Pwata Sia Mochen Silei Pwóróusen án Kot we Mwú?

Chómmóng aramas wóón unusen fénúfan ra eáni ápilúkúlúk wóón ewe Mwúún Kot. Ra áppirú Jesus, ewe a áiti ngeni néún kewe chón káé ar repwe eáni ei iótek: “Muom epwe feito, letipom epwe pwonueta, won fonufan usun chok lon lang.”​—Mateus 6:10, Testament Mi Fö.

Inaamwo ika chómmóng aramas ra fókkun mochen silei usun pwóróusen án Kot we Mwú, nge usun itá lap ngeni lamalam rese kon lien áfánni ena Mwú. Emén sou uruwo itan H. G. Wells a uwawu meefian usun ena mettóch, a erá pwe mi ámáirú pwe lón áitien Jesus kewe a kon menlapei ewe afalafal usun Mwúún Láng, nge lón lap ngeni áitien ekkewe lamalamen Chón Kraist rese kon lien menlapei ena.

Chón Pwáraatá Jiowa ra sókko seni ekkena lamalam pún iir ra fókkun menlapei án Kot we Mwú. Ekieki mwo: Néúm ei puk, ei ka álleani iei, a fen peres lón 220 fósun fénúfan. Iteiten an katowu ei puk a kan peres lón 46 million kapi, nge ina ewe puk mi einet wóón unusen fénúfan lap seni puk (magazine) meinisin. Met ei puk a menlapei? Ppii unusen itelapen ei puk: Ewe Leenien Mas A Esilefeili án Jiowa we Mwú.a

Pwata Chón Pwáraatá Jiowa ra fókkun achocho le esilefeili pwóróusen án Kot we Mwú? Popun, pún aua lúkú pwe án Kot we Mwú, ina menlapen pwóróus lón ewe Paipel, ewe puk mi lamot seni meinisin wóón fénúfan. Pwal och, aua lúkú pwe ina chék ewe Mwú epwe wesewesen pwákini án aramas kewe osukosuk lón ei fansoun.

Chón Pwáraatá Jiowa ra achocho le áppirú án Jesus leenien áppirú ren ar áiti ngeni aramas usun án Kot we Mwú. Lupwen Jesus a nóm wóón fénúfan, a fókkun akkomwa lón manawan me lón an angangen afalafal ewe Mwúún Kot. (Lukas 4:43) Pwata Jesus a fókkun aúcheani ena Mwú? Met lamoten ena Mwú ngonuk? Ám aua etiwok le ppii ifa usun ewe Paipel a pélúweni ekkena kapas eis, usun met sipwele pwóróus wóón lón ekkewe lesen mwirin ei.