Kait Fan Iten Ach Sipwe Afalafalaochu Ewe Kapas Allim
“Oupwe chon pwarata usi lon Jerusalem, lon Jutia me Sameria, o pwal lon unusen fonufan meinisin.”—FOFOR 1:8.
“JISES, ewe re Nasaret, . . . a erenikem pwe am aupwe afalafala aramas, o pwarata pwe i ewe mi seikita me ren Kot pwe epwe apungu ekkewe mi manau o pwal ekkewe mi malo.” (Fofor 10:38, 42) Ren ekkeei kapas, ewe aposel Piter a awewei ngeni Kornilios me aramasan kewe ussun wiisan we le esilefeili ewe kapas allim.
2 Ineet Jises a fen awiisa ngeni Piter wiisan? Ese mwaal, Piter a fen ekieki met Jises a apasa mwirin an manausefal ekis chok mwen an feita lang. Lon ena fansoun, Jises a ereni noun kewe chon kaeo mi tuppwol: “Oupwe chon pwarata usi lon Jerusalem, lon Jutia me Sameria, o pwal lon unusen fonufan meinisin.” (Fofor 1:8) Iwe nge, ren och fansoun mwen ena, Piter a fen silei pwe, pokiten i emon noun Jises chon kaeo, a lamot an fos ngeni aramas ussun an luku Jises.
Kait Ren Ulungat Ier
3 Fitu maram mwirin an papatais lon 29 C.E., Jises a afalafal lon ewe leeni ikewe Piter me pwiin we Antru ra attau ie lon ewe Noomun Kalili. Ra fen attau unusen ewe pwin nge rese liap. Nge Jises a ereniir: “Ekinauu le alollol o oturatiu noumi keei cheu ren attau.” Lupwen ra fori met Jises a ereniir, “ra fakkun liapa ik chommong. Iwe, nour kewe cheu a popueta kamwelo.” Lupwen Piter a kuna ei manaman, a fokkun niu, nge Jises a akinamwelo Piter ren an apasa: “Kete niuokus, seni iei kopwe liapeni aramas.”—Luk 5:4-10.
4 Muttir chok, Piter me Antru—fengen me Jemes me Jon, noun Sepeti kewe—ra likitalo waar kewe ren ar repwe tapwelo mwirin Jises. Ren arapakan ulungat ier, ra fiti Jises lupwen a afalafal me ra kait ngeni ar repwe wiliiti chon esilefeili ewe kapas allim. (Mattu 10:7; Mark 1:16, 18, 20, 38; Luk 4:43; 10:9) Le muchuloon ena fansoun, lon Nisan 14, 33 C.E., Jises a ereniir: “Ewe mi lukuei epwe pwal fori ekkewe angang minne ngang ua fori. Nge epwe fori ekkoch angang lap seni ekkewe.” (Jon 14:12) Noun Jises kewe chon kaeo repwe afalafalaochu ewe kapas allim nge ar angang epwe watte seni minne Jises a fori. Ra kaeo pwe ir me ekkewe chon kaeo mi tapwelo mwirir repwe afalafal lon “fonu meinisin,” tori “sopolon ei fansoun.”—Mattu 28:19, 20.
5 Sia nonnom lon ewe “sopolon ei fansoun.” (Mattu 24:3) Sise tongeni fiti Jises lupwen a feilo afalafal ussun chok ekkewe chon kaeo akkom. Nge, sia chuen tongeni kuna feioch seni aitien Jises kewe ren ach alleaani lon ewe Paipel ifa ussun a afalafal me ekkewe emmwen a awora ngeni noun kewe chon kaeo. (Luk 10:1-11) Ei lesen epwe pwal fos ussun och mettoch mi fokkun lamot Jises a pwaralo ngeni noun kewe chon kaeo—ewe sokkun ekiek mi pwung ngeni ewe angangen afalafal.
A Tongei Aramas
6 Met popun Jises a kon lipwakoch le afalafal? Eu popun, an enletin tongei me lolileniesini aramas. Ewe soumak kol mi fel a oesini pwe Jises epwe “lolileniesini ekkewe aramas mi apwangapwang, o ekkewe mi osupwang.” (Kol Fel 72:13) Jises a wesewesen apwonueta ena oesini. Ewe Paipel a apasa: “Nge lupwen a kuna ekkewe aramas, a fakkun tongei ir, pun ra riaffou me torotorongau usun chok siip mi esor chon maser.” (Mattu 9:36) Pwal mwo nge chon tipis watte ra meefi an tongeer me ra mochen arap ngeni.—Mattu 9:9-13; Luk 7:36-38; 19:1-10.
7 Sipwe lipwakoch le afalafal ika sia appiru an Jises lolileniesini aramas. Mwen om feilo afalafal, pwata kesap ekiek won ukuukun watteen an aramas osupwangen ewe poraus kopwe afalafaleer ussun. Ekieki mwo ussun ar kewe osukosuk Muun Kot chok mi tongeni pwakiniir. Apposa letipom pwe kopwe ekiekoch ussun aramas meinisin kopwe fos ngeniir, pun kese silei io epwe etiwa ewe poraus. Neman emon kopwe fos ngeni a keran wes an tingor alillis lon iotek pwe emon epwe alisi!
Mwokutukut Fan Tong
8 Ewe kapas allim Jises a esilefeili a weneiti fisitaan letipen Kot, piniloon itan, me aitochchun pwungun an nemenem—ekkewe popun alongolongun kapwung mi lamot seni meinisin fan iten aramas. (Mattu 6:9, 10) Pokiten a tongei Seman, Jises a mochen tuppwol tori malo me a mochen afalafalaochu porausen ewe Muu mi tongeni pwakini ekkena popun alongolongun kapwung. (Jon 14:31) Pokiten a pwal ina ussun met noun Jises kewe chon kaeo ra mochen fori, ir mi tinikken lon ewe angangen afalafal. Ewe aposel Jon a apasa: “Pun iei weween ewe tongen Kot, pwe sipwe alleasochisi an kewe alluk,” kapachelong ewe alluk pwe sipwe afalafala ewe kapas allim me foralo chon kaeo.—1 Jon 5:3; Mattu 28:19, 20.
9 Jises a ereni noun kewe chon kaeo: “Are oua tongeiei, iwe, oupwe alleasochisi ai kewe alluk. Ewe mi wor ai kewe alluk ren o mi alleasochisi ir, ina i mi tongeiei.” (Jon 14:15, 21) Iwe, ach tongei Jises epwe amwokutukich le afalafala ewe enlet me alleasochisi ekkewe ekkoch mettoch Jises a alluk ngenikich. Fan eu, lupwen a pwalo ngeni aramas mwirin an manausefal, Jises a pesei Piter: “Amongooni nei kewe kukkun siip. . . . Foleni nei kewe kukkun siip. . . . Amongooni nei kewe kukkun siip.” Met epwe efisi an Piter fori ena? Jises a pwisin polueni ena kapas eis ren ifa ussun a ekkeisini Piter: “Ke tongeiei? . . . En mi tongeiei? . . . En mi acheniei?” Ewer, an Piter tong fan iten Jises, me an acheni Jises, epwe efisi an mochen afalafalaochu ewe kapas allim me kutta noun Jises “kukkun siip,” me mwirin foleniochuur lon pekin ngun.—Jon 21:15-17, NW.
10 Ikenai, sise tongeni chiechi ngeni Jises ussun chok Piter a fori. Iwe nge, sia weweochuuti met Jises a fori fan itach. A chung letipach ren ewe tong a emmwen ngeni Jises an epwe “malo fan asengesin aramas meinisin.” (Ipru 2:9; Jon 15:13) Meefiach a ussun chok meefien Paul lupwen a makkei: “Pun ewe tongen Kot [an Kraist tong, NW] a nemenikich, . . . O atewe a malo fan asengesin aramas meinisin, pwe ir mi chuen manau resap manau ngeni pwisin ir, nge ngeni atewe mi malo.” (2 Korint 5:14, 15) Sia pwaralo pwe an Jises tong a lamot ngenikich me sia pwaralo ach tongei ren ach alamota wiisach le afalafalaochchu ewe kapas allim. (1 Jon 2:3-5) Sisap tenechepwak ngeni ewe angangen afalafal, ussun ita pwe ese kon watte lamoten an Jises asor ngenikich.—Ipru 10:29.
Akkomwa Minne Mi Lamot
11 Lupwen Jises a nonnom mwen Pailat, a apasa: “Iei popun ua uputiu, pwal iei popun ua feitiu fonufan, pwe upwe pwarata usun ewe enlet.” (Jon 18:37) Jises ese mut ngeni och mettoch an epwe arikalo i seni an pwarata ewe enlet. Ina letipen Kot fan iten Jises.
12 Setan a sotuni Jises won ena. Ekis chok mwirin an papatais, Setan a pesei Jises an epwe wiliiti emon mi foummong lon fonufan ren an ngeni i “muun fonufan meinisin me linger.” (Mattu 4:8, 9) Mwirin ena, ekkewe chon Jus ra mochen seikata Jises pwe epwe king. (Jon 6:15) Eli ekkoch ra ekieki ussun watteen ewe alillis epwe kawor ika Jises a fen wiliiti king won fonufan. Iwe nge, Jises a tunalo ena esin ekiek. A akkomwa wiisan le pwarata ussun ewe enlet.
13 Pwal och, chechchei wou me pisek ese fen arikalo an Jises ekiek seni an angang. Ina popun manauan ese nikinikin manauen emon chon fonufan mi wouoch. Ese pwal mwo wor pwisin imwan. A apasa: “Mi wor pwangen ekkewe foks, o fasen ekkewe mansusu fan lang; nge esor leenien ewe Noun-Aramas an epwe akonalo mokuran.” (Mattu 8:20) Lupwen Jises a malo, ewe chok pisek mi auchea a nom ren Jises ina ufan we ekkewe sounfiun Rom ra utut won. (Jon 19:23, 24) Weween pwe esor lamoten manauen Jises? Aapwi!
14 Met Jises a fen apwonueta lon manauan a fokkun lapalap seni met emon mwan mi wouoch lap seni meinisin me achocho le akkalisi chon woungau a tongeni fori. Paul a apasa: “Pun oua sinei usun ewe chenin ach Samol Jises Kraist, inaamwo ika i mi pisekisek, nge a fen woungauelo fan asengesimi, pwe ami oupwe pisekisekilo ren an we woungau.” (2 Korint 8:9; Filipai 2:5-8) Inaamwo ika Jises a woungau nge, a atufichi chokkewe mi tipetekison ar repwe unusochulo me pwapwaiti manau esemuch. A ifa me watteen ach kilisou ngeni i! Me a ifa me watteen ach pwapwaiti ewe feioch Jises a angei pokiten an akkomwa letipen Kot!—Kol Fel 40:8; Fofor 2:32, 33, 36.
15 Chechchei wou me pisek ese arikalo ekiekin ekkewe chon Kraist mi mochen appiru Jises seni ar angang. (1 Timoti 6:9, 10) Ra silei pwe wou me pisek ra tongeni akinamwelo manauer nge, ra silei pwe ekkena mettoch resap atoto ngeniir manau esemuch. Lupwen emon chon Kraist a malo, woun ese chuen auchea ngeni ussun chok ufen Jises ese chuen wor aucheaan ngeni i mwirin an malo. (An Salomon Afalafal 2:10, 11, 17-19; 7:12) Lupwen emon chon Kraist a malo, ewe chok mettoch mi chuen auchea ngeni ina an chiechioch me Jiowa me Jises Kraist.—Mattu 6:19-21; Luk 16:9.
Sap Ppet Ren Chon U Ngenikich
16 Ese fen kisikisitiu an Jises pwarata ewe enlet pokiten an aramas u ngeni i. Pwal mwo nge an silei pwe epwe malo ussun chok eu asor le muchuloon an angangen afalafal won fonufan ese arikalo i seni ena angang. Paul a apasa pwe Jises a “likiitu won ewe irapenges pokiten ewe pwapwa mi nom mwen i, ese mo lolileniesini asauan, o a mottiu pelimwanin ewe leenien motun Kot.” (Ipru 12:2) Nengeni pwe Jises “ese mo lolileniesini asauan.” Ese osukosuk ren met aramas ra eani ekiek ussun i. A unusen akkomwa an foffori letipen Kot.
17 Paul a menlapei ewe lesen mi lamot seni an Jises likiitu lupwen a pesei ekkewe chon Kraist: “Oupwe ekieki usun atewe mi likiitu lupwen ekkewe chon tipis ra u ngeni i iei usun, pwe ousap chipwangelo, are apwangapwangelo, lon ngunumi.” (Ipru 12:3) Ren enletin sia tongeni molululo pokiten an aramas u ngenikich me esiitakich iteiten ran. Ach u ngeni etipetipaen lingen fonufan a tongeni amolulukich me sia pwal tongeni molu pokiten an aramasach peppeseikich le alamota minne a nonnom lon fonufan. Iwe nge, ussun chok Jises, sia kutta alillis seni Jiowa me sia apposa letipach le kutta loom ewe Muu.—Mattu 6:33; Rom 15:13; 1 Korint 2:4.
18 Pwe Jises esap kkul seni wiisan a pwalo lupwen a ereni ekkewe chon kaeo pwe epwe malo. Piter a apasa “apwi” me “esap mo fis reom.” Jises ese auselinga och poraus a tongeni apwangapwangalo an uppos le fori letipen Jiowa. A kkulu seni Piter me a apasa: “Sulo le sokuri, Satan! En mi minen oturukapaei, pun kose tipeni usun mettochun Kot pwe mettochun aramas chok.” (Mattu 16:21-23) Amwo epwe ina ussun ach uppos le poutalo ena esin ekiekin aramas. Sipwe kukkutta emmwen seni ekiekin Jiowa.
A Wato Feioch Mi Enlet
19 Jises a fori chommong manaman ren an epwe anneta pwe i ewe Messaia. A pwal mwo nge amanauasefallieta aramas. Chommong ra feito ren ar repwe katol ekkewe manaman, nge Jises ese feitiu fonufan ren an epwe chok alisi aramas lon pekin aion. A feito ren an epwe pwarata ussun ewe enlet. A silei pwe ewe alillis lon pekin aion a awora esap nomofocholo. Pwal mwo chokkewe ra manausefal repwe malo sefal. A tongeni alisi aramas ar repwe angei manau esemuch ren chok an pwarata ussun ewe enlet.—Luk 18:28-30.
20 Ikenai, ekkoch aramas ra sotun appiru an Jises kewe foffor murinno ren ar aueta pioing are ren kaworen alillis ngeni aramas mi woungau. Fan ekkoch ra wattiu moni watte ren ar repwe fori ekkena mettoch me ra fokkun tongei aramas mi osupwang; nge ewe alillis ra awora esap nomofocholo. Muun Kot chok a tongeni awora alillis mi nomofocholo. Ina popun Chon Pwarata Jiowa ra akkomwa ar pwarata ewe enlet ussun Muun Kot ussun chok Jises a fori.
21 Pwungun pwe chon Kraist ra alisi aramas. Paul a makkei: “Iei minne, lupwen epwe wor ach fansoun sipwe fofor-murinno ngeni aramas meinisin, nge lapaloon ngeni chon ewe einangen luku.” (Kalesia 6:10) Lon fansoun osukosuk are lupwen emon a osupwang, sise mochen pireir le “foffor-murinno” ngeni chon oruch are pwiich kewe chon Kraist. Iwe nge, sia chuen akkomwa ach afalafala ewe enlet.
Kaeo Seni An Jises Leenien Appiru
22 Paul a makkei: “Riaffou ngeniei are usap arongafetalei ewe kapas allim.” (1 Korint 9:16) Paul ese tenechepwak ngeni ewe kapas allim pokiten an afalafal a wewe ngeni manau fan itan me chokkewe mi auseling. (1 Timoti 4:16) Ach ekiek ussun ewe angangen afalafal a ussun chok an Paul ekiek. Sia mochen pwaralo ach tong fan iten Jiowa. Sia mochen anneta pwe sia tongei Jises me pwaralo ach kilisou ren watteen an tongeikich. Ina popun sia afalafala ewe kapas allim me sise “chuen manau ren mochenian aramas, pwe ren letipen Kot.”—1 Piter 4:1, 2.
23 Ussun chok Jises, sise tanechelo seni ach angang lupwen aramas ra esiitakich are asukichelo fan song. Sia kaeo eu lesen seni ewe manaman Jises a fori lupwen a ereni Piter pwe epwe tapwelo mwirin. Sia miritiiti pwe ika sia alleasochisi Jises me ussun ita oturatiu nouch cheu, pwal mwo nge lon ekkewe leeni ikewe sise luku a wor iik ie, eli sia tongeni liap. Chommong chon attau chon Kraist ra fen liap mwirin fitu ierin ar attau ia a ussun ita esor iik ie. Pwal ekkoch ra fen feilo ia a wor chommong iik me ra pwal liap ikena ie. Ese lifilifil met sia fori, sisap ukutiu seni ach oturatiu nouch cheu. Sia silei pwe Jises esaamwo apasa pwe a wes ewe angangen afalafal lon ekkoch kinikinin fonufan.—Mattu 24:14.
24 Lap seni wonu milion Chon Pwarata Jiowa ra achocho lon lap seni 230 fonu. Ewe Leenien Mas, minen February 1, 2005 epwe kapachelong ewe repotun ar angangen afalafal won unusen fonufan atun ewe 2004 service year. Ei repot epwe pwaralo watteen an Jiowa feioch won ei angangen afalafal. Atun ewe fansoun lusun fan iten ei otot minen loom, amwo sipwe amwochu an Paul kewe kapas mi alololakicheta: “Kopwe esineifeili ewe kapas; kopwe achocho ngeni.”—(2 Timoti 4:2) Amwo sipwe likiitu le afalafalaochu aramas tori ewe fansoun Jiowa a apasa pwe a wes ewe angang.
En Mi Tongeni Polueni?
• Ifa ussun sia tongeni feioch seni ewe kait Jises a awora ngeni noun kewe chon kaeo?
• Ifa ekiekin Jises ussun ekkewe aramas a afalafaleer?
• Met a amwokutukich le afalafalaochu ewe kapas allim?
• Ifa ussun sia tongeni akkomwa le fori letipen Kot, ussun chok Jises?
[Ekkewe kapas eis fan iten ewe lesen]
1, 2. Ifa wiisen Piter, me io a awiisa ngeni?
3. Met a fis lupwen Jises a etiwa Piter an epwe fiti i?
4. (a) Ifa ussun Jises a fen alisi noun kewe ar repwe ammonlata le afalafal? (b) Ifa ussun sia tongeni alollofengenni ewe angangen afalafal noun Jises kewe chon kaeo loom ra eani ngeni ach angangen afalafal ikenai?
5. Ifa ussun sia tongeni feioch seni ewe kait Jises a awora ngeni noun kewe chon kaeo?
6, 7. Ifa lapalapen Jises mi asopwochu an angangen afalafal, me ifa ussun sia tongeni appiru Jises ren ena?
8. Ussun chok Jises, met a amwokutu noun kewe chon kaeo ar repwe esileifeili ewe kapas allim?
9, 10. Lukun ar tong fan iten Kot, menni tong a amwokutukich ach sipwe afalafalaochu ewe kapas allim?
11, 12. Met popun Jises a feito fonufan, me ifa ussun a akkomwa an we angang mi lamot?
13, 14. (a) Met ese tongeni arikalo Jises seni an angang mi lamot? (b) Inaamwo ika Jises a woungau nge, met a apwonueta ren an angang?
15. Met a fokkun auchea lap seni wou me pisek?
16. Ifa ussun Jises a likiitu fan riaffou?
17. Met sia tongeni kaeo seni an Jises likiitu?
18. Ifa ewe lesen mi murinno sia tongeni kaeo seni an Jises kewe kapas ngeni Piter?
19. Inaamwo ika Jises a fen fori chommong manaman nge, ifa ewe mettoch mi lamot seni meinisin lon an angangen afalafal?
20, 21. Ifa ussun ekkewe chon Kraist repwe itepok me ruuepek ren ar kewe foffor murinno?
22. Met popun chon Kraist ra afalafal ngeni chon orur kewe?
23, 24. (a) Ifa ewe lesen sia kaeo seni ewe manamanen ekkewe iik? (b) Io kewe ikenai ra afalafalaochu ewe kapas allim?
[Lios lon pekin taropwe 24]
Seni lon ei ier, ewe Repotun Afalafal an Chon Pwarata Jiowa esap nonnom lon Ewe Leenien Mas, minen January. Epwe kapachelong lon ewe minen February 1.
[Lios lon pekin taropwe 25]
Sipwe sopwoch lon ach angangen afalafal ika sia tongei aramas ussun chok Jises a tonger
[Lios lon pekin taropwe 26]
Jises a feito fonufan akkaewin ren an epwe pwarata ussun ewe enlet
[Lios lon pekin taropwe 27]
Ekkewe Chon Pwarata Jiowa ra akkomwa ar afalafalochu ewe kapas allim