“Epwe Wor Tong Pwoteete Lefilemi”
“Epwe wor tong pwoteete lefilemi usun chok pwipwi eu.”—ROM 12:10, NW.
LON unusen ekkewe 43 ier a eani wiisan misineri lon Esia, Don a sinelo ren ewe tong mi pwichikkar a pwaralo ngeni chokkewe a angang ngeniir. Mwen an malo pokiten semmwen mi chou, ekkoch aramas Don a kaeo ngeniir ra sailo fite ngerou mwail pwe repwe chuuri Don me apasa, “Kamsahamnida, kamsahamnida!”—“Kilisou, kilisou!” lon fosun Korea. An Don tong pwoteete a kku letiper.
2 Don ese alaemon chok ren an pwaraloon tong pwoteete. Lon ewe aewin senturi, ewe aposel Paul a pwarata tong mi alollon fan iten chokkewe a angang ngeniir. Paul a pennukuolo manauan. Inaamwo ika Paul emon mi eani luku mi pochokkul nge, a pwal pwoteete me a tongei aramas, “usun chok emon inelap a tumunuochu pwisin noun kewe.” Paul a mak ngeni ewe mwichefel lon Tesalonika: “Pokiten am tong pwoteete ngenikemi, am aua chok pwapwa ren fangelo ngenikemi, esap ewe kapas allim chok, pwe pwal manauem; pun ami mi achengicheng rem.” (1 Tesalonika 2:7, 8, NW) Mwirin, Paul a ereni pwiin kewe lon Efisus pwe resap kuna i sefal, “ir meinisin ra kechiu, o ra romi popun uen Paul, o ra pwal mitiri i.” (Fofor 20:25, 37) A ffat pwe ewe riri lefilen Paul me pwiin kewe a pochokkul esap chok pokiten ra eani eu chok luku. A pochokkul ewe tong pwoteete lefiler.
Tong Pwoteete Me Tong
3 Lon ewe Paipel, tong pwoteete, meefi meefien aramas, me ewe mochen alisi emon mi riaffou ra ririfengen ngeni ewe lapalapen chon Kraist mi murinno seni meinisin—tong. (1 Tesalonika 2:8; 2 Piter 1:7) Ussun chok periperin efou taimon mi ling, ekkeei lapalap mi murinno ra alillisfengen me angangfengen. Rese chok alisaata an chon Kraist arapfengenniir nge pwal ngeni Semer mi lom lang. Iwe, ewe aposel Paul a pese ngeni chienan kewe chon luku: “Ami tong epwe enlet. . . . Oupwe tongfengen [tong pwoteete] lefilemi usun chok pwipwi eu.”—Rom 12:9, 10.
4 Mei wor ruu kinikinin ewe kapasen Krik Paul a nounou fan iten “tong pwoteete”, eu a wewe ngeni chiechioch me ewe eu, tong lon famili. Emon sou kaeo Paipel a awewei weween. Ekkewe chon Kraist “repwe sinelo ren tuppwol lefiler, lapalapen eu famili mi tong, pacheoch fengen, me alillis fengen.” Ina meefiom ussun pwiom kewe chon Kraist? Tong—ussun chok tong lon eu famili—epwe nonnom lon ewe mwichefelin chon Kraist. (Kalesia 6:10) Iwe, a iei ussun an J. B. Phillips, The New Testament in Modern English, a chiyakuni Rom 12:10: “Epwe wor tong mi pwichikkar lefilach ussun chok ewe tong lefilen pwipwi.” Me Ewe Testament Mi Fo a apasa: “Tong en pwipwi epwe pwichikar lefilemi.” Ewer, tong lefilen chon Kraist esap chok fisita pokiten a murinno are pokiten wiiser. Ren “tong usun pwipwi . . . mi enlet,” sipwe ‘tongfengen lefilach seni lon letipach.’—1 Piter 1:22.
“Kot A Fen Aitingenikemi Pwe Ami Oupwe Tongfengen Lefilemi”
5 Inaamwo ika lon ei fonufan ‘chommong aramas ra patapatelo [lon] ar tong,’ nge Jiowa a asukula noun kewe aramas ikenai pwe repwe ‘tongfengen lefiler.’ (Mattu 24:12; 1 Tesalonika 4:9) An Chon Pwarata Jiowa kewe mwichelap ra atufichi ar kaeo ei mettoch. Lon ekkeei mwichelap, ekkewe Chon Pwarata ra souni pwiir kewe seni ekkewe fonu towau, me chommong ra etiwa ekkewe mi fiti ewe mwichelap seni towau ar repwe nonnom rer lon imwer. Kanoto chok, lon eu mwichelap, ekkoch ra feito seni ekkewe fonu ia aramas rese kan eorenalo ar pwaralo meefier. Emon chon Kraist mi alisi ekkewe wasola le kutta ia repwe onnut ie a apasa: “Lupwen ekkeei wasola ra keran feito, ra fokkun pireir me sau. Nge wonu ran mwirin lupwen repwele feilo, ir me ekkewe mi awasolaochuur ra foropachfengen me kechiu. Ra pwapwaesini ewe tongen chon Kraist repwe chechchemeni tori feilfeilo.” Awasolaochu pwiich kewe, ese lifilifil nonnomun manauer, a kan alisata lapalap mi och lein wasola me chon etiwa.—Rom 12:13.
6 Mi amwarar ekkeei poraus ussun ach kewe mwichelap nge eu ririoch mi lap seni ena a maarita lupwen ekkewe chon Kraist ra angangfengen ngeni Jiowa ren och fansoun. Lupwen sia sileifichi pwiich kewe, epwe lapelo ach ingeiti lapalaper kewe mi murinno—ar pwung, wenechar, tuppwol, kirokiroch, kisaseu, tong, me ar mochen alisi emon mi riaffou. (Kol Fel 15:3-5; An Salomon Fos 19:22) Mark, emon misineri lon Otiuen Africa, a apasa, “Ach angang fan tipeeu ren pwiich kewe a efisaata eu riri ese tongeni talo.”
7 Ren ach sipwe tikeri me amwochu ena esin riri lon ewe mwichefel, a lamot pwe chon ekkewe mwichefel repwe arapfengenniir. Ren ach fiffiti ekkewe mwich, sia appochokkula ach chiechioch me pwiich kewe. Ren ach nonnom mwen, atun, me mwirin ewe mwich, sia alisi me alololafengennikich “lon tong o fofor murinno.” (Ipru 10:24, 25) Emon elter lon Merika a apasa, “Ua chechchemeni pwe le kukkuni, ai famili eu lein ekkewe famili mi mmang le su seni ewe Kingdom Hall pwe aua tongeni pwapwaesini ewe porausfengen me pwiich kewe mi murinno.”
A Lamot Om Kopwe ‘Suukalo Letipom’?
8 Ren ach unusen pwapwaiti ena esin tong, neman a lamot sipwe wiisen ‘suukalo letipach’. Ewe aposel Paul a makkeei ngeni ewe mwichefel lon Korint: “Letipem mi chok suukulo. Pun am ause amwochufengenni-kemi.” Paul a pese ngeniir ar repwe ‘suukalo letiper.’ (2 Korint 6:11-13) Ka pwal tongeni ‘suukalo letipom’ lon tong? Kesap witiwit ar repwe akkom pwarata tong ngonuk. Lon an taropwe ngeni ekkewe chon Rom, Paul a aririfengenni ewe lamoten tong pwoteete ren ei fon: “Oupwe akkom achocho le asamolufengenni-kemi.” (Rom 12:10, NW) Ren om asamolu aramas, kopwe tongeni akkom kapong ngeniir lon ach kewe mwich. Eli kopwe etiweer pwe oupwe mwin le afalafal are ammonlata fan iten ekkewe mwich. Om fori ena epwe amaaraata tong pwoteete.
9 Ekkewe famili me emon me emon lon ewe mwichefel ra tongeni ‘suukalo letiper’ ren ar chuurifengenniir, eli ren ar mongofengen, me kuloufengen. (Luk 10:42; 14:12-14) Fan ekkoch Hakop a akkota eu picnic fan iten eu kukkun kumi. A apasa: “Kukkun me watte ra fiti ewe picnic, kapachelong ekkewe sam are in mi nipich. Meinisin ra pwapwa lupwen ra liwin ngeni imwer, me a maarita ar chiechiochfengen.” Pokiten kich chon Kraist, a lamot pwe sisap chok chiechioch lon luku nge sipwe pwal enletin chiechifengen.—3 Jon 14.
10 Nge, fan ekkoch, a weires ach sipwe chiechi me tongei pwiich kewe pokiten ach kewe apwangapwang. Met sipwe tongeni fori? Akkom, sia tongeni iotek fan iten kinamwe lefilach me pwiich kewe. Letipen Kot pwe noun kewe chon angang repwe chiechiochfengen, me epwe polueni ena esin iotek. (1 Jon 4:20, 21; 5:14, 15) A lamot pwe foffor epwe pache ngeni ach iotek. Emon chon afalafal mi saifetal lon East Africa itan Ric a chechchemeni emon brother aramas ra weiresin chiechi ngeni pokiten lapalapan a kan akinasa letipen aramas. Ric a apasa, “Use su seni ewe brother, iwe, ua apposa letipei ngeni ai upwe chiechi ngeni. Ua kuna pwe semen ei brother emon mi fokkun titchik le emiriti i. Lupwen ua weweiti ukuukun watteen an achocho le pwakini ei osukosuk me an feffeita, ua ingeiti i. Am me ruuemon aua chiechiochfengen.”—1 Piter 4:8.
Suukalo Letipom!
11 Ikenai, chommong aramas rese chiechioch ngeni aramas lon unusen manauer. A ifa me alolilen ena mettoch! Esap ita ina ussun lon ewe mwichefelin chon Kraist. Tongen pwipwi mi enlet ese chok wewe ngeni mennin lupwen ra porausfengen me fairo. Ese pwal wewe ngeni pwe aramas repwe fokkun mweireir lupwen ra pwarata tong ngeni aramas. Nge, sipwe tipemecheres le suukalo letipach, ussun chok Paul a fori ngeni ekkewe chon Korint, me pwarata ngeni chienach chon luku pwe sia wesewesen tongeer. Inaamwo ika aramas meinisin rese saani ar repwe nonnom lein chommong aramas iteitan are fos chommong nge, ach mochen alaemon iteitan epwe efeiengauakich. Ewe Paipel a apasa: “Eman mi pusin imwula a chok kutta an mochen, a u ngeni meinisin mine aramas ra ekieki pwe a pwung.”—An Salomon Fos 18:1.
12 Porausfengen mi wenechar longolongun chiechi mi enlet. (Jon 15:15) A lamot ngeni oukich meinisin chienach sia tongeni pwari ngeniir ach ekiek me memmeef mi alollon. Pwal och, ika sia wesewesen silefengennikich, iwe epwe amecheresi ach alisifengennikich. Lupwen sia ekilapei minne mi lamot ngeni chienach, iwe sia alisata tong pwoteete, me sipwe kuna enletin kapasen Jises: “Feiochun liffang mi lap seni feiochun angei.”—Fofor 20:35; Filipai 2:1-4.
13 A lamot ach pwarata tong ika epwe uwaoch. (An Salomon Fos 27:5) Mesach epwe pwaralo ika ach tong mi enlet, me eli epwe achungu letipen aramas me amwokutuur ar repwe pwal tongeikich. Eu mwiitun seni Paipel a apasa: “Wopwapwan won mesen eman a apwapwai leluken aramas.” (An Salomon Fos 15:30) Fofforoch ra pwal alisata tong pwoteete. Inaamwo ika moni ese tongeni mooni tong nge, eu liffang seni letip a murinno. Echo card, echo taropwe, me “eu kapas eman apasa lon fansoun fich”—ekkeei mettoch meinisin ra pwarata tong mi alollon. (An Salomon Fos 25:11; 27:9) Lupwen sia chiechi ngeni aramas, a lamot ach amwochu ena riri ren ach pwarata tong ese maicha. Akkaewin lon fansoun osukosuk, sia mochen alisi chienach kewe. Ewe Paipel a apasa: “Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riafou.”—An Salomon Fos 17:17.
14 Ren enletin, sise tongeni arap ngeni meinisin lon ewe mwichefel. Epwe wor ekkoch sia meefi kinamwe rer lap seni ekkoch. Ina popun ika emon ese kon mochen chiechi ngonuk, kesap muttir ekieki pwe mei wor osukosuk reom are ren emonnewe. Kesap eriani emon an epwe chiechi ngonuk. Ika ka sotun chiechi ngeni i, iwe, epwe chuen tufich pwe oupwe chiechiochfengen lon mwach kkan.
“Ua Unusen Pwapwa Reom”
15 A ifa me watteen pwapwaan Jises lupwen a rongorong ekkewe kapas seni lang lupwen a papatais: “Ua unusen pwapwa reom”! (Mark 1:11) Ese mwaal ei kapasen apunga a apochokkula an Jises luku pwe Seman we a tongei i. (Jon 5:20) A mmen alolilen pwe ekkoch rese fan eu rongorong ena esin kapasen apunga seni chokkewe ra sufoliitiir me tongeer. Ann a apasa: “Chommong sarafo usi esor chon am famili mi fitikem lon am luku. Lon imwem, sia chok rongorong esiit. Aua fokkun letipechou.” Iwe nge, lupwen ra choni ewe mwichefel, ra meefi tong seni eu famili lon pekin ngun mi alillisoch—ekkewe sam me in me ekkewe brother me ekkewe sister lon luku.—Mark 10:29, 30; Kalesia 6:10.
16 Ren eorenien ekkoch fonu, ekkewe sam me in, ekkewe watte, me ekkewe sense ra apunga ekkewe kukkun fan ekkoch chok, pokiten ra ekieki pwe repwe tenechepwakelo are lamalam tekia. Pwal mwo ekkewe familien chon Kraist are ewe mwichefel repwe tongeni eani ena esin ekiek. Eli lupwen ekkewe watte ra kapas ussun an emon afalafal are pwal eu angang, ra apasa: “A murinno om angang, nge kopwe tongeni achocho lap seni ena!” Are eli repwe pwal pwarata pwe rese kon pwapwa ren met ewe kukkun a fen fori. Chommong ra luku pwe ren ar fori ena ra amwokutu ekkewe kukkun ar repwe achocho. Nge fan chommong met ra fori ese uwaoch pokiten ekkewe kukkun repwe chipwang are repwe meefi pwe ra lipwakingau.
17 Iwe nge, sisap chok apunga emon lupwen sia mochen fonouur. Kapasen apunga mi enlet a alisata tong pwoteete lon famili me lon ewe mwichefel, iwe a alisi ekkewe kukkun ar repwe kutta emmwen seni pwiir kewe mi lipwakoch seniir. Ina popun, sisap mut ngeni eoreniach an epwe nemeni met sia fori me apasa ngeni aramas nge sipwe ‘pwilitalong lapalapach mi fo, ewe mi forieta usun lapalapen Kot lon ewe pung mi enlet pwal ewe tuppwel mi enlet.’ Sipwe appiru ifa ussun Jiowa a apunga aramas.—Efisus 4:24.
18 Iwe, ami kana mi kukkun, ousap ekieki pwe ika ekkewe watte ra emiriitikemi are fonoukemi, weween pwe ra oputakemi. (An Salomon Afalafal 7:9) Esap ina ussun! Ese mwaal ra fori pokiten ra fokkun tongeikemi. Ika rese tongeikemi, pwata repwe achocho le kapas ngenikemi ussun ewe osukosuk? Pokiten ra silei manamanen kapas, ekkewe watte—akkaewin ekkewe elter lon ewe mwichefel—ra ekiekifichi me iotek ussun ewe emmwen repwe awora, pokiten ra chok mochen fori minne mi murinno.—1 Piter 5:5.
“Ewe Samol Mi Fokkun Pwoteete Lon An Tong”
19 Pokiten ar pwarata tong pwoteete a efisata osukosuk, eli ekkoch ra meefi pwe ar sopweilo le pwarata tong pwoteete epwe chok alichipunguur. A lamot pwora me luku mi pochokkul pwe repwe suukalo letiper sefal ngeni aramas. Nge a lamot ar resap monukalo pwe Jiowa “ese touau seni emon me emon leich.” A etiwakich ach sipwe arap ngeni i. (Fofor 17:27; Jemes 4:8) A pwal weweiti ach pireir pwe aramas repwe akinasakich, me a pwonei pwe esap likitikichelo me epwe alisikich. Ewe soumak kol mi fel a alukulukukich: “Ewe SAMOL a chok arap ngeni chon letipeta, a pwal amanaua ekkewe mi ta lon ngunur.”—Kol Fel 34:18.
20 Ach chiechioch me Jiowa ewe riri mi lamot seni meinisin sia tongeni amaaraata. Nge ena esin chiechi mi wesewesen tufich? Ewer. Ewe Paipel a awewei ussun ekkewe mwan me fefin mi pwung ra meefi ukuukun ar chiechioch ngeni Semach we lon lang. Ar kewe kapas ra fen isois fan iten ar repwe alukulukukich pwe sia pwal tongeni arap ngeni Jiowa.—Kol Fel 23, 34, 139; Jon 16:27; Rom 15:4.
21 Meinisin mi tongeni tikeri met Jiowa a kutta seni aramas mi mochen chiechioch ngeni i. Tafit a kapas eis: “SAMOL, io epwe siamu lon om we im mangaku? . . . Ekkena ir mi fefetal lon minne mi enlet, o forata minne mi pung, ir mi apasata minne mi enlet seni lon letiper.” (Kol Fel 15:1, 2; 25:14) Lupwen sia kuna pwe ach angang ngeni Kot a uwani uwa mi murinno me a atoto rech an emmwen me tumun, sipwe kuna pwe “ewe Samol mi fokkun pwoteete lon an tong.”—Jemes 5:11, NW.
22 Sia fokkun feioch pwe Jiowa a mochen chiechioch me aramas mi apwangapwang! Ina popun, esap pwal amwokutukich le pwarata tong pwoteete lefilach? Ren an Jiowa alillis, emon me emon leich a tongeni pwarata me pwapwaesini ewe tong pwoteete ewe mwichen pwipwiin chon Kraist a lapalapeni. Fan nemenien an Kot we Muu, meinisin won fonufan repwe pwapwaesini ei tong feilfeilo.
Ka Tongeni Awewei?
• Ita epwe ifa ussun ngunun ewe mwichefelin chon Kraist?
• Ifa ussun emon me emon leich a tongeni alapalo ewe tong lon ewe mwichefel?
• Ifa ussun kapasen apunga seni letip a tongeni alisata tong lon mwichefelin chon Kraist?
• Ifa ussun an Jiowa tong pwoteete a alisi me apochokkula kich?
[Ekkewe kapas eis fan iten ewe lesen]
1, 2. Menni riri lefiler me pwiir kewe emon misineri ikenai me ewe aposel Paul ra pwapwaiti?
3. Ifa ussun ekkewe kapas lon ewe Paipel fan iten tong pwoteete me tong ra ririfengen?
4. Met weween ewe kapas “tong pwoteete”?
5, 6. (a) Ifa ussun Jiowa a nounou ekkewe mwichelap pwe epwe aiti ngeni noun kewe aramas ussun tong? (b) Ifa ussun ewe riri lefilen pwipwi a pochokkulelo mwirin och fansoun?
7. Met a lamot pwe sipwe pwapwaesini ewe tongen chon Kraist lon ewe mwichefel?
8. (a) Met weween an Paul ereni ekkewe chon Korint ar repwe ‘suukalo letiper’? (b) Met sia tongeni fori pwe sipwe alisata tong lon ewe mwichefel?
9. Met ekkoch ra fen fori pwe repwe alapalo ar chiechi ngeni chiener chon Kraist? (Apasawu met a fis lon leeniom.)
10. Met sia tongeni fori lupwen a wor osukosuk lefilen pwiich kewe?
11. (a) Met a lamot pwe tong epwe maarita lon ewe mwichefel? (b) Met popun ach tukumalo meefiach seni aramas mi tongeni efeiengauakich lon pekin ngun?
12. Met popun popporausfengen a lamot ngeni chiechioch lon ewe mwichefel?
13. Met sia tongeni fori ren ach sipwe pwarata pwe sia wesewesen tongei pwiich kewe?
14. Met sia tongeni fori ika emon a ussun ita ese etiwakich lupwen sia mochen chiechi ngeni?
15. Ifa ussun kaworen are nafangauen kapasen apunga a kku aramas?
16. Met popun ach esiita aramas ese och?
17. Met popun sipwe kutta ifa ussun sipwe apunga aramas?
18. (a) Ami kana kukkun, ita ifa ussun ami ekiek ussun emmwen seni ekkewe watte? (b) Met popun ekkewe watte ra tumunu ifa ussun ra awora emmwen?
19. Met popun chokkewe ra lichipungulo ra tongeni kutta alillis seni Jiowa?
20, 21. (a) Ifa ussun sia silei pwe sia chiechioch ngeni Jiowa? (b) Met Jiowa a kutta senikich ika sia chiechioch ngeni i?
22. Met sokkun chiechi Jiowa a mochen noun kewe aramas repwe pwapwaesini?
[Lios lon pekin taropwe 23]
Tong lefilen chon Kraist esap chok pokiten ina wiiser
[Lios lon pekin taropwe 25]
Kopwe tongeni ‘suukalo letipom’ lon tong?
[Lios lon pekin taropwe 26]
En chon esiita are chon apochokkula aramas?