A Wor Emön A Fen Chofona Ngonuk?

A MMEN eletipechou ika emön ka lükülük woon a kapas chofona ngonuk. Eli ka säw, song are pwal mwo nge meefi lichippüng. Kapas chofona a atai chiechi me ririin pwüpwülü. A pwal efisi än aramas solääi watteen moni.

Iwe, ekieki mwo, epwe met meefiom ika ekkoch ra chofona ngonuk usun Kot? Ika ka achocho lon om lamalam, neman kopwe pwal meefieni meefien ekkeei aramas keei:

● DEANNE a apasa: “Ua meefi pwe ai we lamalam a chüngawaei.”

● LUIS a apasa: “Ua fokkun song. Ua meefi pwe ua fen tupulo, ese wor lamoten ekkewe mettoch ua äpilükülükü me achocho ngeni.”

Neman kese ekieki pwe a wor ekkoch ra fen kapas chofona ngonuk usun Kot. Pokiten ka lükülük woon ekkewe chon asukulok usun Kot, iir kewe ra mochen kopwe küna tümün, äwewe chök, semom kewe me inom, noum patere, nöüwisin lamalam are emön chiechiom. Neman lon unusen manauom ka lükü eü afalafal. Iwe nge, en mi tipeeü ngeni pwe ekkewe afalafal mi chöüfetäl ra pwal tongeni mwääl? Emön presitenin Merika loom itan Franklin D. Roosevelt a mirititi ena mettoch, iei alon: “Sap minne chöüfetälin eü afalafal mi chofona epwe tongeni wiliti eü afalafal mi enlet.”

Ifa usun kopwe silei ika emön a fen chofona ngonuk? Fän eü, iei met Jises a eäni iotek ngeni Kot: “Om kapas a let.” (Jon 17:17) Ewer, än Kot Kapas, ewe Paipel, a tongeni älisikich le esilla minne mi enlet me minne mi chofona.

Pwata kese mut ngeni ewe Paipel an epwe pwäraalo pwe mi chofona ekkewe nimu pworaus aramas ra achöüfetälei usun Kot? Kopwe küna ifa usun ewe enlet epwe tongeni amürinnölo manauom.