“Ü Ngeni Ewe Tefil” Ussun Chök Jises
“Oupwe u ngeni ewe tefil, iwe, epwe su senikemi.”—JEM. 4:7, TF.
1. Jises a silei pwe koputan me woon fönüfan epwe popu seni iö? Met mwiriloon?
JISES KRAIST a silei pwe ewe Tefil epwe sotuni i. A ffat ena seni minne Kot a ereni ewe serepenit nge alon a wesewesen weneiti ewe ngün mi ngaü, ewe mi afosa ewe serepenit: “Üpwe afiukemi me ewe fefin [ewe kinikinin än Jiowa mwicheich lon läng], pwal mwirimwirum me mwirimwirin. Men [Jises Kraist] epwe puri mökürom, nge en kopwe küw apilipilin pechen.” (Ken. 3:14, 15; Pwär. 12:9) Än Setan kküü epinipinin Jises a wewe ngeni pwe esap mäfoch lupwen epwe ninniilo woon fönüfan pun Jiowa epwe amanauasefällietä pwe epwe lingelo lon läng. Nge än Jises awata ewe serepenit woon möküran a wewe ngeni pwe ewe Tefil epwe mäfocholo.—Älleani Föför 2:31, 32; Ipru 2:14.
2. Pwata Jiowa a lükülük pwe Jises epwe ü ngeni ewe Tefil fansoun meinisin?
2 Jiowa a lükülük pwe Jises epwe apwönüetäöchü wisan me ü ngeni ewe Tefil atun a nom woon fönüfan. Pwata Jiowa a fokkun lükülük ussun ena? Pun Jiowa a föri Jises lon läng loom loom, a nennengeni napanapan, me a silei pwe ena “chon angang mi sipeöch” me “mwanichien forian kewe meinisin” a älleasochis me tuppwöl. (SalF. 8:22-31; Kol. 1:15) Iwe, lupwen Kot a tinato Jises ngeni fönüfan me a mut ngeni ewe Tefil an epwe sotuni tori an ninniilo, Kot a lükülük pwe Nöün we Äläemön epwe wesewesen ü ngeni ewe Tefil.—Jon 3:16.
Jiowa A Kan Amanaua Nöün kewe Chon Angang
3. Mei fet meefien ewe Tefil ngeni nöün Jiowa kewe chon angang?
3 Jises a apasa pwe ewe Tefil, i “ewe sou nemenemen ei fonufan,” iwe, a öüröüra nöün kewe chon käeö pwe repwe küna riäfföü ussun chök i. (Jon 12:31; 15:20) Chon fönüfan mi nom fän nemenien Setan ewe Tefil, ra oput Chon Kraist mi enlet pun ra angang ngeni Jiowa, me afalafala minne mi pwüng. (Mt. 24:9; 1 Jon 5:19) Ewe Tefil a kon änna ekkewe lusun mi kepit, iir kewe repwe eti Kraist le nemenem lon an we Mwu lon läng. Setan a pwal änna ekkewe chommong Chon Pwäratä Jiowa mi eäni ewe äpilükülükün manau esemuch lon paratis woon fönüfan. Än Kot Kapas a öüröürakich: “Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.”—1 Pit. 5:8.
4. Met a änneta pwe nöün Kot kewe aramas ra unusen ü ngeni ewe Tefil lon ach ei fansoun?
4 Pokiten Jiowa a peppeni ach ei mwicheich, iwe, sia tongeni ü ngeni ewe Tefil fansoun meinisin. Ekieki mwo ekkeei pworaus: Lon ekkewe ipükü ier ra lo, ekkoch sou nemenem mi sokkolo ngaüer seni meinisin ra fen sotuni le arosalo Chon Pwäratä Jiowa. Nge a chochchommongolo chochoon Chon Pwäratä Jiowa, a tori arapakkan 7,000,000 chochoor lon lap seni 100,000 mwichefel woon unusen fönüfan. Ekkena nemenem mi eriäfföüü nöün Jiowa kewe aramas, fen iir ekkewe ra rosolo!
5. Ifa ussun a letelo Aisea 54:17 ren pworausen nöün Jiowa kewe chon angang?
5 Kot a pwon ngeni Israel loom ussun itä nge “pwuluwan,” a ereni: “Esap wor och pisekin maun epwe tongeni afeiengauok. Iwe, kopwe tongeni pälüeni chokewe meinisin mi atipisuk lon kapwüng. Iei feiöchün nei kewe chon angang me rei, iei usun üa awineer.” (Ais. 54:11, 17) A nüküchar an we pwon fän iten nöün Jiowa kewe aramas woon unusen fönüfan lon ekkeei “ran le sopwolon.” (2 Tim. 3:1-5, 13) Sia chök ükkü ngeni ewe Tefil, iwe, esor och pisekin maun a tongeni arosalo nöün Kot kewe aramas, pun Jiowa a peppenikich.—Kölf. 118:6, 7.
6. Met än Taniel oesini a äiti ngenikich ussun met epwe fis ngeni än Setan nemenem lon mwachkkan?
6 A chök mwittir arapoto sopwoloon unusen ei otot mi ngaü. Iwe lon ena atun, meinisin kinikinin än Setan nemenem repwe morolo. Ewe soufos Taniel a makkei ei pworaus fän emmwenien Kot: “Iwe, lon fansoun mwün ekewe king, ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.” (Tan. 2:44) Lon ena fansoun, än Setan nemenem me än aramas kewe nemenem repwe morolo. Meinisin kinikinin än ewe Tefil otot mi ngaü repwe tafocholo, iwe, än Kot we Mwu epwe nemenalo unusen fönüfan, nge esap wor epwe appölüwa.—Älleani 2 Piter 3:7, 13.
7. Ifa ussun sia silei pwe emön me emön nöün Jiowa kewe chon angang ra tongeni ü ngeni ewe Tefil?
7 Esor tipemwaramwar pwe än Jiowa mwicheich epwe nomofocholo me kükküna än Kot feiöch. (Älleani Kölfel 125:1, 2.) Nge kich? Ewe Paipel a apasa pwe sipwe tongeni ü ngeni ewe Tefil, ussun chök Jises. Enlet, än Jises oesini me ren ewe aposel Jon a pwäratä pwe “eu mwich mi lapalap” mi eäni äpilükülükün manau woon fönüfan repwe manauewu seni sopwoloon ei otot. Me ren ewe Paipel, ra püchör: “Sia küna manau me ren ach we Kot, ewe mi mot won ewe lenien motun king, pwal me ren ewe Lam.” (Pwar. 7:9-14) A mak pwe ekkewe chon kepit ra akkufu Setan. Iwe, chiener kewe “ekkewe pwal ekkoch siip,” ra pwal ü ngeni. (Jon 10:16; Pwar. 12:10, 11) Nge a lamot ar repwe tinikken me ikkiotek pwe repwe ‘ngaselo seni ewe emon mi ingau.’—Mt. 6:13.
Ewe Leenien Äppirü mi Mürinnö ren an Ü ngeni ewe Tefil
8. Met ewe Tefil a akkomw sotuni Jises ren lon ewe fönüpöön? Ifa ussun Jises a pölüweni?
8 Ewe Tefil a sotuni le atai tuppwölün Jises. Lon ewe fönü pöön, Setan a sotuni Jises pwe epwe älleasolapa Jiowa. Iwe nge, Jises a isetiu eü leenien äppirü mi unusöch ren an ü ngeni Setan. Mwirin an a echikifel 40 rän me 40 pwin, ese mwääl Jises a fokkun mochen möngö. Setan a ereni: “Are en Noun Kot, kopwe chok ereni ekkeei fau pwe repwe wiliti foun pilaua.” Nge Jises esap äeämwäälli an manaman seni Kot fän iten pwisin feiöchün. Nge, Jises a apasa: “A makketiu, ‘Aramas resap manau ren pilaua chok, pwe ren iteiten kapas meinisin mi tou seni auen Kot.’”—Mt. 4:1-4, TF; Tut. 8:3.
9. Pwata sipwe fiu ngeni än ewe Tefil sotuni le aingaüa mochenich kewe mi pükün nom rech?
9 Lon ach ei fansoun, ewe Tefil a sotuni nöün Jiowa kewe chon angang ren pükün mocheniir kewe. Ina minne, sipwe tipeppos le ü ngeni föfför mi sikepwach mi chöüfetäl. Än Kot we Kapas a wesewesen affata: “Enlet, oua silei pwe ekewe chon föföringau resap mwüni Mwün Kot. Ousap püsin atupukemi! Chon föri föförün lisowu, ika chon angang ngeni anümwäl, ika chon lisowu ngeni mi pwüpwülü, ika chon amömö inisir, ika chon lisowufengen lefilen mwän me mwän ika fefin me fefin . . . resap mwüni mwün Kot.” (1 Kor. 6:9, 10) A ffat pwe Kot esap mut ngeni aramas mi föfföringaü nge rese mochen siwili napanaper ar repwe manau lon an we fönüfan mi fö.
10. Me ren Mattu 4:5, 6, ifa ussun Setan a pwal sotuni Jises pwe epwe atai tuppwölün?
10 Iei alon Paipel ussun eü me lein ekkewe sossot Jises a küna lon ewe fönüpöön: “Iwe, ewe tefil a emmwenata i tori ewe telinim mi fel, o a iseta i won ungen ewe imwen fel. O a kapas ngeni i, ‘Are en Noun Kot, kopwe chok pwisin oturuketiu; pun a makketiu, “I epwe akünöü noun kewe chonlang fan asengesum,” o “Repwe pwisuk won pour, pwe kosap chepet ngeni fau pecheom.”’” (Matt. 4:5, 6) Epwe itä ina eü föfför mi eingeing än Jises änneta pwe i wesewesen ewe Messaia. Nge ren enletin, ina eü föfförün lamalam tekia ese pwüng, iwe, Kot esap fokkun tipeeü ngeni. Pwal lon chök ena atun, Jises a tuppwöl ngeni Jiowa, iwe, a pölüweni ren an aloni alon eü wokisin lon Paipel. A apasa: “A pwal makketiu, ‘Kote sotuni om Samol Kot.’”—Mt. 4:7; Tut. 6:16.
11. Ifa ussun Setan epwe tongeni sotunikich, me met epwe tongeni fis mwirin?
11 Setan epwe tongeni sotunikich pwe sipwe kütta itach lon sokkopaten napanap. Eli epwe sotuni le etipetipakich le kütta chen seni chon fönüfan ren ach äppirü üfen me fouten chon lükün, are ren ach fiti ekkewe minen apwapwa ese fich. Nge ika sipwe tunalo än Paipel fön me äppirü pwomwen fönüfan, sipwe itä ekieki pwe ekkewe chonläng repwe tümünükich seni sopwongaüen ach filingaü? Inaamwo ika King Tafit a aier seni an kewe tipis ngeni Patsipa, nge ese tongeni sü seni liwinin an kewe föfföringaü. (2 Sam. 12:9-12) Sisap sotuni än Jiowa tümün lon och napanap ese pwüng, neman, ren ach chiechi ngeni fönüfan.—Älleani Jemes 4:4; 1 Jon 2:15-17.
12. Pworausen menni sossot a mak lon Mattu 4:8, 9, iwe, ifa ussun nöün Kot we a pölüweni?
12 Setan a pwal sotuni Jises lon ewe fönüpöön ren an ekiekin liffang ngeni pöchökkülen nemenem. Setan a äiti ngeni Jises mwuun fönüfan meinisin me linger, iwe, a apasa: “Ekei mettoch meinisin üpwe ngonuk, are kopwe chapetiu mwei o fel ngeniei.” (Mt. 4:8, 9) A ifa me watteen rawangaüan, pwe epwe angemwäälli fel mi chök fich ngeni Jiowa, me pwal etipetipa Jises an esap tuppwöl ngeni Kot! Ren an ekilonei an mochen pwe aramas repwe fel ngeni, ena chonläng mi piin tuppwöl a tipis watte, me a wiliti Setan ewe Tefil. (Jem. 1:14, 15) Iwe nge, Jises a fokkun sokko seni Setan, pun a pposolo letipan pwe epwe tuppwöl ngeni Seman we lon läng. Ina minne, a apasa: “Kopwe sü seniei Satan! Pun a mak lon ekewe Toropwe mi Pin, ‘Kopwe fel ngeni ewe Samol om Kot o angang ngeni i chök.’” Iwe, Jises a tuwenewen le pölüweni ewe Tefil. Nöün Kot we ese fokkun mochen fiti mwökütükütün än Setan otot me esap tongeni fel ngeni ena emön mi fokkun ngaü!—Mt. 4:10; Tut. 6:13; 10:20.
“Oupwe Ü Ngeni ewe Tefil, iwe, Epwe Sü Senikemi”
13, 14. (a) Ren an eppii ngeni Jises mwuun fönüfan meinisin, met ewe Tefil a ekiekin fang ngeni? (b) Ifa ussun Setan a sotuni le aingaüakichelo?
13 Ren an eppii ngeni Jises ekkewe mwuun fönüfan meinisin, ewe Tefil a ekiekin fang ngeni pöchökkülen nemenem esor emön aramas a eäni me mwan. Setan a äpilükülükü pwe Jises epwe efich minne a küna me wesewesen lükü pwe epwe tongeni wiliti ewe sou nemenem mi kon pöchökkül seni meinisin woon fönüfan. Ikenäi, sap minne ewe Tefil a ekiekin fang ngenikich nemenem, nge a kan sotuni le aingaüa letipach ren künaen mesach, rongean selingach, me ekiekich.
14 Ewe Tefil a nemeni unusen ei otot woon fönüfan. Ina minne, a nemeni ekkewe minen afetäla pworaus. Ina popun, sisap mäirü pwe minne chon fönüfan ra katol, aüseling, me älleani ra ur ren föfför mi sikepwach me akkachofesä. Än fönüfan kewe minen alapalo mocheniangaüen mesach ra efisi ach mocheniaiti chommong pisek ese kon lien lamot ngenikich. Ren ekkena mettoch, ewe Tefil a sotunikich fansoun meinisin ren ekkan pisek mi ling ngeni mesach, selingach, me ekiekich. Nge ika sisap katol, aüseling ngeni, me älleani ekkana mettoch rese tipeeü ngeni Paipel, sia ussun itä apasa: “Sülo, Setan!” Epwe ina ussun sipwe äppirü tipepposun me nükücharen Jises le ü ngeni än Setan otot mi limengaü. Sise peppeni än Setan otot. Sia affata ena ren ach pwora le pwäri pwe kich Chon Pwäratä Jiowa me chon äppirü Kraist lon ach leenien angang, lon sukul, lein chon oruch, me märärich kewe.—Älleani Mark 8:38.
15. Pwata sipwe mammasa fansoun meinisin fän iten ach sipwe tufichin ü ngeni Setan?
15 Lupwen ese pwönütä an aülüngätin sossot fän iten an epwe atai tuppwölün Jises, “ewe Tefil a likitala.” (Mt. 4:11) Iwe nge, Setan ese ekiekin ükütiu seni an sotuni Jises, pun a mak: “Iwe, lupwen Tefil a wes me sotuni Jises ren ekkewe sosot meinisin, a feilo seni lon ekis chök fansoun.” (Luk 4:13) Lupwen sia tongeni ü ngeni ewe Tefil, sipwe kilisou ngeni Jiowa. Nge sipwe pwal sopwosopwolo le tittingor än Kot älillis, pun ewe Tefil epwe pwal sotunisefällikich fän eü lon eü fansoun a pwisin tipeni nge sap lon eü fansoun sia ekieki. Ina minne, sipwe mammasa fansoun meinisin, pwe sipwe likiitü lon ach angang mi fel fän iten Jiowa, ese lifilifil met sokkun sossot epwe torikich.
16. Met Jiowa a liffang ngenikich? Pwata sipwe tittingor ena mettoch?
16 Sipwe tittingor me angei än Kot we ngün mi fel, ewe mi pöchökkül seni meinisin, fän iten an epwe älisikich le ü ngeni ewe Tefil. Epwe atufichikich pwe sipwe föri mettoch sise fokkun tufichin föri ren pwisin ach pöchökkül. Iwe, Jises a anükünükü ngeni nöün kewe chon äppirü pwe epwe awora än Kot we ngün ren an ereniir: “Iwe, are mwo ämi aramas mi ngau oua silei ämi oupwe fang ngeni nöümi lifang mi mürina, epwe fen ifa me watten än Sememi lon läng fangela Ngünmifel ngeni chokewe mi tüngorei!” (Luk 11:13) Sipwe sopwosopwolo le tingorei Jiowa an we ngün mi fel. Ren älillisin än Kot we ngün mi pöchökkül, sipwe tipeppos le ükkü ngeni ewe Tefil. Lükün ach sipwe ikkiotek iteitan seni lon letipach, a pwal lamot sipwe pwilitalong woch än Kot kewe pisekin maun pwe sipwe tongeni ‘üpöchökül ngeni än ewe Tefil angangen otuputup.’—Ef. 6:11-18.
17. Ifa ewe pwapwa a älisi Jises le ü ngeni ewe Tefil?
17 Iei pwal eü mettoch a älisi Jises pwe epwe ü ngeni ewe Tefil, iwe, a pwal tongeni älisikich. Ewe Paipel a apasa: ‘Fänäsengesin ewe pwapwa mi nom mwen [Jises], esap ekieki itengauen an mäla won ewe [irään ninni]. Iwe, iei a mottiu lepelifichin Kot.’ (Ipru 12:2) Sia pwal tongeni eäni ena pwapwa ren ach atekiatääi än Jiowa nemenem, asamolu itan we mi fel, me nennelo ngeni ewe liwinin manau esemuch. Epwe ifa me watteen ach pwapwa lupwen Setan me an kewe angang meinisin repwe kitetterilo tori feilfeilo chök me “ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola”! (Kölf. 37:11) Ina popun, kopwe likiitü le ükkü ngeni ewe Tefil ussun chök Jises.—Älleani Jemes 4:7, 8.
Ifa Ussun Kopwe Pölüweni?
• Met a ännetatä pwe Jiowa a kan amanaua nöün kewe aramas?
• Ifa ussun Jises a isetiu eü leenien äppirü ren an ükkü ngeni Setan?
• Ifa ussun kopwe tongeni ü ngeni ewe Tefil?
[Sasing lón pekin taropwe 29]
Ika sipwe chiechi ngeni fönüfan, iwe, epwe wor koum lefilach me Kot
[Sasing lón pekin taropwe 31]
Jises ese tipeeü ngeni än Setan ekiekin fang ngeni mwuun fönüfan meinisin