“Nefotofot Wóón Ekkewe Mettóch mi Fókkun Lamot”
“Nefotofot wóón ekkewe mettóch mi fókkun lamot.”—FIL. 1:10, NW.
1, 2. Ifa ewe oesini usun ewe ránin lesópwólóón néún Jesus kewe chón káé ra ekieki usun, me pwata?
JESUS a kerán ereni néún kewe chón káé pwe ewe imwenfel epwe taló. Iwe, minne a apasa a alólileni Petrus, James, Johannes me Andru. (Mark. 13:1-4) Lupwen iir chék ra nóm ren Jesus, ra eisini: “Kose mochen ürenikem inet epwe fis ekei mettoch meinisin? Kopwe pwäri ngenikem asisilen fansoun om wareto me ewe fansoun sopolan.” (Mat. 24:1-3) Iwe, Jesus a pélúweni me áweweei ngeniir met epwe fis mwen talóón Jerusalem, me pwal ekkewe mettóch repwe fis lesópwólóón án Satan ei ótót. Jesus a oesini usun ekkóch mettóch mi eniwokkus repwe fis, áwewe chék ren maun, lengita me watteen féfféringaw. Nge Jesus a pwal oesini usun och mettóch mi múrinné. A erá: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.”—Mat. 24:7-14.
2 Néún Jesus kewe chón káé ra fen fiti Jesus le afalafala ewe kapas allim usun ewe Mwú. (Luk. 8:1; 9:1, 2) Eli ra pwal chechchemeni alon Jesus ei: “Ewe räs a fokun watte, nge ekewe chon angang lon ra chokükün. Iei mine oupwe tüngor ngeni samolun ewe räs, pwe epwe tinala chon angang lon ewe räs.” (Luk. 10:2) Nge neman repwe ekieki: ‘Ifa usun sipwe afalafal “won unusen fanüfan” me “epwe eu minen pwärätä ngeni aramas meinisin”? Ia repwe feito me ie ekkewe chón afalafal?’ Ekkewe chón káé lón fansoun Jesus we repwe máirú ika repwe kúna amwararen pwénútáán ei oesini lón Mateus 24:14!
3. Met popun alon Jesus lón Lukas 21:34 a kon lamot ngenikich ikenái? Met sipwe pwisin eisinikich?
3 Án Jesus oesini a pwéppwénútá lón ach ei fansoun. Fite million aramas ra akkafalafala ewe kapas allim usun ewe Mwú wóón unusen fénúfan. (Ais. 60:22) Nge Jesus a áiti ngenikich pwe epwe weires ngeni ekkóch ar repwe akakkomwa lón manawer ewe angangen afalafal. Repwe fókkun osukosuk ren ekkóch mettóch, iwe, leluker epwe “chouchou” rer. (Álleani Lukas 21:34.) Alon Jesus keei ra kon lamot ngenikich ikenái pún ekkóch néún Kot kewe aramas rese akakkomwa lón manawer ekkewe mettóch mi lamot seni meinisin. Ei mettóch a pwáló ren met ra filatá lón pekin ar angang, ar sukul tekia me pisek. Ekkóch ra awora watteen fansoun fán iten ar minen apwapwa are kunou. Ekkóch ra fen apwangapwangoló lón ar angang ngeni Kot pokiten ar aúreki manawer iteiten rán. Kopwe pwisin eisinuk: ‘Met pwóróusei? Ngang mi akakkomwa Kot lón manawei?’
4. (a) Ifa án Paulus iótek fán iten ekkewe Chón Kraist lón Filipi? Pwata a lamot ena iotek? (b) Met sipwe káé lón ei lesen me ewe lesen mwirin ei? Ifa usun ekkeei lesen repwe álisikich?
4 A lamot ekkewe popun Chón Kraist repwe angang weires pwe repwe akkamwéchú ar akakkomwa án Kot angang lón manawer. Ina popun ewe aposel Paulus a iótek pwe ekkewe chón Filipi repwe “nefotofot wóón ekkewe mettóch mi fókkun lamot.” (Fil. 1:9-11, NW) Lap ngeni ekkewe Chón Kraist ra usun chék Paulus, “a lapala ar pwora le afalafala ewe kapasen Kot, nge resap niuokus.” (Fil. 1:12-14) Pwal ina chék usun lón ach ei fansoun, lap ngenikich sia akkafalafala án Kot we kapas fán pwora. Nge, epwe eú minen apéchékkúl ngenikich ach káé ei lesen ren ifa usun Jiowa a áeá an we mwicheich ikenái pwe epwe pwénúetá ewe oesini lón Mateus 24:14. Ei mettóch epwe álisikich ach sipwe alapaaló ach tinikken lón ewe angangen afalafal. Met án Jiowa we mwicheich a féfféri iei, me ifa usun a achchúngúkich me chón ach famili? Lón ewe lesen mwirin ei, sipwe káé met epwe tongeni álisikich le likiitú lón ach angang ngeni Kot me álleasochisi emmwenien án Jiowa we mwicheich.
KINIKININ ÁN JIOWA WE MWICHEICH LÓN LÁNG
5, 6. (a) Pwata Jiowa a pwár ngeni néún kewe aramas ekkewe lángipwi usun kinikinin an we mwicheich lón láng? (b) Met Isikiel a kúna lón eú lángipwi?
5 A wor chómmóng pwóróus Jiowa a filatá an esap apachaalong lón ewe Paipel. Áwewe chék, ese tichiki ewe pwóróus usun tupwuen aramas are pwóróus usun unuselapen láng me fénúfan. Nge Jiowa a awora ewe pwóróus mi lamot ngenikich pwe sipwe tongeni weweiti letipan me álleasochisi i. (2 Tim. 3:16, 17) A mmen amwarar pwe Jiowa a filatá an epwe pwár ngenikich pwóróus usun an we mwicheich lón láng. A ifa me ámmeseiken ach álleani ei pwóróus lón puken Aisea, Isikiel, Taniel me Pwärätä! (Ais. 6:1-4; Is. 1:4-14, 22-24; Tan. 7:9-14; Pwär. 4:1-11) Pwata Jiowa a pwár ngenikich ekkóch pwóróus usun met a fiffis lón láng?
6 Jiowa a mochen sipwe fókkun chechchemeni pwe sia kapachelong lón an we mwicheich wóón unuselapen láng me fénúfan. Kinikinin án Jiowa we mwicheich lón láng a angang weires le apwénúetá letipan. Áwewe chék, Isikiel a kúna eú lángipwi usun án Jiowa mwicheich mi liosutiw ren efóch watteen woken. Ei woken a fókkun mwittir le ssá me a pwal tongeni mwittir rik me siwili ia epwe ssá ie. (Is. 1:15-21) Isikiel a pwal kúna ewe Chón Wawa ena woken. Iei met a erá: “Üa küna och a wewe ngeni piras mi misimis, pwal och usun ekkei a pwelifeili ünükün.” A pwal erá: “Iei usun lapalapen lingen ewe Samol mi Lapalap.” (Is. 1:25-28) Ese mwáál Isikiel a mwaar ren met a kúna. A kúna pwe Jiowa a unusen nemeni an we mwicheich me a ákkáeá an we manaman mi fel le emmweni. Mwékútúkútún ewe woken lón ena lángipwi a eliosu ngenikich ifa usun angangen án Jiowa we mwicheich lón láng!
7. Ifa usun ewe lángipwi Taniel a kúna a alúkúlúkúkich?
7 Taniel a pwal kúna eú lángipwi mi alúkúlúkúkich. A kúna Jiowa “ewe mi nom seni me lomlom,” a mómmót wóón eú leenien motun king mi wor willan. (Tan. 7:9) Jiowa a mochen Taniel epwe kúna pwe An we mwicheich a mwékútúkút me akkangang pwe epwe apwénúetá letipan. Mwirin Taniel a kúna emén mi “usun chök lapalapen eman nöün aramas,” ina i Jesus, a angei wisan an epwe emmweni kinikinin án Jiowa we mwicheich wóón fénúfan. Án Jesus nemenem wóón fénúfan ese kaúk ren fitu chék ier. An “nemenem epwe nom tori feilfeilachök, esap tongeni wesila, nge mwün esap tongeni tala.” (Tan. 7:13, 14) Ei lángipwi a achchúngúkich ach sipwe lúkúlúk wóón Jiowa me álisikich le weweiti met i a féfféri. Pokiten Jesus a angei an nemenem seni Jiowa, iwe, ei lángipwi a pwal amwékútúkich ach sipwe lúkúlúk wóón Jesus pwe i ach we Sou Emmwen.
8. Ifa usun ekkewe lángipwi usun án Jiowa mwicheich a achchúngú Isikiel me Aisea? Ifa usun ekkeei lángipwi repwe pwal achchúngú letipach?
8 Ifa usun ekkeei lángipwi usun án Jiowa we mwicheich repwe itá achchúngú letipach? Usun chék Isikiel, sia ingeiti amwararen met Jiowa a féfféri. (Is. 1:28) Ewe soufós Aisea a pwal kúna eú lángipwi usun met a fiffis lón láng. Lupwen a ketiw an epwe wisen aronga ngeni aramas usun met Jiowa a féfféri, iwe, a mwittir etiwa ena etiwetiw. (Álleani Aisea 6:5, 8.) Ren án Jiowa álillis, Aisea a silei pwe esor och mettóch epwe tongeni pinei an epwe apwénúetá wisan we usun emén soufós. Usun chék Aisea, a pwal chúng letipach pwe sipwe álisatá án Jiowa we mwicheich ren ach alapaaló ach angang ngeni. Sia fókkun péchékkúletá ren ach silei pwe sia kapachelong lón án Kot we mwicheich, ewe a akkangang le apwénúetá letipen Jiowa!
KINIKININ ÁN JIOWA WE MWICHEICH WÓÓN FÉNÚFAN
9, 10. Pwata a lamot an epwe wor kinikinin án Jiowa mwicheich wóón fénúfan?
9 Ren Néún we Jesus, Jiowa a fératiw kinikinin an we mwicheich wóón fénúfan ewe a angangfengen me kinikinin an we mwicheich lón láng. A lamot ei mettóch pwe epwe pwénútá ewe angang Mateus 24:14 a oesini usun. Pwata? Nengeni ekkeei úlúngát popun.
10 Áeúin popun, Jesus a erá pwe néún kewe chón káé repwe afalafal wóón “unusen fanüfan.” (Föf. 1:8) Oruuan, a lamot ngeni chókkewe mi féri ei angangen afalafal ar repwe angei káit seni ewe Paipel me angei kapasen apéchékkúl. (Joh. 21:15-17) Aúlúngátin, mi lamot epwe kawor ekkewe mwich pwe repwe tongeni chufengen me fel ngeni Jiowa, me káé ifa usun repwe afalafal. (Ipru 10:24, 25) Ren an epwe pwénúetá ekkeei mettóch, a lamot pwe néún Jesus kewe chón káé repwe kókkótéch.
11. Ifa usun sipwe álisatá án Jiowa we mwicheich?
11 Ifa usun sipwe álisatá án Jiowa we mwicheich? Eú mettóch mi lamot, sipwe lúkúlúk wóón pwiich kewe ra wisen emmweni ewe angangen afalafal. Jiowa me Jesus ra lúkúlúk wóón pwiich kana, iwe, mi lamot sipwe pwal lúkúlúk wor. Pwiich kana ra tongeni áeá ar fansoun me péchékkúl le sótun pwákini osukosuken ei fénúfan, nge rese féri ena. Sipwe ppii met án Kot mwicheich wóón fénúfan a kan nefotofot wóón.
RA AKKOMWA EKKEWE METTÓCH MI LAMOT SENI MEINISIN
12, 13. Ifa usun ekkewe mwán mi ásimaw mi wisen emmweni ewe angang lón ekkewe fénú mi nóm fán ar túmún ra apwénúetá wiser? Pwata ar leenien áppirú a apéchékkúlakich?
12 Ekkóch ekkewe mwán mi ásimaw mi lipwákéch lón ekkewe mwichefel wóón unusen fénúfan, ra fen angei ewe wis le akkóta me emmweni ewe angangen afalafal lón ekkewe fénú ia ra angang ie. Lupwen ra féri kefil, ra kútta álillis seni Paipel. Iwe, ewe Paipel a usun ‘eu lamp a aiti ngeniir ia repwe ipwela ie, a pwal asarama aler.’ Ra pwal tingor án Jiowa emmwen lón iótek.—Kölf. 119:105; Mat. 7:7, 8.
13 Usun chék ekkewe mwán mi ásimaw lón fansoun ekkewe aposel, ekkewe mwán mi ásimaw ikenái mi wisen akkóta ewe angangen afalafal, ra pwal akkomwa ewe angangen “afalafala ewe kapasen Kot.” (Föf. 6:4) Ra meefi pwapwa lupwen ra kúna feffeitáán ewe angangen afalafal lón pwisin fénúer me wóón unusen fénúfan. (Föf. 21:19, 20) Rese fératiw chómmóng allúk fán iten néún Kot kewe aramas, nge ra nefotofot wóón ar féri minne mi lamot fán iten chéúfetálin ewe kapas allim fán emmwenien ewe Paipel me án Kot we manaman mi fel. (Álleani Föför 15:28.) Ren ei mettóch, pwiich kana ra isetiw eú leenien áppirú mi fókkun múrinné fán iten meinisin chón ekkewe mwichefel.—Ef. 4:11, 12.
14, 15. (a) Ikkefa ekkewe angang a fiffis pwe repwe álisikich lón ach angangen afalafal wóón unusen fénúfan? (b) Met meefiom ren óm apwénúetá wisom lón kálisitáán ewe angangen afalafal?
14 Chómmóng pwiich kewe ra akkangang iteiten rán pwe repwe ammólnatá ekkewe minen asukul seni Paipel repwe katowu lón néúch kewe puk, lón ach kewe mwich me mwichelap. Áwewe chék, fite ngeréú pwiich kewe ra pennúkúóló pwisin ar fansoun pwe repwe angang weires le afféúni néúch kewe puk mi kawor lón lap seni 600 fósun fénúfan. Iwe, pokiten ena, chómmóng aramas ra tongeni káé lón pwisin fósun fénúer “ekewe mettoch mi amwarar Kot a föri.” (Föf. 2:7-11) Ekkewe alúwél me fépwúl ra angang weires wóón ekkewe mwesin mi peresei me féri néúch kewe puk. Iwe mwirin, ekkewe puk ra titiiló ngeni ekkewe mwichefel pwal mwo nge ekkewe lón fénú towau.
15 Pwal lón pwisin leeniach kewe, chómmóng ra féri ewe angang mi álisikich le nefotofot wóón ewe angangen afalafala ewe kapas allim. Áwewe chék, fite ngeréú pwiich kewe ra fangóló pwisin ar fansoun pwe repwe álillis ren kaútáán ekkewe mineféén Leenien Mwich me Leenien Mwichelap. Ekkóch ra álisi ekkewe chón feiengaw atun feiengaw watte me álisi chókkewe mi weiweitá ar tolong lón pioing. Ekkóch ra akkóta ach kewe mwichelap, me ekkewe ekkóch ra wisen sense lón ekkewe sukulen Paipel. Pwata a fiffis ekkeei sókkópaten angang? A fis pwe epwe álisikich lón ach angangen afalafala ewe kapas allim, feffeitá lón ewe enlet, me álisi ekkewe ekkóch ar repwe wiliti chón fel ngeni Jiowa. Kinikinin án Jiowa we mwicheich wóón fénúfan a wesewesen akkomwa ekkewe mettóch mi lamot!
KÁÉ SENI EWE LEENIEN ÁPPIRÚ ÁN JIOWA WE MWICHEICH A ISETIW
16. Met ka tongeni káé lón óm famili fel are pwisin káé?
16 Kich mi kan awora fansoun le ekieki usun met án Jiowa we mwicheich a féfféri? Ka tongeni kútta ekkewe pwóróus usun ewe mwicheich atun óm famili fel are pwisin káé, me ekilonei met ka káé. Áwewe chék, epwe fókkun apwapwa óm káé usun ekkewe lángipwi Aisea, Isikiel, Taniel, me Johannes ra kúna. Ka pwal tongeni káé chómmóng mettóch mi apwapwa usun án Kot we mwicheich seni ewe puk Jehovah’s Witnesses—Proclaimers of God’s Kingdom me pwal néúch kewe ekkóch puk are ekkewe DVD.
17, 18. (a) Ifa usun ei lesen a álisuk? (b) Ikkefa ekkewe kapas eis kopwe pwisin eisinuk?
17 A múrinné ngenikich ach sipwe ekilonei ifa usun Jiowa a áeá an we mwicheich le álisatá ewe angangen afalafal. Sipwe fiti án Jiowa ei mwicheich mi amwarar le akkomwa ekkewe mettóch mi fókkun lamot. Sipwe meefieni meefien Paulus, ewe a apasa: “Pokiten än Kot tong a atolongakem lon ei angang, iei mine aisap apilükingau.” (2 Kor. 4:1) A pwal apéchékkúla pwiin kewe ren an apasa: “Sisap achanü le föföri mine a mürina. Pun are sisap achanü epwe war ewe fansoun lupwen sipwe kini ewe räs.”—Kal. 6:9.
18 Mi lamot ngonuk me óm famili ámi oupwe féri ekkóch siwil pwe oupwe tongeni akkomwa minne mi lamot lón manawemi iteiten rán? Oua tongeni ámecheresaaló nónnómun manawemi pwe oupwe tongeni alapaaló ámi fiti ewe angangen afalafal? Lón ewe lesen mwirin ei, sipwe káé nimu mettóch repwe álisikich le fitipachei án Jiowa mwicheich me akkamwéchú ach tinikken lón ach angang ngeni Kot.