewe a newenewenelo, o a murinnosefal. Iwe, a fat an kuna mettoch meinisin.” (Mark 8:23-25) Pwungun pwe Jises a amurinnosefalilo mesan kkewe ekis me ekis pwe emonewe epwe tongeni eoreni ttinochun saramen ewe akkar. Anchangei mwo pwapwaan ena mwan lupwen a tongeni kunasefal.
11 Iwe nge, pwapwaan ena mwan epwe kis seni pwapwaan ir kkewe mi kuna allilis pwe repwe tou, ekis me ekis, seni ewe rochopwak lon pekin ngun ngeni saramen enlet. Lupwen sipwe kuna ar pwapwa, eni sipwe ekieki ika pwata pwal ekkoch rese etiwa ewe saram. Jises a ngenikich ewe popun, a era: “O iei ewe apung, pwe ewe saram a fen feito ngeni fonufan, nge aramas ra tongei rochopwak lap seni saram, pun ar fofor mi chok ingau. Pun iteiten aramas meinisin mi fori minne mi ingau a chok oput saram, o ese feito ren saram, pwe an kewe fofor rete pwalo.” (Jon 3:19, 20) Ewer, chommong ra fokkun tipeni ar repwe foffori “ekkewe mettoch mi ngau”—ussun lisoumwaal, nemenemengau won aramas, kapas chofona, fofforun michimich, kapas chofona—iwe, repwe tongeni foffori minne ra mochen lon an Setan rochopwak lon pekin ngun.
Feffeita lon ewe Saram
12 Pokiten sia fen sileilo ewe saram, ikkefa ekkewe siwil sia fen kuna lon pwisin manauach? Fan ekkoch epwe murinno ach sipwe nesekuriiti ach feffeita. Ikkefa ekkewe foffor-mwaal sia fen poutalo senikich? Ikkefa ekkewe osukosuk lon manauach sia fen pwakini? Ifa ussun ach ekiek ussun mwach kkan a siwil? Ren ewe pochokkul seni Jiowa me alillisin an we ngun mi fel, sipwe tongeni amurinnolo lapalapen manauach me ach ekiek pwe epwe pwarata pwe sia mwokutukut fan ewe saram. (Efisus 4:23, 24) Paul a apasa: “Pun lom ami oua rochopwak, nge iei ami oua fen saramelo lon ewe Samol. Iwe, oupwe fefetal usun chok aramasen saram, pun sia kuna uwan saram lon mettoch meinisin mi murinno, o mi pung, o mi enlet.” (Efisus 5:8, 9) Ach sipwe mut ngeni an Jiowa we saram an epwe emmwenikich epwe ngenikich eu apilukuluk allim me popun manauach me pwal apwapwai ekkewe ekkoch. Iwe, lupwen sipwe amurinnolo manauach, epwe apwapwai letipen Jiowa!—An Salomon Fos 27:11.
13 Sipwe pwarata ach kilisou ren lapeloon pwapwaan manauach ren ach sipwe atittina an Jiowa we saram—sipwe fos ngeni chon ach famili, chienach kkewe, me chon oruch kkewe ussun minne sia fen kaeo seni ewe Paipel. (Mattu 5:12-16; 24:14) Ren ir kkewe rese mochen auseling, ach angangen afalafal fengen me ach manaueni manauen Chon Kraist epwe apwungur. Paul a awewei: “O ami oupwe achocho le kaeo minne ewe Samol epwe pwapwa ren. Ousap pwal chuen chiechi ngeni ekkewe foforun rochopwak rese tongeni uwa, nge a murinno oupwe apungur.” (Efisus 5:10, 11) Epwe lamot ach sipwe pwora pwe sipwe tongeni alisi ekkewe ekkoch pwe repwe likitalo ewe rochopwak me etiwa ewe saram. Lap seni ena, epwe lamot ach sipwe pwarata tong ngeni ekkewe ekkoch me ach fokkun mochen pwarata ngeniir saramen ewe enlet pwe repwe kuna feioch tori feilfeilo chok.—Mattu 28:19, 20.
Tumunuk Seni ewe Saram mi Chofona!
14 Ir kkewe mi nom le matau lon kiroch repwe pwapwa le kuna och saram. Lon Enland lom, aramas ra pin keni mettoch won ekkewe achau pwe ewe ekkei epwe pwarata ia ekkewe sip repwe tongeni salong me opalo seni ekkewe molumol ie. Ekkewe salo ra kilisou ren ewe saram mi emmwenir ngeni ekkewe leenien tumun. Iwe nge, ekkoch ekkei ra chok chofona. Chon ekkewe sein matau rese kuna eu oror, nge chommong sip ra talo won ekkewe achau, ikkewe ekkewe chon sola mi otupur ra solani pisekir kkewe ie. Lon ei fonufan mi otupotup, epwe lamot ach sipwe tumunukich seni ekkewe saram mi chofona mi tongeni lukikich ngeni taloon ach luku. Paipel a erenikich: “Setan a pwisin awilielo lapalapan ussun emon ekkewe chonlang saram.” A pwal ussun chok noun Satan kkewe chon angang, pachelong ekkewe chon rikilo, ir chon angang mi otupotup mi “pwal awilielo lapalaper usun chok chon angang mi pung.” Ika sipwe etiwa ar kkewe ekiek chofona, epwe tongeni apwangapwangelo ach luku an Jiowa we Kapasen enlet, ewe Paipel, me epwe tongeni malo ach luku.—2 Korint 11:13-15; 1 Timoti 1:19.
15 Ewe sou makkei Kol Fel a makkei: “Om kapas a wewe ngeni eu lamp ren pechei, o pwal saramen ai al.” (Kol Fel 119:105) Ewer, ewe ‘al mi chokukkun mi alelo ngeni manau’ a ttinoch me ren ach Kot mi tong, Jiowa, emonewe mi “mochen pwe aramas meinisin repwe kuna amanauen ngunur o sineifichi minne mi enlet.” (Mattu 7:14; 1 Timoti 2:4) Ach akkapwonueta an ewe Paipel kkewe kapasen emmwen epwe tumunukich seni ach sipwe rikilo seni ewe al mi chokukkun me feffetal won ewe alen rochopwak. Paul a makkei: “Ekkewe puk meinisin ra pop seni Ngunun Kot, ra pwal lamot ngeni afalafal, ngeni fonou, ngeni amurinnolo, o pwal ngeni angangochun ewe manau mi pung.” (2 Timoti 3:16) Atun sipwe feffeita lon pekin luku, an Kot we Kapas epwe asukulakich. Ren saramen an Kot we Kapas, sipwe tongeni pwisin apwungukich, are, ika epwe lamot, sipwe tongeni kuna kapwung me ren ekkewe chon masen siip mi tong lon ewe mwichefel. Iwe, kich mi pwal tongeni awenechara manauach me ren tipetekison, etiwa ewe angangen kapwung lon pwung pwe sipwe feffetal won ewe alen manau.
Sipwe Kilisou le Feffetal Lon ewe Saram
16 Ifa ussun sipwe tongeni pwarata ach kilisou ren an Jiowa we saram mi amwarar? Jon sopwun 9 a erenikich pwe lupwen Jises a achikarata emon mwan mi mesechun seni uputiuan, ena mwan a pwarata an kilisou. Ifa ussun? A eani lukuluk pwe Jises, i Noun Kot we me pwarata pwe Jises, i “emon soufos.” Pwal eu, fan pwora a appolua ngeni ekkewe mi esiita an Jises we manaman. (Jon 9:17, 30-34) Ewe aposel Piter a eita ngeni chon ewe mwichefelin Chon Kraist mi kepit pwe ir “eu einang mi filita.” Pwata? Pun ra eani ewe ngunun kilisou ussun chok ewe mwan mi mesechun seni uputiuan mi kunasefal. Ra pwarata ar kilisou ngeni Jiowa, ewe Chon Alillis ngeniir, ren ar ‘arongafeili poraus usun ekkewe manaman i mi [korir] seni lon rochopwak ngeni an we saram mi amwarar.’ (1 Piter 2:9; Kolose 1:13) Ekkewe mi eani ewe apilukulukun manau won fonufan ra pwal eani ewe ngunun kilisou me alisi pwir kkewe mi kepit lon ewe angangen arongafeili an Jiowa we “manaman.” A ifa me watten ena wis mi fokkun auchea seni meinisin Kot a awisa ngeni aramas mi rese unusoch!
17 A fokkun lamot ach sipwe meefi kilisou seni letipach ren ewe saramen enlet. Chechemeni pwe sise silei ewe enlet seni le uputiuach. Ekkoch ra kaeo atun ra fen ier watte, me ra muttir kuna ochun ewe saram lap seni ewe rochopwak. Pwal ekkoch ra feioch pun semer kkewe me iner ra niuokkusiti Kot. Ren chokkewe, eni epwe mecheres ar resap kon lien alamota ewe saram. Me mwen an a uputiu emon fopwul, seman kkewe me inan ra fen angang ngeni Jiowa, iwe, ewe fopwul a era pwe a ekis watte ewe fansoun me an achocho pwe epwe weweiti unusen aucheaan me lamoten ekkewe enlet a fen kaeo seni le kukkunun. (2 Timoti 3:15) Ese lifilifil ika kich mi kukkun are chinlap, nge a lamot ngeni emon me emon leich ach sipwe amarata ach kilisou chapur ren ewe enlet Jiowa a pwarata ngenikich.
18 Emon aluwan itan Timoti a kaeo “ekkewe taropwe mi fel” seni le kukkunun, nge a tori asimau lon pekin Chon Kraist ren chok an achocho lon an we angangen afalafal. (2 Timoti 3:15) A ina ussun an a eani ewe tufichin alisi ewe aposel Paul, ewe mi pesei i: “Kopwe achocho ngeni om kopwe achengicheng me ren Kot, usun chok emon chon angang esap saueiti och mettoch, emon mi forfichi lon an anganga ewe kapas mi enlet.” Amwo oukich meinisin, ussun chok Timoti, sipwe tumunukich seni ach fori minne sipwe sau ren—are minne Jiowa epwe saueitikich ren!—2 Timoti 2:15.
19 Mei wor chommong popun ach sipwe mwareiti Jiowa, ewe mi ngenikich saramen an we enlet. Ussun chok King Tafit, sipwe apasa: “En ai lamp, O Jiowa, iwe, en Jiowa, ka awili ai rochopwak ngeni saram.” (2 Samuel 22:29) Iwe nge, a lamot ach sisap chippwang, pun epwe tongeni emmwen ngeni ach sipwe liwiniiti ewe rochopwak, ewe sia fen ngaselo seni. Ina minne, ewe lesen mwirin ei epwe alisikich le ekieki ussun ukukun watten ach alamota ewe enlet seni Kot lon manauach.
Met Ka Fen Kaeo?
• Ifa ussun Jiowa a awora saram lon pekin ngun?
• Ifa ewe sossot mi weires sipwe kuna seni ewe rochopwak lon pekin ngun mi pwellifeilikich?
• Ikkefa ekkewe minen efeiengau sipwe tumunukich seni?
• Ifa ussun sipwe tongeni pwarata ach kilisou fan iten ewe saramen enlet?
[Study Questions]
1. Ifa ussun saram a riri ngeni manau?
2. Ussun Paul a pwarata, saram a ririfengen me met?
3. Ren ewe Paipel, ifa ewe saram Jiowa a awora?
4. Ifa ussun Jises i “saramen fonufan”?
5. Ifa wisen noun Jises kkewe chon kaeo mwirin an malo?
6. Ifa ewe enlet ussun saram me rochopwak sipwe kuna lon 1 Jon 1:5?
7. Ewe rochopwak lon pekin ngun a popu seni io, me ifa an tufichin etipetipa aramas?
8. Ifa ussun ekkewe mi nom lon rochopwak lon pekin ngun ra pwarata pwe a osukosuk ar ekiek?
9. Awewei mwo pwata ekkewe chon fofforingau ra sani rochopwak lon kapas wesewesen me pwal lon kapas monomon.
10, 11. (a) Ifa ussun Jises a pwarata an tong ngeni ewe mwan mi mesechun a achikarata? (b) Pwata chommong rese filata ewe saram?
12. Ifa ussun sia fen kuna feioch seni ach etiwa ewe saram?
13. Ifa ussun sipwe tongeni pwarata ach kilisou ngeni an Jiowa we saram, me met epwe lamot ren ach sipwe aleni ena al?
14. Ren porausen ewe saram, ifa ewe kapasen ourour sipwe auseling ngeni?
15. Met epwe alisikich pwe sipwe feffetal won ewe al mi alelo ngeni manau?
16. Ifa ussun sipwe tongeni pwarata ach kilisou ngeni an Jiowa we liffangen saram mi amwarar?
17, 18. (a) Ifa wisen iteiten aramas meinisin? (b) Ren ach sipwe appiru Timoti, ifa ewe mettoch iteiten Chon Kraist meinisin repwe tumunur seni?
19. (a) Ussun chok Tafit, mei wor popun ach sipwe apasa met? (b) Ifa ewe poraus sipwe kaeo lon ewe lesen mwirin ei?
[Picture on page 20]
Jiowa i popunlapen saram lon pekin inis me pwal lon pekin ngun
[Picture on page 22]
Ussun Jises a achikarata emon mwan mi mesechun ekis me ekis, iwe, epwe pwal alisikich pwe sipwe tou seni rochopwak lon pekin ngun
[Picture on page 23]
An aramas tupulo ren an Setan kkewe saram mi chofona a efisata taloon luku