“Ua fen Küna me Pwäkini Meinisin Minne Ua Osupwang Ren”
E REN eü repot, a wor orun 120 milion aramas woon unusen fönüfan a uriir semwenin letipengaü. Iteiten ier, eü milion aramas ra pwisin nirelo, nge lefilen 10 me 20 milion ra pwal sotuni le pwisin nirelo. Mei wor älillis fän iten chokkewe ra riäfföü pokiten ar letipengaü? Ekkoch minen älillis seni tokter eli epwe tongeni akükkünalo ar meefi weires me a pwal lamot ar repwe küna älillis seni ekkoch fän iten ar repwe apöchökküla meefier. Pwal och, ekkoch mi letipechou ra küna älillis mi fichitiir seni nöün Chon Pwäratä Jiowa kewe puk mi longolong woon ewe Paipel, ussun met ei taropwe seni Franis a apasa:
“Kanoto chök, ua meefi pwe ese chüen wor lamoten manauei. Ua iotek ngeni Kot pwe epwe mut ngeniei ai upwe mälo. Le alolloolun letipei ussun itä ua fen mälo. Ua siö ngeni Jiowa me kütta emmwen seni.
“Ua pwal küttaöchü ekkewe pworaus seni Leenien Mas me Awake! nge ua fokkun mäirü ren met ua küna! Ua fen älleani ekkewe puk lon lap seni 15 ier, nge use fen ekieki pwe ekkewe pworaus lon a mmen apöchökkül me amwarar. A ur ren tong, eü napanap sise kan kükküna ikenäi. Ekkeei puk ra fokkun älillisöch ngeniei pwe a pwäkini ai kewe osupwang meinisin.”
Ewe Paipel a erä: “Ewe Samol mi Lapalap a kan ngeni chokewe mi luketatakis, a amanaua chokkewe mi apilükingau.” (Kölfel 34:18) Ese mwääl, meinisin ekkewe “mi luketatakis” are “mi apilükingau” ra tongeni küna pöchökkül seni ewe Paipel me eäni äpilükülüköch ussun mwach kan. Chon Pwäratä Jiowa ra kan anöünöü ngeni aramas ekkewe puk mi longolong woon Paipel pwe epwe älisi ekkewe mi osupwangen aurur seni Kot.