‘Oupwe Pwilitalong Woomi Tipetekison’
SAUL, i seni eü telinimw mi iteföülo. I emön re wilipposun Rom, me eli an famili a föüwatte. Saul a fiti sukul tekia mi fokkun öch lon ena fansoun. A silei lap seni eü fosun fönüfan, me a pwal choni eü mwichen lamalamen Jus mi sillelo, ekkewe Farisi.
Ina minne, Saul a oputa ekkewe aramas kisikis me a sikäsini pwisin an pwüng. (Luk 18:11, 12; Fofor 26:5) Chienen Saul kewe Farisi ra kan tipetekia me ra sani än aramas repwe ingeitiir me ar eäni ekkewe itelap mi eingeing. (Mattu 23:6, 7; Luk 11:43) Saul a lamalam tekia pokiten an chiechi ngeni ekkena sokkun aramas. Sia silei pwe a tinikken le eriäfföüü ekkewe Chon Kraist. Fitu ier mwirin, atun i ewe aposel Paul, a erä pwe a piin “esiita, . . . ninni, . . . pwal pweni” Kraist.—1 Timoti 1:13.
Ewer, Saul a wiliti emön Chon Kraist, ewe aposel Paul, iwe, a unusen siwil. Lon wisan we, fän tipetekison, Paul a apasa pwe a “kisifochofoch me lein ekkewe aramas mi fel meinisin.” (Efisus 3:8) I emön chon afalafal mi fokkun lipwäköch, nge ese alinga pwisin itan, pwe a chök alingalo Kot. (1 Korint 3:5-9; 2 Korint 11:7) Paul a pesei chienan kewe Chon Kraist: “Oupwe pwilitalong womi umoumoch, kirokiroch, tipetekison, mosonoson, o songomang.”—Kolose 3:12.
Ena kapasen fön a fich ngenikich lon ach ei fansoun? Sipwe küna feiöch ika sipwe tipetekison? Ewe napanap tipetekison a wesewesen esissillatä pöchökkülen ewe letip?
Ewe Chon Föratä mi Lapalap Seni Meinisin A Tipetekison?
Lupwen sia kakkapas ussun tipetekison, sipwe pwal ekilapei än Kot ekiek ussun. Pwata? Pun I ewe Epinkepiisom me ewe Chon Förikich. Pokiten kich sia sokko seni i, a lamot ach sipwe pwisin silei aüküküch. Sia chök eäni lükülük woon Jiowa. Loom, loom, emön mwän mi tipatchem itan Elihu a apasa: “Sisap tongeni küna Ewe mi Unusen Manaman. I a tekia lon an manaman.” (Hiop 37:23) Pwüngün, ach ekieki ussun meinisin förien Kot kewe lon läng epwe atipetekisonakichetiu! Ewe soufos Aisea a pesekich: “Oupwe netä läng. Iö a föratä masouan meinisin? Iwe, Kot a emmwenawu mwicheicher meinisin, a pwal aita ngeniir iter. Meinisin ra nom pokiten watten an tufich, pwal ren pöchökülen an manaman.”—Aisea 40:26.
Jiowa Kot a tipetekison inaamwo ika I mi lapalap seni meinisin. King Tafit a iotek: “Ka amanauaei o epeti seniei feiengaü, om alillis [tipetekison] a atekiaeitä.” (2 Samuel 22:36) Sia tongeni apasa pwe Kot a tipetekison pokiten an lolileniesini ekkewe aramas kisikis mi mochen apwapwai i, iwe, a ümöümöch ngeniir. Lon kapas esap wesewesan, seni läng, Jiowa a pwisatä ekkewe mi osupwang fän iten an epwe pwäratä kirekiröch ngeni iir mi niuokkusiti i.—Kölfel 113:5-7.
Pwal eü, Jiowa a aücheani än nöün kewe chon angang tipetekison. Ewe aposel Piter a makkei: “Kot a u ngeni iir mi lamalam tekia, nge a fangelo chen ngeni iir mi tipetekison.” (1 Piter 5:5) Iei än Kot ekiek ussun lamalam tekia me ren emön soumak: “Ewe Samol mi Lapalap a oput chokewe meinisin mi lamalam tekia. A fokun let pwe repwe angei liwinir.” (Än Salomon Fos 16:5) Iwe, ifa ussun ei napanap tipetekison epwe eü esissillen pöchökkül?
Met Tipetekison Esap Wewe Ngeni
Tipetekison esap wewe chök me än emön küna säü ika turunufas. Me loom, eörenien ekkoch fönü pwe emön mi tipetekison epwe emön slave mi torotorongaü me attong. Nge sokko seni ena, ewe Paipel a erä pwe än emön tipetekison epwe efisi an epwe küna itöch me ling. Awewe chök, emön mwän mi tipatchem a makkei: “Wou me iteuoch me manauatam, iei ewe liwin fan iten eman mi tipetekison o niuokusiti ewe Samol mi Lapalap.” (Än Salomon Fos 22:4) Kölfel 138:6 a pwal erä: “Inaamwo ika ewe SAMOL mi tekia, nge a lolileniesini ekkewe mi tekison, nge a chok sinei ekkewe mi lamalam tekia seni touau.”
Sap minne emön mi tipetekison esor an kewe tufich are föfföröch. Ren chök awewe, Jises Kraist a tongeni apasa pwe i Nöün Jiowa we äläemön, me a lamot an angangen afalafal woon fönüfan. (Mark 14:61, 62; Jon 6:51) Iwe nge, Jises a pwäratä tipetekison ren an alingalo Seman we pwe I a atufichi an kewe föfför. Jises a pwal äeä an manaman le älisi me angang ngeni aramas nge ese samol wor are nemenemengaü woor.
Eü Esissillen Pöchökkülen Letip
Pwüngün pwe Jises Kraist a iteföülo me sillelo me lein piloon kewe pokiten “an manaman o minen aweitifengen.” (Fofor 2:22) Iwe nge, me ren ekkoch aramas i “emön mi fokkun tekison seni chon fönüfan meinisin.” (Taniel 4:17, NW) Jises ese chök eäni ewe manau mi tekison, nge a pwal asukula aramas ussun aüchean tipetekison fän chommong. (Luk 9:48; Jon 13:2-16) Iwe nge, esap i emön mi apwangapwang pokiten an tipetekison. A pwora le aitöchü iten Seman we me apwönüetä an we angangen afalafal. (Filipai 2:6-8) Lon Paipel, Jises a liosutiu ren emön laion mi pwora. (Pwarata 5:5) Än Jises we leenien äppirü a pwäratä pwe tipetekison a angangfengen me än emön üppos fän iten minne mi pwüng me pöchökkülen letip.
Atun sia äkkämääraatä tipetekison mi enlet, sia weweiti pwe ese mecheres ach sipwe napanapeni lon unusen manauach. Epwe wewe ngeni ach sipwe anomukich fän letipen Kot, nge sisap chök aleni ewe al mi mecheres are akkapwönüetä mochenin futukach. A lamot sipwe üppos fän iten minne mi pwüng ika sipwe ämääraatä tipetekison, pun sipwe likitalo pwisin ach mochen fän iten ach sipwe angang ngeni Jiowa me ekkewe ekkoch.
Uwaan Ach Pwäratä Tipetekison
Tipetekison a wewe ngeni ach sisap lamalam tekia are sikesik. Tipetekison a pop seni ach etittinaöchü pwisin kich—ach kewe tufich, ach kewe apwangapwang, minne sia fen sopwöch ren me minne sia fen sopwongaü ren. Paul a ngenikich ei kapasen fön: “Pun upwe pwal fonou ami, emon me emon, ren ewe chen a fangeto rei, pwe emon esap ekieki ren pwisin i mi tekia seni minne mi fich, nge epwe ekieki ren mirit usun ewe ukukun luku Kot a awisa ngeni i.” (Rom 12:3) Iir mi apwönüetä ena fön ra kan pwäratä tipetekison.
A pwal pwälo tipetekison lupwen sia enletin akkomwa minne a lamot ngeni ekkewe ekkoch lap seni pwisin ach mochen. Fän emmwenien ngünün Kot, Paul a mak ngeni Chon Kraist: “Ousap fori och ren kirikiringau are ren lamalam tekia, nge lon ami tipetekison oupwe chok ekieki pwe ekkewe ekkoch ra murinno seni ami.” (Filipai 2:3) Ena fön a tipeeü ngeni än Jises allük ngeni nöün kewe chon käeö: “Ewe emon mi lapalap me leimi epwe chok noumi chon alilis. Iwe, are emon epwe atekiata pwisin i, iwe, epwe kuna tekison; nge are emon epwe atekisona pwisin i, iwe, epwe kuna tekia.”—Mattu 23:11, 12.
Ewer, Kot a fokkun aücheani chokkewe mi tipetekison. Ewe chon käeö, Jemes, a apöchökküla ena pworaus lupwen a makkei: “Ami oupwe atipetekisona-kemi-etiu fan mesen ewe Samol; iwe, I epwe atekia-kemi-ata.” (Jemes 4:10) Iö esap mochen pwe Kot epwe ätekiatääi?
Nafangaüen tipetekison a efisatä osukosuk me fitikoko lefilen ekkoch mwichen aramas me pwal lefilen aramas. Iwe nge, tipetekison a uwaani uwa mi mürinnö. Sipwe pwapwaesini än Kot we chen. (Mika 6:8) Sipwe küna kinamween letipach pun emön mi tipetekison epwe tongeni meefi pwapwa me menemenöch lap seni emön mi lamalam tekia. (Kölfel 101:5) Epwe wor kinamwe lefilach me chon ach famili, chiechiach kewe, chienach kewe chon angang, me iö kkan mwo. Chon tipetekison ra kan tümünüür seni ar repwe änini are aumwesi ekkewe ekkoch, pun ena esin föfför epwe emmwen ngeni song, tipefesen, oput, me tipemaras.—Jemes 3:14-16.
Ewer, ach ämääraatä tipetekison, iei eü alen akkamwöchü ach chiechiöch ngeni aramas. Epwe pwal älisikich le pwäkini sossotun ei fönüfan mi chök tongommang me akkuffengen. Ren än Kot älillis, ewe aposel Paul a tongeni pöütalo lamalam tekia me an sikäsini pwisin i, ekkewe a piin eäni me loom. Pwal ina chök ussuch, epwe mürinnö sisap lamalam tekia are ekieki pwe sia mürinnö lap seni ekkewe ekkoch. Ewe Paipel a öüröürakich: “Lamalamtekia a akom mwen feiengau, nge tunosikesik a akom mwen an eman tur.” (Än Salomon Fos 16:18) Ren ach akkapwönüetä än Paul we kapasen fön, sipwe küna tipatchemen ach sipwe ‘pwilitalong woch tipetekison.’—Kolose 3:12.
[Sasing lón pekin taropwe 3]
Paul a likitalo an lamalam tekia me tipetekia
[Sasing lón pekin taropwe 4]
Anglo-Australian Observatory/David Malin Images