Áppirú án Jesus Tipetekison me An Eáni eú Letip mi Chúngúkkái
“Kraist a pwal riaföü fänäsengesimi o likiti ngenikemi eu lenien apirü, pwe oupwe tapwela mürin lon ipwan.”—1 PET. 2:21.
1. Pwata sia akkarap ngeni Jiowa lupwen sia áppirú Jesus?
SIA kan mochen áppirú napanapen me féfférún ekkewe aramas sia ingeitiir. Jesus Kraist, i eú leenien áppirú mi fókkun múrinné lap seni meinisin, ina popun a fich ngeni ach sipwe áppirú. Pwata? Jesus pwisin a erá: “Iö a künaei, a küna Semei.” (Joh. 14:9) Pokiten Jesus a mwirifichi napanapen Seman we, iwe, lupwen sia káé usun napanapan kewe, usun itá nge sia fen kúna napanapen ewe Sam. Ina minne, lupwen sia áppirú Jesus, sia akkarap ngeni Jiowa, ewe Emén mi lapalap seni meinisin wóón unuselapen láng me fénúfan. A ifa me feiéchúch ren ach áppirú napanapen me féfférún Néún we!
2, 3. (a) Pwata Jiowa a féri pwe epwe mak lón Paipel pwóróusen Néún we, me met I a mochen sipwe féri? (b) Met sipwe pwóróus wóón lón ei lesen me ewe lesen mwirin ei?
2 Iwe nge, ifa usun sipwe silei napanapen Jesus kewe? Sia kilisou pwe a nóm rech án Kot we Kapas mi álisikich le silefichi pwóróusan. Jiowa a awora ekkena pwóróus lón ewe Tesin Krik lón Paipel pún a mochen sipwe silefichi Néún we me áppirú i. (Álleani 1 Petrus 2:21.) Ewe Paipel a apasa pwe ewe leenien áppirú Jesus a isetiw a usun chék ipwan. Iwe lón och itiitin, Jiowa a erenikich ach sipwe tapweló mwirin Jesus me ipw lón ipwan. Pwúngún pwe Jesus a isetiw ewe leenien áppirú mi unuséch nge kich sise unuséch. Jiowa ese kútta senikich ach sipwe unuséch le áppirú Jesus, nge a chék mochen sipwe áppirú Néún na ren úkúkún ach tufich.
3 Iwe, sipwe ppii ekkóch napanapen Jesus mi múrinné. Lón ei lesen sipwe káé usun an tipetekison me an eáni eú letip mi chúngúkkái. Nge lón ewe lesen mwirin ei, sipwe káé usun an tipepwora me mirit. Atun sia káé eú me eú ekkeei napanap sipwe pélúweni ekkeei úlúngát kapas eis: Met weween ei napanap? Ifa usun Jesus a pwáraatá? Ifa usun sia tongeni áppirú Jesus?
JESUS MI TIPETEKISON
4. Ifa usun kopwe áweweei weween ewe napanap tipetekison?
4 Met weween tipetekison? Chómmóng aramas mi lamalam tekia ra meefi pwe emén mi tipetekison ina esissillan pwe mi apwangapwang are lúkúlúkúmmang. Nge fán chómmóng esap fen ina. Ren án emén epwe tipetekison a lamot epwe tipepwora me péchékkúl. Aramas ra fen áweweei pwe tipetekison ina “eú napanap mi mwáálfesen me lamalam tekia me sikesik.” Tipetekison a poputá seni meefiach usun pwisin kich. Eú puken áweween kapas lón Paipel, a erá: “Án emén epwe tipetekison a wewe ngeni an epwe silei ifa úkúkún tekisosonun mwen mesen Kot.” Ika sia wesewesen tipetekison mwen mesen Kot, sise pwal eáni ewe ekiek pwe sia tekia seni ekkewe ekkóch. (Rom 12:3; Fil. 2:3) Ese mecheres án aramas rese unuséch repwe ámááraatá ena napanap tipetekison. Nge sia tongeni káé ifa usun sipwe tipetekison ika sia ekiekifichi ach riri ngeni Kot me tapweló lón ipwen Néún we.
5, 6. (a) Ié na Mikael, ewe meilapen chónláng? (b) Ifa usun Mikael a pwáraatá ewe napanap tipetekison?
5 Ifa usun Jesus a pwáraatá tipetekison? Seni lóóm lóóm, Néún Kot na a fen pwáraatá tipetekison lupwen i emén chónláng mi manaman lón láng, me lupwen a nóm wóón fénúfan usun emén aramas mi unuséch. Sipwe káé ekkóch pwóróusan.
6 An ekiek. Ewe sou makken Paipel itan Jutas a makkeei pwóróusen manawen Jesus lón láng. (Álleani Jutas 9.) Mikael, ewe meilapen chónláng, ina i Jesus, “a aninifengen me ewe Tefil,” ewe emén mi ngaw. Ra ánini usun “somän Moses.” Chechchemeni pwe mwirin án Moses máló, Jiowa a peiaseni lón eú leeni ese wor emén a silei. (Tut. 34:5, 6) Eli ewe Tefil a mochen áeá inisin Moses we le apéchékkúla fel mi chofona. Nge Mikael a pwora le ú ngeni met ewe Tefil a ekiekin féri. Me ren eú puken káé, ewe mwuten kapas “a aninifengen,” lón kapasen Krik “a pwal tongeni weneiti ewe sókkun kapwúng fengen” a fis lón imwen kapwúng. Iwe, a tongeni wewe ngeni pwe “Mikael a ‘ú ngeni án ewe Tefil pwúúng’ le angei inisin Moses.” Nge ewe meilapen chónláng a mirititi pwe ese wor an pwúúng le apwúngú ewe Tefil, iwe a fen likiti ngeni Jiowa, ewe Soukapwúng mi Lapalap seni Meinisin. Inaamwo ika Mikael a meefi song nge a túmúnúéchú an esap angolong lón och mettóch ese wor an péchékkúlen nemenem wóón. A ifa me tipetekisonun Jesus!
7. Ifa usun Jesus a pwáraatá lón an féffér me kapas pwe i emén mi tipetekison?
7 Lupwen Jesus a féri ewe angangen afalafal wóón fénúfan, an féffér me kapas ra pwáraatá pwe i mi enletin tipetekison. An kapas. Esap fán eú an epwe sótun átekiaatái pwisin i, nge a fen elingaaló Seman we fansoun meinisin. (Mark. 10:17, 18; Joh. 7:16) Napanapen án Jesus kapas ngeni néún kewe chón káé ese ámmeef ngeniir pwe iir aramas mi lamotongaw, nge a fen súfélitiir, apúnga ar féffér múrinné me ereniir pwe a lúkúlúk wóór. (Luk. 22:31, 32; Joh. 1:47) An kewe féffér. Jesus a filatá an epwe menemenéch lón manawan ren an esap achommonga pisekin. (Mat. 8:20) A tipemecheres le féri ekkewe sókkun angang mi tekisosson. (Joh. 13:3-15) A fókkun pwáraatá an tipetekison ren an álleasochis. (Álleani Filipi 2:5-8.) Jesus a sókko seni ekkewe aramas mi lamalam tekia me tipeférea, pún fán tipetekison a féri letipen Kot me “aleasochis tori mäla.” A ffat pwe Jesus, ewe Néún aramas, i emén mi “tipetekison.”—Mat. 11:29.
ÁPPIRÚ ÁN JESUS TIPETEKISON
8, 9. Ifa usun sipwe pwáraatá tipetekison?
8 Ifa usun sipwe áppirú án Jesus tipetekison? Ach ekiek. Tipetekison a túmúnúkich ach sisap féri och mettóch ese wor ach péchékkúlen nemenem wóón. Ika sia mirititi pwe ese wor ach pwúúng le apwúngú aramas, iwe sisap mwittir esiita mwáállin ekkewe ekkóch are tipimwáál ngeniir. (Luk. 6:37; Jas. 4:12) Tipetekison a álisikich ach sisap ekieki pwe sia “kon öch” seni ekkewe ekkóch me meefi pwe ra lamotongaw pún rese eáni ach kewe tufich are wis. (SalAf. 7:16, Kapasen God) Ekkewe mwán mi ásimaw mi tipetekison rese ekieki pwe ra tekia seni chiener kewe chón lúkú. Nge ra fen ekieki pwe ekkewe ekkóch ra múrinné seniir me iir kisifóchófóch me leir.—Fil. 2:3; Luk. 9:48.
9 Nengeni pwóróusen W. J. Thorn, emén chónemmwen mi wisen sáifetál seni ewe ier 1894. Mwirin an eáni ena wis ren fite fite ier, a pwal ketiw ngeni eú mineféén wis, epwe angang lón án ach we ofesilap leenien atake (Kingdom Farm) lón New York. A wisen angang lón leenien fol chukó. A erá: “Iteiten ai ua poputá le ekieki pwe ngang mi fókkun éch, iwe ua áchema ngeniei me pwisin ereniei: ‘En pwúl moromor chék. Met a nóm reom pwe ka tongeni esika?’” (Álleani Aisea 40:12-15.) A ifa me tipetekisonun ena sókkun ekiek!
10. Ifa usun sia tongeni pwáraatá tipetekison lón ach kapas me féffér?
10 Ach kapas. Ach kapas repwe pwáraatá pwe sia enletin tipetekison. (Luk. 6:45) Lón ach pwóróusfengen me ekkewe ekkóch, sisap chék fóffósun pwisin ach kewe féffér me ekkewe wis sia wiseni. (SalF. 27:2) Nge sipwe fen kútta minne mi múrinné seni pwiich kewe me apúnger ren napanaper kewe mi múrinné, ar kewe tufich, me minne ra fen féri. (SalF. 15:23) Ach kewe féffér. Ekkewe Chón Kraist mi tipetekison rese ekiekin kútta pwisin itetekiar wóón ei fénúfan. Ra chék manaweni ewe manaw mi menemenéch, ra pwal mwo nge eáni ekkewe sókkun angang mi tekison me ren ekiekin aramas pwe repwe tongeni angang ngeni Jiowa úkúkún ar tufich. (1 Tim. 6:6, 8) Nge ewe a lamot seni meinisin, sia tongeni pwáraatá tipetekison ren ach álleasochis. A lamot tipetekison ika sipwe ‘aleasochisi nöüch kewe souemwen’ lón mwichefel me fiti ekkewe emmwen sia angei seni án Jiowa we mwicheich.—Ipru 13:17.
JESUS I EMÉN MI CHÚNGÚKKÁI LETIPAN
11. Met weween an chúngúkkái letipen emén?
11 Met weween an chúngúkkái letipen emén? Fán chómmóng ena esin memmeef a feito seni án emén watteen tong, iwe a wewe ngeni an mwittir chúng letipan le meefi ekkewe esin memmeef, choweán kirekiréch me úméúméch. Ewe Paipel a fós usun “ümöümöch o lukpwetete” me “tong” mi alóllóól. (Luk. 1:78; 2 Kor. 1:3; Fil. 1:8) Eú puken áweween kapas lón Paipel a erá pwe emén mi chúngúkkái letipan ese chék tongei ekkewe aramas mi osupwang, nge epwe fen mwékút me álisiir ren an féri och mettóch epwe ekkesiwili manawer me ámúrinnééló. Eú letip mi chúngúkkái a amwékútú ena emén an epwe áfeffeitáái manawen ekkewe ekkóch.
12. Met a pwáraatá pwe Jesus a fókkun úméúméch ngeni aramas? An eáni eú letip mi chúngúkkái a amwékútú le féri met?
12 Ifa usun Jesus a pwáraatá an chúngúkkáei aramas? An memmeef me féffér. Jesus a úméúméch ngeni aramas. Lupwen a kúna chiechian we Maria me chókkewe mi fiti le kechiweiti mwongean we Lasarus, iwe Jesus a pwal “kechü.” (Álleani Johannes 11:32-35.) Iwe mwirin, pokiten an a chúng letipen Jesus ren an fókkun tongeer, a amanawatá Lasarus, usun met a pwal meefi ren néún ewe fefin mi má seni pwúlúwan. (Luk. 7:11-15; Joh. 11:38-44) Ren án Jesus na féfférún úméúméch, neman i a suuki ngeni Lasarus ewe ápilúkúlúkún kúna manaw lón láng. Me mwan, Jesus a ‘fokun tongei’ eú pwiin aramas ra pwereto ren. Pokiten an tongeer, a “popuetä le afalafala ngeniir chomong mettoch.” (Mark. 6:34) A ifa me watteen feiéchún chókkewe mi etiwa an afalafal! Nengeni pwe án Jesus eáni ewe esin letip mi kan chúngúkkái ese chék weneiti an eáni och memmeef, nge a amwékútú i le wenewenen álisi ekkewe aramas.—Mat. 15:32-38; 20:29-34; Mark. 1:40-42.
13. Ifa usun Jesus a fós ngeni aramas fán tong? (Ppii ewe sasing lepoputáán ei lesen.)
13 An kapas. Án Jesus eáni ewe esin letip mi chúngúkkái a amwékútú le fós ngeni ekkewe aramas fán tong ákkáeúin ngeni chókkewe mi riáfféú. Aposel Mateus a alóni alon Aisea, me iei met a erá usun Jesus: “Esap kupiela efoch äsät mi puopu, esap pwal kunuela efoch wiik mi kümochoch.” (Ais. 42:3; Mat. 12:20) Napanapen án Jesus fós a apéchékkúla letipen aramas, iir kewe ra usun efóch áset mi puopu are efóch wiik mi kúmochoch. A afalafala pwóróusen ewe ápilúkúlúk allim pwe epwe “achipa chon luketatakis.” (Ais. 61:1) A etiwa “meinisin mi weiresikis o uwochou” ar repwe etto ren, me alúkúlúkú ngeniir pwe repwe kúna “söön” are kinamwe lón manawer. (Mat. 11:28-30) A alúkúlúkú ngeni néún kewe chón káé pwe Kot a fókkun tongei emén me emén chón fel ngeni, kapachelong ekkewe “kükün,” chókkewe aramasen fénúfan ra ekieki pwe iir mi lamot kisikis.—Mat. 18:12-14; Luk. 12:6, 7.
ÁPPIRÚ ÁN JESUS CHÚNGÚKKÁEI ARAMAS
14. Ifa usun sipwe ákkeáni ewe sókkun letip mi chúngúkkáei aramas?
14 Ifa usun sipwe áppirú Jesus ren an eáni eú letip mi chúngúkkáei aramas? Ach kewe memmeef. Eli ese pwúkún nóm rech ekkena sókkun memmeef, nge Paipel a pesekich ach sipwe ámááriiretá. “Tong,” ina kinikinin ewe manaw mi fé mi lamot meinisin Chón Kraist repwe eáni. (Álleani Kolose 3:9, 10, 12.) Ifa usun sipwe ámááraatá ewe sókkun letip mi chúngúkkáei aramas? Sipwe suukaaló letipach. (2 Kor. 6:11-13) Aúselingéch lupwen emén a uwawu ngonuk meefian me an lólilen. (Jas. 1:19) Ekiekiéchú me pwisin eisinuk: ‘Ika a iei usun nónnómui, epwe met meefiei? Met epwe lamot ngeniei?’—1 Pet. 3:8.
15. Ifa usun sia tongeni álisi chókkewe ra usun chék áset mi puopu are wiik mi kúmochoch?
15 Ach kewe féffér. Ach eáni ewe sókkun letip mi chúngúkkáei aramas epwe amwékútúkich le álisiir, nge ákkáeúin chókkewe ra usun efóch áset mi puopu are efóch wiik mi kúmochoch. Ifa usun sipwe álisiir? Rom 12:15 a erá: “Oupwe eti chokewe mi kechü le kechü.” A lamot ekkewe mi lichippúng repwe meefi pwe aramas ra weweiti meefier lap seni ar ereniir minne repwe féri pwe epwe pwák ar osukosuk. Emén pwiich fefin a má seni néún nengngin nge chienan kewe chón lúkú ra oururu, a apasa: “Ua aúcheani án chiechiei kewe etto rei me etiei chék le kechiw.” Sia pwal tongeni pwáraatá ach tong ren féfférúch mi kirekiréch. Ka silei emén pwiich fefin mi má seni pwúlúwan nge a osupwangen álillis ren fférsefálin mettóchun imwan we? Mi wor emén pwiich chinnap a osupwangen emén epwe uwei le ló mwich, afalafal, are ló ren tokter? Pwal mwo ekkewe féfférún kirekiréch mi kisikis, iir eú watteen álillis ngeni emén pwiich mi osupwang. (1 Joh. 3:17, 18) Lap seni meinisin, sia tongeni pwáraatá úméúméch ren ach unusen fiti ewe angangen afalafal. Ina ewe mettóch mi lamot seni meinisin a tongeni álisi aramas mi letip wenechar!
16. Met sia tongeni apasa ngeni chókkewe mi letipechou pwe sipwe apéchékkúler?
16 Ach kapas. Ach eáni eú letip mi chúngúkkái epwe amwékútúkich le eáni kapas mi “apöchöküla letipen” chókkewe mi letipechou. (1 Tes. 5:14) Met sia tongeni apasa ngeniir pwe sipwe apéchékkúler? Sia tongeni ereniir pwe sia enletin áfánniir me ekiekiir. Sia tongeni apúnger me álisiir pwe repwe tongeni kúna napanaper kewe mi múrinné me ar kewe tufich. Sia tongeni áchema ngeniir pwe iir ra aúchea me ren Jiowa, ina popun a álisiir le kúna ewe enlet. (Joh. 6:44) Sia tongeni alúkúlúkú ngeniir pwe Jiowa a fókkun áfánni néún kewe chón angang mi “luketatakis” are “apilükingau.” (Kölf. 34:18) Ach kapas mi pwáraatá úméúméch a tongeni apéchékkúla chókkewe mi osupwangen ouruur.—SalF. 16:24.
17, 18. (a) Met Jiowa a kútta seni ekkewe mwán mi ásimaw ren féfférúr ngeni néún kewe siip? (b) Met sipwe káé lón ewe lesen mwirin ei?
17 Ámi kana mwán mi ásimaw, Jiowa a kútta senikemi ámi oupwe tongei me chúngúkkái néún kewe siip. (Föf. 20:28, 29) Chechchemeni pwe wisemi ámi oupwe asukuler, apéchékkúler me túmúnúúr. (Ais. 32:1, 2; 1 Pet. 5:2-4) Ina minne, emén chónemmwen mi úméúméch esap sótun nemeni ekkewe siip ren an achómmónga allúk are emengiringiriir pwe epwe eriániir le féri mettóch ese ki rer. Nge epwe fen achocho le atoto ngeniir pwapwa, me epwe lúkúlúk pwe ar tongei Jiowa epwe amwékútúúr le angang ngeni I ren unusen ar tufich.—Mat. 22:37.
18 Ach ekilonei napanapen Jesus kewe ren an tipetekison me an chúngúkkáei aramas, ese mwáál epwe amwékútúkich le ákkáppirú i. Lón ewe lesen mwirin ei, sipwe káé usun pwal ruu napanapen Jesus kewe, an tipepwora me mirit.