ÁN PAIPEL KEWE KAPAS EIS RA PÉLÚ

Met a amwékútú chómmóng aramas le etittina ika mi wor emén Chón Fératá?

Órun 3,000 ier ra ló, emén sou makken kúúkúún fós a makkeei: “A amairü o amwarar om föri ei.” (Kölfel 139:14) Lupwen ka ekieki usun án emén ménúkol fisitá seni eféú cell, kese le mmen ingeló? Chómmóng aramas ra meefi pwe kókkótéchún ménúmanaw a fis pokiten emén Chón Fératá.​—Álleani Kölfel 139:13-17; Ipru 3:4.

Ewe Emén mi féri unuselapen láng me féri fénúfan pwe aramas me man repwe tongeni nóm wóón, a pwal awora manaw. (Kölfel 36:9) A fen pwóróus ngeni aramas me a áiti ngenikich pwóróusan.​—Álleani Aisea 45:18.

Itá kich sia pop seni man?

A wor chómmóng mettóch inisich aramas me inisin man ra lélléfengen wóón. Nge a ina usun pokiten ewe Chón Fératá a anapanapa aramas me man ar repwe manaw wóón fénúfan. A féri ewe áeménún aramas seni pwúl, nge esap seni emén man.​—Álleani Keneses 1:24; 2:7.

A wor ruu mettóch mi aúchea aramas ra sókko seni man wóón. Áeúin, aramas ra tufichin silei, tongei, me asamolu ewe Chón Fératá. Oruuan, aramas ra ffér pwe repwe manaw tori feilfeiló chék, nge esap ina usun ren man. Nge iei, aramas meinisin ra álemwiri máló pokiten ewe áeménún mwán a tunaló ekkewe kapasen emmwen seni ewe Chón Fératá.​—Álleani Keneses 1:27; 2:15-17.