Kopwe Pwäpwääraawu Lingen Kot Lon Manauom?

“Sia . . . pwäpwääraawu lingen Jiowa üssün chök kinasen ori.” ​—2 KORINT 3:18, NW.

LON eü fansoun, a pwää ngeni emön mwän och mettoch mi fokkun eingeing. Ewe mwän Moses a nom woon ewe Chuukun Sainai, nge a chök äläeemön, iwe, a mumutä an tingor mi sokkolo. A mumutä ngeni an epwe küna eü mettoch esor emön aramas mi küna fän eü, weween, lingen Jiowa. Pwüngün pwe Moses ese wesewesen küna Jiowa. A kon lingemwarar Kot, ina minne, aramas repwe mälo ika repwe küna i. Nge, Jiowa a apwölü ngeni Moses “pöün we” pwe epwe tümünü toori an a lulo seni, nge neman a nöünöü emön choonläng mi wiisen tupuni i. Iwe mwirin, Jiowa a mut ngeni Moses pwe epwe küna merettinen lingan, lingan we mi fel. Jiowa a pwal foos ngeni Moses me reen emön choonläng. A iei üssün än Paipel awewei minne a fis mwirin: “Iwe, Moses a feitiu seni won ewe chuk Sinai . . . [nge] won mesan a saramaram pokiten an kapasfengen me Kot.”​—Ekistos 33:18-34:7, 29.

² Kopwe anchaangei mwo pwe ka nom woon ena chuuk reen Moses. Epwe ifa me watteen amwaaraaren oom kopwe küna lingemwaararen ewe emön mi Unusen Tekia me aüseling ngeni aloon! Epwe ifa me watteen feiöchun oom kopwe mwimwmwin me Moses, ewe choon afföör lon ewe Allük fän iten eü pwon, atun an feitiu seni ewe Chuuk Sainai! Iwe nge, ka silei pwe choon Kraist mi enlet ra kan pwääraawu lingen Kot lon ekkooch lapalap mi watte seni än Moses pwääraawu lingan? Ena pworaaus enlet a mak lon echö taropwe ewe aposel Paul a makkei. A makkei pwe choon Kraist mi kepit ra kan “pwäpwääraawu lingen Jiowa üssün chök kinasen ori.” (2 Korint 3:7, 8, 18, NW) Lon pwal och weween, choon Kraist mi eäni ewe apilükülüküün ar repwe manau won fönüfan ra pwal pwäpwääraawu lingen Kot.

Ifa Üssün Choon Kraist ra Pwäpwääraawu Lingen Kot

³ Ifa üssün sipwe tongeni pwäpwääraawu lingen Kot lon manauach? Sise küna Jiowa are rong aloon üssün Moses. Iwe nge, sileach üssün Jiowa a watte seni sileen Moses. Jises a pwää lon wiisan we, wiisen Messaia arapaakkan 1,500 ier mwirin mäloon Moses. Ina minne, Moses ese tongeni silei ifa üssün ewe Allük epwap pwönütä lon manauen Jises, ewe mi mälo pwe epwe epichaalo aramas seni riäfföüün tipis me mälo. (Rom 5:20, 21; Kalesia 3:19) Pwal och, Moses a tongeni weweiiti ekis chök watteen än Jiowa we kokkot, ewe mi longolong woon ewe Mwüün Messaia me ewe Paratis woon fönüfan epwe atooto. Ina minne, sia küna lingen Jiowa, sap reen wesewesen mesach, nge reen mesach, mesen lükülük mi longolong woon ekkewe afalafal lon Paipel. Pwal och, sia roong leüwen Jiowa, sap reen an nöünöü emön choonläng, pwe reen ewe Paipel, nge äkkäeewin ekkewe Puken Pworaaus Allim, puun ra awewefichi aitien Jises kewe me an angaangen afalafal.

⁴ Inaamwo ika choon Kraist rese pwäpwääraawu lingen Kot reen an a ttinewu saram seni woon meseer, nge a üssün itä a meretittin meseer lupwen ra ereni aramas üssün lingemwaararen lapalapen Jiowa me an kewe kokkot. Ewe soufoos Aisea a oesini üssün ach ei fansoun pwe nöün Kot kewe aramas repwe “pwäratä äi ling lein chon ekewe mwün fanüfan.” (Aisea 66:19) Pwal och, iei aloon 2 Korint 4:​1, 2: “Pokiten sia eäni ei angangen afalafal . . . , sia fen poutalo ekkewe föfföör mi otuputup, föfföör mi asäü, iwe, sise eäni ekiek solä, me sise pwal amwäälli ewe kapasen Kot, nge reen ach pwäpwääraatä ewe enlet, sia aitöchu pwisin kich ngeni mwelien letipen aramas meinisin mwen mesen Kot.” Paul a äkkäeewin mak üssün choon Kraist mi kepit, puun ir “choon afalafal fän iten eü pwon sëëfö.” (2 Korint 3:6) Nge ar angaangen afalafal a fen kkü chommong aramas, iwe, chokana ra eäni ewe apilükülüküün ar repwe küna manau esemwüch woon fönüfan. Ewe angaangen afalafal ir me ruu ekkena küümi ra eäni a wewe ngeni ar pwäpwääraatä lingen Jiowa, esap chök lon minne ra eäni afalafal pwe pwal lon unusen manauer. Iei wiisach me feiöchuch, ach sipwe pwäpwääraatä lingen ewe Kot mi Unusen Tekia!

⁵ Lon ei fansoun, ewe pworaaus allim mi lingemwaarar, pworaaus allimen än Kot we Mwüü, a ekkesilefeil woon unusen fönüfan üssün Jises a oesini. (Mattu 24:14) Choon ekkewe mwüü, einang, fönü, me foos meinisin ra mwasangasangen etiwa ewe pworaaus allim me ra siiwili manaueer reen ar repwe fööri letipen Kot. (Rom 12:2; Pwäratä 7:9) Üssün chök ekkewe popun choon Kraist, resap tongeni ukutiu seni ar kapas üssün ekkewe mettoch ra fen küna me roong. (Föför 4:20) Lap seni wonu milion aramas ra pwäpwääraatä lingen Kot lon ei fansoun, nge ei üküükün a lap seni ekkewe fansoun loom meinisin lon uruwoon aramas. En emön leir? Wöüöchun nöün Kot kewe aramas lon peekin ngüün a wesewesen anneta pwe än Jiowa feiöch me tümün a nom reer. Pokiten an a wor choon appölüakich mi fokkun pöchökkül, iwe, a wenewenen pwäälo pwe än Jiowa ngüün mi fel a nom reech. Iei sipwe pii ewe popun ach apasa ena.

Esor Och Mettoch mi Tongeni Afanafaneloi Nöün Kot kewe Aramas

⁶ Sipwe erä pwe kopwe wiisen choon pwääraatä lon kapwüng ngeni emön choon ipweri allük mi fokkun ngaü. Ka silei pwe ena choon ipweri allük a eäni eü mwicheich mi fokkun pöchökkül, iwe, epwe äeä mettoch meinisin pwe epwe pinei oom pwääraatä tipisin. Reen oom kopwe tuufichin pwääraatä tipisin ena choon ipweri allük, epwe lamot oom kopwe pwora me pwal lükü pwe ewe mwüü epwe tümünük seni i. Sia üssün chök ena emön. Lupwen sia wiisen choon pwääraatä fän iten Jiowa me an kewe kokkot, sia kan atipisi Setan ewe Tefil, weween, sia pwääraatä pwe i emön choon nniielo aramas me emön choon kapas chofona mi otupu unusen fönüfan meinisin. (Jon 8:44; Pwäratä 12:9) Lükü me pwora ra lamot ngenikich fän iten ach sipwe tuufichin peni Jiowa me ü ngeni ewe Tefil.

⁷ Pwüngun pwe Jiowa ewe Emön mi Tekia Seni Meinisin. An manaman a fokkun lap seni än Setan. Sap minne sia chök wenewenen lükü pwe Jiowa a tuufichin tüttümünükich fansoun ach angaang ngeni fän tuppwöl, nge a pwal mwasangasang ngeni. (2 Kronika 16:9) Iwe nge, Setan a sou nemenem woon ekkewe timon me choon fönüfan mi imülo seni Kot. (Mattu 12:24, 26; Jon 14:30) Setan a fööfö orun fönüfan me an “song mi lap,” iwe, a ningeringerin ü ngeni nöün Jiowa kewe choon angaang me a nöünöü choon fönüfan mi nonnom fän nemenian pwe epwe sotuni le afanafaneloi meinisin mi akkafalafalala ewe pworaaus allim. (Pwäratä 12:​7-9, 12, 17) Ifa üssün a föffööri ena? A kan äeä ülüngat mettoch.

⁸ Eü mettoch Setan a kan sotuni le orukalo ach ekiek reen, iei ewe mettoch aürekin manau. Aramas lon ekkeei räänin le sopwoloon ra tongei moni, pwisin ir, me apwaapwaan fönüfan. Esap ir choon tongei Kot. (2 Timoti 3:1-4) Pokiten a lape ngeni aramas ar ra ekiek watte üssün nonnomur rään me rään, iwe, rese mochen käeö ekkewe pworaaus mi enlet lon Paipel. (Mattu 24:37-39) Ena sokkün ekiek mi tongeni chöüfetäl, iwe, epwe efisaatä chipwangelooch lon peekin ngüün. Ika sipwe amääraatä tongen pisek me apwaapwaan fönüfan lon letipach, epwe patalo ach tong ngeni Kot. ​—Mattu 24:12.

⁹ Ina popun, choon Kraist repwe piiöchu iö kkan repwe chiechi ngeni. King Solomon a makkei pwe “Eman mi chiechi ngeni aramas mi tipachem epwe tipachemela, nge eman mi chiechi ngeni ekewe chon tiparoch epwe feiengaü.” (An Salomon Fos 13:20) Amwo sipwe ‘mwimwmwin’ me ir kewe mi pwäpwääraawu lingen Kot. A feet mürinnöön ach föffööri ena mettoch! Lupwen sipwe chuchufengen me pwiich kewe lon ach kewe mwich me pwal ekkewe fitu fansoun, sia kan pöchökkületä reen ar tong, ar lükü, ar chengel, me watteen miritir. Ena sokkün chiechi mi mürinnö a kan alapaalo tipeppwosuch pwe sipwe likiitu lon ach angaangen afalafal.

¹⁰ Ewe oruuen mettoch Setan a äkkäeä reen an epwe aukaatiu än choon Kraist pwäpwääraawu lingen Kot, iei an äeä kapasen esiit. Sisap itä määirü reen ena. Fansoun Jises Kraist a afalafal woon fönüfan, aramas ra esiita i reen ar takiri, turunufasei, laleiti, me pwal mwo nge attufeiti. (Mark 5:40; Luk 16:14; 18:32) Ekkewe popun choon Kraist ra pwal küna esiit. (Föför 2:13; 17:32) Choon angaangen Jiowa lon ei fansoun ra pwal küna ena mettoch. Me reen ewe aposel Piter, aramas repwe eita ngeniir “soufoos chofona.” Piter a oesini pwe, “Lon ekkewe ränin le sopolon chon esiit repwe feito ren ar esiit, repwe tapwelo mwirin pwisin ar mochenia ingaü, o repwe apasa, ‘Ia pwonen an epwe feito? Pun . . . mettoch meinisin ra üsün we chök seni popun lom.’” (2 Piter 3:3, 4) Aramas ra esiita nöün Kot kewe aramas reen ar apasa pwe rese weweiiti enletin nonnomun aramas. Ra ekieki pwe a kon minen loom än Paipel kewe allük üssün föfföör mi limöch. Me reen ekiekin choommong, ewe pworaaus sia afalafala mi umwes. (1 Korint 1:18, 19) Pokiten kich choon Kraist, eli sipwe küna kapasen esiit lon sukul, lon ach leenien angaang, me pwal mwo nge seni choon ach famili. Sisap fangetä, nge sipwe pwäpwääraawu lingen Kot reen ach angaangen afalafal, puun üssün chök Jises, sia silei pwe än Kot we Kapas a enlet.​—Jon 17:17.

¹¹ Ewe aulungatin mettoch ewe Tefil a äkkäeä pwe epwe sotuni le aukaatiu ach angaang, iei än aramas ü ngenikich are eriäfföüükich. Iei aloon Jises ngeni nöün kewe choon käeö: “Lon ewe fansoun, repwe afangemä ämi lon riäfföü, o repwe nielo ämi; o ekkewe einang meinisin repwe oput ämi pokiten itei.” (Mattu 24:9) A enlet pwe pokiten kich Choon Pwääraatä Jiowa, a mmen watte än aramas eriäfföüükich lon choommong fönü. Sia silei pwe loom loom, Jiowa a oesini pwe epwe wor koput lefilen ir kewe mi angaang ngeni Kot me ir kewe mi angaang ngeni Setan ewe Tefil. (Keneses 3:15) Sia pwal silei pwe ika sipwe tuppwöl fän sossot, sia wiisen choon pwääraatä pwe a pwüng än Jiowa nemeni unuselapen läng me fönüfan. Ach silei ena epwe tongeni apöchökkülakich lon ekkewe sossot mi sokkolo watteer. Esap wor och riäfföü epwe tongeni pinei ach afalafal ika epwe ppwosolo letipach fän iten ach pwäpwääraawu lingen Kot.

¹² En mi kan fiffiu ngeni minne a kan luki letipen aramas woon ei fönüfan me en mi tuppwöl inaamwo ika aramas ra esiitok me ü ngonuk? Ika ina, iwe, a wor popun oom kopwe chengel. Iei än Jises kapasen alükülük ngeni nöün kewe choon käeö: “Ämi oupwe feiöch, lupwen repwe laleitikemi are eriäfföüükemi are chofonatä sokkün mi ingaü meinisin üssün ämi pokitei. Ämi oupwe chengel o pwapwa chapur, pun liwinimi epwe lapalap lon läng, pwe a iei üsün ar eriäfföü ekkewe soufosun lom, ekkewe mi akkom mwemi.” (Mattu 5:11, 12) Oom likiitu a anneta pwe än Jiowa we ngüün mi fel a nonnom woom, iwe, a apöchökkülok pwe kopwe tuufichin pwäpwääraawu lingan.​—2 Korint 12:9.

Ach Tuufichin Likiitu a Popu Seni Jiowa

¹³ Eü populapen ach sia likiitu lon ewe angaangen afalafal, iei ach tong ngeni Jiowa me ach pwaapwaaiiti ach sipwe pwäpwääraawu lingan. Aramas ra kan appirü ir kewe ra tongeer me süfölitiir, iwe, esor emön lukun Jiowa Kot mi fichiiti ach sipwe appirü. Pokiten an tong mi lapalap, a tinaatiu Nöün we ngeni fönüfan pwe epwe wiisen choon pwääraatä üssün minne mi enlet, me epwe pwal amanaua choon fönüfan mi alleasoochis. (Jon 3:16; 18:37) Üssün chök Kot, sia mochen pwe sokkün aramas meinisin repwe aier me küna manau, iwe, ina ewe popun sia afalafal ngeniir. (2 Piter 3:9) Mochenich na fitifëngen me ach uppwos le appirü Kot, a kan amwokutuukich pwe sipwe achoocho ngeni ach sipwe pwäpwääraawu lingan reen ach angaangen afalafal.

¹⁴ Iwe nge, ach pöchökkül fän iten ach sipwe tuufichin likiitu lon än choon Kraist angaangen afalafal a äkkäeewin popu seni Jiowa. A kan alikiitukich me apöchökkülaakich reen an we ngüün mi fel, an we mwicheich, me an we Kapas, ewe Paipel. Jiowa a “alikiitü” ir kewe mi mochen pwäpwääraawu lingan. A kan pölüeni ach kewe iotek me a emiritiikich pwe sipwe tuufichin ataweei ach kewe sossot. (Rom 15:5; Jemes 1:5) Pwal och, Jiowa ese mut ngenikich ach sipwe küna eü sossot esap ki reech. Ika sipwe anomu ach lükülük woon Jiowa, epwe awora ewe alen ngaselo pwe sipwe tuufichin sopweelo ach pwäpwääraawu lingan.​—1 Korint 10:13.

¹⁵ Likiituuch lon ach angaangen afalafal a anneta pwe än Kot we ngüün mi fel a nonnom wooch. Awewe chök, sipwe erä pwe emön a tingoreok pwe kopwe einetifetalei och sokkün pilawa ngeni imw meinisin, nge esap kamö. A eronuk pwe esap wor liwinum me epwe watte ewe fansoun kopwe äeä fän iten ena angaang. Pwal eü, ekiselo mwirin ka küna pwe ekkoch chök aramas ra mochen angei ena pilawa, iwe, ekkoch ra pwal mwo nge oput oom einetifetalei. Oom ekiek pwe kopwe tongeni sopweelo oom föffööri ena angaang fansoun langattam? Neman kosap tongeni. Iwe nge, eli ka fen achoocho le ekkesilefeili ewe pworaaus allim fite, fite ier reen oom awora watteen oom fansoun ngeni, me ka nöünöü pwisin noum moni . Meet popun? Esap pokiten oom tongei Jiowa, iwe, reen an we ngüün mi fel a efeiöchu oom achoocho reen an alisuk pwe kopwe likiitu? Ewer, fokkun ina!

Eü Angaang Sipwe Chechchemeni Fansoun Meinisin

¹⁶ Ewe angaangen afalafal fän iten ewe pwon sëëfö eü liffang sisap tongeni aüküükü aücheeaan. (2 Korint 4:7) Pwal üssün chök, än choon Kraist angaangen afalafal ekkewe pwal fitemön siip ra föffööri woon unusen fönüfan eü mettoch mi fokkun aücheea. Fansoun kopwe likiitu lon oom angaangen afalafal, kopwe tuufichin “amanaua pwisin en o pwal ir ekkewe mi aüseling en.” (1 Timoti 4:16) Ekieki mwo weween ena mettoch. Ewe pworaaus allim ka akkafalafala a suuki ngeni aramas ewe apilükülüküün manau esemwüch. En mi tongeni föraatä ewe sokkün chiechi mi fokkun pöchökkül lefilemi me ir kewe ka alisiir le käeö Paipel. Ekieki ika epwe ifa me watteen oom pwaapwa ika kopwe nonnom lon Paratis toori feilfeilo chök reen ir kewe ka alisiir le käeö üssün Kot! Ese mwääl resap mönuki oom achoocho le alisiir. Epwe ifa me watteen oom pwaapwa!

¹⁷ Ka manau lon eü fansoun mi sokkolo aücheeaan lon uruwoon aramas. Esap chüen fissefääl esilefetälin ewe pworaaus allim lein choon fönüfan mi towau seni Kot. Noa a manau lein aramas mi ina üssün, iwe, a küna moroloon chokana. Ese mwääl a chengel reen an silei pwe a tuppwöl le apwönüüetä letipen Kot, nge letipan an epwe fööri eü waaimw, iwe, ina ewe minen amanaua ir me choon an we famili! (Ipru 11:7) En mi pwal tongeni eäni ena sokkün chengel. Ekieki mwo ika epwe feet meefiom lupwen kopwe nesefääliiti oom angaang lon ekkeei räänin le sopwoloon me weweiti pwe ka achoocho üküükün oom tuufich fän iten angaangen ewe Mwüü.

¹⁸ Iwe, amwo sipwe pwäpwääraawu lingen Kot fansoun meinisin. Toori feilfeilo chök sipwe chechchemeni ach fööri ena angaang. Jiowa a pwal chechchemeni ach angaang. Iei eü kapas mi apöchökkülaakich lon Paipel: “Pun Kot mi pung, o esap monukalo ämi angang me tong fän asengesin itan, mi ämi oua pwäralo lon ämi angang ngeni ekkewe aramas mi fel, seni lom tori ikenai. O äm aua mochen pwe emön me emön leimi oupwe pwäratä ewe chök sokkun achocho pwe oupwe küna uren ach apilükülük allim tori le sopwolon, o ousap chipwang, nge oupwe appiru ekkewe chon alemwiri ekkewe pwon ren lükü o likiitu.”​—Ipru 6:10-12.

En mi Tongeni Awewei?

• Ifa üssün choon Kraist ra pwäpwääraawu lingen Kot?

• Meet sokkün mettoch Setan a äkkäeä reen an epwe sotuni le aükaatiu angaangen nöün Kot kewe aramas?

• Ikkefa ekkewe pisekin annet mi affata pwe än Kot we ngüün mi fel a nonnom wooch?

[Ekkewe kapas eis fan iten ewe lesen]

1. Meet Moses a küna, me meet a fis mwirin?

2. Meet ewe aposel Paul a makkei üssün ewe ling choon Kraist ra pwäpwääraawu?

3. Ifa üssün sileach üssün Jiowa a lap seni sileen Moses?

4. (a) Ifa üssün choon Kraist mi kepit ra kan pwäpwääraatä lingen Kot? (b) Ifa üssün meinisin mi eäni ewe apilükülüküün ar repwe manau woon fönüfan ra tongeni pwäpwääraatä lingen Kot?

5. Wöüöchuch lon peekin ngüün a anneta meet?

6. Pwata a lamot ngenikich lükü me pwora fän iten ach sipwe tuufichin peni Jiowa?

7. Ifa üküükün watteen än Setan nemenem, me meet a kan sotuni le fööri?

8, 9. Ifa üssün Setan a äkkäeä ewe sokkün tong ese pwüng, me pwata sipwe filiöchu chiechiach kewe?

10. Ifa üssün Setan a äeä kapasen esiit le fiu ngeni ir kewe mi pwäpwääraawu lingen Kot?

11. Ifa üssün Setan a äeä föfföör mi eriäfföü fän iten an sotuni le aukaatiu än choon Kraist angaangen afalafal?

12. Pwata sipwe chengel ika sipwe tuppwöl lupwen Setan epwe fiu ngenikich?

13. Ifa eü populapen ach sia likiitu lon ach angaangen afalafal?

14. Ifa üssün Jiowa a kan apöchökkülaakich pwe sipwe tuufichin likiitu lon ach angaangen afalafal?

15. Meet a alisikich pwe sipwe tuufichin likiitu?

16. Ifa üssün ach likiitu lon ach angaangen afalafal a aücheea ngenikich me pwal ngeni ir kewe mi aüselingakich?

17. Pwata ach ei fansoun a sokkolo aücheeaan lon uruwoon aramas?

18. Ifa üssün Jiowa a kan alololaatä letipen nöün kewe choon angaang?

[Lios lon pekin taropwe 5]

Woon mesen Moses a saramaram pokiten lingen Kot

[Lios lon pekin taropwe 6]

Sia kan pwääraawu lingen Kot lon ach angaangen afalafal