A Ifa Ukuukun Om Aucheani Ewe Faafen Ach Samol?
“Are emon epwe aea ewe pilawa are un seni kapen ewe Samol, nge ese fich ngeni, iwe, epwe tipis ngeni inisin me chchaan ewe Samol.”—1 KORINT 11:27, NW.
1. Ifa ewe mettoch mi lamot seni meinisin a kkotota ren ewe ier 2003, me inet a keran aewin poputa?
EWE mettoch mi lamot seni mettoch meinisin mi kkotota ren ewe ier 2003 epwe fis mwirin tuputiuen ewe akkar lon April 16. Lon ena ran Chon Pwarata Jiowa repwe mwichfengen pwe repwe fori Achechchemenien maloon Jises Kraist. Ussun sia fen kuna lon ewe lesen mwen ei, Jises a poputani ena mwich mi auchea, nge a pwal iteni ewe Faafen Ach Samol, mwirin ir me noun kewe aposel ra fori achechchemenien ewe Pasofer lon Nisan 14, 33 C.E. Ewe pilawa ese lefen me ewe wain mi par lon ewe Achechchem ra liosueta inisin Kraist we esor tipisin, me chchaan we mi niniilo—nge ina ewe eu chok asor mi tufichin angasalo aramas seni tipis me malo.—Rom 5:12; 6:23.
2 Chokewe mi aea ewe pilawa me wain lon ewe Achechchem repwe aea fan sufol. Ewe aposel Paul a affata ena lupwen a mak ngeni chon Kraist lon Korint lom lom, ikewe ese pwung lapalapen ar fori ewe Faafen Ach Samol ie. (1 Korint 11:20-22) Iei makkeien Paul: “Are emon epwe aea ewe pilawa are un seni kapen ewe Samol, nge ese fich ngeni, iwe, epwe tipis ngeni inisin me chchaan ewe Samol.” (1 Korint 11:27, NW) Ifa lamoten ekkena kapas?
Ekkoch Rese Pwarata Sufol
3 Ese fichiiti chommong chon Kraist lon Korint ar repwe angei ekkewe minen lios lon ewe Achechchem. A wor kinikinfesen leir, iwe, ren och fansoun, ekkoch ra uwei aner mongoon le faaf, nge ra mongo mwen are atun ewe mwich, me fan chommong a kon watte ar mongo me un. A topotop ar ekiek me rese tufichin miritiiti mettoch lon pekin ngun. Ina popun, ra “tipis ngeni inisin me chchaan ewe Samol.” Chokewe rese uwei aner ra echik, iwe, a orukoruk ar ekiek. Ewer, chommong ra aea ewe pilawa me wain nge esor ar sufol me rese unusen miritiiti lamoten ewe mwich. Ina ewe popun ra atoto apwung ngeni pwisin ir!—1 Korint 11:27-34.
4 Fansoun an epwe arapoto ewe Achechchem iteiten ier, a mmen lamot ewe mettoch atittin ren ir kewe mi kan akkangei ekkewe minen lios. Ren an epwe fichiitiir ar repwe kapachelong lon ena fansoun mongofengen, repwe pochokkul lon pekin ngun. Emon mi pwarata sufolungau, are pwal mwo nge esiit, ren an Jises we asor epwe tongeni ‘pokuelo me lein noun Kot kewe aramas,’ ussun chok an emon chon Israel fiti eu fansoun mongofengen, iwe nge, esap limoch manauan.—Lifitikos 7:20; Ipru 10:28-31.
5 Paul a alollofengenni ewe Achechchem me eu kkotun mongofengen lon Israel lom lom. A apasa pwe chon aea ewe pilawa me wain ra eu fengen me Kraist, iwe mwirin, a apasa pwe “Ousap tongeni unupok seni kapen Jiowa me kapen ekkewe timon; ousap pwal tongeni mongopok seni ‘chepelin Jiowa’ me chepelin ekkewe timon.” (1 Korint 10:16-21, NW) Ika emon mi kan akkangei ekkewe minen lios lon ewe Achechchem epwe fori och tipis watte, epwe pwari ngeni Jiowa an we tipis me pwal kutta alillis lon pekin ngun seni ekkewe mwan mi asimau lon ewe mwichefel. (An Salomon Fos 28:13; Jemes 5:13-16) Ika epwe enletin aier me uwaani ekkewe sokkun uwa mi fichiiti aier, sap minne esap fichiiti an epwe angei ekkewe minen lios.—Luk 3:8.
Chon Fiti mi Wiisen Katol fan Sufol
6 Ekkewe mi foffor murinno iei ngeni lusun pwiin Kraist kewe, lusun ekkewe 144,000, repwe ita aea minen ewe Faafen Ach Samol? (Mattu 25:31-40; Pwarata 14:1) Aapw. Kot a fen aimulo ena mettoch mi auchea ren ir kewe a fen epiti ngeniir ngun mi fel pwe repwe “chienen Kraist kewe chon alemwir.” (Rom 8:14-18, NW; 1 Jon 2:20) Iwe, ifa wiisen ir mi eani ewe apilukulukun ar repwe manau tori feilfeilo chok lon eu paratis won unusen fonufan fan nemenien ewe Muu? (Luk 23:43; Pwarata 21:3, 4) Pokiten esap ir chienen Jises kewe chon alemwir mi eani ewe apilukulukun ar repwe manau lon lang, ra kan fiti ewe Achechchem pwe repwe wiisen chon katol mi pwarata sufol.—Rom 6:3-5.
7 Chon Kraist mi enlet lon ewe aewin senturi ra kepit ren ngun mi fel. Chommong leir ra tufichin aea eu are lap seni eu me lein ekkewe liffang mi manaman, liffangen ewe ngun, awewe chok ren ar eani fos mi sokkofesen. Ina popun, esap weires ngeni chokana ar repwe silei pwe ir mi kepit ren ewe ngun, iwe, repwe wiisen aea ekkewe minen lios lon ewe Achechchem. Iwe nge, lon ach ei fansoun, ena mettoch epwe ffatolo ren ekkeei sokkun kapas mi fel: “Ir meinisin mi nom fan emmwenien an Kot we ngun, ikkeei ir noun Kot. Pun ami ouse angei ewe ngunun kichiniwel mi atotosefalli niuokkus, nge oua angei eu ngunun mumu pwe oupwe noun, iwe, ren ena ngun sia koko: ‘Abba, Semach!’ ”—Rom 8:14, 15, NW.
8 Lon ekkewe fitepuku ier ra lo, wesewesen chon kepit ra mammaarita ussun chok “wit” lon eu atakeen “petewelingau,” are chon Kraist mi chofona. (Mattu 13:24-30, 36-43) Mwirin 1870, ewe “wit” a pwapwalo, me fitu ier mwirin, ei kapas a katowu ngeni chon Kraist mi kepit, ir mi wiisen chon mas: “Ekkewe elter . . . repwe affata ngeni ir mi mwichfengen [fan iten ewe Achechchem] ekkeei lapalap,—(1) lukuluk won chchaan [Kraist]; me (2) fangeloon unusen manauer fan iten ewe Samol me an angang, tori pwal mwo nge malo. Iwe mwirin, repwe etiwa ir meinisin mi eani ekkena ruu lapalap pwe repwe fiti achechchemenien maloon ewe Samol.”—Studies in the Scriptures, Series VI, The New Creation, page 473.a
Angangen Kukutta “Pwal Fitemon Siip”
9 Mwirin och fansoun, an Jiowa we mwicheich a poputa le ekiekifichi pwal fitemon lukun noun Kraist kewe chon kaeo mi kepit. Eu mettoch mi lamot fan iten ena a fis lon 1935 feffeilo. Mwen ena ier, noun Kot kewe aramas ra ekieki pwe ewe “mwich mi lapalap” lon Pwarata 7:9 a wewe ngeni eu oruuen mwich lon pekin ngun epwe nom lon lang ren ekkewe 144,000 chon kepit mi manausefallita—weween, repwe chienen ewe fin apupulu, puluwen Kraist we. (Kol Fel 45:14, 15; Pwarata 7:4; 21:2, 9) Nge lon May 31, 1935, eu afalafal lon eu mwichelapen Chon Pwarata Jiowa lon Washington, D.C., U.S.A., a awewei seni Paipel pwe ewe “mwich mi lapalap” a wewe ngeni ekkewe “pwal fitemon siip” mi manau lon ewe fansoun sopwoloon. (Jon 10:16) Mwirin ena mwichelap, ekkoch me lein ir mi akkangei ekkewe minen lios lon ewe Achechchem mesemwan rese chuen angei pun ra miritiiti pwe ra eani ewe apilukulukun ar repwe nonnom won fonufan, nge esap lang.
10 Akkaewin seni 1935 a poputa ewe angangen kukutta chokewe repwe kapachelong lein ekkewe “pwal fitemon siip,” nge chokena ra luku ewe asor fan iten ewe moon kepich, ra fangolo manauer ngeni Kot, iwe, ra akkalisi ewe “mwich mi kisikis,” mwichen chon kepit, lon ewe angangen afalafala porausen ewe Muu. (Luk 12:32) Ekkena pwal fitemon siip ra eani ewe apilukulukun ar repwe manau won fonufan tori feilfeilo chok, nge lon meinisin ekkewe lusun mettoch, ra ussun ekkewe lusun chon alemwir mi manau ikenai, chon alemwiri ewe Muu. Ussun ekkewe chon ekis lon Israel lom lom, nge ir chon fel ngeni Jiowa me chon alleasochisi ewe Alluk, ikenai ekkewe pwal fitemon siip ra wiiseni wiisen chon Kraist, awewe chok ren ar afalafala ewe poraus allim fitifengen me chon ewe Israel lon pekin ngun. (Kalesia 6:16) Iwe nge, emon chon ekis esap tongeni wiiseni wiisen king are samol fel lon Israel, iwe, pwal ussun chok, ekkewe pwal fitemon siip resap tongeni wiisen nemenem lon ewe Muu lon lang are wiiseni wiisen samol fel.—Tuteronomi 17:15.
11 Iwe, mwirin 1930, a ffataffatelo pwe a fen wes kefilitaan chokewe repwe nonnom lang. Ren fite ier a kan pwopwonuta ewe angangen kukutta ekkewe pwal fitemon siip, nge ra eani ewe apilukulukun ar repwe manau won fonufan. Ika emon chon kepit epwe ttur, neman emon mi tuppwol le angang ngeni Kot fansoun langattam me lein ekkewe pwal fitemon siip epwe kefil pwe epwe siwilin ena emon fan iten an epwe unus ewe ukuukun 144,000.
Popun A Wor Ekiek mi Mwaal
12 Chon Kraist mi kepit ra wenewenen silei pwe ra kefil pwe repwe manau lon lang, nge rese fokkun meefi och tipemwaramwar ussun. Nge epwe ifa ussun ika ekkoch ra fen akkangei ekkewe minen lios lon ewe Achechchem, nge rese kefil? Pokiten ar weweiti iei pwe ese nom rer ewe apilukulukun manau lon lang, ese mwaal mwelien letiper epwe amwokutuur pwe repwe ukutiu seni ar angei ekkewe minen lios. Kot esap pwapwaiti emon ika epwe ameef ngeni aramas pwe i mi kefil ngeni ewe wiis king me samol fel lon lang, nge a silei pwe ese wesewesen kefil. (Rom 9:16; Pwarata 20:6) Jiowa a nnielo ewe chon Lifai Kora pokiten an lamalam tekia pun a ekiekin nemeni ewe mwichen samol fel lon tettelin Aaron. (Ekistos 28:1; Numperis 16:4-11, 31-35) Ika emon chon Kraist epwe miritiiti pwe mi mwaal an angei ekkewe minen lios lon ewe Achechchem, epwe ukutiu seni an angei, iwe, epwe iotek ngeni Jiowa ren omusomus fan tipetekison.—Kol Fel 19:13.
13 Met popun ekiekin ekkoch epwe tongeni mwaallilo, iwe, repwe meefi pwe ra kefil ngeni manau lon lang? Eli maloon puluwer are pwal eu mettoch mi fokkun eriaffour epwe tongeni ameef ngeniir pwe rese chuen mochen manau won fonufan. Are eli repwe tipeni ewe chok sokkun apilukuluk emon chiener mi fokkun achengicheng a eani, chiener chon Kraist mi kepit. Pwungun pwe Kot ese filata ekkoch pwe repwe etipetipa aramas fan iten ar repwe wiiseni ena wiis mi auchea. Iwe, sap minne a epiti chon alemwiri ewe Muu ren an aronga ngeniir och mongungu pwe epwe esile ngeniir pwe ra kefil fan iten ena wiis.
14 Eli ewe ekiek mi mwaal lon pekin lamalam, ewe mi era pwe meinisin aramas mi murinno repwe feita lang, epwe efisata an ekkoch ekieki pwe ra kefil ngeni manau lon lang. Ina minne, epwe lamot ach sipwe tumunukich pwe site tipetipelo ren ekiek mi mwaal seni lom are pwal och mettoch. Ren chok awewe, ekkoch repwe tongeni pwisin eisiniir: ‘Ua kan ukkun ewe sokkun safei mi tongeni siwili meefiei? Epwe tongeni mwaallilo ai ekiek pokiten ngang ewe sokkun aramas mi pochokkul meefiei me leuti?
15 Ekkoch repwe tongeni pwisin eisiniir: ‘Ua mochen pwe upwe itefoulo? Ngang mi tipeni ewe mettoch nemenem iei are lon mwach kkan lon ewe wiis chon alemwir fiti Kraist?’ Lupwen chon alemwiri ewe Muu ra kefil lon ewe aewin senturi, sap minne ir meinisin a wor wiiser lon ewe mwichefel. Iwe, chon kefilita fan iten ar repwe manau lon lang rese kutta it are asika ngeni aramas pwe ir chon kepit. Ra pwarata ewe sokkun tipetekison mi fichiiti emon mi “eani ekiekin Kraist.”—1 Korint 2:16.
16 Eli ekkoch ra ekieki pwe ra kefil ngeni manau lon lang pokiten an a lapalo sileier ussun Paipel. Nge sap minne an aramas kepit ren ewe ngun mi fel epwe atoto ngeniir tipachchem mi sokkolo watteen, pun Paul a emiriti me fonou ekkoch chon kepit. (1 Korint 3:1-3; Ipru 5:11-14) Kot a foratiu eu kokkot fan iten an epwe awora mongoon ngun ngeni noun kewe aramas meinisin. (Mattu 24:45-47) Ina minne, esap wor emon an epwe ekieki pwe epwe tori chon Kraist mi kepit ewe sokkun tipachchem mi tekia seni tipachchemen ir mi eani ewe apilukulukun manau won fonufan. An emon kepit ren ewe ngun mi fel ese kan pwalo ren angochun le polueni kapas eis ussun Paipel, angochun lon ewe angangen afalafal, are angochun le afalafal ussun Paipel. Chon Kraist mi eani ewe apilukulukun manau won fonufan ra pwal angoch lon ekkena mettoch.
17 Ika emon chienach chon luku epwe eis ussun kefilitaan aramas fan iten manau lon lang, emon elter are pwal emon chon Kraist mi asimau epwe tongeni kapas ngeni ussun. Iwe nge, esap wiisen emon an epwe filata minne pwal emon epwe fori. Esap lamot ngeni emon mi enletin eani ena apilukuluk an epwe eisini aramas ika mi nom ren ena sokkun apilukuluk. Chon kepit ra “fen eani och upufo, esap ren pwikil mi tongeni ngauolo, nge ren pwikil murinno esap tongeni ngauolo, ren kapasen ewe Kot mi manau me nomofoch.” (1 Piter 123, NW) Ren an we ngun mi fel me Kapas, Kot a ffotukalong ewe “pwikil” mi awilalo ewe emon pwe epwe “eu minefoon mettoch mi for,” fiti ewe apilukulukun manau lon lang. (2 Korint 5:17) Jiowa a kan wiisen fili aramas. An aramas kepit “a longolong, esap won ewe emon mi aneanei are won ewe emon mi sassa, nge won Kot.” (Rom 9:16) Iwe, ifa ussun emon epwe tongeni wesewesen silei pwe a kefilita ngeni manau lon lang?
Ewe Popun Ra Wesewesen Silei
18 Pwarataan an Kot we ngun mi fel a anukuchara ngeni chon Kraist mi kepit pwe ra eani ewe apilukulukun manau lon lang. Iei makkeien Paul: “Ami oua angei eu ngunun mumu pwe epwe nounikemi, iwe, ren ena ngun sia kota: ‘Appa, Semach!’ Ewe ngun a pwisin pwarata fitifengen me ngunuch pwe kich noun Kot. Ina minne, ika kich noun, sia pwal chon alemwir: wesewesen noun Kot kewe chon alemwir, nge chienen Kraist chon alemwir, are sipwe riaffoufengen pwe sipwe pwal tongeni lingepokulo.” (Rom 8:15-17) Fan an ewe ngun mi fel emmwen, ngunun are ekimmongun chon kepit a kan amwokutuur pwe repwe akku ngeni pwisin ir minne Paipel a apasa ussun noun Jiowa kewe lon pekin ngun. (1 Jon 3:2) An Kot we ngun mi fel a ameef ngeniir pwe ir noun Kot me a efisata lon letiper eu apilukuluk mi sokkolo. (Kalesia 4:6, 7) Pwungun pwe epwe fokkun murinno an aramas kuna manau esemuch won fonufan, iwe, inisir epwe unusoch me epwe nom rer chon ar famili me chiener kewe, nge esap ina ewe apilukuluk Kot a ngeniir. Ren an we ngun mi fel, Kot a fen efisata lon letiper eu apilukuluk mi sokkolo pochokkulan, ewe apilukulukun ar repwe manau lon lang, pwe iwe ra tipemecheresin likitalo mettoch meinisin mi pacheri manauer won fonufan.—2 Korint 5:1-5, 8; 2 Piter 1:13, 14.
19 Chon Kraist mi kepit ra wesewesen silei pwe ra eani ewe apilukulukun manau lon lang, me ra kapachelong lon ewe atipeeu sefo. Jises a kapas ussun ena lupwen a poputani ewe Achechchem, iwe, iei alon: “Ei kap a wewe ngeni ewe atipeeu sefo mi longolong won chchaai, ewe epwe niniilo fan asengesimi.” (Luk 22:20, NW) Chon kapachelong lon ewe atipeeu sefo, Kot me chokewe mi kepit. (Jeremaia 31:31-34; Ipru 12:22-24) Jises ewe chon affor. Pokiten pwonutaan ewe atipeeu sefo a longolong won chchaan Kraist we mi niniilo, sap minne a angei seni chon Jus chok pwe pwal seni chon ekkewe muu meinisin eu mwichen aramas fan asengesin iten Jiowa we, iwe, a apacherelong lein “mwirimwirin” Eperiam kewe. (Kalesia 3:26-29; Fofor 15:14) Ena “atipeeu esemuch” a atufichi meinisin chon Israel lon pekin ngun ar repwe manausefallita ngeni ewe sokkun manau esap tongeni morolo lon lang.—Ipru 13:20.
20 Ese fokkun wor och tipemwaramwar ren chon kepit ussun ar apilukuluk. Ra fen pwal kapachelong lon pwal eu atipeeu, nge iei ewe atipeeu fan iten eu Muu. Iei alon Jises ussun ar fiti ewe Kraist: “Ami oua fen fitipach ngeniei lon ai kewe sossot; iwe, ua foratiu eu atipeeu lefilach, ussun Semei we a fen foratiu eu atipeeu lefilem, ren eu muu.” (Luk 22:28-30, NW) Ena atipeeu lefilen Kraist me chienan kewe king epwe sopwosopwolo tori feilfeilo chok.—Pwarata 22:5.
Ewe Fansoun Achechchem —Eu Minen Apwapwa
21 A wor chommong mettoch mi apwapwa lon ewe fansoun Achechchem. Sipwe tongeni kuna feioch seni ewe allean Paipel mi kkotota ren ena fansoun. Pwal ina eu fansoun mi akkaewin auchea fan iten iotek, ach ekkekiekifichi manauen me maloon Jises won fonufan, me ach fiffiti ewe angangen afalafal fan iten ewe Muu. (Kol Fel 77:12; Filipai 4:6, 7) Ewe achechchem a kan achema ngenikich ussun ewe tong Kot me Kraist ra pwarata ren kaworen an Jises we asor fan iten ewe moon kepich. (Mattu 20:28; Jon 3:16) Ena kokkot a kan ngenikich eu apilukuluk allim me a aururukich, iwe, a kan apochokkula ach ekiekin tapwelo mwirin Kraist. (Ekistos 34:6; Ipru 12:3) Ewe Achechchem epwe pwal apochokkulakich fan iten ach sipwe apwonueta wiisach, wiisen noun Kot chon angang mi fangolo manauach ngeni, me pwal fan iten ach sipwe tuppwol le appiru Noun we mi achengicheng.
22 A ifa me murinnoon ekkewe liffang Jiowa a kan ngenikich! (Jemes 1:17) Mi nom rech emmwen seni an we Kapas, alillis seni an we ngun mi fel, me ewe apilukulukun manau esemuch. Ewe liffang mi lap seni meinisin Kot a ngenikich, iei an Jises we asor fan iten tipisin chon kepit me pwal ir meinisin me lukun mi pwarata ar lukuluk won. (1 Jon 2:1, 2) Iwe, a ifa ukuukun om aucheani maloon Jises? Kopwe nom lein ir mi pwarata ar kilisou ren ena mettoch lupwen repwe mwichfengen mwirin tuputiuen ewe akkar lon April 16, 2003, fan iten ar repwe fori achechchemenien ewe Faafen Ach Samol?
[Footnotes]
a Forien Chon Pwarata Jiowa, nge iei ese chuen peres.
Ifa Ussun Kopwe Polueni?
• Io epwe wiisen angei ekkewe minen lios lon ewe Achechchem?
• Pwata ekkewe “pwal fitemon siip” repwe fiti ewe Faafen Ach Samol, nge repwe chon katol chok mi pwarata sufol?
• Ifa ussun chon Kraist mi kepit ra silei pwe repwe aea ewe pilawa me wain lon ewe Achechchemenien maloon Kraist?
• Ewe fansoun Achechchem eu fansoun mi fich ngeni ach sipwe fet?
2. Ifa ewe kapasen ourour a mak lon 1 Korint 11:27?
3. Mei fet fofforun chommong chon Kraist lon Korint lupwen ra chufengen fan iten ar repwe fori achechchemenien ewe Faafen Ach Samol?
4, 5. Pwata chokewe mi akkangei ekkewe minen lios lon ewe Achechchem repwe atittina pwisin ir?
6. Kot a awiisa ngeni io kkan ar repwe wiisen aea ewe pilawa me wain lon ewe Faafen Ach Samol?
7. Pwata chon Kraist lon ewe aewin senturi ra silei pwe repwe wiisen angei ekkewe minen lios lon ewe Achechchem?
8. Lon Mattu sopwun 13, “ewe wit” me “ekkewe petewelingau” ra liosueta io?
9. Ifa ussun a ffatolo weween ewe “mwich mi lapalap” lon 1935, me ifa ussun ena poraus a kku ekkoch mi fen akkaea me mwan ekkewe minen lios lon ewe Achechchem?
10. Ifa ussun kopwe awewei apilukulukun me wiisen ekkewe “pwal fitemon siip” mi manau ikenai?
11. Pwata ewe pwinin maramen an emon papatais epwe tongeni nemeni menni apilukuluk a eani?
12. Emon epwe ukutiu seni an angei ekkewe minen lios lon ewe Achechchem ika epwe wor met sokkun lapalap lon manauan, me met popun?
13, 14. Met popun ekiekin ekkoch epwe tongeni mwaallilo, iwe mwirin, repwe meefi pwe ra kefilita fan iten ar repwe manau lon lang?
15, 16. Ifa ewe popun eli ekkoch repwe ekieki pwe ir chon kepit, iwe nge, mi mwaal ar ekiek?
17. An aramas kepit ren ewe ngun mi fel epwe longolong won met me io epwe wiisen filiireta?
18. Ifa ussun an Kot we ngun mi fel epwe wiisen chon pwarata fitifengen me ngunun chon kepit?
19. Met lamoten ewe atipeeu sefo lon manauen emon chon Kraist mi kepit ren ewe ngun mi fel?
20. A wor menni atipeeu lefilen chon kepit me Kraist?
21. Ifa ussun sipwe tongeni kuna feioch mi lapalap seni ewe fansoun Achechchem?
22. Ifa ewe nampa eu an Kot liffang ngeni aramas, me ifa ussun sipwe tongeni pwarata pwe sia aucheani ena liffang?
[Graph/Pictures on page 30]
Chon Fiti ewe Achechchem
(See bound volume)
[Pictures on page 27]
Mi fichiiti ewe fansoun Achechchem ach sipwe alapalo ach alleani Paipel me ach fiti ewe angangen afalafala porausen ewe Muu
[Pictures on page 30]
Kopwe fiti ewe Faafen Ach Samol lon ei ier?