Kosap Mut Ngeni Och Mettóch Epwe Atowauakoló Seni Jiowa

1-3. (a) Met popun Josua a eú leenien áppirú mi múrinné fán itach? (b) Met sipwe chechchemeni lupwen sipwe féri ach kewe kefil?

EKKEWE kefil sia féri ra fókkun lamot pún ra mut ngenikich ach sipwe filatá ifa usun sipwe áeá manawach. A usun chék án emén fetál wóón efóch al nge mwirin a keangfesen. Iwe, menni al epwe filatá? Ese mwáál epwe filatá ewe al epwe kan ngeni ewe leeni a mochen ló ia nge esap fen ewe al epwe atowauaaló seni ewe leeni.

² Ewe Paipel a masou ren pwóróusen chómmóng aramas mi féri ekkewe kefil mi lamot. Áwewe chék ren Kain, a lamot ngeni an epwe filatá ika epwe nemeni an song are esap. (Ken. 4:6, 7) A nóm mwen Josua eú kefil ika epwe fel ngeni ewe Kot mi enlet are ekkewe kot chofona. (Jos. 24:15) A lamot ngeni Josua an epwe feffetál wóón ewe al mi pwúng. A mochen amwéchú an ririéch ngeni Jiowa, ina popun a féri ewe kefil mi álisi le apwénúetá ena. Nge Kain a féri ewe kefil mi atowauaaló i seni Jiowa.

³ Fán ekkóch, mi lamot sipwe féri kefil pwe sipwe tongeni feffetál wóón ewe al mi pwúng. Sipwe chechchemeni pwe minne sia filatá a tongeni elingaaló Jiowa me álisikich le amwéchú ach ririéch ngeni are a tongeni atowauakicheló seni i. (Álleani Ipru 3:12.) Lón ei lesen me ewe lesen mwirin ei, sipwe etittina fisu mettóch lón manawach mi lamot sipwe túmúnú pwe ach kewe kefil woor resap atowauakicheló seni Jiowa.

ANGANG

4. Pwata a lamot án emén epwe angang?

⁴ Mi lamot ngeni ekkewe Chón Kraist ar repwe angang pwe repwe atufichi pwisin iir me ar famili. Ewe Paipel a erá pwe ika emén ese mochen atufichi an famili, i a fen ngaw seni emén chón lúkún are i emén mi amamesini Jiowa. (2 Tes. 3:10; 1 Tim. 5:8) A ffat pwe mi lamot án emén epwe angang. Nge ika kese túmúnú, óm kewe kefil usun óm angang repwe tongeni poputá le atowauakoló seni Jiowa. Ifa usun?

5. Met itá kopwe akkomw ekieki me mwen óm kopwe etiwa och angang?

⁵ Nge ifa usun ika ka osupwangen óm angang? Ika a weires kútten angang lón fénúom, iwe, eli epwe eú sóssót ngonuk óm kopwe etiwa menni chék angang a suuk ngonuk. Nge, met epwe fis ika ena sókkun angang ese tipeeú ngeni ekkewe kapasen emmwen lón Paipel? Are lón ena angang, a lamot kopwe áeá watteen óm fansoun, iwe epwe eppeti óm fansoun fán iten ewe mwichefel me óm famili? Iwe, kopwe chúen etiwa ena angang inaamwo ika ese fichiituk, me ekieki: ‘Ianan, a mwaren wor ai angang mwen an ese wor?’ Chechchemeni pwe minne ka filatá epwe tongeni álisuk le arap ngeni Jiowa are atowauakoló seni. (Ipru 2:1) Nge ifa usun kopwe féri ekkewe kefil mi pwáraatá mirit, ika ka osupwangen angang are ekiekin siwili óm angang?

6, 7. (a) Ikkefa ekkewe ruu popun eli emén epwe etiwa och angang? (b) Menni leir a pwáraatá pwe eménna a mochen amwéchú an ririéch ngeni Jiowa, iwe, pwata?

⁶ Óm kefil epwe lóngólóng wóón met ka mochen féri lón manawom. Pwisin eisinuk: ‘Ifa ewe popun ua eáni ei angang?’ Jiowa epwe efeiéchuk ika ewe popun ka eáni ewe angang fán iten an epwe atufichuk me óm famili lón ámi angang ngeni I. (Mat. 6:33) Jiowa a silei ifa usun epwe álisuk lupwen a weiweitá péútúlóón óm angang are a weiresiló án aramas atufichi manawer lón fénúom we. (Ais. 59:1) A “silei usun an epwe amanaua ekewe aramas mi likitü lon ar lükü seni sosot.”​—2 Pet. 2:9.

⁷ Nge ifa usun ika ewe popun ka angang pwe kopwe chék awattelooi noum moni? Eli ka tongeni féri ena. Nge chechchemeni pwe kopwe chúen feiengaw ika ewe popun ka angang pwe kopwe chék pisekisekiló. (Álleani 1 Timoty 6:9, 10.) Ika ka fókkun alamota moni me angang lón manawom, iwe, kopwe towauoló seni Jiowa.

8, 9. Ikkefa ekkewe kapas eis ekkewe sam me in repwe pwisin eisiniir usun ar angang? Pwata?

⁸ Ika en emén sam are in, ekieki ifa usun óm kewe féffér epwe kkúú noum kewe. Met ra ekieki pwe a nampa eú lón manawom? Óm angang are óm ririéch ngeni Jiowa? Ika ka achocho pwe kopwe wéúéchúló are kútta pwisin itetekiam, ka ekieki pwe noum kewe repwe pwal áppiruk me aleni ena esin al mi efeiengaw? Are epwe kisikisiló ar súfélituk? Emén Chón Kraist sáráfé a erá: “Seni lekúkkúni, semei we a kan akkomwa an we angang lón manawan. Lepoputáán, usun itá a angang weires pokiten a mochen awora ngenikem minne mi múrinné seni meinisin. A mochen túmúnúéchúkem. Nge kukkuto chék, usun a wor och siwil. A akkangang iteitan me mééni ekkewe pisek mi mémmong nge ese lamot ngeni ám famili. Iwe, aua silleló pwe ám ewe sókkun famili mi watte néúm moni, nge esap eú famili mi kan pesei aramas le angang ngeni Jiowa. Upwe fen pwapwa ika semei we a álisikem le ririéch ngeni Jiowa lap seni an awattelooi néúm moni.”

⁹ Ami kana sam me in, túmúnú pwe oute mut ngeni ámi angang an epwe atowauakemiló seni Jiowa. Oupwe isetiw eú leenien áppirú mi múrinné fán iten néúmi kewe. Pwár ngeniir pwe oua wesewesen lúkú pwe a kon lamot án emén ririéch ngeni Jiowa lap seni moni are pisek.​—Mat. 5:3.

10. Met itá emén sáráfé epwe ekieki me mwen an epwe filatá ewe sókkun angang epwe eáni?

¹⁰ Ika en emén sáráfé mi ekieki met sókkun angang kopwe tongeni eáni lupwen ka wattetá, ifa usun kopwe filiéch? Usun met sia fen káé, óm kefil epwe lóngólóng wóón met ka mochen féri lón manawom. Ika ka ekiekin fiti eú sukul fán iten och angang, ena angang epwe álisuk le akkomwa án Jiowa angang lón manawom, are epwe fen atowauakoló seni Jiowa? (2 Tim. 4:10) Ka mochen áppirú chón ei fénúfan, ekkewe ra chék pwapwa ika a watte néúr moni? Are kopwe lúkúlúk wóón Jiowa usun chék Tafit? A erá: “Seni me lom, lupwen ngang üa eman alüal, tori iei üa chinlap, üsap küna mwo eman chon pwüng epwe sachawun, ika nöün kana repwe tütüngorfetal ener mongö.” (Kölf. 37:25) Chechchemeni pwe a wor rem eú kefil ren menni al kopwe fetál wóón. Efóch epwe atowauakoló seni Jiowa, nge efóch epwe atoto ngonuk ewe sókkun manaw mi echipwér seni meinisin. (Álleani Än Salomon Fos 10:22; Malakai 3:10.) Iwe, menni al kopwe filatá?a

MINEN APWAPWA ME KUNOU

11. Met ewe Paipel a apasa usun ekkewe minen apwapwa me kunou, nge met sipwe chechchemeni?

¹¹ Ewe Paipel ese apasa pwe mi mwáál ach sipwe pwapwa. Ese pwal erá pwe ekkewe minen apwapwa mi chék asolapaaló ach fansoun. Paulus a ereni Timoty pwe mi wor feiéchún án emén epwe taiso are anganga inisin. (1 Tim. 4:8) Ewe Paipel a pwal mwo nge apasa pwe a wor “fansoun takir,” me “fansoun pwörük,” me a pwal pesekich ach sipwe “kinamwe,” are annaféchú ach fansoun asésé. (SalAf. 3:4; 4:6) Nge ika kese túmúnú, óm minen apwapwa a tongeni atowauakoló seni Jiowa. Ifa usun? Ren óm filatá ekkewe sókkun minen apwapwa mi mwáál are áeá watteen fansoun le féri ekkewe minen apwapwa.

12. Met itá kopwe akkomw ekieki me mwen óm filatá óm kewe minen apwapwa me kunou?

¹² Sipwe akkomw etittina met sókkun minen apwapwa are kunou sipwe filatá. Sia tongeni kúna ewe sókkun minen apwapwa mi múrinné. Nge chómmóng me leir lón ei fénúfan ra menlapei ekkewe mettóch Kot a oput, ren choweán féfférún akkachofesá, angangen roong, me féfférún lisowu mwáál. Ina popun a lamot kopwe filiéchú ekkewe minen apwapwa me kunou kopwe eáni. Ekieki ekkeei kapas eis: Ifa usun ai kewe minen apwapwa repwe kkúú manawei? A apéchékkúla ai upwe féri féfférún akkachofesá are esika fénúei? A ámmeef ngeniei ai upwe okkokkuf ngeni ekkewe ekkóch pwe upwe chék win iteitan? (SalF. 3:31) Ua néúnéú watteen moni fán iter? Ekkóch aramas repwe chepetek ika ra silei ekkewe sókkun minen apwapwa ua filatá? (Rom 14:21) Met sókkun aramas upwe chieneni lón ai féri ekkeei minen apwapwa? (SalF. 13:20) A apéchékkúla ai mochen féri och mettóch mi mwáál?​—Jas. 1:14, 15.

13, 14. Met itá kopwe ekieki usun úkúkún ewe fansoun kopwe áeá fán iten ekkewe minen kunou?

¹³ Pwal ekieki úkúkún ewe fansoun kopwe áeá fán iten ekkena minen apwapwa me kunou. Pwisin eisinuk: ‘A kon watte ewe fansoun ua áeá fán iten ekkewe minen apwapwa, iwe, a chék ekis ai fansoun fán iten ewe angangen afalafal me ekkewe mwich?’ Ika ka awora watteen fansoun fán iten ekkewe minen kunou, iwe, ekkena mettóch resap kon lien apwapwaok. Ren enletin, chókkewe mi aúkúkú ar fansoun kunou ra fen kon pwapwaiti ar kewe minen apwapwa lap seni chókkewe mi áeá watteen ar fansoun. Met popun? Pún ra silei pwe ra fen akkomwa minne mi lamot, ina popun rese meefi mengiringir lupwen ra kunou.​—Álleani Filipi 1:10, 11.

¹⁴ Inaamwo ika kopwe meefi pwe usun itá a mmen apwapwa óm áeá watteen fansoun le kunou, nge a tongeni atowauakoló seni Jiowa. Emén pwiich itan Kim, 20 ierin, a kúna enletin ena pwóróus. A erá pwe a soun fiti ekkewe pari iteiten wiikend lón Enimu, Ammól me Ránin Fel. Iwe nge, iei, a silei pwe mi fen wor chómmóng mettóch mi kon lamot lap seni ekkena pari. A apasa: “Áwewe chék, pokiten ngang emén pioneer ua kan neló kulók 6 lesossor fán iten ewe angangen afalafal. Ina popun use tongeni fiti ewe pari tori kulók eú are ruu lukenipwin. Ua silei pwe ekkena minen kunou rese kon ngaw meinisin, nge ra fókkun tongeni erikaló emén.” Kim a káé lamoten an epwe túmúnú pwe esap áeá watteen an fansoun fán iten ekkewe minen kunou.

15. Ifa usun ekkewe sam me in ra tongeni álisi néúr kewe le filatá ekkewe minen kunou mi múrinné?

¹⁵ Wisen ekkewe sam me in ar repwe awora tufichin ar famili. Repwe pwal wisen álisi ar famili le akkarap ngeni Jiowa me meefi pwapwa me tong. Ika en emén sam are in, kosap ekieki pwe meinisin ekkewe minen kunou ra ngaw. Pwúngún pwe ekkóch sókkun minen kunou mi ngaw. (1 Kor. 5:6) Nge ika oupwe filiéchú ámi minen kunou are apwapwa, oupwe kúna ekkewe sókkun repwe fókkun apwapwakemi me asésékemi.b Ika ina, ámi kewe kefil resap atowauakemiló seni Jiowa.

RIRI LÓN FAMILI

16, 17. Ifa ewe mettóch mi eletipengaw chómmóng sam me in ra kúna? Pwata sia silei pwe Jiowa a weweiti ewe popun ra letipechou?

¹⁶ Ewe ririin tong lefilen emén sam are in me néún a fókkun péchékkúl. Ina usun Jiowa a pwal mwo nge apasa pwe a tongei néún kewe aramas usun án emén in tongei néún kúkkún. (Ais. 49:15) Lupwen emén chón ach famili a likitaló Jiowa, sia fókkun letipengaw. Iei alón emén fin Kraist lupwen néún we nengngin a katowu: “Ua fókkun letipechou. Ua kan ekieki, ‘Pwata nei we a likitaló Jiowa?’ Ua meefi mengiringir me meefi pwe tipisi.”

¹⁷ Ika a pwal fis ngonuk ei mettóch, Jiowa a weweiti meefiom. Lupwen néún we, ewe áeménún aramas, a ú ngeni, “letipan a pwal fokun weires.” Jiowa a pwal fókkun letipengaw lupwen lap ngeni ekkewe aramas rese aúseling ngeni Noa mwen ewe Noter. (Ken. 6:5, 6) Eli ekkóch rese tongeni weweiti úkúkún metekin letipen emén pokiten rese fen kúna ei esin osukosuk. Iwe nge, epwe eú alen efeiengaw ika ka mut ngeni féfférmwáálin chón óm famili mi katowu an epwe atowauakoló seni Jiowa. Iwe, ifa usun kopwe likiitú lón óm letipechou lupwen emén chón óm famili a likitaló Jiowa?

18. Met popun ekkewe sam me in resap ekieki pwe tipisiir án néúr we likitaló Jiowa?

¹⁸ Kosap ekieki pwe tipisum minne a fis. Emén me emén chón ewe famili mi fen fangóló manawan me papatais epwe pwisin “mwärei wosan” me filatá ika epwe angang ngeni Jiowa. (Kal. 6:5) Iwe, me ren Jiowa, pwisin ewe chón tipis epwe kúna etittin ren met a filatá le féri. Kot ese pwal tipi ngonuk pwe tipisum. (Is. 18:20) Kosap pwal tipi ngeni ekkewe ekkóch. Kopwe súféliti napanapen án Jiowa emiriti néún kewe aramas. Kosap tipi ngeni ekkewe elter, ekkewe ra túmúnú ewe mwichefel. Nge ú ngeni ewe Tefil, me kosap mut ngeni ena mettóch an epwe atowauakoló seni Jiowa.​—1 Pet. 5:8, 9.

19, 20. (a) Ifa usun ekkewe sam me in, néúr a katowu repwe tongeni likiitú lón ar letipechou? (b) Met ekkeei sam me in repwe ápilúkúlúkú?

¹⁹ Iwe, met epwe fis ika kopwe song ngeni Jiowa ren minne a fis ngeni noum we? Ena esin memmeef epwe atowauakoló seni Jiowa. Ren enletin, mi lamot eménna ka tongei epwe silei pwe ka tipeppós lón óm tongei Jiowa lap seni óm tongei chón óm famili. Iwe, ren óm kopwe likiitú lón óm letipechou, achocho le akkamwéchú óm ririéch ngeni Jiowa me chichiechi ngeni pwiom kewe Chón Kraist mi tuppwél. (SalF. 18:1) Uwawu enletin meefiom ngeni Jiowa lón iótek. (Kölf. 62:7, 8) Kosap kúnetipingen ren óm kútta och popun kopwe tongeni chiechi ngeni chón óm famili mi katowu, áwewe chék wóón Internet are ren óm text ngeni wóón phone. (1 Kor. 5:11) Kopwe angang weires lón óm angang ngeni Jiowa. (1 Kor. 15:58) Pwiich we sia kerán pwóróus usun, a erá: “Ua silei pwe a lamot ai upwe achocho le angang ngeni Jiowa me upwe péchékkúl lón ai lúkú, iwe, lupwen nei we nengngin epwe liwiniti Jiowa, upwe tongeni álisi.”

²⁰ Ewe Paipel a erá pwe tong “a apilüküni meinisin.” (1 Kor. 13:4, 7) Ese wor ngawen óm kopwe ápilúkúlúkú pwe ewe emén ka fókkun tongei epwe liwiniti Jiowa. Iteiten ier, chómmóng mi katowu ra filatá ar repwe aier me liwiniti án Jiowa mwicheich. Lupwen ra fen aiersefál Jiowa ese chúen song rer. Nge a tipemecheres le “amusala tipis.”​—Kölf. 86:5.

KOPWE FILIÉCH

21, 22. Lupwen ka féri kefil met ka tipeppós ngeni?

²¹ Jiowa a fen awora ngeni aramas ar pwúúng le féri kefil lón manawer. (Álleani Tuteronomi 30:19, 20.) Iwe nge pwal wisach ach sipwe féri kefil mi múrinné. Emén me emén Chón Kraist itá epwe pwisin eisini: ‘Ngang mi féfféri ekkewe kefil pwe upwe feffetál wóón ewe al mi pwúng? Ua fen mut ngeni ai angang, minen apwapwa are kunou, are ai famili ar repwe atowauaeiló seni Jiowa?’

²² Án Jiowa tongei aramas ese wor lemuchún. Ina minne esor och mettóch epwe tongeni áimukicheló seni i, chilóón chék ika sia féri kefil mi ngaw. (Rom 8:38, 39) Nge sia tongeni túmúnú pwe esap fis ngenikich ena! Kopwe apposa letipom pwe kosap mut ngeni och mettóch an epwe atowauakoló seni Jiowa. Ewe lesen mwirin ei epwe pwóróus usun pwal rúáánú mettóch lón manawach a lamot sipwe túmúnú ach kewe kefil wóór.