“Epwe Wor Tongfengen Lefilemi”

“Epwe iei usun pwe aramas meinisin repwe silei pwe ami nei chon kaeo, are mi wor ewe tong lefilemi.”​—JON 13:35.

“NEI KEWE SEMIRIT.” (Jon 13:33) Ren ena kapas mi potete, Jises a fos ngeni noun kkewe aposel lon ewe pwinin me mwen an we malo. Ese mak lon ekkewe puken Kapas Allim pwe Jises a pin nounou ekkena kapas potete me mwan lon an fos ngeniir. Iwe nge, lon ena pwinin mi sokkolo aucheaan, fan tong a nounou ekkena kapas potete pwe epwe pwarata an tong mi alollol ngeni noun kkewe chon kaeo. Iwe, lon ena pwinin Jises a kapas ussun tong orun fan 30. Pwata a apochokkula ena lapalap?

² Jises a awewei ewe popun a lamot ewe lapalapen tong. A apasa: “Epwe iei usun pwe aramas meinisin repwe sinei pwe ami nei chon kaeo, are mi wor ewe tong lefilemi.” (Jon 13:35; 15:​12, 17) An emon epwe noun Jises chon kaeo a riri ngeni an pwapwarata tong. Ekkewe Chon Kraist mi enlet repwe pwapwalo, sap ren och sokkun uf are eoreni, nge ren ewe tong lefiler. Ar eani ei sokkun tong mi alollol, ina eu me lein ekkewe ulungat mettoch noun Kraist kkewe chon kaeo repwe eani ussun an a mak me le poputaan ewe lesen me mwan. Met epwe alisikich pwe sipwe akkamwochu mi lapalap?

“Oupwe Achocho ngeni”

³ Ussun chok an a fis lein noun Jises kkewe chon kaeo lon ewe aeuin senturi, ei sokkun tong mi auchea epwe pwapwalo lein noun Kraist kkewe chon kaeo ikenai. Ewe aposel Paul a mak ngeni ekkewe Chon Kraist lon ewe aeuin senturi: “Nge ren tongfengen, esor lamoten an emon epwe mak ngenikemi och, pun Kot a fen aiti ngenikemi pwe ami oupwe tongfengen lefilemi. Iwe, mei pung pwe a fen iei usun ami fofor ngeni pwich kena meinisin.” Iwe, Paul a pwal apasa: “Nge am aia chok pwal fonoukemi, pwii kena, pwe oupwe alapalo ami achocho ngeni.” (1 Tesalonika 3:12; 4:​9, 10, NW) A pwal lamot ngenikich ach sipwe lefareni an Paul we kapasen pesepes me “alapalo” ach achocho le pwarata tong lefilach.

⁴ Lon ena chok taropwe mi mak fan emmwenien ngunun Kot, Paul a pesei chienan kkewe chon luku pwe repwe “alapa letipen ir ekkewe mi pireir” me “alisi ir ekkewe mi apwangapwang.” (1 Tesalonika 5:14) Lon pwal eu fansoun, a achema ngeni ekkewe Chon Kraist pwe ir kkewe “mi pochokkul [repwe] mosonoson ngeni mwaalin ekkewe aramas mi apwangapwang.” (Rom 15:⁠1) Jises a pwal eani och kapasen pesepes ussun ar alisi ekkewe mi apwangapwang. Mwirin an a oesini pwe lon pwinin an ares Piter epwe su seni, Jises a ereni Piter: “Iwe, mwirin om liwinsefallito, kopwe apochokkulata pwiom kena.” Pwata? Popun, pun ra fen pwal likitalo Jises, iwe, epwe pwal lamot ngeniir ar repwe kuna alillis. (Luk 22:32; Jon 21:​15-17) Ina minne, an Kot we kapas a peseikich ach sipwe alisi ekkewe mi apwangapwang lon pekin ngun me ekkewe rese chuen fiffiti ewe mwichefelin Chon Kraist. (Ipru 12:12) Pwata sipwe fori ena mettoch? Ruu an Jises kkewe kapas monomon repwe polueni ena kapas eis.

Emon Siip me Efou Moni Silfer mi Mwalechelo

⁵ Ren an epwe aiti chokkewe mi auseling ngeni an Jiowa ekiek ussun ir kkewe mi fen mwalechelo, Jises a eani ruu kapas awewe mi mwochomwoch. Eu me leir a ussun emon chon masen siip. Jises a era: “Io leimi mwan kena, are a nouni ipuku siip, nge emon leir epwe mwalechelo, esap likitalo ekkewe tiue-me-tiuemon lon ewe fonupon o feilo kukutta ewe emon mi mwalechelo, tori fansoun an epwe kuna? O lupwen epwe kuna, epwe iseta won afaran o pwapwa. Iwe, lupwen a liwinto lon imwan, epwe korifengenni chienan kkewe, o pwal chon orun kewe, o epwe erenir, ‘Oupwe etiei le pwapwa, pun ua fen kuna nei we siip mi mwalechelo.’ Iei usun, upwe apasa ngenikemi, pwe epwe pwal wor pwapwa won lang pokiten an emon chon tipis aier, lap seni ekkewe tiue-me-tiuemon chon pung rese aier.”​—Luk 15:​4-7.

⁶ Ewe oruuen poraus awewe a ussun emon fefin. Jises a era: “Are pwal io fefin mi wor noun engol moni silfer, nge efou a mwalechelo, esap appulata lamp o purumuni imwan we o kutta fichi, tori fansoun an epwe kuna? O lupwen an kuna, epwe korifengenni chienan kewe, o pwal chon orun kewe, o epwe apasa, ‘Oupwe etiei le pwapwa, pun ua fen kuna ewe moni mi mwalechelo.’ Iei ussun, upwe apasa ngenikemi, pwe pwapwa epwe fis fan mesen ekkewe chonlangin Kot ren emon chon tipis mi aier.”​—Luk 15:​8-​10.

⁷ Met sipwe tongeni kaeo seni ekkeei poraus awewe mi mwochomwoch? Ra aiti ngenikich (1) ifa ussun sipwe meefi ussun ir kkewe mi apwangapwangelo me (2) met sipwe fori le alisir. Iwe, sipwele afanni ekkeei poraus.

Ra Mwalechelo nge mi Chuen Auchea

⁸ Och mettoch a mwalechelo lon ir me ruu poraus awewe, nge nengeni meefien chokewe minne nour. Ewe chon masen siip ese era: “Met lamoten emon chok siip pun mei chuen wor nei kkewe 99? Ese lamot ngeniei ewe emon chok siip.’ Ewe fefin ese apasa: ‘Pwata upwe osukosuk ussun ena efou moni silifer? Ngang ua chok menemenoch ren ekkewe tiuefou mi chuen nom rei.’ Iwe nge, ewe chon masen siip a chok kukkutta noun we siip mi mwalechelo ussun ita nge ina noun we alaemon. Iwe, ewe fefin a meefi poutuloon noun we moni ussun ita ngeni esor noun pwal ekkoch foun moni. Lon ir me ruu kapas monomon, ewe mettoch mi mwalechelo mi chuen auchea lon ekiekin ewe emon minne noun. Met ena poraus a pwarata?

⁹ Nengeni ekiekin Jises ussun ekkena ruu poraus awewe: “Epwe pwal wor pwapwa won lang pokiten an emon chon tipis aier, me “pwapwa epwe fis fan mesen ekkewe chonlangin Kot ren emon chon tipis mi aier.” Ina minne, meefien ewe chon masen siip me ewe fefin ra ekis pwarata meefien Jiowa me forian kkewe chonlang. Ussun chok minne a poutulo a chuen auchea lon ekiekin ewe chon masen siip me ewe fefin, epwe pwal ussun chok ir kkewe mi mwalechelo me rese chuen fiffiti noun Kot kkewe aramas ra chuen auchea mwen mesen Jiowa. (Jeremaia 31:3) Eni chokena ra apwangapwang lon pekin ngun, nge sap minne pwe ra wesewesen lukumach. Inaamwo ika ir mi apwangapwang, nge ra chuen apwonueta an Jiowa kkewe alluk. (Kol Fel 119:176; Fofor 15:29) Ina popun, ussun an a pin fori lon fansoun lom, Jiowa a mmang le “atouauerela seni fan mesan.”​—2 King 13:23.

¹⁰ Ussun chok Jiowa me Jises, kich mi pwal lolileniesini chokewe mi apwangapwang me rese chuen nonnom lon ewe mwichefelin chon Kraist. (Isikiel 34:16; Luk 19:10) Sia meefi pwe emon mi apwangapwang lon pekin ngun a ussun chok emon siip mi mwalechelo nge esap i emon mi poutfochelo. Sisap ekieki: ‘Pwata sipwe osukosuk ussun emon mi apwangapwang? Ewe mwichefel a murinno, iwe, ese positi.’ Iwe nge, ussun Jiowa, sia meefi pwe mi auchea ir kkewe mi mwalechelo nge ra mochen liwinsefal.

¹¹ Iwe nge, ifa ussun sipwe pwari ach lolileniesinir? An Jises kkewe ruu kapas monomon ra pwarata pwe kich mi tongeni fori ena ren ach sipwe (1) akkom mwokutukut, (2) pwarata kirokiroch me mosonoson, me (3) tinikken. Sipwe nengeni eu me eu ekkeei ulungat mettoch.

Akkom Mwokutukut

¹² Lon ewe aeuin poraus awewe, Jises a era pwe ewe chon masen siip epwe “feilo kutta ewe mi mwalechelo.” Ewe chon masen siip a pwisin mwokutukut akkom le feilo kukkutta ewe siip mi mwalechelo. Weires, feiengau, me touauen an fetal esap eppeti. Iwe nge, ewe chon masen siip a likiitu “tori fansoun an kuna.”​—Luk 15:4.

¹³ Pwal ussun chok, fan chommong, emon mi pochokkul lon pekin luku epwe wisen akkom mwokutukut fan iten an epwe alisi emon mi apwangapwang. Ekkewe chon luku lom ra weweiti ena mettoch. Awewe chok, lupwen Jonatan, noun King Saul we, a silei pwe a lamot ngeni chienan we mi achengicheng Tafit an epwe kuna pochokkulen letipan, Jonatan a “feila ren Tafit lon Hores o apochokula lelukan lon an luku Kot.” (1 Samuel 23:15, 16) Fitepuku ier mwirin, lupwen ewe kepina Nehemaia a kuna pwe ekkoch pwiin kkewe chon Jus ra letipechou, i a pwal “muttir fos” iwe, a peseiir pwe repwe ‘chechemeni Jiowa.’ (Nehemaia 4:14) Ikenai, kich mi pwal mochen ‘muttir fos’-​—weween, pwisin mwokutukut​—pwe sipwe apochokkulata ir kkewe mi apwangapwang. Nge io kkewe lon ewe mwichefel repwe wisen fori ena?

¹⁴ Akkaeuin, epwe wisen ekkewe chon Kraist elter ar repwe “apochokula pau kana mi apwangapwang o anukuchara pwasuk kana mi chechech” me “apasa ngeni chokewe mi niuokus lon letiper, ‘Oupwe pworacho, nge ousap niuokus.’ ” (Aisea 35:​3, 4; 1 Piter 5:​1, 2) Iwe nge, nengeni pwe Paul ese chok fonou ekkewe elter ar repwe “alapa letipen ir ekkewe mi pireir” me “alisi ir ekkewe mi apwangapwang.” Nge, alon Paul kkewe ra weneiti unusen “ewe mwichefelin Tesalonika.” (1 Tesalonika 1:1; 5:​14) Ina minne, epwe wisen chon Kraist meinisin ach sipwe akkawora alillis ngeni ekkewe mi apwangapwang. Ussun chok ewe chon masen siip lon ewe kapas monomon, emon me emon chon Kraist epwe “feilo kukutta ewe emon mi mwalechelo.” Pwungun pwe epwe sopwoch ena foffor ika epwe fis fan emmwenien ekkewe elter. En mi tongeni fori och fan iten om kopwe alisi emon mi apwangapwang lon ewe mwichefel?

Oupwe Kirokiroch

¹⁵ Met ewe chon masen siip a fori lupwen a kuna ewe siip mi mwalechelo? “A uwei won afaran kkewe.” (Luk 15:5) Met ren minne ena poraus mi titchik a pwarata! Eni ewe siip a fetalfeil fitu ran, fitu pwin won ewe leeni ese silei, me eni ekkoch laion ra fen chechei. (Hiop 38:​39, 40) Ese mwaal ewe siip a apwangapwangelo ren nafangauen mongo. A kon lien apwangapwang pwe esap naf pwisin an pochokkul an epwe pworacho ngeni ekkewe minen feiengau epwe kuna lon an liwinsefalliti ewe pwin siip. Ina popun, ewe chon mas a pworotiu, ren kirokiroch, a ekieta ewe siip, me uwei ngeni ewe pwin siip fan ekkewe minen eppet meinisin. Ifa ussun sipwe appiru an ewe chon masen siip we tong?

¹⁶ Eni emon mi fen mwalechelo seni ewe mwichefel epwe pekkus lon pekin ngun. Ussun chok emon siip mi imu seni ewe chon masen siip, eni emonewe a rikirikfetal lon fonuen ei fonufan mi efeiengau. Pokiten ese chuen kuna tumun seni ewe tittin siip, ewe mwichefelin chon Kraist, epwe tongeni kuna feiengau seni ewe Tefil, ewe “a fefeilfetal ussun chok emon laion mi orior, a kutta emon pwe epwe oromalo.” (1 Piter 5:8) Pwal eu, a apwangapwang pun esor mongoon ngun. Ina minne, ese tongeni pwisin pwakini ekkewe minen eppet epwe kuna lon an sotun liwiniti ewe mwichefel. Ina minne, lon kapas monomon, sipwe pworetiu, ekieta ewe mi apwangapwang ren kirokiroch, me uwei. (Kalesia 6:2) Ifa ussun sipwe fori ena?

¹⁷ Ewe aposel Paul a era: “Io mi apwangapwang, nge ngang usap pwal apwangapwang?” (2 Korint 11:29, The New English Bible; 1 Korint 9:​22) Paul a tongeni meefi meefien aramas, pachelong ekkewe mi apwangapwang. Kich mi pwal mochen meefi meefien ekkewe mi apwangapwang. Lupwen sipwe chuuri emon chon Kraist mi apwangapwang lon pekin ngun, sipwe alukuluku ngeni pwe i mi achengicheng mwen mesen Jiowa, iwe, chienan kkewe Chon Pwarata ra fokkun positi. (1 Tesalonika 2:​17) Repwe esilei ngeni pwe ra mochen apochokkula, iwe, ra ussun chok “pwiich. . . pwe epwe alisikich lon fansoun riaffou.” (Proverbs 17:17; Kol Fel 34:18) Ach pwari ngeni meefien letipach ren kirokiroch epwe tongeni apochokkula tori an epwe tufichin liwiniti ewe pwiin siip. Met sipwe fori mwirin? Ewe kapas monomon ussun ewe fefin me ewe moni mi poutulo epwe aiti ngenikich.

Sipwe Tinikken

¹⁸ Ewe fefin mi pout seni noun we foun moni a silei pwe epwe weires nge epwe tongeni kunasefalli. Ika a pout seni ewe foun moni lon eu masies are lon eu noom mi alollol, eni epwe chok ekieki pwe esap tufich an epwe chuen kunasefalli. Iwe nge, pokiten a silei pwe ewe foun moni a chok nonnom lon imwan we me a tongeni kuna, iwe, epwe tinikken le kukkutta. (Luk 15:8) Akkom, a keni eu lamp pwe epwe asarama imwan we mi kiroch. Iwe, a pirumuni imwan we me a aneanei pwe epwe rongorong kararen ewe foun moni. Iwe, saigoon, a kukkutta lon iteiten leeni meinisin tori fansoun epwe kuna ttinesichin ewe moni fan saramen ewe lamp. A feioch an ewe fefin tinikken le angang weires!

¹⁹ Ussun ei kinikinin ewe kapas monomon a achema ngenikich, ewe Paipel a awisa ngenikich ach sipwe alisi ekkewe chon Kraist mi apwangapwang, iwe, esap kon weires nge mei tufich. Enlet, ewe aposel Paul a ereni ekkewe elter lon Efisus: “Ami oupwe fokkun angang weires o alisi ir ekkewe mi apwangapwang.” (Fofor 20:35a) Chechemeni pwe ewe fefin ese kuna ewe foun moni ren an a chok nennefetal lon ekkoch chok leeni lon imwan we, are fan ekkoch chok. Aap, nge a sopwoch pun a kokkotoch an kukkutta “tori fansoun an epwe kuna.” (Luk 15:⁠8) Pwal ussun chok, lupwen sipwe achocho le alisata emon mi apwangapwang lon pekin ngun, epwe lamot ach sipwe tinikken me kokkotoch. Met sipwe tongeni fori?

²⁰ Ifa ussun sipwe tongeni alisi emon mi apwangapwang an epwe apochokkulata an luku me kilisou? Epwe och an epwe kaeo Paipel ren alillisin eu puken awewei Paipel. Enlet, ach kakkaeo ngeni emon mi apwangapwang epwe atufichi ach sipwe alisi lon eu lapalap mi kokkotoch me unus. Ina epwe ewe service overseer epwe silei io epwe tongeni awora alillisoch ngeni. Epwe tongeni awora an memmeef ren menni itelap are puk epwe tongeni kaeo. Ussun chok ewe fefin lon ewe kapas monomon a aea ekkoch pisekin angang ren an epwe fori an angang, pwal ussun chok ikenai, mei wor ekkoch pisekin angang sipwe tongeni nounou le apwonueta wisach me ren Kot ach sipwe alisata ekkewe mi apwangapwang. Ruu me lein ekkewe minefoon minen alillis are puk ra murinno. Ekkena puk ra iteni Worship the Only True God me Draw Close to Jehovah.a

²¹ Ach alisi ekkewe mi apwangapwang repwe atoto feioch ngeni meinisin. Ewe emon mi angei alillis epwe kuna pwapwa seni an epwe chiechisefal ngeni chienan kkewe mi enlet. Kich sipwe kuna ewe sokkun pwapwa lon lelukach mi chok popu seni liffang. (Luk 15:​6, 9; Fofor 20:35b) Unusen ewe mwichefel epwe mammaroch lon tipeeufengen atun emon me emon epwe pwarata tong. Iwe, lap seni meinisin, sipwe asamolu nouch kkewe Chon Masen Siip mi tong, Jiowa me Jises, atun kich noun kkewe chon angang won fonufan sipwe appiru ar mochen apochokkula ekkewe mi apwangapwang. (Kol Fel 72:12-​14; Mattu 11:28-​30; 1 Korint 11:1; Efisus 5:1) Iwe, mei wor popun murinno ach sipwe sopweilo le ‘tongfengen lefilach’!

[Footnotes]

En mi Tongeni Awewei?

• Pwata a lamot ngenikich meinisin ach sipwe pwapwarata tong?

• Pwata sipwe pwarata tong ngeni ekkewe mi apwangapwang?

• Ikkefa ekkewe lesen sipwe kaeo seni ekkewe kapas awewe ussun ewe siip me efou senis mi mwalechelo?

• Met sipwe tongeni fori pwe sipwe alisi emon mi apwangapwang?

[Study Questions]

1. Jises a apochokkula menni lapalap mwen an we a malo?

2. Pwata a lamot ngeni Chon Kraist ar repwe pwapwarata tong?

3. Ifa ewe kapasen pesepes ussun tong a katou seni ewe aposel Paul?

4. Me ren Paul me Jises, io kkewe sipwe ekkekieki ussun?

5, 6. (a) Ikkefa ekkewe ruu poraus awewe mi mwochomwoch Jises a eani? (b) Met ekkeei ruu poraus awewe ra pwarata ussun Jiowa?

7. Ikkefa ekkewe ruu lesen sipwe kaeo seni ekkewe poraus awewe ussun ewe siip me ewe efou senis mi mwalechelo?

8. (a) Met meefien ewe chon mas me ewe fefin ussun minne a pout seniir? (b) Met meefier ussun minne a pout seniir a pwarata ngenikich?

9. Met a pwapwalo ren meefien ewe chon mas me ewe fefin?

10, 11. (a) Epwe met meefiach ussun ekkewe mi ukkutiu seni ar fiffiti ewe mwichefel? (b) Me ren an Jises kkewe ruu poraus awewe, ifa ussun sipwe tongeni pwarata ach tong ngenir?

12. Ifa ekkewe kapas “feilo kutta ewe mi mwalechelo” a aiti ngenikich ussun ekiekin ewe chon mas?

13. Ifa ussun ekkewe mwan mi tuppwol lom lom ra alisi ekkewe mi apwangapwang, iwe, ifa ussun sipwe tongeni appiru ekkena leenien appiru seni Paipel?

14. Io kkewe lon ewe mwichefelin Chon Kraist repwe wisen alisi ekkewe mi apwangapwang?

15. Eni met a amwokutu ewe chon mas pwe epwe fori minne a fori?

16. Pwata sia pwal mochen pwarata ewe sokkun kirokiroch ewe chon mas a pwarata ngeni ewe siip mi mwalechelo?

17. Epwe ifa ussun sipwe tongeni appiru ewe aposel Paul lupwen sipwe alisi emon mi apwangapwang?

18. (a) Pwata ewe fefin lon ewe poraus awewe ese apilukulukungau? (b) A fet ewe fefin mi pwarata an achocho, iwe ifa mwirinoon?

19. Ikkefa ekkewe lesen ussun ach sipwe alisi ekkewe mi apwangapwang sipwe tongeni kaeo seni fofforun ewe fefin lon ewe poraus awewe ussun ewe efou senis mi mwanechelo?

20. Met sipwe fori fan iten ach sipwe alisi ekkewe mi apwangapwang?

21. Ifa ussun ach alisi ekkewe mi apwangapwang epwe atoto feioch ngeni meinisin?

[Pictures on page 14, 15]

Lon ach alisi ekkewe mi apwangapwang, sipwe pwisin mwokutukut me sipwe kirokiroch me tonger

[Picture on page 14, 15]

Ach alisi ekkewe mi apwangapwang epwe atoto feioch ngeni meinisin