“Oua Fen Amomoto Ren Eu Liwinin”
“Pun ami oua fen amomoto ren eu liwinin. Iei minne, oupwe alinga Kot ren inisimi.”—1 KORINT 6:20.
“ANGANG fan echchimw a choufetal me loom,” alon ewe Holman Illustrated Bible Dictionary. A pwal mak lon ena puk: “Wouochun Isip, Kris, me Rom a alongolong won angang fan echchimw. Lon fansoun ekkewe popun chon Kraist, emon seni iteiten ulumon lon Italy me emon seni iteiten limon lon ekkewe ekkoch fonu ra angang fan echchimw.”
2 Mei wor angang fan echchimw lon Israel loom nge, ewe Allukun Moses a tumunu ekkewe chon angang chon Ipru. Ren chok awewe, ewe Alluk a affata pwe ukuukun ttamen emon chon Israel epwe angang fan echchimw esap lu seni wonu ier. Lon ewe afisuen ier, atewe epwe “ngasala, nge esap monatiu och.” Nge ekkewe alluk mi weneiti ekkewe chon angang fan echchimw ra fokkun kirokiroch me pwung pwe ei alluk a kapachelong lon an Moses kewe alluk: “Nge are ewe chon angang epwe apasa, ‘Ua tongei ai samol pwal pwuluei me nei, usap mochen ngasala, murin, an we samol epwe emwenala lon imwenfel ren Kot. Epwe anomu lon ewe asamalap ika ren uren ewe asamalap o pwangeni selingan ngeni efoch pwangapwang. Murin i epwe chon angang ngeni an we samol lon ranin manauan meinisin.”—Ekistos 21:2-6; Lefitikos 25:42, 43; Tuteronomi 15:12-18.
3 Ei kokkot pwe emon a tongeni filata an epwe angang fan echchimw, a alisata ach weweiti ewe sokkun angang fan echchimw fan iten chon Kraist. Ren chok awewe, ekkewe soumak Paipel iter, Paul, Jemes, Piter, me Juta, ra apasa pwe ir noun Kot me noun Kraist chon angang fan echchimw. (Taitos 1:1; Jemes 1:1; 2 Piter 1:1; Juta 1) Paul a achema ngeni ekkewe chon Kraist lon Tesalonika pwe ra fen ‘sap ngeni Kot seni ekkewe ununun anu, pwe repwe angang ngeni ewe Kot mi manau o enlet.’ (1 Tesalonika 1:9) Met popun ekkena chon Kraist ra mochen angang ngeni Kot fan echchimw? Iwe, met a amwokutu emon chon angang lon Israel an epwe fangolo an ngaselo? Esap pokiten a tongei noun we masta? An ekkewe chon Kraist angang fan echchimw a alongolong won tong fan iten Kot. Lupwen sia silei me tongei ewe Kot mi manau me enlet, sia mochen angang ngeni ‘seni unusen lelukach me unusen ngunuch.’ (Tuteronomi 10:12, 13) Iwe, met a kapachelong lon ach wiliiti noun Kot me noun Kraist chon angang fan echchimw? Me ifa ussun a weneiti manauach ran me ran?
“Fori Mettoch Meinisin Pwe Oupwe Alingalo Kot Ren”
4 Iei weween chon angang fan echchimw: “Emon mi ussun chok pisekin pwal emon me ren alluk me a wiisen unusen alleasochis.” Sia wiliiti pisekin Jiowa me ren alluk lupwen sia fangolo manauach me papatais. Ewe aposel Paul a awewei: “Ami ousap pwisin noumi. Pun ami oua fen amomoto ren eu liwinin.” (1 Korint 6:19, 20) Pwungun pwe ena liwinin ina an Jises Kraist asor, ewe moon kepichilo, pokiten ina longolongun an Kot etiwakich ussun chok noun kewe chon angang, ese lifilifil ika kich chon Kraist mi kepit are chiechier kewe mi apilukulukun manau won fonufan. (Efisus 1:7; 2:13; Pwarata 5:9) Iwe, seni ewe fansoun sia papatais, “sia chok noun ewe Samol.” (Rom 14:8) Pokiten kich mi kamoto ren chchaan Jises Kraist mi fokkun auchea, kich pwal noun kewe chon angang me sia wiisen alleasochisi an kewe alluk.—1 Piter 1:18, 19.
5 Ekkewe chon angang fan echchimw repwe alleasochisi ewe masta. Sia pukun filata pwe sipwe angang pokiten tong fan iten ewe Masta. Iei met a mak lon 1 Jon 5:3: “Iei weween ewe tongen Kot, pwe sipwe alleasochisi an kewe alluk, o an kewe alluk rese mo chourek.” Iwe, fan itach, ach alleasochis a ussun chok pisekin annet pwe sia tongei me anomukich fan Kot. A pwapwalo lon mettoch meinisin sia fori. Paul a apasa: “Ika ami oupwe mongo are un, are fori och mettoch, oupwe chok fori mettoch meinisin pwe oupwe alinga Kot ren.” (1 Korint 10:31) Lon manauach iteiten ran, pwal mwo nge lon ekkewe mettoch mi kukkun, sia mochen pwarata pwe sia “angang ngeni ewe Samol.”—Rom 12:11.
6 Awewe chok, lupwen a wor eu kefil sia pwungupwung won, sipwe chechchemeni letipen ewe Masta lon lang, Jiowa. (Malakai 1:6) Ekkewe kefil watte ra tongeni sotuni ach alleasochis ngeni Kot. Kopwe auselinga an we fon mwen om kopwe auselinga ekiekin letipom mi “atuputup” me “ingau”? (Jeremaia 17:9) Melisa, emon fin Kraist mi lipich, a keran papatais lupwen emon anuwol a poputa le fos ngeni. A nikinikin och lapalapan kewe, me a kakkaeo ewe Paipel ren chon Pwarata Jiowa. Iwe nge, emon elter a fos ngeni Melisa ussun an auselinga an Jiowa alluk pwe epwe pupulu “lon chok ewe Samol.” (1 Korint 7:39; 2 Korint 6:14) Melisa a apasa: “Ese mecheres ai upwe etiwa an we poraus. Nge ua ekieki pwe pokiten ua fen pwon ngeni Kot pwe upwe fori letipan, upwe fori alon an ewe elter emmwen. Iwe, ua pwapwa pwe ua auseling. Ewe mwan a ukutiu seni an kaeo. Ika ua fen sopweilo lon ai chiechi ngeni, iwe, iei upwe pupulu ngeni emon chon lukun.”
7 Pokiten kich noun Kot chon angang, sisap wiliiti noun aramas chon angang. (1 Korint 7:23) Ren enletin, kich meinisin sia mochen pwe aramas repwe saanikich, nge sipwe chechchemeni pwe an chon Kraist kewe minen aukuk ra fokkun sokkolo me an ewe fonufan. Paul a eani ei kapas eis: “Ua chari aramas?” Iei ifa ussun a polueni an kapas eis: “Nge ika ua chuen apwapwai aramas, esap ngang emon chon angangen Kraist.” (Kalesia 1:10) Ese pwung ach fang fan etipetipaen aramas ren ach sipwe chaachaari aramas. Iwe, met sia tongeni fori lupwen aramas ra echchimw le fori minne ra fori?
8 Ekieki mwo met Elena, emon chon Kraist sarafo lon Spein, a fori. Mei wor fitemon chiechian chon sukul ra mochen fangolo chchaar lon pioing. Ra silei pwe Elena, emon Chon Pwarata Jiowa, esap fangolo chchaan are IV chcha. Lupwen a tongeni awewe ewe popun ese mochen fori ena, Elena a apasa pwe epwe awewe ngeni unusen ewe class. Elena a apasa: “Ua niu. Nge ua ammonlataochu met upwe apasa me ua pwapwa ren sopwochun ai afalafal. Chommong ekkewe chon sukul ra sufoliitiei, me ewe sense a apasa pwe ewe angang ua fori mi murinno. Lap seni meinisin ua meefi ai pwapwa pokiten ua aitochu iten Jiowa me ua tongeni awewei ewe popun ua luku seni Paipel.” (Keneses 9:3, 4; Fofor 15:28, 29) Iwe, pokiten kich noun Kot me Kraist chon angang, kich aramas mi sokkolo. Iwe nge, sia tongeni winneni sufol seni aramas ika sia awewei ach kewe luku fan sufol.—1 Piter 3:15.
9 Ach chechchemeni pwe kich noun Kot chon angang a tongeni alisata tekisoson. Fan eu, lupwen ewe aposel Jon a unusen ingelo ren eu langepwi mi amwarar ussun lingen Jerusalem lon lang, a mochen fel ngeni ewe chonlang a fos fan iten Kot. Ewe chonlang a ereni Jon: “Kosap ina! Ngang emon chienom chon angang pwal chienen pwiom kewe soufos, pwal chienen ir mi amwochu kapasen ei puk. Kopwe chok fel ngeni Kot.” (Pwarata 22:8, 9) A ifa me murinnoon ei pisekin nengeni fan iten noun Kot kewe chon angang meinisin! Eli ekkoch chon Kraist a wor wiiser kewe mi sokkolo lapalaper lon ewe mwichefel. Iwe nge, Jises a apasa: “Are emon a mochen pwe epwe lapalap leimi, iwe, epwe chok noumi chon alilis; o are emon epwe mochen nampa eu leimi, iwe epwe chok noumi chon angang.” (Mattu 20:26, 27) Pokiten kich noun Jises kewe chon kaeo, kich meinisin sia ussun chok chon angang fan echchimw.
‘Sia Chok Fori Minne Wisach’
10 Ese kan mecheres fan iten aramas rese unusoch ar repwe fori letipen Kot. Ewe soufos Moses a pireir le alleasochis lupwen Jiowa a era pwe epwe feilo emmwenawu noun Israel kewe seni ar fotek lon Isip. (Ekistos 3:10, 11; 4:1, 10) Lupwen Jona a angei wiisan le esile ngeni chon Ninefa porausen an Kot kapwung, a “monatiu liwinin an sai won ewe sip pwe epwe fiti tori Tarsis, pun a mochen su seni fan mesen ewe Samol mi Lapalap.” (Sona 1:2, 3) Paruk, noun Jeremaia seketeri, a era pwe a molululo. (Jeremaia 45:2, 3) Met sipwe fori lupwen pwisin ach mochen a u ngeni ach fori letipen Kot? Eu me lein an Jises kewe kapas monomon epwe polueni ena kapas eis.
11 Jises a fos ussun emon chon angang fan echchimw a wiisen mammasa noun ewe masta pwin siip unusen ewe ran lon ewe masies. Lupwen ewe chon angang a liwin, a molulu seni an angang weires ren 12 awa, nge noun we masta ese etiwa an epwe mottiu me ani anen mongo le pwin. Nge, ewe masta a apasa: “Kopwe ammolata ai mongoon lekuniol, o rifengenni pwisin lukanapom o atenekiei, tori ai upwe mongo o un. Iwe, mwirin, kopwap mongo o un.” Ewe chon angang epwe tumunu an kewe osupwang mwirin an fori angangen an we masta. Iei alon Jises le muchuloon an kapas awewe: “Iwe, pwal ami usun chok, mwirin oua forata mettoch meinisin minne a fen allukatiu ngenikemi, oupwe chok apasa, ‘Am chon angang mi chok mwal; sia chok forata minne wisem.’ ”—Luk 17:7-10.
12 Jises ese apasawu ei kapas monomon ren an epwe affata pwe Jiowa ese afanni ewe angang sia fori fan itan. A ffat ei poraus lon ewe Paipel: “Pun Kot mi pung, o esap monukalo ami angang me tong fan asengesin itan.” (Ipru 6:10) Ewe poraus mi lamot lon ewe kapas monomon pwe emon chon angang ese tongeni apwapwai pwisin i are achocho ngeni kinamween manauan. Lupwen sia fangolo manauach ngeni Kot me filata pwe sipwe noun kewe chon angang fan echchimw, sia tipeeu pwe letipan epwe akkom mwen pwisin letipach. Sipwe anomu letipach fan letipen Kot.
13 Eli ach kakkaeo ewe Paipel me ekkewe puk me chassi mi kawor seni “ewe chon angang mi tuppwel o tipatchem” a weires ngenikich. (Mattu 24:45) Neman a ina ussuch ika a weires ngenikich allea are ika eu puk a awewe won “ekkewe le olololun Kot.” (1 Korint 2:10) Nge sisap akkota fansoun fan iten kaeo? Neman sipwe echchimwa pwisin kich ach sipwe mottiu me ekiekifichi ewe poraus. Iwe nge, ika sise fori ena, ifa ussun sipwe mwoneiti “ewe mongo pochokkul a och ngeni aramas asimau”?—Ipru 5:14.
14 Iwe, ifa ussun ekkewe fansoun sia liwinlo imwach me sia fokkun molulu mwirin eu ranin angang? Eli epwe lamot ach pwisin erianikich le fiti ewe mwich. Are afalafal ngeni aramas sise sissileer a fokkun weires ngenikich. Paul a pwal miritiiti pwe fan ekkoch sipwe afalafal ‘sap seni lon pwisin letipach.’ (1 Korint 9:17) Iwe, sia fori ekkeei mettoch pokiten Jiowa—ach we Masta lon lang sia fokkun tongei—a apasa pwe ina met sipwe fori. Iwe, ifa ussun, sise kan pwapwa me pochokkuleta mwirin ach achocho le kaeo, fiti mwich, me feilo afalafal?—Kol Fel 1:1, 2; 122:1; 145:10-13.
Kosap “Nennesefalliti Mwirin”
15 A mmen amwarar ifa ussun Jises Kraist a pwaralo an sufoliiti nemenemen Seman we lon lang. Jises a ereni ekkewe chon kaeo: “Pun ua fen feitiu seni lang, nge esap ren ai upwe fori pwisin letipei, pwe letipen ewe emon mi tinieito.” (Jon 6:38) Lupwen a riaffou lon Ketsemeni, Jises a iotek: “Semei, are mi tufich, pwe ei kap epwe su seniei. Nge a wes rei, esap usun minne ngang ua mochen, pwe usun minne ka mochen.”—Mattu 26:39.
16 Jises Kraist a mochen pwe sipwe apwonueta alon filiach pwe sipwe noun Kot kewe chon angang. A apasa: “Are emon a iseta poun won plau, minen tu pwul, o epwe nennesefalliti mwirin, iwe, ese tufich ngeni muun Kot.” (Luk 9:62) Ach ekkekieki minne sia likitalo lupwen kich noun Kot chon angang ese pwung. Sipwe aucheaani winnach pokiten sia filata ach sipwe wiliiti noun Kot chon angang fan echchimw. Paul a mak ngeni ekkewe chon Filipai: “Ewer, upwe apasa pwe mettoch meinisin mi chok lus rei, pokiten upwe sinei Kraist Jises ai Samol mi lamot ngeniei lap seni mettoch meinisin. Fan iten i ua chok lus ren mettoch meinisin, o ua apasa pwe piipi chok, pwe upwe win ren Kraist.”—Filipai 3:8.
17 Ekieki mwo ekkewe mettoch meinisin Paul a likitalo me eani ekiek pwe ir ppiipi chok pokiten ekkewe feioch seni an wiliiti noun Kot chon angang fan echchimw. A likitalo manauan mi kinamwe me ewe tufichin wiliiti emon nouwis lon ewe lamalamen Jus. Ika Paul a likiitu lon ewe lamalamen Jus, eli epwe fen wiiseni eu wiis ussun chok an Simeon, noun, noun Paul we sense Kameliel, a wiiseni. (Fofor 22:3; Kalesia 1:14) Simeon a wiliiti chon emmweni ekkewe Farisi me a watte wiisan—inaamwo ika a wor an kewe tipemwaramwar—lon an ekkewe chon Jus u ngeni Rom lon 66-70 C.E. A malo lon ena maun, nge ese ffat ika chon Jus are sounfiuen Rom ra nnielo.
18 Chommong Chon Pwarata Jiowa ra tapwelo lon ipwen Paul kewe. Jean a apasa: “Ekkoch chok ier mwirin a wes ai sukul, ua wiiseni wiisen seketeri fan iten emon lawyer mi itefoulo lon London. Ua pwapwaiti ewe angang me a watte ai peioff, nge lon letipei, ua silei pwe ua tongeni alapalo ai angang fan iten Jiowa. Iwe, ua resign me ua poputa ai angang ussun chok emon pioneer. Ua fokkun kilisou pwe ina filiei 20 ier me loom! Ai angangen afalafal a fokkun efeiochu manauei lap seni ai angangen seketeri. Esor och mettoch a lollo ngeni ewe pwapwa ua meefi lupwen ua kuna ifa ussun an Jiowa we kapas a siwili manauen emon. Mi amwarar ach alisata ena siwil. Met sia fangolo fan iten ach sipwe angang ngeni Jiowa a fokkun kisikis seni met Jiowa a ngenikich.”
19 Nonnomun manauach a tongeni siwil. Iwe nge, ach fangolo manauach ngeni Kot ese siwil. Sia chuen noun Jiowa chon angang fan echchimw, nge Jiowa a mut ngeni ach pwisin filata ifa ussun sipwe aea ach fansoun, pochokkul, tufich, me wouch. Iwe, filiach ren ifa ussun sipwe angang ngeni Jiowa a pwaralo ukuukun ach tongei Kot. Filiach kewe repwe pwarata ukuukun ach tipemecheres le poutalo pwisin ach kewe mochen. (Mattu 6:33) Ese lifilifil lapalapen manauach nge, sisap uppos le fangolo ngeni Jiowa minne a nom rech mi murinno seni meinisin? Paul a makkei: “Pun are emon mi mochen epwe achengichengilo ren minne a wor ren, sap ren minne esor ren.”—2 Korint 8:12.
“Uwami Ewe Manau Mi Fel”
20 Sise riaffou pokiten kich noun Kot chon angang. Ei angang a sokkolo pokiten a atufichi ach su seni eu sokkun angang fan echchimw mi eriaffoukich me angei senikich pwapwa. Paul a makkei: “Oua fen ngaselo seni tipis, o oua wiliti chon angangen Kot, iwe, uwami ewe manau mi fel, o sopolon, ewe manau esemuch.” (Rom 6:22) Ach angang fan iten Kot a uwani uwa mi pin, weween pwe sia kini ekkewe feioch seni ach kewe foffor mi pin are limoch. Pwal och, a emmwen ngeni manau esemuch lon mwach kkan.
21 Jiowa a kisaseu ngeni noun kewe chon angang. Lupwen sia achocho lon an angang, Jiowa a “suki ekewe asammwachon lang” me a ninatiu wooch “sokun feioch mi somwola.” (Malakai 3:10) A ifa me watteen ach pwapwa lupwen sipwe angang ngeni Jiowa tori feilfeilo chok!
En Mi Chechchemeni?
• Met popun sia wiliiti noun Kot chon angang?
• Ifa ussun sia pwaralo pwe sia anomukich fan letipen Kot?
• Met popun sipwe mmonleta ach sipwe akkomwa letipen Kot mwen pwisin letipach?
• Met popun sisap “nennesefalliti mwirin”?
[Ekkewe kapas eis fan iten ewe lesen]
1, 2. (a) Me ren ewe Allukun Moses, ifa ussun ekkewe masta repwe tumunu ekkewe chon angang fan echchimw? (b) Menni kefil a nom ren emon chon angang a tongei noun we masta?
3. (a) Met sokkun angang fan echchimw ekkewe chon Kraist loom ra tipeeu ngeni? (b) Met a amwokutukich ach sipwe angang ngeni Kot?
4. Ifa ussun sia wiliiti chon angangen Kot me Kraist?
5. Pokiten kich noun Jiowa kewe chon angang fan echchimw, iwe, ifa wiisach akkom, me ifa ussun sia tongeni apwonueta?
6. Ifa ussun ach wiliiti noun Kot kewe chon angang a kku ekkewe kefil lon manauach? Apasawu poraus mi awewei ena.
7, 8. (a) Met popun sisap kon ekilapei ifa ussun aramas ra ekiek ussuch? (b) Awewei ifa ussun sia tongeni akkufu ach niueiti aramas.
9. Met sia kaeo seni ewe chonlang a pwa ngeni ewe aposel Jon?
10. Awewei won porausen aramas mi tuppwol ngeni Kot lon Paipel mi fori letipen Kot fan weires.
11, 12. (a) Awewei an Jises kapas monomon lon Luk 17:7-10. (b) Ikkefa ekkewe lesen sia angei seni an Jises kapas monomon?
13, 14. (a) Ineet sia wiisen akkufu pwisin ach kewe mochen? (b) Met popun sipwe mut ngeni letipen Kot an epwe pworacho ngeni letipach?
15. Ifa ewe leenien appiru Jises a isetiu ren an anomu fan Kot?
16, 17. (a) Epwe ifa ekiekich ussun ekkewe mettoch sia fen likitalo? (b) Awewei ifa ussun Paul a ekiekoch lupwen a apasa pwe an kewe tufich seni fonufan ra ussun chok “piipi.”
18. Awewei ifa ussun angang lon pekin ngun ra atoto feioch.
19. Sipwe apposa letipach ngeni met, me met popun?
20, 21. (a) Ifa ewe uwa noun Kot kewe chon angang ra uwani? (b) Ifa ussun Jiowa a efeiochu chokkewe mi fangolo ngeni minne mi murinno seni meinisin a nonnom reer?
[Lios lon pekin taropwe 12]
Ewe kokkot pwe emon a tongeni filata le wiliiti chon angang fan echchimw a liosueta an chon Kraist angang fan echchimw
[Lios lon pekin taropwe 13]
Sia wiliiti noun Kot kewe chon angang lupwen sia papatais
[Lios lon pekin taropwe 13]
Ekkewe chon Kraist ra akkomwa forien letipen Kot
[Lios lon pekin taropwe 14]
Moses a pireir le etiwa wiisan