Ifa Ussun Ewe Iotekin Ach Samol A Lamot Ngonuk

EWE Iotekin Ach Samol, ewe mi nom lon an Jises we Afalafal won ewe Chuuk, a mak lon ewe Paipel lon Mattu sopwun 6, wokisin 9 ngeni 13. Pwata ewe Iotekin Ach Samol a mak lon ewe Paipel? Ren ena minen emmwen, Jises a aiti ngenikich ifa ussun sipwe iotek pwe Kot epwe auselingakich. Lon ena iotek sia pwal kuna poluen ekkoch kapas eis ussun manauach. Ina minne, sipwe kaeo eu me eu kinikin lon ewe Iotekin Ach Samol.

Ifa Iten Kot?

“Semem mi nonnom lang, itom epwe pin.” (Mattu 6:9) Ekkena kapas le poputaan ewe iotekin emmwen ra alisikich le arap ngeni Kot ren ach ko ngeni i “Semach.” Sia tongeni arap ngeni Semach we lon lang fan ach lukuluk pwe a mochen auseling ngenikich, ussun emon semirit mi pukun kine ngeni seman we mi tongei, nge a pwal weweiti lapalapan.

Jises a apasa pwe sipwe iotek fan iten an epwe pinilo iten Kot we, are epwe ussun ita och mettoch mi mechen. Nge ifa iten Kot? Iei poluan lon Paipel: “En, mi iteni Jiowa, en chok ewe mi Unusen Tekia won unusen fonufan.” (Kol Fel 83:​18, NW) Ka fen kuna ewe it Jiowa lon ewe Paipel?

A enlet pwe iten Kot we Jiowa a mak arapakan fan 7,000 lon ekkewe taropween Paipel minen lom lom. Iwe nge, ekkoch chon afouni Paipel ra fen uwawu ena it seni nour kewe Paipel. Ina minne, a pwung ach sipwe iotek pwe ewe Chon Forikich epwe epinalo itan we. (Isikiel 36:23) Eu foffor mi tipeeu ngeni ena sokkun iotek, iei ach aea ewe it Jiowa lupwen sipwe iotek ngeni Kot.

Letipen Kot epwe Pwonuta won Fonufan

“Muum epwe war. Letipom epwe pwonuta lon lang, pwal ussun chok won fonufan.” (Mattu 6:​10) Ifa ussun epwe pwonuta ena kinikinin an Jises we iotekin emmwen? A lap ngeni aramas ar ra ekieki pwe lang eu leenien kinamwe. Paipel a apasa pwe lang leenien Jiowa, “leenian we mi tekia, nge mi pin me ling.” (Aisea 63:15) Ina ewe popun sia kan iotek pwe letipen Kot epwe pwal pwonuta won fonufan ussun an epwe “pwonuta lon lang”! Nge ena mettoch epwe wesewesen fis?

Taniel, noun Jiowa we soufos, a makkei ei oesini: “Ewe Koten lang epwe aueta eu mwu esap tongeni tala, esap pwal wor eu mwu epwe tongeni akufu. Iwe, ei mwu epwe ataela o arosala ekewe lusun mwu, nge epwe pusin nom tori feilfeilachok.” Ena muu lon lang epwele mwokut pwe epwe efisata kinamwe won unusen fonufan ren eu nemenem mi pwung.​—2 Piter 3:​13.

Iotek me Minne a Lamot Ngenikich lon Pekin Aion

Me ren minne Jises a apasa lon ewe iotekin emmwen, a affata pwe lupwen sipwe iotek, sipwe akkaewin ekieki iten Kot we me letipan. Iwe nge, a sopwosopwolo ewe iotekin emmwen ren ewe sokkun tingor epwe pwung ach sipwe esile ngeni Jiowa.

Iei ewe mi akkom leir: “Kopwe ngenikem anem mongo ikenai.” (Mattu 6:​11) Esap ina eu tingor fan iten wouun fonufan. Jises a peseikich ach sipwe iotek ren “anach pilawa ran me ran me ren minne epwe lamot iteiten ran.” (Luk 11:​3, NW) Sia tongeni iotek fan ach lukuluk pwe Kot epwe awora minne a lamot ngenikich iteiten ran ika sia kan tongei me alleasochisi i, nge ina eu mettoch mi tipeeu ngeni ewe Iotekin Ach Samol.

Ewe sokkun aurek ese pwung ussun osukosukach lon pekin moni epwe tongeni efisata ach tunalo minne mi lamot ngenikich lon pekin ngun, iwe mwirin, sisap chuen apwonueta wiisach me ren Kot. Nge ika sipwe akkomwa ach fel ngeni Kot lon manauach, sia tongeni luku pwe epwe polu ach kewe tingor fan iten minne mi lamot lon pekin aion, awewe chok ren anach mongo me ufach. Iei alon Jises: “Oupwe kuttafichi lom an mu o an pung; iwe, ekkeei mettoch meinisin repwap kapach ngenikemi.”​—⁠Mattu 6:​26-​33.

Ach kewe Iotek me Omusomusen Tipis

“Omusa senikem am liwinimang, usun chok am aua omusalo ekkewe mi liwinimang senikem.” (Mattu 6:​12) Lon ewe Iotekin Ach Samol Luk a wiisen makkei, ekkena “liwinimang” ra wewe ngeni “tipis.” (Luk 11:4) Semach we lon lang a “ekiekin muttir omusalo” tipisin ir mi kokko ngeni fan ewe ngunun aier. Jiowa a tongeni unusen omusa senikich ach kewe tipis, ussun an a tufichin unusen musulo och liwinimmang.

Iwe nge, Jises a kapas ussun eu mettoch omusomusen tipis epwe longolong won: Ren ach sipwe kuna omusomus seni Kot, sipwe kan omusalo tipisin aramas. (Mattu 6:​14, 15) Ika sipwe omusalo chokewe mi tipis ngenikich, Kot epwe pwapwa rech me sipwe tufichin kuna feioch seni an umoumoch.

Alillis fan iten Ach Sipwe Feffetal Won ewe Al mi Pwung

“Kosap emmwenikemelong lon sossot, nge kopwe angasakem seni ewe emon mi ngau.” (Mattu 6:​13, NW) Jiowa ese kan likitikichelo lon fansoun sossot are oturukichelong lon tipis. Iei alon an we Kapas: “Kot esap tongeni kuna sosotingau, i esap pwal sotuningauei eman.” (Jemes 1:​13) Kot a kan mut ngenikich ach sipwe kuna sossot, nge epwe tongeni angasakichelo seni ewe Chon Sossot mi Lapalap​—weween, “ewe emon mi ngau” are Setan ewe Tefil.

Ren an aea ekkewe mettochun fonufan mi nom fan nemenian, eli ewe Tefil epwe sotunikich ren ekkewe sokkun foffor Kot a oput. (1 Jon 5:​19) Ina minne, mi fokkun lamot ach sipwe kulliiti Kot iteitan, nge akkaewin lupwen eu sossot epwe lilliwiniitikich. Iwe, ika sipwe fel ngeni Kot me ren minne a mak lon an we Kapas mi fel, Kot epwe selanikich ren an alisikich le fiu ngeni ewe Tefil. Ewe Paipel a erenikich pwe “Kot mi tuppwel, o esap mut ngenikemi sokkun sosot mi lap seni ami tufich.”​—1 Korint 10:13.

A Mmen Lamot Lukuluk lon Kot

A mmen apwapwa ach silei pwe Semach lon lang a kan ekieki manauen emon me emon leich! A pwal mwo nge awiisa ngeni Noun we Jises Kraist pwe epwe wiisen aiti ngenikich ifa ussun sipwe iotek. Ese mwaal sia mochen apwapwai Jiowa Kot pokiten ach silei ena mettoch. Nge ifa ussun sia tongeni apwapwai i?

Sia anean pwe ach porausfengen ussun ewe Iotekin Ach Samol a fen alapalo om miritiiti aucheaan. Ren om kakkaeo ussun Jiowa me ifa ussun epwe efeiochu “ir mi achocho le kukutta i,” en mi tongeni apochokkula om luku Kot. Amwo kopwe alapalo sileiom ussun i me an kewe kokkot ren om kopwe tufichin pwapwaesini om ririoch ngeni Semom we mi nonnom lang tori feilfeilo chok.​—Jon 17:3.