Porausen Ekkewe Chon Afalafala Ewe Muu

“Ua Mochen Angang Ngeni Kot”

“AMI nei aramas, oupwe tou seni neminewe.” Ina met emon chonlang a eani kokko ewe aposel Jon a rongorong lon ewe aewin senturi C.E. Ikenai fite milion aramas mi letip wenechar ra fen lefareni ewe poraus me ra towu seni “Papilon Mi Lapalap,” ewe nemenemen lamalam chofona won unusen fonufan. (Pwarata 18:​1-4) Emon me leiin ekkeei aramas itan Wilner seni Haiti a pwisin aporausa porausan.

“Ua uputiu lon ewe ier 1956 lon eu famili mi achocho lon ewe lamalamen Katolik lon eu kukkun sopw St. Marc, Haiti. Ekieki epwe ian me pwapwaan ai famili lupwen ra fen filieita me pwal kewe ruuemon seni sopwum we ren am aupwe fiti ewe sukulen Patere lon St. Michel de l’Atalaye, Haiti. Mwirin, lon 1980, ra tiinikemilo ngeni Stavelot, Belgium, pwe am aupwe pwal sukul. Ikena ie, am aua pwal fiti eu Katolik university.

“Me le poputaan ua fokkun mochen wiliiti emon patere. Nge eu ran me lon am we leenien mongo, ewe patere a wiisen emmweni am we kumi a tingor pwe upwe ekis witiwit pokiten a mochen fos ngeniei. Ua fokkun ruko lupwen a ereniei pwe a saaniei! Use etiwa nge ua poputa le letipechou. Ua mak ngeni ai famili ussun met a fis me ua su seni ewe sukulen patere fite maram mwirin inaamwo ika rese pwapwa ren met ua fori. Ua kuna eu leeniei lon eu sopw me ua poputa le kaeo ngeni pwal eu angang.

“Lupwen ua liwinlo St. Marc, ese chuen wor ai lukuluk won ewe lamalamen Katolik. Ua mochen angang ngeni Kot, nge use silei met upwe fori. Ua feilo ngeni ewe Ebenezer Haitian Baptist Church, me ewe imwen felin Mormon. Ua pappaselo lon pekin ngun.

“Mwirin ua chechchemeni pwe lupwen ua fiti ewe sukulen patere lon Belgium, ua fen alleani ewe Crampon Paipel. Lon ena Paipel ua alleani pwe mei wor iten Kot. Ina popun ua nounou itan we lon ai iotek ngeni Kot pwe epwe alisiei ren ai upwe kuna ewe lamalam mi enlet.

“Ekisilo mwirin, ruuemon Chon Pwarata Jiowa ra mwokut ngeni sopwi we. Ra mosonoson, ra pwarata sufol, me ra tipetekison. Ua ingeiti lapalapen manauer. Eu ran, emon me leiin ekkewe ruuemon Chon Pwarata, a etiwaei le fiti ewe Achechchemenien Maloon Jises. Ua fokkun pwapwaesini ewe mwich me ua etiwa ekkewe Chon Pwarata ar repwe kaeo ngeniei. Mwirin orun wonu maram, ua fen luku pwe ua kuna ifa ussun upwe angang ngeni Kot ren ewe lapalap mi pwung. Ua fangolo manauei ngeni Jiowa me ua papatais lon November 20, 1988.”

Feil, feil, Wilner a angang ngeni Kot full-time. Ikenai, a wiiseni ewe wiis elter lon ewe mwichefel. I me puluan we, kapachelong nour kewe ruuemon, ra angang ren pwapwa lon ewe mwichefel.

[Picture on page 19]

Ren an Wilner alleani ewe Paipel a kuna pwe iten Kot Jiowa