Ra Asúfél me Aúchea Me Ren Kot

LUPWEN Jesus a nóm wóón fénúfan, a unusen áppirú napanapen Seman we me ifa usun a féri mettóch. A erá: “Üsap föri och ren püsin ngang, nge üa chök apasa mine Semei a aiti ngeniei . . . Üa föri mine a pwapwa ren fansoun meinisin.” (Johannes 8:28, 29; Kolose 1:15) Ina minne, ren ach nengeni féfférún Jesus ngeni ekkewe fefin me an ekiek usur, sia tongeni weweiti án Kot ekiek usun ekkewe fefin me met itá féfférún aramas ngeniir.

Me ren ekkewe pwóróus lón ekkewe Puken Kapas Allim, chómmóng sou káé Paipel ra kúna pwe a fókkun sókkóló ekiekin Jesus usun fefin seni ekiekin aramas lón ena fansoun. Ifa usun? Itá áitien Jesus kewe ra chúen tongeni atoto ngaseló ngeni ekkewe fefin ikenái usun chék lón an we fansoun?

Féfférún Jesus Ngeni Ekkewe Fefin

◼ Jesus a eáni ekiek mi limeliméch ngeni ekkewe fefin. Me ren ekkóch néúwisin ewe lamalamen Jus, chiechi ngeni fefin epwe chék emmwen ngeni mocheisou. Ra ekieki pwe pokiten fefin iir populapen sóssót, iwe ra lólilen me rese mutatá ar repwe fós ngeni mwán lein aramas are allúkú ngeniir ar repwe áeá nikatupwél lupwen repwe towu lúkún. Nge lap seni ar allúkú án fefin repwe imuló seni aramas, Jesus a fen fénéú ekkewe mwán ar repwe nemenifichi mocheniaingawen futuker me súféliti ekkewe fefin.​—Mateus 5:28.

Jesus a pwal erá: “Eman mwän mi tinala pwülüan, nge a pwülüeni pwal eman fefin, ätewe a tipisin lisowu ngeni pwülüan we.” (Markus 10:11, 12) Alon na a ú ngeni áitien chón Jus we mi mut ngeni mwán ar repwe mu seni pwúlúwer kewe “fän iten ekoch popun esap lifilifil.” (Mateus 19:3, 9) Lap ngeni chón Jus ra fókkun ekieki pwe ika emén mwán a annut ren emén lúkún pwúlúwan, iwe esap nóm fán kapwúngún tipisin lisowumwáál. Iwe, néúr kewe rappai ra pwal afalafala pwe ewe mwán esap tipis ika a lisowu ngeni emén lúkún pwúlúwan, nge ika pwúlúwan we, ewe fefin, a lisowu ngeni emén lúkún pwúlúwan na, iwe a fókkun watte tipisin! Emén sou káé Paipel a apasa, “Ren án Jesus anómu ewe mwán pwúpwúlú me fin pwúpwúlú fán eú chék allúk ar repwe limeliméch, iwe a átekiatá ekkewe fefin pwe iir mi aúchea.”

Manamanen áitien Jesus kewe ikenái: Lón án Chón Pwáraatá Jiowa kewe mwichefel, ekkewe mwán me fefin ra chiechifengen atun ekkewe mwich. Iwe nge, rese lólilen án ekkewe mwán repwe mese sikepwach ngeniir are núesik ngeniir, pokiten ekkena Chón Kraist mwán ra túmúnúéchú pwe me rer ‘ekewe chinlap fefin usun itä nge ir inelaper . . . ekewe föpwül usun itä nge ir fefiner. Ra föri ei ren limöchün leluker.’​—1 Timoty 5:2.

◼ Jesus a awora fansoun le asukula fefin. Áitien ewe lamalamen Jus pwe ese fich án fefin repwe angei káit. Nge Jesus a asukula fefin me etiwer ar repwe uwawu meefier. Jesus a pwáraatá pwe esap chék wisen fefin ar repwe féri angangen leimw atun a suuki ngeni Maria an epwe akkomw angei káit seni mwen an epwe féri an kewe angangen leimw. (Lukas 10:38-42) Marta, pwiin Maria we, a pwal káé seni Jesus, a pwáló seni minne a pélúwen ngeni án Jesus kapas eis mwirin án Lasarus máló.​—Johannes 11:21-27.

Jesus a áfánni minne ekkewe fefin ra ekieki. Lón ena fansoun, lap ngeni ekkewe fin Jus ra meefi pwe kiien án emén fefin pwapwa ina an néúni emén át mi múrinné are fen emén soufós. Lupwen emén fefin a púchérútá me apasa: “Feiöchün ewe fefin mi nöünuk!” Jesus a áeá ena fansoun le áiti ngeni pwal eú mettóch mi kon apwapwa seni ena. (Lukas 11:27, 28) Ren an áweweei pwe án emén álleasochisi Kot a kon lamot, Jesus a pwáraatá pwe mi pwal wor wisen ekkewe fefin mi kon aúchea seni ar chék féri án fefin kewe angang lón ena atun.​—Johannes 8:32.

Manamanen áitien Jesus kewe ikenái: Ekkewe chón emmwen lón án Chón Kraist kewe mwich ra etiwa meefien ekkewe fefin atun ekkewe mwich. Ra súféliti ekkewe fefin mi ásimaú ren ar “asukula mine a mürina” atun ra nóm lein aramas me nóm lón imwer. (Titus 2:3) Ra pwal lúkúlúk wóór pwe repwe esilefeili ewe kapas allim usun án Kot we Mwú.—Kölfel 68:11; ppii ena pwóór itelapan “Aposel Paulus A Itá Pinei án Ekkewe Fefin Repwe Fós?”

◼ Jesus a chúngú ekkewe fefin. Lón fansoun lóóm, ekkewe át ra kon aúchea seni ekkewe nengngin. A pwáló ena ekiek ren alon ewe Talmud ei: “Mi feiéch iir kewe ra néúnéú át, me feiengaw ngeni iir kewe ra néúnéú nengngin.” Ekkóch sam me in ra meefi pwe a áweires ar repwe néúnéú nengngin lap seni át, pwe repwe pwal kútta pwúlúwer me awora kiser, me rese tongeni lúkúlúk wóón nengngin ar repwe wisen túmúnúúr atun ra chinnap.

Jesus a pwáraatá pwe léllé chék aúchean manawen emén nengngin me emén át ren an amanawasefáli néún Jairus we nengngin me ewe át, néún ewe fin Nain mi má seni pwúlúwan. (Markus 5:35, 41, 42; Lukas 7:11-15) Mwirin an echikaraatá ewe fefin mi riáfféú ren an “sasamau lon ükükün engol me walu ier,” Jesus a apasa pwe ena “fefin, i mwirimwirin Apraham.” Ei mwuten kapas lón fósun fénúer, ese kan mak lón makkeien ekkewe chón Jus. (Lukas 13:10-16) Ren án Jesus néúnéú ena esin kapas mi asúfél, ese chék pwáraatá pwe ena fefin emén chón Jus mi wor aúchean, nge a pwal áfánni watteen an lúkú.​—Lukas 19:9; Kalatia 3:7.

Manamanen áitien Jesus kewe ikenái: Och mwitún seni Asia a erá pwe túmúnú emén nengngin epwe chék lusmwáál pwe esap atoto feiéch lón ewe famili, a erá: “Án emén túmúnú emén nengngin a usun chék an túmúnú án chón órun atake.” Ekkewe sam Chón Kraist rese eáni ena esin ekiek, nge iir ra tongei me túmúnú néúr kewe meinisin. Iir ra pwal piiéchú pwe epwe múrinné án néúr kewe sukul me túmún péchékkúlen inisiir.

◼ Jesus a lúkúlúk wóón ekkewe fefin. Lón án ekkewe chón Jus imwen kapwúng, manamanen án emén fefin minen pwáraatá a chék léllé ngeni án emén slave. Josephus, emén sou uruwo lón fansoun ekkewe aposel, a eáni ei éúréúr: “Pokiten án ekkewe fefin wiliwilikkis me lúkúmach, ar minen pwáraatá lón kapwúng esap ketiw.”

Ena ekiek a sókko seni án Jesus ekiek, pún i a filatá ekkewe fefin ar repwe pwáraatá pwe a manawsefál. (Mateus 28:1, 8-10) Inaamwo ika ekkewe fefin mi tuppwél ra pwisin kúna ninniilóón Jesus me an peias, nge a mmen weires án ekkewe aposel repwe lúkú minne ra apasa. (Mateus 27:55, 56, 61; Lukas 24:10, 11) Iwe nge, ren án Jesus akkomw pwá ngeni ekkewe fefin lupwen a manawsefál, a pwáraatá pwe ra pwal tongeni wisen chón pwáraatá usun chék pwal ekkóch néún kewe chón káé.​—Föför 1:8, 14.

Manamanen áitien Jesus kewe ikenái: Lón án Chón Pwáraatá Jiowa kewe mwichefel, ekkewe mwán mi wor wiser ra áfánni ekiekin me meefien ekkewe fefin. Ekkewe Chón Kraist mwán pwúpwúlú, ra ‘meniniti’ pwúlúwer kewe ren ar aúselingéch ngeniir.​—1 Petrus 3:7; Keneses 21:12.

Kapasen Emmwen lón Paipel mi Álisatá Pwapwaan Ekkewe Fefin

Lupwen ekkewe mwán ra áppirú Kraist, ekkewe fefin ra kúna súfél me eáni ewe sókkun ngaseló Kot a fen tipeni fán iter me lepoputáán. (Keneses 1:27, 28) Ekkewe Chón Kraist mwán pwúpwúlú rese ekieki pwe ra kon aúchea seni fefin, iwe ra pwisin anómuur fán ekkewe kapasen emmwen seni Paipel, me ina met a álisatá pwapwaan pwúlúwer kewe.​—Efisos 5:28, 29.

Lupwen Yelena a poputá le káé Paipel, a kúna riáfféú ren kirikiringawen pwúlúwan we. Pwúlúwan we a mááritá lón eú leeni ra kan eáni féfférún akkachofesá, ikewe mwán ra kan sú fán ekkewe fefin ra mochen pwúlúweniir, are awata pwúlúwer kewe. Iei alón Yelena: “Minne ua káé seni Paipel a apéchékkúla ei. Ua weweiti pwe mei wor emén a fókkun tongeei me aúcheaniei. Ua pwal weweiti pwe ika pwúlúwei we epwe káé Paipel, epwe tongeni siwil féfférún ngeniei.” Mwirin och fansoun a pwénútá minne a áneánei atun pwúlúwan we a tipeeú ngeni an epwe káé ewe Paipel me papatais usun emén Chón Pwáraatá Jiowa. Yelena a apasa: “Pwúlúwei we a wiliti eú leenien áppirú ren an nemenifichi an fós me meefian. Aua kan tipemecheres le omusafengeni tipisim.” Iwe ifa meefian lesópwólóón? “Ekkewe kapasen emmwen lón Paipel ra wesewesen álisiei ai upwe meefi aúcheai me núkúnúkéchúi lón ai pwúpwúlú.”​—Kolose 3:13, 18, 19.

Chómmóng Chón Kraist fefin ra pwal kúna ewe esin pwapwa Yelena a kúna pokiten iir me pwúlúwer kewe ra angangfengen le apwénúetá ekkewe kapasen emmwen lón Paipel lón ar pwúpwúlú. Lón ar chiechi ngeni chiener kewe Chón Kraist ra kúna súfél, ouruur me ngaseló.​—Johannes 13:34, 35.

Chón Kraist mwán me fefin ra mirititi pwe pokiten iir chón tipis me rese unuséch, iwe ra kapachelong lein férien Kot kewe mi “lomotongauala.” Nge ren ar arap ngeni ar we Kot mi tong me semer we Jiowa, iwe ra ápilúkúlúkú ar “repwe ngasala seni ar ngauala” me pwapwaiti ar repwe “eti nöün Kot kewe lon ar ngasala me ling.” A ifa me amwararen ena ápilúkúlúk fán iten ekkewe mwán me fefin mi nóm fán án Kot túmún!​—Rom 8:20, 21.

[Sasing lon pekin taropwe 10]

Jesus a filatá Maria Maktalene an epwe wisen apwóróusa ngeni ekkewe aposel pwe a manawsefál