Ineet án Kot we Mwú A Poputá le Nemenem?​—Kinikin 1

“FAKKUN ACHOCHO NE KUTTA” WEWEÉCH

Cameron: Jon, ua wesewesen pwapwaiti ach kákkáé Paipel iteitan wiik.a Lón ewe atun sia fósfengen ka kapas eis usun án Kot we Mwú. Ka eis ika pwata Chón Pwáraatá Jiowa ra lúkú pwe ewe Mwú a poputá le nemenem lón ewe ier 1914.

Jon: Ewer. Ua álleani eú me lein néúmi kewe puk, me lón ena puk a erá pwe án Kot we Mwú a poputá le nemenem lón 1914. Iwe, ua mochen silei enletin pún ka erá pwe meinisin ámi lúkú a chék lóngólóng wóón ewe Paipel.

Cameron: Ewer, mi pwúng.

Jon: Iwe, pwe ua fen álleani unusen ewe Paipel nge use chechchemeni ai kúna eú wokisin mi apasa usun ewe ier 1914. Ina popun ua tétá wóón Internet, ló ngeni Paipel online me kútta usun “1914” nge ese wor lón Paipel.

Cameron: A wor ruu popun ua apúngaok Jon. Akkomw, pwe ka álleani unusen ewe Paipel. Ka fókkun tongei án Kot we Kapas.

Jon: Pwúngún. Ese wor met mi léllé ngeni ewe Paipel.

Cameron: Ua tipeeú. Oruuan, ua pwal mochen apúngaok pún ka kútta pélúwan óm kapas eis seni ewe Paipel. Ka wesewesen féri minne ewe Paipel a pesengenikich: “Kopwe fakkun achocho ne kutta” weweéch.b A múrinné óm achocho le féri ena.

Jon: Kilisou. Pún ngang ua mochen upwe chék kákkáé. Ren enletin, ua pwal alapaaló ai pwisin kúttafichi pwóróus usun 1914 me ua kúna ei pwóróus lón ei puk sia kákkáé. A apasa pwe emén king a eáni ttan, usun efóch irá mi fókkun watte, iwe a pékúpékútiw nge usun a pwúksefál.

Cameron: Mi pwúng. Ina ewe oesini mi mak lón Taniel sópwun 4. A fós usun ewe ttan ewe Kingen Papilon itan Nepukatnesar a eáni.

Jon: Mi pwúng, ina ewe. Ua álleani ewe oesini fán fite nge upwe kapas wenechar, use weweiti ifa usun a riri ngeni án Kot we Mwú are ewe ier 1914.

Cameron: Ren enletin Jon, pwal mwo ewe soufós Taniel ese weweiti unusen weween minne Kot a apasa pwe epwe makkeei.

Jon: Fókkun?

Cameron: Ewer. Nengeni met Taniel a erá lón Taniel 12:8: “Üa rong mine a apasa, nge üsap weweiti.”

Jon: Iwe, weween esap chék ngang. Iwe kilisou pwe ua meefi kinamwe.

Cameron: Nge ren enletin, Taniel ese weweiti pokiten esaamwo tori án Kot fansoun pwe aramas repwe unusen weweiti weween ekkewe oesini lón puken Taniel. Nge iei, lón ach ei fansoun, sia tongeni unusen weweiti ekkewe oesini.

Jon: Pwata ka apasa ena?

Cameron: Iwe, nengeni met Taniel 12:9 a erá: “Ekei kapas epwe monomon o kaopola tori fansoun sopolan.” Weween pwe aramas repwe weweiti ekkeei oesini atun ewe “fansoun sopolan.” Me ina met sipwele pwóróus wóón lón ach káé, pwe meinisin ekkewe pisekin ánnet ra áiti ngenikich pwe sia fen nónnóm lón ena fansoun.c

Jon: Iwe, ka tongeni áwewe ngeniei ewe oesini lón Taniel?

Cameron: Upwe achocho ngeni.

ÁN NEPUKATNESAR TTAN

Cameron: Iwe, upwe ekis apwóróusa met Nepukatnesar a kúna lón an we ttan. Mwirin sia tongeni fósfengen usun met weween.

Jon: Iwe, komwan.

Cameron: Lón ewe ttan, Nepukatnesar a kúna efóch irá mi fókkun watte arapakkan epwele tikeri láng. Mwirin a rongorong emén néún Kot chónláng a allúkú pwe epwe pékúpék ewe irá. Iwe nge, ewe chónláng a erá pwe epwe likiti popun me waran lón ewe pwúl. Mwirin “fisu ier” ewe irá epwe máársefál.d Ei oesini a akkomw pwénútá ngeni King Nepukatnesar. Ikaamwo i emén king mi iteféúló, usun irá mi mááritá tori láng, nge a pékúpékúló lón “fisu ier.” Ka chechchemeni met a fis?

Jon: Aapw, use chechchemeni.

Cameron: Iwe, ewe Paipel a erá pwe Nepukatnesar a umwes lón úkúkún fisu ier. Lón ena atun ese tongeni nemenem usun emén king. Nge lemuchúlóón ena fansoun, Nepukatnesar a miritsefál me poputásefál le nemenem.e

Jon: Ua weweiti minne ka apasa. Nge ifa ririin ekkeei ngeni án Kot we Mwú me ewe ier 1914?

Cameron: Ren an epwe chék mwoch áweween, a wor ruu pwénútáán ei oesini. Áeúin, a fis atun án King Nepukatnesar nemenem a kaúló. Oruuan, a weneiti atun án Kot nemenem a kaúló. Weween pwe ewe oruuan pwénútáán ewe oesini ina a riri ngeni án Kot we Mwú.

Jon: Nge ifa usun ka silei pwe a wor oruuan pwénútáán ewe oesini m riri ngeni án Kot we Mwú?

Cameron: Sia kúna ena seni ewe oesini. Alon Taniel 4:17,ewe oesini a atowu “pwe aramas repwe silei pwe Ewe mi Fokun Tekia a nemeni mwün aramas, repwe pwal silei pwe a fangala nemenem ngeni iö a mochen fang ngeni.” Ka kúna ewe kapas “mwün aramas”?

Jon: Ewer. A erá pwe “Ewe mi Fokun Tekia a nemeni mwün aramas.”

Cameron: Mi pwúng. Ka ekieki pwe ié na “Ewe mi Fokun Tekia”?

Jon: Ai lúkú a fós usun Kot.

Cameron: Mi pwúng. Ina popun ewe oesini ese chék áitingenikich usun Nepukatnesar nge pwal “mwün aramas” weween, án Kot nemenem wóón aramas. A pwúng ena atun sia nengeni weween ewe oesini.

Jon: Met weween ena?

ITELAPEN EWE PUK

Cameron: Fán chómmóng ewe puken Taniel a fós usun ena itelap. A kan soun áwena ngeni poputáán án Kot we Mwú fán nemenien Néún we, Jesus. Áwewe chék, sipwe liwiniti ekkóch sópwun. Kese mochen kopwe álleani Taniel 2:44?

Jon: Ewer. A erá: “Lon fansoun mwün ekewe king, ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.”

Cameron: Kilisou. Met meefiom, ei wokisin a fós usun Mwúún Kot?

Jon: Mmm. Use silei.

Cameron: Iwe, nengeni pwe a apasa pwe ei Mwú “epwe püsin nom tori feilfeilachök.” Mi enlet ena fán iten án Kot we Mwú nge sise tongeni erá pwe epwe weneiti mwúún aramas meinisin, ika met?

Jon: Pwúngún.

Cameron: Iei pwal eú oesini lón puken Taniel mi weneiti án Kot we Mwú. A mak lón Taniel 7:13, 14 usun ewe sounemenem lón fansoun mwach, a erá: “a angei an nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni. An nemenem epwe nom tori feilfeilachök, esap tongeni wesila, nge mwün esap tongeni tala.” Ka chemeni och mettóch mi usun ei wokisin?

Jon: A fósun eú mwú.

Cameron: Mi pwúng. Nge esap weween pwe ese lifilifil menni mwú. Nengeni, a erá pwe ei Mwú epwe wor an nemenem wóón “aramasen fanü me mwü, pwal aramas mi eäni sokopaten fos.” Weween, ei Mwú epwe wor an nemenem wóón unusen fénúfan.

Jon: Use mwo pwal ekieki pwe ina weween ena wokisin. Nge mi pwúng.

Cameron: Pwal och, nengeni met ewe oesini a pwal apasa: “An nemenem epwe nom tori feilfeilachök, esap tongeni wesila, nge mwün esap tongeni tala.” A chék usun ewe oesini sia kerán álleani seni Taniel 2:44, ika met?

Jon: Pwúngún.

Cameron: Iwe, sipwe ekis enniwili met sia fen pwóróusfengen wóón. Ewe oesini lón Taniel sópwun 4 a atowu pwe aramas repwe silei pwe “Ewe mi Fokun Tekia a nemeni mwün aramas.” Ei mettóch a ánneta pwe ewe oesini a pwal wor pwénútáán mi lap seni ewe mi weneiti Nepukatnesar. Me lón unusen ewe puken Taniel, sia kúna chómmóng oesini usun poputáán án Kot we Mwú fán nemenien Néún we. Met meefiom, epwe éch ach sipwe apasa pwe ewe oesini lón Taniel sópwun 4 a pwal weneiti án Kot we Mwú?

Jon: Ewer. Nge use mwo kúna ifa usun a riri ngeni 1914.

“EPWE FIS . . . FISU IER”

Cameron: Iwe, sipwe liwiniti pwóróusen King  Nepukatnesar. Lón ewe áeúin pwénútáán ewe oesini, ewe irá a liosuetá Nepukatnesar. An we nemenem a kaúló atun a umwes lón fitu fansoun, usun ewe irá a pékúpék me ra likitaló lón fisu fansoun. Ena fisu fansoun a much lupwen Nepukatnesar a miritsefál me liwiniti an we nemenem. Lón oruuen pwénútáán ewe oesini, án Kot nemenem epwe kaúló lón fitu fansoun nge esap pokiten a wor lipwákingawen Kot.

Jon: Met weween alom na?

Cameron: Lón fansoun lóóm, ekkewe kingen chón Israel mi nemenem lón Jerusalem ra usun itá móót wóón án Jiowa “lenien motun king.”f Ra tupuni Kot lón ar nemeni néún kewe aramas. Ina popun án chókkana nemenem a liosuetá wesewesen án Kot we nemenem. Iwe nge a wor fansoun pwe lape ngeni ekkena king ra álleasolapa Kot me chómmóng me lein ekkewe aramas ra nóm fán nemenier ra áppirúúr. Pokiten án chón Israel álleasolap, iwe Kot a mut ngeni chón Papilon ar repwe okkufuur lón 607 B.C.E. Seni ena atun ese chúen wor king mi tupuni Jiowa lón Jerusalem. Lón ena áwewe, a kaúló án Kot we nemenem. Ka ekis weweiti?

Jon: Ewer.

Cameron: Ina popun a poputá ewe fisu fansoun lón ewe ier 607 B.C.E. are ewe fansoun án Kot nemenem a kaúló. Lemuchúlóón ewe fisu fansoun, Kot epwe seikaatá emén mineféén sounemenem. Iwe, lón ena atun, ena emén epwe seni láng. Ina ewe atun ekkewe ekkóch oesini sia álleani seni Taniel repwe pwénúetá. Iwe, iei ewe kapas eis: Ineet atun ewe fisu fansoun a muchúló? Ika sia tongeni pélúweni ena, sipwe pwal silei ineet atun án Kot we Mwú a poputá le nemenem.

Jon: Iwe, upwe esissil. Esap a much lón 1914?

Cameron: Mi fókkun pwúng!

Jon: Nge ifa usun sia silei ena?

Cameron: Iwe, atun án Jesus afalafal wóón fénúfan, a erá pwe esaamwo much ewe fisu fansoun.g A ffat pwe ena fansoun a ttam. Ewe fisu fansoun a poputá fitepúkú ier me mwen án Jesus feito fénúfan, me a chék sópwósópwóló tori ewe atun a feitá láng. Pwal chemeni pwe weween án Taniel kewe oesini esap mwo fataffatéch tori “fansoun sopolan.”h Me mwan ewe ier 2000, ekkewe chón káé Paipel iir mi letipwenechar ra fókkun mochen silei me etittinaéchú ei oesini me pwal ekkewe ekkóch. Ra poputá le weweiti pwe ewe fisu fansoun epwe much lón ewe ier 1914. Minne a fiffis wóón fénúfan a ánneta pwe 1914 ina wesewesen ewe ier án Kot we Mwú a poputá le nemenem lón láng. Ina ewe ier fénúfan a tolong lón ekkewe ránin lesópwólóón. Ngang ua silei pwe a chómmóng pwóróus kopwe ekieki usun.

Jon: Ewer. Upwe wesewesen álleasefáli ei pwóróus pwe upwe weweéchúti.

Cameron: Kosap lólilen. A pwal ttam ewe fansoun ai upwe silei ifa usun meinisin ekkeei pwóróus ra ririfengen. Nge ren mwo iei, ua áneán pwe amwo itá ach pwóróusfengen a álisuk le kúna pwe án Chón Pwáraatá Jiowa lúkú usun ewe Mwú a lóngólóng wóón ewe Paipel.

Jon: Ewer. Fen ina met ua meefi iteitan ren ifa usun oua lónguni ámi lúkú wóón Paipel.

Cameron: Ua pwal kúna pwe ina met ka mochen. Usun met ua fen apasa pwe ei pwóróus a kon watte áweween lón chék eú fansoun. Nge ese mwáál a chúen pwal wor ekkóch óm kapas eis. Áwewe chék, sia fen apwúngaló pwe ewe fisu fansoun mi riri ngeni án Kot we Mwú a poputá lón 607 B.C.E. Nge ifa usun sia wesen silei pwe ewe fisu fansoun a much lón 1914?i

Jon: Mi pwúng, ua pwal ekieki ena.

Cameron: Pwisin Paipel epwe álisikich le silei wesewesen ttamen ewe fisu fansoun. Ka mochen kopwe káé ena lón nan?

Jon: Ewer, ua mochen.