Oupwe Kilisou Ngeni Jiowa me Kúna Feiéch

1. Pwata a fich ngeni Jiowa ach sipwe kilisou ngeni?

A FICH ach sipwe kilisou ngeni Jiowa, ewe Chón Awora “lifang mi mürina meinisin me feiöch mi unusöch meinisin.” (Jas. 1:17) I ach Chón Mas mi tong, a awora ngenikich meinisin met sia osupwangan lón pekin aion me pekin lúkú. (Kölf. 23:1-3) I “ach lenien op me ach pöchökül,” ákkáeúin lón fansoun riáfféú. (Kölf. 46:1) Pwúngún, a wor chómmóng popun ach sipwe fókkun tipeeú ngeni ewe soumakken kélfel, ewe a makkeei: ‘Oupwe apasa ami kilisou ngeni Jiowa, pun i mi murinno; pun an we tong enlet epwe nonnom feilfeilo chok!’—Kölf. 106:1, TF.

2, 3. (a) Met efeiengawen ach sisap meefi kilisou? (b) Ikkefa ekkewe kapas eis sipwe pélúweni lón ei lesen?

² Pwata a lamot ach sipwe kilisou ngeni Jiowa? Paipel a fen oesini pwe lón ekkeei ránin lesópwólóón, aramas resap fókkun sile kilisou, iwe ina met a fiffis. (2 Tim. 3:2) Chómmóng rese aúcheani ekkewe feiéch Jiowa a fang ngeniir. Fite fite million aramas ra tipetipeló ren án ei fénúfan etipetiper ar repwe mééni mettóch ese enletin lamot ngeniir lap seni ar repwe menemenéch ren minne a wor rer. Pwal kich sia tongeni eáni napanapen ekkewe chón Israel lóóm ika sise meefi kilisou me aúcheani ewe riri mi fókkun lamot lefilach me Jiowa me ekkewe feiéch meinisin sia fen angei seni i.​—Kölf. 106:7, 11-13.

³ Pwal eú, ekieki ika met a tongeni fis lupwen sia nóm lón watteen weires. Lón ekkena fansoun, a mecheres ach sipwe meefi pwe ach kewe osukosuk ra kon watte me ménúkaaló ekkewe feiéch sia fen kúna. (Kölf. 116:3) Iwe, ifa usun sia tongeni ákkeáni eú letip mi meefi kilisou? Met epwe álisikich le akkamwéchú ach eáni ekiek pwúng pwal mwo nge atun sia nóm lón watteen weires? Iei sipwele káé usun.

“AI SAMOL MI LAPALAP AI KOT, KA FÖRI CHOMONG FÖFÖR”

4. Ifa usun sipwe ákkeáni ewe sókkun letip mi meefi kilisou?

⁴ Ren ach sipwe ákkeáni ewe sókkun letip mi meefi kilisou, a lamot sipwe mirititi me ekilonei ach kewe feiéch seni Jiowa me ekiekifichi an kewe féffér mi pwáraatá an tong mi enlet. Lupwen emén soumakken kélfel a féri ena, a fókkun ingeló ren ekkewe mettóch mi amwarar Jiowa a fen féri fán itan.​—Álleani Kölfel 40:5; 107:43.

5. Met sia tongeni káé seni aposel Paulus usun ach sipwe meefi kilisou?

⁵ Sia tongeni káé chómmóng mettóch seni aposel Paulus ren ifa usun sipwe meefi kilisou. Sia silei pwe i a kan ekiekifichi ekkewe feiéch seni Jiowa pokiten a iótekin kilisou iteitan. Paulus a mirititi pwe i emén chón “kapasingau,” “ariaföüü o turunufaseei” aramas. Iwe nge, a kilisou pún inaamwo ika a féri watteen tipis me lóóm, nge Kot me Kraist ra úméúméch ngeni me ewisa ngeni an epwe afalafal ngeni aramas. (Álleani 1 Timoty 1:12-14.) Paulus a pwal fókkun aúcheani pwiin kewe Chón Kraist me a kan kilisou ngeni Jiowa ren ar tuppwél me eáni napanap mi fókkun múrinné. (Fil. 1:3-5, 7; 1 Tes. 1:2, 3) Pwal och, lupwen Paulus a nóm lón watteen riáfféú a mwittir kilisou ngeni Jiowa ren met pwiin kewe chón lúkú ra féri fán itan. (Föf. 28:15; 2 Kor. 7:5-7) Ina popun, esap eú minen ámáirú ngenikich án Paulus keei kapasen apéchékkúl ngeni ekkewe Chón Kraist: “Oupwe kilisou ngeni Kot . . . o fönööfengenikemi fän mirit. Oupwe kölü ekewe kölfel, ekewe kölün lamalam me ekewe köl mi pin. Oupwe köl ngeni Kot fän kilisou lon letipemi.”​—Kol. 3:15-17.

EKILON ME IÓTEK RA ÁLISIKICH LE MEEFI KILISOU ITEITAN

6. Pwata ka kilisou ngeni Jiowa?

⁶ Ifa usun sia tongeni áppirú Paulus? Mi lamot sipwe ekilonei minne Jiowa a fen féri fán pwisin itach. (Kölf. 116:12) Met kopwe apasa ika emén a eisinuk, ‘Menni feiéch seni Jiowa ka kilisou ren?’ Kopwe apachaalong óm ririéch ngeni Jiowa? Are án Jiowa omusaaló óm kewe tipis pokiten óm lúkú án Kraist méén kepich? Kopwe fós usun chienom kewe Chón Kraist mi álisuk atun óm nóm lón weires? Kopwe fós usun óm kilisou ren pwúlúwom we mi áchengicheng are noum kewe? Óm awora fansoun le ekilonei ekkena feiéch seni Semom we mi tong, Jiowa, epwe uroló letipom ren kilisou me amwékútuk le kilisou ngeni iteiten rán.​—Álleani Kölfel 92:1, 2.

7. (a) Pwata sipwe kilisou ngeni Jiowa lón iótek? (b) Met feiéchún óm pwáraatá kilisou lón iótek?

⁷ Lupwen sia ekilonei meinisin ekkewe feiéch mi torikich, iwe sia mochen iótek ngeni Jiowa me apasa ach kilisou. (Kölf. 95:2; 100:4, 5) Chómmóng aramas ra chék ekieki pwe iótek ina alen ar repwe tingor mettóch seni Kot. Nge kich sia silei pwe Jiowa a kan pwapwaiti ach sipwe apasaatá ach kilisou ngeni i ren met a fen fang ngenikich. A wor chómmóng iótekin kilisou mi mak lón Paipel, kapachelong án Hana me Hiskia. (1 Sam. 2:1-10; Ais. 38:9-20) Iwe kopwe áppirú ekkena chón angang mi tuppwél, iir mi pwáraatá ar kilisou. Ewer, kopwe kilisou ngeni Jiowa lón iótek ren met a fen féri fán ásengesum. (1 Tes. 5:17, 18) Óm féri ena epwe atoto ngonuk chómmóng feiéch. Kopwe meefi kinamween letipom, péchékkúlelóón óm tong ngeni Jiowa, me kopwe akkarap ngeni i.​—Jas. 4:8.

8. Met a tongeni efisi ach sisap meefi kilisou ngeni Jiowa ren mettóch meinisin a fen féri fán itach?

⁸ Ika sise túmúnúéch, a tongeni péút senikich ach meefi kilisou ngeni Jiowa ren an kewe liffang mi múrinné. Pwata? Pún sia álemwiri ewe napanap ach sisap meefi kilisou. Ekieki mwo: Kot a onómu popuch kewe, Atam me Efa, lón eú paratis. Ese wor met ra osupwangan, me ra tongeni manaw lón kinamwe tori feilfeiló chék. (Ken. 1:28) Iwe nge rese aúcheani ar kewe feiéch. Ra fen tipemmóng me mocheniaiti pwal ekkóch mettóch. Pokiten ena, a péút seniir mettóch meinisin. (Ken. 3:6, 7, 17-19) Pokiten sia nónnóm lón ei ótót aramasen lón rese pwári kilisou, sia pwal tongeni ménúkaaló meinisin met Jiowa a fen féri fán itach. A tongeni apwangapwangoló ach aúcheani ach chiechi ngeni i. A tongeni efisi ach sisap chúen aúcheani ach we feiéch, ina ach chóni ewe mwichen pwipwi wóón unusen fénúfan. Sia tongeni poputá le ekieki chék mettóchun ei fénúfan epwele móróló. (1 Joh. 2:15-17) Ren ach sipwe ttii senikich ena esin ssár, a lamot sipwe ekilonei ekkewe chómmóng feiéch mi torikich me kilisou ngeni Jiowa iteitan pokiten ach kapachelong lein néún kewe aramas.​—Álleani Kölfel 27:4.

LUPWEN SIA NÓM LÓN WATTEEN RIÁFFÉÚ

9. Lupwen sia nóm lón watteen riáfféú, pwata a lamot sipwe ekkekieki ekkewe feiéch a fen torikich?

⁹ Ach eáni eú letip mi meefi kilisou a tongeni álisikich le likiitú fán watteen riáfféú. Sia tongeni meefi pwe sia kokoló lón ach osukosuk lupwen a weiweitá mettóch mi tongeni siwili nónnómun manawach, áwewe chék ren kirikiringawen pwúlúwach, semmwen mi fókkun chou, málóón attongeach, are feiengaw watte. Ach ekkekieki ekkewe feiéch a fen torikich epwe tongeni oururukich me apéchékkúlakich. Sipwele ppii met mi wesewesen fis lón manawen ekkóch.

10. Ifa usun án Irina ekkekieki ekkewe feiéch mi tori a álisi?

¹⁰ Emén regular pioneer lón Merika itan Irina,a pwúlúwan emén mwán mi ásimaw lón ewe mwichefel, nge mwirin och fansoun átena ese chúen tuppwél ngeni me a likitaló me néúr kewe. Met a álisi Irina an epwe sópweló le angang ngeni Jiowa fán tuppwél? A erá: “Ua kilisou ren án Jiowa pwisin túmúnúei wóón winikapei. Pokiten ua filatá ai upwe ekkekieki ekkewe feiéch mi toriei iteiten rán, ua tongeni kúna úkúkún ewe feiéch seni Semach we lón láng mi túttúmúnúkich, ina ai silleló me ren me an tongeei. Ua silei pwe i esap fókkun likitieiló.” Inaamwo ika Irina a kúna chómmóng mettóch mi áweires lón manawan, nge an meefi pwapwa a kan elikiitú i, iwe a pwal apéchékkúla ekkewe ekkóch.

11. Met a álisi Kyung-sook an epwe likiitú ngeni eú semmwen mi fókkun chou?

¹¹ Kyung-sook a nónnóm lón Asia, iir me pwúlúwan we ra pioneer lap seni 20 ier. Mwittir chék, a silei pwe a úri kanserin ammat me ewe tokter a ereni pwe a tongeni manaw úkúkún chék úlúngát ngeni wonu maram. Inaamwo ika iir me pwúlúwan we ra kúna chómmóng osukosuk lón manawer, nge rese kan sessemwen. Kyung-sook a erá: “Ei semmwen a fókkun áweiresi letipei. Ua meefi pwe a péút seniei mettóch meinisin, me ua mmen niwokkus.” Met a álisi Kyung-sook an epwe tongeni likiitú? A erá: “Iteiten pwin me mwen ai upwele méúr, ua tétá asen imwem we me léúwommóng le iótek usun nimu mettóch ua kilisou ren lón ena ránin. Iwe, ua meefi lúkúlúk, me a chúng letipei ai upwe pwáraatá ai tong ngeni Jiowa.” Ifa usun Kyung-sook a kúna feiéch seni ekkeei iótek a kan eáni iteiten pwin? A erá: “Iei ua mirititi pwe Jiowa a elikiitúkich lón mettóch mi áweires me a kon chómmóng ekkewe feiéch sia kúna lón manawach lap seni ekkewe riáfféú.”

12. Ifa usun Jason a kúna ourur mwirin málóón pwúlúwan we?

¹² Emén mwán itan Jason mi angang lón eú keangen ofesilap lón Afrika, a angang ngeni Jiowa full-time lap seni 30 ier, a erá: “Fisu ier ra ló, pwúlúwei we a má seniei, me fán ekkóch ai chúpwúl a lululó. Ika ua mut ngeniei ai upwe ekkekieki usun met pwúlúwei we a kúna atun a úkkú ngeni ewe semwenin kanser, ua tongeni meefi watteen letipechou.” Met a álisi Jason an epwe tongeni likiitú? A erá: “Lón eú atun, ua chechchemeni eú fansoun mi apwapwa lefilem me pwúlúwei we, me ua kilisou ngeni Jiowa lón iótek ren ai chemeni ena fansoun. Ua meefi ppánetá iwe mwirin ena, ua poputá le kilisou ngeni Jiowa iteitan ren ai chechchemeni ekkena esin fansoun mi apwapwa. Ai meefi kilisou a fókkun álisiei ai usap ápilúkúlúkúngaw. Ua chúen meefi weiresin an ese nóm rei, nge ai apasa ai kilisou ngeni Jiowa ren múrinnéén ai pwúpwúlú me ewe wis mi aúchea, ina ai angang ngeni fiti emén mi fókkun tongei i, a álisiei ai usap ápilúkúlúkúngaw.”

13. Met a álisi Sheryl le likiitú atun lap ngeni chón an famili ra má seni?

¹³ Lupwen ewe watteen taifun itan Haiyan a tori eú kinikin lón Philippines lesópwólóón 2013, a péút seni emén nengngin 13 ierin itan Sheryl arapakkan mettóchun meinisin. A erá: “A ta seniei imwei, me lap ngeni chón ai famili ra má seniei.” Seman, inan, emén mwongean me rúúemén pwiin ra máló lón ena taifun. Met a álisi Sheryl an epwe likiitú ngeni ei esin riáfféú nge esap lichippúng? A mmen meefi kilisou me a kan ekieki ekkewe feiéch mi chúen nóm ren. A apasa: “Ua kúna meinisin minne chienach kewe mwán me fefin ra féri pwe repwe álisi me apéchékkúla ekkewe mi osupwang. Ua silei pwe pwiich kewe wóón unusen fénúfan ra iótek fán itei.” A pwal apasa: “Ua fókkun kilisou pún Jiowa i ai Kot. Iteitan a awora met mi lamot ngenikich.” Ewer, ach chechchemeni ekkewe feiéch mi torikich, a tongeni eppeti ach sipwe kokoló lón ach letipechou. Ikaamwo sipwe kúna weires, nge ach eáni eú letip mi kilisou epwe álisikich le likiitú.​—Ef. 5:20; álleani Filipi 4:6, 7.

“NGE NGANG ÜPWE CHÖK MESEIK REN EWE SAMOL MI LAPALAP”

14. Ifa ewe ápilúkúlúk mi amwarar sia eáni? (Ppii ewe sasing lepoputáán ei lesen.)

¹⁴ Seni me lóóm, néún Jiowa kewe aramas ra kan pwapwaiti ekkewe feiéch mi toriir. Áwewe chék, mwirin án Kot amanawa ekkewe chón Israel seni Farao me néún kewe soufiu me lón ewe Setipar, iir ra pwáraatá ar pwapwa lón ar kélún mwareiti me kilisou ngeni Jiowa. (Eks. 15:1-21) Ikenái, eú me lein ekkewe feiéch mi fókkun aúchea sia kúna, ina ach ápilúkúlúkún ngaseló seni mettóch meinisin mi efisi ach letipeta me riáfféú. (Kölf. 37:9-11; Ais. 25:8; 33:24) Anchangei ika epwe ifa meefiach lupwen Jiowa a nieló meinisin chón oputa i me etiwakichelóng lón ewe ótót sefé mi kinamwe me pwúng. Epwele ifan me watteen ach kilisou ngeni Jiowa lón ena rán!—Pwär. 20:1-3; 21:3, 4.

15. Met ka tipeppós le féri lón unusen 2015?

¹⁵ Lón ei 2015, sia mwétéres le angei chómmóng feiéch seni Jiowa. Ewer, neman sipwe pwal kúna riáfféú. Nge ese lifilifil ika met epwe fis, sia silei pwe Jiowa esap fókkun likitikicheló. (Tut. 31:8; Kölf. 9:9, 10) I epwe sópweló le awora meinisin met mi lamot ngenikich pwe sipwe tongeni angang ngeni fán tuppwél. Iwe, amwo sipwe tipeppós le eáni ekiekin ewe soufós Apakuk, ewe mi erá: “Inamwo ika ewe irä fiik esap sot, esap pwal wor ua won ekewe irän wain, inamwo ika ewe irä olif esap ua, esap pwal wor mongö seni ekewe tanipi, inamwo ika ekewe sip repwe ärela seni ewe lenien sip, esap pwal wor kow lon lenier, nge ngang üpwe chök meseik ren ewe Samol mi Lapalap, üpwe pwapwa ren Kot ai Chon Amanau.” (Ap. 3:17, 18) Ewer, lón unusen ei ier amwo sipwe chechchemeni fán pwapwa ekkewe feiéch sia kúna me apwénúetá ach ei lesenin ier fán iten 2015: “Oupwe apasa ámi kilisou ngeni Jiowa, pún i mi múrinné.”​—Kölf. 106:1.