Ewe Wesewesen Chón Efisi Maun me Riáfféú

A wesiló ewe Áeúin Maunen Fénúfan lón November 11, 1918. A kamwo kesip ekkewe business me aramas ra pwérúk wóón ekkewe al. Nge ena apwapwa ese nómottam. Ekiseló chék mwirin ena maunen fénúfan, a pwal fis eú osukosuk mi kon efeiengaw lap seni ekkewe kikanchú ra néúnéú le maun.

Lón June 1918 eú watteen semmwen itan Spanish flu a chéúló ikewe ra kan maunfengen ie lón France. Ewe ménún samau a fókkun efeiengaw. Áwewe chék, lón chék fitu maram, a chómmóng soufiun Merika lón France ra máló ren ena samau lap seni ekkewe ra máló lón ewe maun. Iwe, wesin ewe maun ekkewe soufiu ra liwiniti en me fénúan, ra uwei ena ménún samau, me a mwittir chéúló ena samau wóón unusen fénúfan.

A pwal fis osupwangen mwéngé me ekkewe fénú ra wéúngawoló. Lap ngeni unusen chón Iurop ra echik lupwen a wesiló ewe maun lón 1918. Lón 1923, ese chúen wor manamanen ekkewe monien Tois. Mwirin wonu ier, wóón unusen fénúfan ótóten sopai me manamanen moni ra tatiw. Iwe sáingolóón, lón 1939 ewe oruuen maunen fénúfan a poputá, usun itá sópwósópwun chék ewe áeúin maun. Met popun a fis ekkena watteen osukosuk mi kkóló mi chék akkatapw?

ESISSILLEN EKKEWE RÁNIN LESÓPWÓLÓÓN

Ekkewe oesini lón Paipel ra áiti ngenikich popun a fis ekkóch mettóch wóón fénúfan, ákkáeúin ewe Áeúin Maunen Fénúfan. Jesus Kraist a oesini usun eú fansoun lupwen “fanü me fanü repwe fiufengen” me lengita me málapalap repwe eriáfféwú unusen fénúfan. (Mateus 24:3, 7; Lukas 21:10, 11) A ereni néún kewe chón káé pwe ekkena riáfféú repwe kapachelong lón esissillen ekkewe ránin lesópwólóón. Lón ewe puken Pwärätä a mak pwal ekkóch pwóróus mi tichik, mi eririfengeni ekkena riáfféú wóón fénúfan me ewe maun mi fis lón láng.​—Ppii ewe pwóór itelapan “Maun Wóón Fénúfan me Maun lón Láng.”

Ewe puken Pwärätä a pwal fós usun ekkewe fémén chón wawa oris. Úlúmén me leir ra liosuetá maun, lengita me samau, ikkena pwal ekkewe riáfféú Jesus a fen oesini usun. (Ppii ewe pwóór itelapan “Ekkewe Fémén Chón Wawa Oris Ra Wesewesen Sássá Iei?”) A ffat pwe ewe áeúin maunen fénúfan a poputááni eú fansoun mi eriáfféú mi chék sópwósópwóló. Ewe Paipel a pwáraatá pwe Satan, i ewe a emmwenaalong fénúfan lón ekkeei osukosuk. (1 Johannes 5:19) Nge epwe muchúló an manaman?

Ewe puken Pwärätä a alúkúlúkú ngenikich pwe án Satan fansoun a chék “mochomoch.” (Pwärätä 12:12) Ina popun a fókkun song me a poputááni ekkeei watteen riáfféú wóón fénúfan. Iwe nge, ekkewe osukosuk sia kúkkúna iei ra ánnetatá pwe epwele muchúló án Satan fansoun.

KATALÓÓN ÁN TEFIL KEWE ANGANG

Pwúngún pwe ewe Áeúin Maunen Fénúfan a atoto watteen siwil wóón fénúfan. A emmwenikich ngeni ewe fansoun maun a kkúú manawen aramas ekis meinisin, angangen ú ngeni mwú me án aramas lúkúlúkúmmang ngeni ekkewe néúwis. A pwal awora eú pisekin ánnet pwe Satan a fen kóturutiw seni láng. (Pwärätä 12:9) Féfférún ei sou nemenemen fénúfan sise tongeni kúna, a usun féfférún emén king mi kirikiringaw mi silei pwe epwele péút seni an nemenem. Lupwen án Satan na fansoun epwe muchúló, iwe ewe fansoun osukosuk a poputá atun ewe Áeúin Maunen Fénúfan epwe pwal wesiló.

Me ren ekkewe oesini lón Paipel, a wor popun kopwe lúkúlúk pwe ekiseló chék Jesus Kraist, ach we King lón láng epwe “atala än Tefil angang.” (1 Johannes 3:8) Chómmóng aramas ra fen ikkiótek fán iten warotoon ewe Mwúún Kot. Ka pwal ákkeáni ena iótek? Sia kilisou ngeni ena Mwú pún ekkewe aramas mi tuppwél repwe kúna pwénúetáán letipen Kot, esap fen letipen Satan. (Mateus 6:9, 10) Fán án Kot we Mwú, esap chúen wor maunen fénúfan are esap mwo nge fis eú maun! (Kölfel 46:9) Káé usun ena Mwúún Kot, me manaw ngeni ena fansoun lupwen kinamwe epwe nóm ekis meinisin wóón fénúfan!​—Aisea 9:6, 7.