Aúrek Usun Feiengaw

Alona a erá: “Atun ua rongorong ewe sáireng ngasangasei a poputá le púngúpúng me ua sú ngeni eú leenien op fán iten pakutang, nge ua chúen aúrek. A fen kon weires ika ua nóm lúkún nge ese wor ia upwe op ie. Usun lón eú atun ua fetál wóón ewe al ua poputá le kechiw me use tongeni ngasangas. Fitu awa mwirin ua kinamweeló, nge ina atun ewe sáireng a pwal poputásefál.”

Maun ina eú me lein ekkewe mettóch ra atoto feiengaw. Áwewe chék, ika a uruk are emén attongeom eú samau mi fókkun chou iwe a usun nge eféú pakutang a púngútuk. Án ekkewe ekkóch niwokkusiti met epwe fis lón mwach a efisi ar aúrek. Ra lólilen ika, ‘Itá nei kewe are néún nei kewe repwe manaw wóón ewe fénúfan a wor maun, atai allúk, limengawen fénú, siwilin climate me samau mi chéúfetál?’ Ifa usun sisap aúrekiir?

Atun “eman aramas mi mirit” a silei pwe mettóch mi ngaw epwe fis, iwe “a küna ewe feiengau mi feito o opola.” (Än Salomon Fos 27:12) Sia achocho le túmúnú inisich, iwe sipwe pwal túmúnú ekiekich me meefiach. Ekkewe minen apwapwa mi akkachofesá me pwal ekkewe news mi eniweniw ra alapaaló ach me án néúch kewe aúrek. Ach túmúnúkich seni ekkena mettóch ese wewe ngeni pwe sise mochen silei met a fiffis. Kot ese féri tupwuach pwe sipwe ekieki mettóch mi ngaw. Nge sipwe fen aúra ren “mettoch mi let, . . . pwüng, . . . limöch, mettoch aramas ra efich.” Ika sia féri ena, ewe Koten kinamwe epwe ngenikich kinamween ekiek me letip.​—Filipi 4:8, 9.

LAMOTEN IÓTEK

Lúkú mi enlet a álisikich le likiitú fán aúrek. Paipel a pesekich: “Mamasakemi, pwe epwe tongeni fis ämi iotek.” (1 Petrus 4:7) Sipwe tingorei Kot an álillis, tipachem me pwora pwe sipwe féri minne mi múrinné inaamwo ika met nónnómuch. Sia lúkúlúk pwe “a aüselingakich, ese lifilifil met sia eäni tüngor.”​—1 Johannes 5:15.

Ewe Paipel a áweweei pwe esap Kot nge Satan ewe “samolun ei fanüfan” me “unusen fanüfan a nom fän nemenien Ewe mi Ngau.” (Johannes 12:31; 1 Johannes 5:19) Ina popun, Jesus ese kapas monomon atun a áiti ngenikich ach sipwe iótek: “Kopwe angasakem seni ewe mi ngau.” (Mateus 6:13) Alona a erá: “Iteitan a ttik ewe sáireng, ua tingorei Jiowa pwe epwe álisiei le nemeni meefiei. Pwal eú, pwúlúwei we mi áchengicheng a kékké wóón phone me aua iótekfengen. Iótek a fókkun álilliséch.” Ina alon Paipel: “Ewe Samol mi Lapalap a arap ngeni ir meinisin mi köri, a arap ngeniir meinisin mi köri fän wenechar.”​—Kölfel 145:18.

ACH ÁPILÚKÚLÚK FÁN ITEN MWACH

Lón án Jesus Afalafal Wóón ewe Chuuk, a áiti ngeni néún kewe chón káé ar repwe iótek iei usun: “Mwum epwe war.” (Mateus 6:10) Án Kot we Mwú epwe amóffócheló meinisin aúrek mi efeiengaw. Kot epwe néúnéú Jesus, ewe “Samolun kinamwe,” an epwe “aükätiu maun won unusen fanüfan.” (Aisea 9:6; Kölfel 46:9) “Ewe Samol mi Lapalap epwe eäni apwüng lefilen chomong aramas . . . Mwü kana resap chüen maunfengen, resap pwal chüen kaiö maun. . . . Esap wor eman epwe eniuokusu” iir. (Mika 4:3, 4) Ekkewe famili mi pwapwa “repwe aüetä imwer o nonom lon, repwe pwal fotuki irän wain o ochei uan.” (Aisea 65:21) “Iwe, esap wor eman chon ewe fanü epwe apasa pwe a samau.”​—Aisea 33:24.

Ikenái, inaamwo ika sia túmúnúéch nge esap iteitan sipwe tongeni sú seni “feiengaw” are serengaw. (Än Salomon Afalafal 9:11, Kapasen God) Usun met a fen fis fitepúkú ier lóóm, maun, akkachofesá me semmwen ra efisi málóón aramas mi múrinné. Ifa ewe ápilúkúlúk a nóm ren chókkewe mi serengaw ren feiengaw?

Ekkewe fite fite million aramas Kot chék a silei iteiter repwe manawsefál. Nge iei mwo ra annut lón kapas áwewe, Kot epwe fókkun chemeniir tori ewe rán “ekewe sotup meinisin repwe . . . towu seni peiaser.” (Johannes 5:28, 29) Iei met Paipel a alúkúlúkúkich usun manawsefál: “Sia eäni ei apilükülüköch usun eu angkö mi allükülük o nüküchar.” (Ipru 6:19) Kot “a fen alletätä ei ngeni aramas meinisin ren an amanauasefäli ei mwän [Jesus] seni mäla.”​—Föför 17:31.

Nge ren mwo iei, ekkewe mi achocho le féri letipen Kot repwe pwal aúrek. Paul, Janet me Alona ra tufichin likiitú fán aúrek ren ar eáni tipachem, arap ngeni Kot ren iótek me apéchékkúla ar lúkú wóón ewe ápilúkúlúk seni Paipel fán iten mwach. Usun an álisiir, amwo Kot ewe popun ach ápilúkúlúk ‘epwe aurakich ren watten pwapwa me kinamwe ren ach lükü i.’​—Rom 15:13.