“Epwe Arap Ngenikemi”

“[Kot] ese touau seni emon me emon leich.”​—FOFOR 17:27.

1, 2. (a) Lupwen sia neta lang mi tepetep fuu, ifa ewe kapas eis sipwe eis ussun ewe Chon Forata? (b) Ifa ussun ewe Paipel a alukulukukich pwe aramas rese lamot kisikis mwen mesen Kot?

KOSE fen ingelo lupwen ka neta lang lepwin ren tepetepen fuu? Sia ingeiti chommongun ekkewe fuu me watteen ewe lang. Lon unusulapen ei lang mi fokkun watte, nge ewe fonufan a ussun chok eu ttik. Weween pwe ewe Chon Forata, “ewe Mi Fakkun Tekia won fonufan meinisin,” a kon tekia ren an epwe tongeni ekieki ussun aramas pwe rese tongeni silei i pokiten a kon towau me monomonolo seniir?​—Kol Fel 83:18.

² Ewe Paipel a alukulukukich pwe aramas rese lamot kisikis mwen mesen Kot. Ren enletin, an Kot we Kapas a peseikich le kukkutta i ren an apasa: “Ese touau seni emon me emon leich.” (Fofor 17:27; 1 Kronika 28:9) Pwungun pwe ika sipwe sotun arap ngeni Kot, epwe alisikich. Ifa ussun? Ekkewe kapas lon ewe lesenin ier fan iten 2003 a polueni: “Epwe arap ngenikemi.” (Jemes 4:8) Sipwe poraus ussun ekkoch ekkewe feioch mi amwarar Jiowa a ngeni chokkewe mi arap ngeni.

Eu Liffang Seni Jiowa

³ Aewin, mei wor eu liffang Jiowa a ngeni noun kewe chon angang chok. An ei fonufan manaman, wou, me sukul meinisin rese tongeni ngenikich ei liffang. A wesewesen eu liffang Jiowa a ngeni chok aramas mi arap ngeni i. Met ena? An Kot we Kapas a polueni: “Ewer . . . tungor ngeni pwe kopwe weweoch ren. Kopwe kutta tipatchem usun om kutta silifer, ika usun om kutta pisek auchea mi monomon. Are kopwe fori iei usun, murin kopwe weweiti auchean om niuokusiti ewe Samol mi Lapalap o fefeita lon om silei Kot. Pun ewe Samol mi Lapalap a fangala tipachem.” (An Salomon Fos 2:​3-6) Ekieki mwo ifa ussun aramas mi apwangapwang mi tongeni “silei Kot”! Ena liffang​—ewe sile lon an Kot we Kapas​—a ussun chok “pisek auchea mi monomon.” Met popun?

⁴ Iwe, ewe sile ussun Kot a watte lamotan. Eu me lein an kewe feioch mi murinno seni meinisin ina ewe apilukulukun manau esemuch. (Jon 17:3) Nge pwal mwo nge ikenai ena sile a efeiochu manauach. Ren chok awewe, pokiten ach kaeofichi an Kot we Kapas, sia fen kuna poluen ekkeei kapas eis mi lamot: Ifa iten Kot? (Kol Fel 83:18) Ifa enletin lapalapen ekkewe mi malo? (An Salomon Afalafal 9:​5, 10) Ifa an Kot kokkot fan iten fonufan me aramas? (Aisea 45:18) Pwal och, sia fen kaeo pwe ach apwonueta alon ewe emmwen mi murinno seni ewe Paipel epwe atoto ewe sokkun manau mi murinno seni meinisin. (Aisea 30:20, 21; 48:17, 18) Iwe, a nonnom rech emmwen mi murinno mi alisata ach pwakini ekkewe osukosuken manauach me ach feffetal won ewe alen pwapwa mi enlet me menemenoch. Lap seni meinisin, ach kaeo an Kot we Kapas a atufichi ach silei lapalapen Jiowa kewe mi amwarar me a atufichi ach arap ngeni i. Ese pwal wor och mettoch mi auchea seni ach ririoch me Jiowa pokiten sia “silei Kot”.

⁵ Mei pwal wor eu popun ewe sile ussun Kot a ussun chok “pisek auchea mi monomon.” Ussun chok chommong pisek mi auchea, mei chok chokisikis won ei fonufan. Seni ekkewe wonu bilion aramas won fonufan, mei wor ukuukun wonu milion som ra fel ngeni Jiowa, are orun 1 seni iteiten 1,000, ra “silei Kot.” Pwe sipwe awewei ifa ukuukun watteen feiochun emon mi silei ewe enlet lon an Kot we Kapas, ekieki mwo eu kapas eis chok seni ewe Paipel: Met a fis ngeni aramas lupwen ra malo? Sia silei seni Paipel pwe ewe soul a tongeni malo me ekkewe mi malo rese silei och mettoch. (Isikiel 18:4) Nge, lape-ngeni lamalam meinisin won fonufan ra eani ewe luku mi mwaal pwe mei wor och mettoch a nonnom lon aramas nge a chuen manau mwirin emon a malo. Ina eu luku mi fokkun lamot lon ekkewe lamalamen Kirisentom. Ekkewe lamalamen Buddha, Hindu, Islam, Jain, Jus, Shinto, Sikh, me Tao ra pwal eani ei luku. Ekieki mwo​—fite bilion aramas ra tup ren ei luku mi mwaal!

⁶ Met popun ese wor pwal chommong aramas ra “silei Kot”? Pokiten emon ese tongeni unusen weweiti an Kot we Kapas ika esor an Kot alillis. Chechchemeni mwo pwe ei sile eu liffang. Jiowa a ngeni chokkewe chok mi wenechar me tipetekison lon ar kutta an we Kapas. Eli chokkeei rese “tipatchemeni tipatchemen fonufan.” (1 Korint 1:​26) Eli chommong leir “rese kaeo lon sukul, o ir aramas kisikis” me ren ekiekin aramas. (Fofor 4:​13) Nge, esor lamotan ena. Ach “silei Kot”, ina liwinich seni Jiowa pokiten ekkewe lapalap a kuna me lon letipach.

⁷ Ekieki mwo ei kapas awewe. Chommong sou kaeo lon Kirisentom ra fen makkei chommong poraus ussun ewe Paipel. Ar angang a awewei uruwoon eu poraus, weween ekkewe kapasen Ipru me Krik, me pwal chommong mettoch. Inaamwo ika ekkeei sou kaeo ra fokkun tipatchem nge ra wesewesen “silei Kot”? Iwe, mi ffat ar weweiti itelapen ewe Paipel​—ren itochuloon an Jiowa nemenem ren angangen Muun we lon lang? Ra silei pwe Jiowa Kot esap kinikinin eu Trinitas? Nge, kich mi weweiti. Ach weweiti ussun ekkeei mettoch mi enlet. Met popun? Pokiten Jiowa a fen ngenikich weweoch ussun ekkewe enlet lon pekin ngun nge a amonalo seni chommong “chon tipatchem me chon wewe.” (Mattu 11:25) Jiowa a wesewesen efeiochu chokkewe mi arap ngeni i!

“Jiowa A Chok Tutumunu    Ir Meinisin Ekkewe Mi Tongei I”

⁸ Chokkewe mi arap ngeni Jiowa ra pwal pwapwaesini eu feioch​—an we tumun. Ewe sou mak kol fel Tafit, emon a fen kuna chommong fansoun weires me osukosuk, a makkei: “Ewe SAMOL a chok arap ngeni ir meinisin ekkewe mi kokori i, ngeni ir meinisin ekkewe mi kokori i ren enlet. Epwe apwonueta minne ir ekkewe mi niuokusiti i ra mochen, epwe pwal rong ar pupuchor, o epwe amanaua ir. Ewe SAMOL a chok tutumunu ir meinisin ekkewe mi tongei i.” (Kol Fel 145:18-​20) Ewer, Jiowa a arap ngeni chokkewe mi tongei i me ina popun a tongeni muttir alisiir lupwen ra tingor an alillis.

⁹ Met popun sia osupwangen an Kot tumun? Esap chok pokiten ekkewe chon Kraist mi enlet ra meefi osukosuken ei “fansoun weires,” nge ra pwal wiliiti ewe minen annen fan iten ewe Chon Oputa Jiowa mi lapalap seni meinisin, Setan ewe Tefil. (2 Timoti 3:1) Ena chon oput mi otuputup a achocho le “oromalo” kich. (1 Piter 5:8) Setan a eriaffoukich, etipetipakich, me sotunikich. A pwal kutta ekkewe sokkun ekiek lon tupuwach me letipach a tongeni amwaalli. Mei wor eu mettoch a achocho ngeni: pwe epwe apwangapwangolo me ataielo ach luku. (Pwarata 12:12, 17) Pokiten ewe chon oputakich a fokkun pochokkul, esap iei met epwe alukulukukich pwe Jiowa “a chok tutumunu ir meinisin ekkewe mi tongei i”?

¹⁰ Iwe nge, ifa ussun Jiowa a tuttumunu noun kewe aramas? Esap pokiten an pwon pwe epwe tumunukich a wewe ngeni an esap torikich osukosuk iei; pwe a wiisen fori manaman fan itach. Nge, Jiowa a awora tumun lon pekin aion fan iten noun kewe mwichen aramas. Pwungun pwe, esap mut ngeni ewe Tefil an epwe unusen arosalo ekkewe chon fel mi enlet seni fonufan! (2 Piter 2:9) Lap seni meinisin, Jiowa a tumunukich lon pekin ngun. A atufichikich ren minne mi lamot pwe sipwe tongeni likiitu fan sossot ren ach sipwe tumunu ach chiechi ngeni i. Le muchuloon, tumun lon pekin ngun ina ewe sokkun tumun mi lamot seni meinisin. Met popun? Popun pun ika sia chiechioch me Jiowa, esor och mettoch​—esap pwal mwo nge malo​—epwe efeiengauakich feilfeilo.​—Mattu 10:28.

¹¹ Jiowa a awora chommong mettoch ren an epwe tumunu chokkewe mi arap ngeni i lon pekin ngun. Ren an we Kapas, ewe Paipel, a ngenikich tipatchem pwe sipwe sopwoch le pwakini sokkopaten sossot. (Jemes 1:​2-5) Ach apwonueta ewe fon mi murinno lon ewe Paipel a tumunukich. Pwal och, Jiowa a liffang “Ngun mi Fel ngenir mi tingorei i.” (Luk 11:13) Ena ngun ewe manaman mi pochokkul seni meinisin lon lang me fonufan, ina popun a tongeni atufichi ach pworacho ngeni ekkewe osukosuk are sossot a torikich. Ren Kraist, Jiowa a awora “aramas mi ussun chok liffang.” (Efisus 4:8) Ekkeei mwan mi lipwakoch lon pekin ngun ra achocho le appiru lapalapen an Jiowa umoumoch lupwen ra alisi chiener kewe chon luku.​—Jemes 5:​14, 15.

¹² Jiowa a awora pwal eu mettoch ren an epwe tumunukich: mongo lon pekin ngun lon ewe fansoun mi fich. (Mattu 24:45) Ren ekkewe puk, kapachelong Ewe Leenien Mas me Awake!, pwal ekkewe mwich, me mwichelap, Jiowa a awora minne sia osupwang ren lupwen a lamot ngenikich. Ka chechchemeni eu fansoun lupwen ka rongorong eu mettoch seni eu mwich are seni ewe mwichelap mi achungu letipom me apochokkulok are aururu letipom? Ka fen alleani eu lesen seni ekkewe puk are chassi a mak asan me ka meefi pwe ewe lesen a fen mak fan itom?

¹³ Letipechou eu me lein an Setan kewe pisekin maun mi kon manaman, me sipwe pwal tongeni feiengau ren. Setan a silei pwe emon a tongeni apwangapwangelo me epwe tongeni feiengau ika a letipechou ren fansoun langattam. (An Salomon Fos 24:10) Sia osupwangen alillis pokiten Setan mei fokkun sotun alamota an emon letipechou. Fan ekkoch mei wor poraus lon ekkewe chassi Leenien Mas me Awake! mi alisikich le u ngeni letipechou. Emon sister Chon Kraist a apasa ussun eu me lein ekkena poraus: “Ua alleani ewe poraus arapakan iteiten ran, nge ua chuen kechiu ren. Ina popun ua isoni unukkun ai we pet pwe upwe tongeni muttir alleani lupwen ua letipechou. Seni ekkeei poraus, ua meefi an Jiowa tumun. A ussun ita pwe a foropacheiei.”a Sia kilisou ngeni Jiowa ren an awora ngenikich mongo lon pekin ngun lon ewe fansoun mi fich? Chechchemeni mwo pwe an kewe kokkot fan iten ach pochokkul lon pekin ngun a annetata pwe a arap ngenikich me a tuttumunukich.

Ewe Aal Ngeni “Ewe Mi Auseling Iotek”

¹⁴ Ka fen kuna pwe ika a lapelo an aramas manaman me nemenem, fan chommong a weiresilo an ekkewe aramas mi nom fan nemenier ar repwe chuuriir? Iwe, ifa ussun Jiowa Kot? A kon towau senikich fan iten an epwe mochen auseling alon aramas? Aapw, esap i ina ussun! Ewe liffangen iotek ina pwal eu feioch Jiowa a ngeni chokkewe mi arap ngeni i. Ach tufichin fos ngeni “ewe mi auseling iotek” ina wesewesen eu liffang mi amwarar. (Kol Fel 65:2) Met popun?

¹⁵ Ren chok awewe: Ewe meilapen eu kompeni watte a wor chommong wiisan. I epwe filata menni angang epwe pwisin fori me menni epwe awiisa ngeni ekkoch aramas. Pwal ussun we chok, filien ewe Sou Nemenem mi tekia seni meinisin met sokkun mettoch epwe angolong lon me met epwe awiisa ngeni pwal emon. Ekieki mwo ekkewe mettoch Jiowa a fen awiisa ngeni Noun we mi achengicheng, Jises. Ewe Nau “epwe wisen kapwung.” (Jon 5:​27) Ekkewe chonlang “ra alleasochisi i.” (1 Piter 3:​22) Jiowa a ngeni Jises an we ngun mi fel mi manaman pwe epwe alisi i le emmweni noun kewe chon kaeo won fonufan. (Jon 15:26; 16:7) Ina popun Jises a tongeni apasa: “Nemenem meinisin lon lang o pwal won fonufan a fen ngeniei.” (Mattu 28:18) Nge, Jiowa a pwisin mochen auseling ngeni ach kewe iotek. Ina ewe popun ewe Paipel a emmwenikich le iotek ngeni Jiowa chok, fan iten Jises.​—Kol Fel 69:13; Jon 14:​6, 13.

¹⁶ Jiowa a wesewesen auseling ngeni ach iotek? Ika ese tongeikich are ika ese mochen auseling ngenikich, iwe, esap peseikich ach sipwe “achocho ngeni iotek” are pwe sipwe likiti ngeni osach kewe me ach kewe aurek. (Rom 12:12; Kol Fel 55:22; 1 Piter 5:7) Ekkewe chon angang mi tuppwol loom ra unusen lukuluk pwe Jiowa a auselinga iotek. (1 Jon 5:​14) Ina popun ewe soumak kol fel Tafit a apasa: “[Jiowa] epwe rong leuwei.” (Kol Fel 55:17) Sia pwal lukuluk pwe Jiowa a arap ngenikich, me a mmonleta le rongorong ach kewe ekiek me osukosuk meinisin.

Jiowa A Efeiochu Noun Kewe Chon Angang

¹⁷ Met aramas repwe fori are rese mochen fori ese kku wiisen Jiowa ussun ewe Sou Nemenemen Fonufan me Lang. Iwe nge, Jiowa emon Kot mi pwarata an pwapwaitikich. A enletin aucheani ewe angangen noun kewe aramas mi tuppwol. (Kol Fel 147:11) Iei mwo pwal eu feioch a tori chokkewe mi arap ngeni Jiowa: A efeiochu noun kewe chon angang.​—Ipru 11:6.

¹⁸ Ewe Paipel a pwarata pwe Jiowa a aucheani met noun kewe chon angang ra fori. Ren chok awewe, sia alleani: “Eman aramas mi kichioch ngeni chon woungau a fangala ngeni ewe Samol mi Lapalap, nge i epwe liwini ngeni liwinin an fofor.” (An Salomon Fos 19:17) An Jiowa umoumoch ngeni ekkewe mi woungau a pwalo lon ewe Allukun Moses. (Lifitikos 14:21; 19:15) Met meefien Jiowa lupwen sia appiru an umoumoch lon ach kewe foffor ngeni ekkewe mi woungau? Lupwen sia liffang ngeni ekkewe mi woungau, nge sise ekieki ussun liwinich, iwe, Jiowa a eani ewe ekiek pwe sia liffang ngeni I. Jiowa a pwon pwe epwe liwinikich ren an chen me feioch. (An Salomon Fos 10:22; Mattu 6:3, 4; Luk 14:12-​14) Ewer, lupwen sia pwarata umoumoch ngeni chienach chon luku mi osupwang, a achungu letipen Jiowa. A ifa me watteen ach kilisou pwe Semach lon lang a afanni ach kewe foffor mi umoumoch!​—Mattu 5:7.

¹⁹ Jiowa a akkaewin aucheani ach kewe angang fan iten Muun we. Lupwen sia arap ngeni Jiowa, sia kan mochen nounou ach fansoun, ach pochokkul, me wouch fan iten ach sipwe unusen fiti ewe angangen afalafala ewe Muu me foralo chon kaeo. (Mattu 28:19, 20) Eli fan ekkoch, sia meefi pwe ese watte uwan ach angang. Letipach epwe pwal mwo tongeni efisi ach ekieki ika Jiowa a pwapwa ren ach kewe angang. (1 Jon 3:​19, 20) Nge Jiowa a aucheani liffang meinisin​—ese lifilifil ifa ukuukun kukkun​—mi popu seni eu letip mi mwokutukut ren tong. (Mark 12:41-​44) Ewe Paipel a alukulukukich: “Kot mi pung, o esap monukalo ami angang me tong fan asengesin itan.” (Ipru 6:​10) Pwungun pwe Jiowa a chechchemeni me epwe liwini pwal mwo nge eu angang mi kisikis fan iten kalisitan Muun we. Pwal kapach ngeni ekkewe feioch watte lon pekin ngun iei, sipwe tongeni apilukulukun pwapwaesini manau lon ewe fonufan sefo epwe feito, ia Jiowa epwe suukalo poun me epwe amotalo mettoch meinisin mi arap ngeni i!​—Kol Fel 145:16; 2 Piter 3:​13.

²⁰ Lon unusen ei ier 2003, sipwe pwisin eisinikich ika sia achocho le arap ngeni Semach we lon lang. Ika ina met sia foffori, sia lukuluk pwe Kot epwe apwonueta met a fen pwonei. Pokiten “Kot mi enlet.” (Taitos 1:2) Ika ka arap ngeni, i epwe arap ngonuk. (Jemes 4:8) Me ifa muriloon? Chommong feioch iei me ach apilukulukun arap ngeni Jiowa tori feilfeilo!

[Footnotes]

Ka Chechchemeni?

• Ifa ewe liffang Jiowa a ngeni chokkewe mi arap ngeni i?

• Met sokkun alillis Jiowa a awora ngeni noun kewe aramas ren an epwe tumunuur lon pekin ngun?

• Met popun ach tufichin fos ngeni Jiowa lon iotek eu liffang mi sokkolo auchean?

• Ifa ussun ewe Paipel a pwarata pwe Jiowa a aucheani ewe angang mi tuppwol seni noun kewe aramas mi mirit?

3. Ifa ewe liffang Jiowa a ngeni chokkewe mi arap ngeni i?

4, 5. Pwata sipwe tongeni alollo ach “silei Kot” ngeni “pisek auchea mi monomon”? Awewei mwo.

6, 7. (a) Io kewe chok mi tongeni “silei Kot”? (b) Menni kapas awewe a pwaralo pwe Jiowa a fen efeiochukich ren tipatchem me a amonalo seni “chon tipatchem me chon wewe”?

8, 9. (a) Ifa ussun Tafit a awewei pwal eu feioch a tori chokkewe mi arap ngeni Jiowa? (b) Met popun tumun seni Kot a lamot ngeni ekkewe Chon Kraist mi enlet?

10. (a) Ifa ussun Jiowa a tumunu noun kewe aramas? (b) Met sokkun tumun a lamot seni meinisin, me met popun?

11. Met Jiowa a awora fan iten tumunun noun kewe aramas lon pekin ngun?

12, 13. (a) Met Jiowa a nounou ren an epwe awora ngenikich mongo lon pekin ngun lon ewe fansoun mi fich? (b) Met meefiom ussun ekkewe mettoch Jiowa a awora pwe sipwe pochokkul lon pekin ngun?

14, 15. (a) Ifa ewe feioch seni Jiowa a tori chokkewe mi arap ngeni i? (b) Met popun ach tufichin fos ngeni Jiowa ren iotek eu liffang mi fokkun murinno?

16. Met popun sia lukuluk pwe Jiowa a wesewesen auseling ngeni ach kewe iotek?

17, 18. (a) Met meefien Jiowa ussun angangen noun kewe aramas mi mirit? (b) Awewei ifa ussun An Salomon Fos 19:17 a pwarata pwe Jiowa a kuna ach kewe foffor mi umoumoch.

19. (a) Met popun sia lukuluk pwe Jiowa a aucheani met sia fori lon ewe angangen afalafal me foruloon chon kaeo? (b) Ifa ussun Jiowa a liwini ekkewe foffor mi alisata Muun we?

20. Lon unusen ewe ier 2003, ifa ussun sipwe ekkekieki ekkewe kapas lon ach lesenin ier, me met epwe uwaani?

[Pictures on page 12, 13]

Jiowa a awora tumun lon pekin ngun