Met Popun Kopwe Fangolo Manauom Ngeni Jiowa?

“Pun lepwin ewe eman nöün Kot chon läng, ewe Kot üa nonom fän nemenian o üa angang ngeni, a feito rei.”​—FÖF. 27:23.

1. Met chokkewe repwele papatais ra fen föri? Ikkefa ekkewe kapas eis ra piitä?

“REN om lükü än Jises asorun möön kepich, ka fen aier seni om kewe tipis me fangolo manauom ngeni Jiowa?” Iei eü me lein ekkewe ruu kapas eis ekkewe mi mochen papatais ra pölüweni le sopwoloon ewe afalafalen papatais. Pwata ekkewe mi mochen wiliti Chon Kraist repwe fangolo manauer ngeni Jiowa? Ifa usun ach fangolo manauach ngeni Kot a efeiöchükich? Pwata Kot ese etiwa än emön fel ngeni ika ese akkomw fangolo manauan ngeni i? Ren ach sipwe weweiti pölüwen ekkena kapas eis, sipwe käeö met weween fangolo manauach ngeni Kot.

2. Met weween ach fangolo manauach ngeni Jiowa?

² Met weween ach fangolo pwisin manauach ngeni Kot? Nengeni mwo ifa usun aposel Paul a äweweei an riri ngeni Kot. Lupwen waar we sip epwele kokkotiw, chienan kewe ra rong an kör ngeni Jiowa “ewe Kot üa nonom fän nemenian.” (Älleani Fofor 27:22-24.) Chon Kraist mi enlet meinisin iir nöün Jiowa, iwe, ra nonnom fän nemenian. Iwe nge, ei ototen fönüfan a “nonnom fan nemenien ewe mi ingau.” (1 Jon 5:19, TF) Chon Kraist ra wiliti nöün Jiowa kewe lupwen ra fangolo manauer ngeni lon iotek. Ina eü pwon ra eäni ngeni Kot. Mwirin, repwe papatais lon konik.

3. Än Jises papatais a liosuetä met? Ifa usun nöün Jises kewe chon käeö ra tongeni äppirü i?

³ Kot a fen nöüni Jises seni le uputiwan, pun i emön chon Israel, nge meinisin chon ena mwu ra pin me ren Kot. Iir nöün Kot ren eü pwonen etipeeü lefiler. Iwe nge, atun Jises a papatais, a föri lap seni met ewe Allükün Moses a apasa. Iwe, a isetiw eü leenien äppirü ngenikich lupwen a pwisin filatä an epwe föri letipen Kot. Ren an papatais, usun itä a apasa ei: “Nengeni, ua feito pwe upwe fori letipom, Kot.” (Ipru 10:7, TF; Luk 3:21) An papatais a liosuetä an mwe ngeni Kot manauan le föri letipan. Nöün kewe chon käeö ra äppirü i atun ra papatais. Iwe nge, ar papatais a sokkolo pun a pwal pwäratä pwe ra fen pwisin fangolo manauer ngeni Kot lon ar iotek.

Ach Fangolo Manauach A Efeiöchükich

4. Met än Tafit me Jonatan pwipwiöch a äiti ngenikich usun wisach ngeni chiechiach?

⁴ Än Chon Kraist pwonen fangolo manauer ngeni Kot a wesewesen chou lap seni pwon meinisin. A lap seni ar repwe chök tipeeü le wiseni eü wis. Iwe nge, ifa usun sipwe feiöch ren ach pwon ngeni Kot lon iotek pwe sipwe föri letipan? Sipwe eäni kapas äwewe le ppii ifa usun pwönütään wis a atoto feiöch, äwewe chök, lon pekin chiechi. Ren om kopwe wesewesen pwipwiöch ngeni emön, a lamot kopwe akkomw silei me apwönüetä wisen chiechi mi mürinnö. Weween, wisom kopwe chchüngü chiechiom. Ewe Paipel a äweweei usun än Tafit me Jonatan chiechiöchfengen. Ra pwal mwo nge eäni eü pwonen etipeeü pwe repwe pwipwifengen. (Älleani 1 Samuel 17:57; 18:1, 3.) Inaamwo ika äkkäemön chök ra eäni ena esin pwipwiöch, nge ewe ririin chiechi a pöchökkülelo lupwen ra aücheani ar ririfengen me akkapwönüetä wiser lefiler.—SalF. 17:17; 18:24.

5. Ifa usun emön slave epwe feiöchfochofoch ren än nöün we masta nöüni i?

⁵ Än Kot Allük ngeni Israel a äweweei usun än aramas küna feiöch seni pwal eü sokkun riri. Ika emön slave a mochen nonnom ren nöün we masta pun a meefi lükülüköch ren, ra tongeni föri eü pwonen etipeeü lefiler. Ewe Allük a apasa: “Nge are ewe chon angang epwe apasa, ‘Üa tongei ai samol pwal pwülüei me nei, üsap mochen ngasala,’ mürin, an we samol epwe emwenala lon imwenfel ren Kot. Epwe anomu lon ewe asamalap ika ren üren ewe asamalap o pwangeni selingan ngeni efoch pwangapwang. Mürin i epwe chon angang ngeni an we samol lon ränin manauan meinisin.”—Eks. 21:5, 6.

6, 7. (a) Ifa usun än aramas föri pwonen etipeeü lefiler a kan efeiöchüür? (b) Met ena pworaus a äiti ngenikich usun ach riri ngeni Jiowa?

⁶ Lon ewe ririin pwüpwülü, a fokkun lamot ekkewe rüüemön repwe aücheani ar pwonen etipeeü. Iwe nge, repwe mirititi pwe mei wor wiser ngeni pwülüwer, nge esap chök ngeni ewe pwonen etipeeü lefiler. Nge ika emön mwän me emön fefin ra chök nomfengen nge rese wesewesen pwüpwülü, iir me nöür kewe resap fokkun meefi nükünüköch, pun rese silei met ewe emön epwe föri ika a fis osukosuk lefiler. Iwe nge, ika än rüüemön ririin pwüpwülü a limelimöch, a wor popun ar repwe achocho le ataweei ar kewe osukosuk fän tong.—Mt. 19:5, 6; 1 Kor. 13:7, 8; Ipru 13:4.

⁷ Aramasen loom ra küna feiöch seni ar föri pwonen etipeeü lefiler lon pekin business me nöünöün chon angang. (Mt. 20:1, 2, 8) Pwal ina chök usun ikenäi. Äwewe chök, epwe mürinnö an epwe wor echö taropween etipeeü sipwe sainei me mwen ach sipwe poputääni och business, are poputä le angang lon eü kompeni. Iwe, ika a lükücharelo ririin chiechi, pwüpwülü, me chon angang ngeni meilap ren pwonen etipeeü, epwe fen ifa me lapoloon om ririöch ngeni Jiowa ren om pwon le manaueni manauom fän itan! Iei sipwele käeö ifa usun aramas me loom ra feiöch seni ar manaueni manauer fän iten Jiowa Kot, nge a fokkun lap seni ar chök filatä le wiseni eü wis.

Feiöchün Chon Israel Pokiten Jiowa A Nöüniir

8. Met weween ewe pwonen etipeeü lefilen chon Israel me Kot?

⁸ Meinisin chon ewe mwuun Israel ra wiliti nöün Jiowa lupwen ra föri ewe pwonen etipeeü lefiler. Jiowa a amwichafengeniir ünükün ewe Chuukun Sainai, iwe, a ereniir: “Ika oupwe aleasochisi aloi o apwönüeta ai we pwon, mürin oupwe wesewesen nei aramas.” Iwe, ekkewe aramas meinisin ra pölüwenipökü: “Meinisin mine ewe Samol mi Lapalap a apasa aipwe föri.” (Eks. 19:4-8) Sap minne ar nom lon ena pwonen etipeeü a wewe ngeni ar repwe chök apwönüetä och wis. Nge a wewe ngeni pwe Jiowa a nöüniir usun ‘nöün kewe aramas’ mi sokkolo aücheaar.

9. Ifa usun chon Israel ra feiöch pokiten iir nöün Kot?

⁹ Chon Israel ra feiöch ren än Jiowa nöüniir. A tuppwöl le tüttümünüür usun emön sam mi tongei nöün. Kot a apasa ngeni Israel: “Ifa usun, eman fefin epwe tongeni manlükala nöün mönükol, pwe esap tongeäsini nöün won inisin? Nge are epwe fen manlükala, ngang üsap manlukuk.” (Ais. 49:15) Jiowa a ekkemweniir ren ewe Allük, a akkapöchökküleretä ren ekkewe soufos, me a tüttümünüür ren ekkewe chonläng. Iei makkeien emön sou makken kölfel: “A aronga ngeni nöün aramas an kapas, a ngeni chon Israel an kewe allük me pwüüng. Ei sokun lapalap esap föri ngeni pwal eu mwü.” (Kölf. 147:19, 20; älleani Kölfel 34:7, 19; 48:14.) Jiowa a tüttümünü nöün kewe me loom, iwe, epwe pwal tüttümünü chokkewe mi fangolo manauer ngeni ikenäi.

Ewe Popun Sipwe Eäni Pwonen Fangolo Manauach ngeni Kot

10, 11. Atun sia uputiw, kich chon än Kot famili? Äweweei mwo.

¹⁰ Atun ekkoch ra ekiekin fangolo manauer ngeni Kot me papatais, ra eis, ‘Pwata use tongeni fel ngeni Kot ika use akkomw fangolo manauei ngeni?’ A ffatolo ewe popun ika sia chechchemeni pwe kich meinisin sia uputiw lükün än Kot famili pokiten tipisin Atam. (Rom 3:23; 5:12) Sisap tongeni kapachelong lon än Kot famili ika sise fangolo manauach ngeni. Sipwele ppii ika pwata.

¹¹ Esor emön sam woon fönüfan a tongeni liffang ngeni nöün manau esemuch, usun met Kot a fen akkota seni chök le poputään. (1 Tim. 6:19) Atun sia uputiw, esap kich nöün Kot pun lupwen Atam me If ra tipis, aramas ra mu seni Semer we mi tong, ewe Chon Föriir. (Apöpö ngeni Tuteronomi 32:5.) Seni ena fansoun tori iei, aramasen fönüfan rese kapachelong lon än Jiowa famili, weween, ra imu seni Kot.

12. (a) Ifa usun aramas rese unusöch ra tongeni choni än Kot we famili? (b) Met sipwe föri me mwen ach sipwe papatais?

¹² Iwe nge, emön me emön leich sia tongeni tingorei Kot pwe epwe etiwakichelong lon familien nöün kewe chon angang.a Ifa usun epwe tufich ena ngeni chon tipis? Ewe aposel Paul a makkeei: “Me lom kich chon oputa Kot, nge sia chäfengen me Kot ren mälan Nöün we.” (Rom 5:10) Lupwen sia papatais, sia tingorei Kot eü letip mi limelimöch pwe epwe etiwakich. (1 Pit. 3:21) Iwe nge, me mwen ach papatais, mei wor met sipwe föri. Sipwe sileelo Kot, lükülük woon, aier, me kulsefäl. (Jon 17:3; Fof. 3:19; Ipru 11:6) Iwe, mei pwal wor eü mettoch sipwe föri me mwen än Kot epwe etiwakich. Met ena?

13. Pwata mei fich än emön epwe eäni eü pwonen fangolo manauan ngeni Kot fän iten an epwe choni an familien chon fel?

¹³ Me mwen än emön mi imu seni Kot epwe tongeni choni än Kot famili, epwe akkomw pwon ngeni Jiowa. Ren ach sipwe weweiti popun, ekieki usun emön sam mi mürinnö a kirekiröch ngeni emön mi mäsen me a mochen mwuti pwe epwe choni an famili. Ewe sam a itöch me lein aramas. Iwe nge, me mwen an epwe mwuti ewe ät, a mochen pwe ewe ät epwe eäni eü pwon. Iwe, ewe mwän a apasa, “Me mwen ai upwe etiwok pwe nei, ua mochen silei pwe kopwe tongeiei me süfölitiei usun semom.” Epwe chök etiwalong ena ät lon an famili ika pwe epwe eäni ena pwon. Mei pwüng ena, ika met? Pwal ina chök usun, Jiowa epwe chök etiwalong lon an famili chokkewe mi tipeeü ngeni ar repwe pwon le fangolo manauer ngeni. Ewe Paipel a apasa: “Oupwe fangala inisimi pwe eu asor mi manau o pin fän iten än Kot angang o i epwe pwapwa ren.”—Rom 12:1.

Eü Föfförün Tong me Lükü

14. Ifa usun ach fangolo manauach a pwäratä tong?

¹⁴ Ach eäni pwonen fangolo manauach ngeni Kot a pwäralo ach tongei seni letipach. Sia tongeni apöpö ngeni eü pwonen apwüpwülü. Emön mwän apwüpwülü Chon Kraist a pwäri an tongei kofotun we ren an pwonei pwe epwe tuppwöl ngeni, ese lifilifil met epwe fis mwirin. Ina an pwon ngeni emön, nge esap chök fän iten och wis. Ena mwän a weweiti pwe esap tongeni nonnom ren neminnewe ika pwe ese akkomw eäni ena pwonen apwüpwülü. Pwal ina usun, sise tongeni unusen feiöchüni feiöchün chon än Kot famili ika pwe sise eäni eü pwonen fangolo manauach. Ina popun, sia fangolo manauach ngeni Kot me pwäralo ach tuppwöl ngeni inaamwo ika sise unusöch, pun sia mochen epwe nöünikich, ese lifilifil met epwe fis.—Mt. 22:37.

15. Ifa usun ach fangolo manauach a pwäratä lükü?

¹⁵ Ach fangolo manauach ngeni Kot a pwal pwäratä lükü. Pwata? Ach lükü Jiowa a alükülükükich pwe a fokkun mürinnö ach arap ngeni. (Kölf. 73:28, TF) Sia silei pwe esap mecheres ach sipwe älleasochisi Kot atun sia nonnom lein “aramas mi kirikiringau me tipis,” nge sia lükü än Kot pwon pwe epwe apöchökkülakich. (Fil. 2:15; 2 Kor. 4:7) Sia silei pwe sise unusöch, nge sia lükü pwe Jiowa epwe ümöümöch ngenikich atun sia mwäällilo. (Älleani Kölfel 103:13, 14; Rom 7:21-25.) Sia lükü pwe Jiowa epwe liwini ngenikich ach tipeppos le amwöchü pwüngün enletin ach tuppwöl.—Pwar. 2:10.

Ach Fangolo Manauach ngeni Kot A Atoto Pwapwa

16, 17. Pwata ach fangolo manauach ngeni Jiowa a atoto pwapwa?

¹⁶ Ach fangolo manauach ngeni Jiowa a atoto rech pwapwa pun sia äeä manauach fän itan. A enlet alon Jises ei: “Feiochun liffang mi lap seni feiochun angei.” (Fof. 20:35, TF) Jises a fokkun küna pwapwaan fangolo atun an afalafal woon fönüfan. Fän ekkoch, a pennüküolo an fansoun asösö, anan möngö, me an kinamwe fän iten an epwe älisi aramas le küna ewe alen manau. (Jon 4:34) Jises a meseik le apwapwaai letipen Seman we. A apasa: “Üa föri mine a pwapwa ren fansoun meinisin.”—Jon 8:29; SalF. 27:11.

¹⁷ Ina popun, Jises a äiti ngeni nöün kewe chon äppirü ewe alen pwapwa lupwen a apasa: “Are eman a mochen etiei, epwe pölükü manauan.” (Mt. 16:24) Ach pennüküolo manauach epwe alapalo ach ririöch ngeni Jiowa. Itä emön epwe tongeni tüttümünükich fän tong lap seni Jiowa?

18. Met popun ach etipeeüfengeni manauach ngeni ach pwon ngeni Jiowa epwe atoto rech pwapwa lap seni ach äeä manauach fän iten pwal emön are och mettoch?

¹⁸ Ach pwon ngeni Jiowa pwe sipwe föfföri letipan me etipeeüfengeni manauach ngeni ena pwon a atoto rech pwapwa lap seni ach äeä manauach fän iten pwal emön are och mettoch. Ren chök äwewe, chommong aramas ra äeä manauer fän iten ar repwe wöüöchülo, nge rese küna pwapwa enlet me nükünüköch. Iwe nge, chokkewe mi äeä manauer fän iten Jiowa repwe küna pwapwafochofoch. (Mt. 6:24) Ra pwapwaiti wiser mi aüchea le ‘angangfengen me Kot.’ Iwe nge, rese fangolo manauer ngeni eü angang, pwe ngeni ach Kot mi meefi kilisou. (1 Kor. 3:9) Epwe asäräfööi nöün kewe mi tuppwöl pwe repwe tongeni küna feiöch fän an tümün tori feilfeilo chök.—Hiop 33:25; älleani Ipru 6:10.

19. Chokkewe mi fangolo manauer ngeni Jiowa repwe pwapwaiti menni feiöch?

¹⁹ Ren om fangolo manauom ngeni Jiowa, kopwe tongeni ririöch ngeni. Ewe Paipel a apasa: “Oupwe arap ngeni Kot, iwe, epwe arap ngenikemi.” (Jem. 4:8; Kölf. 25:14) Lon ewe lesen mwirin ei, sipwe käeö ika pwata sia tongeni meefi nükünüköch le filatä pwe sipwe nöün Jiowa.

[Pwóróus fan]

Ifa Pölüwen Ekkeei Kapas Eis?

• Met weween ach fangolo manauach ngeni Kot?

• Ifa usun sipwe küna feiöch ren ach äeä manauach le föri letipen Kot?

• Pwata iir mi mochen wiliti Chon Kraist mi enlet repwe fangolo manauer ngeni Jiowa?

[Sasing lon pekin taropwe 10]

Ach apwönüetä ach pwonen fangolo manauach a atoto rech pwapwafochofoch