PWÓRÓUS LÚKÚNPÉÉN | ITÁ KOT A KAN ÁFÁNNUK?
Kot A Weweituk
“Ai Samol mi Lapalap, en ka atittinaei, ka pwal sileei.”—KÖLFEL 139:1.
POPUN EKKÓCH RA TIPEMWARAMWAR: Chómmóng aramas ra meefi pwe Kot a chék nennengeni aramas pwe iir chón tipis, iir mi limengaw me ese fich ngeniir an epwe áfánniir. Kendra, a úri semwenin letipechou, i a fókkun meefi mengiringir pokiten ese tongeni unusen apwénúetá án Kot kewe allúk. Iwe, a erá: “Ua úkútiw le ikkiótek.”
MET ÁN KOT WE KAPAS A APASA: Jiowa ese chék nefotofot ngeni óm kewe apwangapwang, nge I a weweiti met wesewesen napanapom. Ewe Paipel a apasa, “A silei sokosokuch, a chemeni pwe kich pwül echök.” Pwal och, ese féri ngenikich usun minne a fich ngeni “ükükün ach tipis,” nge a úméúméch ngenikich me omusakicheló lupwen sia aier.—Kölfel 103:10, 14.
Nengeni pwóróusen emén kingen Israel, Tafit, ewe sia pwóróus usun lón ewe áeúin lesen. Lón án Tafit we iótek ngeni Kot, a erá: “En ka fen künaei, lupwen esamwo wor uluuli. . . . ra fen mak lon noum puk . . . Ai Kot, kopwe atittinaei o silei letipei.” (Kölfel 139:16, 23) Ewer, Tafit a fókkun lúkú pwe inaamwo ika a fen tipis, me lón ekkóch fansoun a pwal tipis watte, nge Jiowa a tongeni silei lón letipan pwe a aier.
Jiowa a fókkun weweiti meefiom lap seni aramas. Ewe Paipel a apasa: “Aramas ra nenengeni lapalapen mesen eman, nge ngang [Jiowa] üa nenengeni leluken aramas.” (1 Samuel 16:7) Kot a silei pwata a ina usun óm mwékútúkút. A silei pwe ka wiliti ena sókkun aramas, pokiten ekkewe mettóch mi anapanapok, áwewe chék ren napanapom kewe ka álemwiri seni semom me inom me óm kewe lewo, napanapen óm mámmááritá, me pwal pwisin napanapom. A kúna me aúcheani ewe sókkun aramas ka achocho ngeni óm kopwe wiliti, inaamwo ika ka kan mwáálliló.
Iwe nge, itá Kot a áeá an wakkatteen silei me weweiti ika ‘en wesewesen met sókkun aramas’ pwe epwe oururuk?