Kúkkún me Sáráfé Ifa Usun Oua Tongeni Mmólnetá fán Iten Papatais?
“Üa pwapwa le föri letipom, ai Kot.”—KÖLF. 40:8.
1, 2. (a) Áweweei ika pwata án emén filatá le papatais ina eú kefil mi chou. (b) Met a lamot emén epwe lúkúlúkú me mwen an epwe papatais, me pwata a lamot ena?
EN EMÉN kúkkún are sáráfé mi ekiekin papatais? Ika ina, iwe ina eú watteen feiéch seni meinisin ka tongeni eáni. Lón ewe lesen mwen ei, sia fen kúna pwe án emén epwe filatá le papatais ina eú kefil mi fókkun chou. Lupwen ka papatais, ka pwáraatá pwe ka fen fangóló manawom ngeni Jiowa, weween ka pwon ngeni pwe kopwe angang ngeni tori feilfeiló chék me óm féri letipan ina met kopwe akkomwa lón manawom lap seni meinisin. Pokiten a kon watte lamoten ena pwon ngeni Kot, kopwe chék tongeni papatais ika pwe ka tori ewe esin ásimaw mi lamot, pwisin ina mochenin letipom, me ka weweiti weween án emén fangóló manawan ngeni Kot.
2 Iwe nge, neman ka meefi pwe kesaamwo mmólnetá óm kopwe papatais. Are neman ka meefi pwe ka mmólnetá, nge semom kewe me inom ra meefi pwe kopwe mwo witiwit ekis fansoun pwe epwe lapóló óm sile. Iwe, met kopwe féri? Kosap letipengaw. Nge kopwe fen alamota ei fansoun óm kopwe feffeitá pwe ekiseló kopwe tongeni fich ngeni papatais. Iwe, ren óm kopwe féri ena, ka tongeni isetiw met kopwe achocho ngeni lón ekkeei úlúngát mettóch: (1) óm lúkú, (2) óm féffér, me (3) óm meefi kilisou.
ÓM LÚKÚ
3, 4. Menni lesen ekkewe kúkkún me sáráfé ra tongeni káé seni pwóróusen Timoty?
3 Ekieki ika ifa usun kopwe pélúweni ekkeei kapas eis: Pwata ua lúkú pwe mi wor Kot? Pwata ua lúkú pwe Paipel a pop seni Kot? Pwata ua meefi pwe a múrinné ai álleasochisi án Kot kewe allúk lap seni ai áppirú féfférún chón ei fénúfan? Ekkena kapas eis ra tongeni álisuk le apwénúetá án ewe aposel Paulus ei fén pwe kopwe pwisin “älletafichi met mi mwirinnö me met mi fich me minne Kot a unusen tipeni.” (Rom 12:2, Agapé) Pwata a lamot kopwe féri ena?
4 Án Timoty leenien áppirú a tongeni álisuk. I a silefichi masouen Paipel pún inan we me inan we chinnap ra kan áiti ngeni. Iwe nge, Paulus a ereni Timoty: “Kopwe chök kamwöchünük won mine ka kaiö o nüküchar le lükü.” (2 Tim. 3:14, 15) Iwe, a lamot án Timoty epwe lúkúlúk pwe ewe enlet a nóm lón Paipel. I a etiwa ewe enlet esap chék pokiten inan we me inan we chinnap ra ereni an epwe etiwa, nge pokiten a ekiekifichi minne a káé me a wesewesen lúkú.—Álleani Ipru 5:14.
5, 6. Pwata mi lamot ngonuk óm kopwe káé le áeá óm tufichin ekiek atun ka chúen kúkkún?
5 Nge en? Neman en ka fen silei ewe enlet seni chék me lóóm. Ika ina, iwe kopwe achocho le ekieki ika pwata a ina usun óm lúkú. Óm féri ena epwe álisuk le apéchékkúlaló óm lúkú me túmúnuk óm kosap féri kefil ese pwúng pokiten chék óm tipetipeló ren chienom kewe, ekiekin ei fénúfan, are pwisin óm memmeef.
6 Atun ka chúen emén kúkkún are sáráfé nge ka káé óm kopwe áeá óm tufichin ekiek, iwe kopwe tufichin pélúweni án chienom kewe kapas eis, áwewe chék ren: ‘Pwata ka lúkúlúk pwe mi wor emén Kot? Ika pwe Kot a tongekich, pwata chék a mut ngeni minne mi ngaw an epwe fis? Pwata epwe tufich an epwe wor Kot nge ese wor poputáán manawan?’ Ika ka mmólnetá, ekkena esin kapas eis resap efisi tipemwaramwar lón ekiekum, nge repwe fen amwékútuk le alapaaló óm káé Paipel.
7-9. Áweweei ifa usun ewe puk Met ewe Paipel A Wesewesen Apasa? a tongeni apéchékkúla óm lúkú.
7 Ika ka tinikken le féri óm pwisin káé, iwe epwe tongeni álisuk le pélúweni kapas eis, amóeló óm tipemwaramwar, me apéchékkúlaló óm lúkú. (Föf. 17:11) A kawor chómmóng puk me pwal ekkóch mettóch mi tongeni álisuk le féri ena. Chómmóng aramas ra kúna pwe a mmen álilliséch ar káé néúch kewe puk mi áweweei usun ewe Chón Férikich mi Lapalap me férian kewe. Pwal och, ewe puk Met ewe Paipel A Wesewesen Apasa? epwe álisuk le apéchékkúlaló óm lúkú eú áitien Paipel.
8 Pokiten en emén mi fen kákkáé ewe Paipel, iwe eli ka fen silei pélúwen ekkewe kapas eis mi mak lón ena puk. Nge met, ka fen lúkúlúk ren pélúwen ekkena kapas eis? Ka tongeni etittinasefáli ekkewe itelap me kapas eis lepoputáán ekkewe sópwun me ekiekifichi menni wokisin mi álisatá met ka pélúwen ngeni ekkena kapas eis me ewe popun ka lúkú ekkena mettóch. Ka pwal mwo nge tongeni makkeretiw. Iwe óm féri ena epwe álisuk le silei ifa usun kopwe áweweei minne ka lúkú ngeni ekkewe ekkóch. Ika ka féri ena lón óm pwisin káé, iwe epwe álisuk le apéchékkúlaló óm lúkú.
9 A lamot kopwe pwisin ánneta ngonuk pwe iei ewe enlet. Óm féri ena epwe álisuk óm kopwe mmólnetá ngeni papatais. Emén Chón Kraist nengngin teenage a erá: “Me mwen ai filatá ai upwe papatais, ua káé ewe Paipel me mirititi pwe iei ewe lamalam mi enlet. Iwe, iteiten rán lón manawei, ena lúkúlúk a peppéchékkúleló.”
ÓM FÉFFÉR
10. Pwata emén Chón Kraist mi papatais epwe itá eáni féffér mi tipeeú ngeni an lúkú?
10 Ewe Paipel a apasa: “Are epwe wor chök ämi lükülük, nge esap fiti föför, a mäla ämi lükülük.” (Jas. 2:17) Ika óm lúkú a péchékkúl, iwe epwe pwá lón féfférum. Met sókkun féffér? Ewe Paipel a fós usun ach sipwe “manaueni eu manau mi pin mi nonom fän nemenien Kot.”—Álleani 2 Petrus 3:11.
11. Áweweei weween ewe itiitin kapas “manaueni eu manau mi pin.”
11 Met weween óm kopwe “manaueni eu manau mi pin”? Ika féfférum lón manawom a pin, weween pwe ra limeliméch. Áwewe chék, ekieki ekkewe mettóch ka féri lón ekkewe wonu maram ra ló. Lupwen ka kúna sóssótun óm kopwe féri minne mi mwáál, ka ekiekifichi usun met mi pwúng me met mi mwáál? (Ipru 5:14) Ka chechchemeni ekkóch atun kese kkuf lón sóssót are ren etipetipaen chienom kewe? Lón sukul, en mi isetiw leenien áppirú mi múrinné fán iten ekkewe ekkóch? Ka kan tuppwél ngeni Jiowa, are ka kan sótun áppirú chék chienom chón sukul pwe resap esiitok? (1 Pet. 4:3, 4) Pwúngún, ese wor emén wóón fénúfan mi unuséch. Fán ekkóch, pwal mwo nge ekkewe mi angang ngeni Jiowa ren fite fite ier ra tongeni nisássáw me a tongeni weires ar repwe afalafal ngeni ekkewe ekkóch. Nge emén mi fen fangóló manawan ngeni Kot epwe pwapwa pún i emén Chón Pwáraatá Jiowa, me epwe pwári ena ren an kewe féffér mi liméch.
12. Ikkefa ekkóch mettóch kopwe féri lón óm “nonom fän nemenien Kot,” me itá epwe met meefiom usur?
12 Ifa usun kopwe “nonom fän nemenien Kot”? Kopwe fiti mwékútúkútún ewe mwichefel, áwewe chék ren óm fiti ekkewe mwich me ewe angangen afalafal. A pwal kapachelong ekkewe mettóch ka féri ese pwá ngeni aramas, áwewe chék ren óm iótek ngeni Jiowa me pwisin káé. Emén mi fen fangóló manawan ngeni Jiowa ese meefi pwe ekkena mettóch ra áweires. Epwe pwal meefieni meefien King Tafit, ewe a apasa: “Üa pwapwa le föri letipom, ai Kot, om allük a nom lon lelukei.”—Kölf. 40:8.
13, 14. Met a tongeni álisuk le “nonom fän nemenien Kot,” me ifa usun ekkóch sáráfé ra fen kúna álillis?
13 Óm ekieki ekkeei esin kapas eis repwe álisuk le “nonom fän nemenien Kot,” áwewe chék ren: Ifa úkúkún tichikin masouen óm kewe iótek, me met ra pwáraatá usun óm tong ngeni Jiowa? Met ka kan apachaalong lón óm pwisin káé? Ka kan fiti ewe angangen afalafal pwal mwo nge atun semom kewe me inom rese fiti?[1] Makkeetiw pélúwen ekkena kapas eis. Óm féri ena epwe álisuk le isetiw met kopwe achocho ngeni pwe epwe múrinnéló óm iótek, pwisin káé, me óm angangen afalafal.
14 Ekkóch sáráfé mi ekiekin papatais ra makkeetiw pélúwen ekkena esin kapas eis, iwe, ra kúna pwe a fókkun álilliséch ngeniir. Emén nengngin itan Tilda a erá pwe an makkeetiw pélúwen ekkena esin kapas eis a álisi le isetiw met epwe achocho ngeni. A achocho ngeni eú me eú tori a tikeriir, iwe mwirin eú ier a mmólnetá le papatais. Pwal ina met a fis ngeni emén sáráfé át itan Patrick. Iei met a apasa: “Ua fen silei met ua mochen achocho ngeni, iwe nge ai makkeretiw a álisiei ai upwe alapaaló ai angang weires pwe upwe tikeriir.”
Kopwe sópweló le angang ngeni Jiowa inaamwo ika semom kewe me inom ra úkútiw le angang ngeni? (Ppii parakraf 15)
15. Áweweei ika pwata án emén fangóló manawan itá epwe pwisin ina an kefil.
15 Iei eú me lein ekkewe kapas eis mi lamot: “Kopwe angang ngeni Jiowa inaamwo ika semom, inom, me chiechiom ra úkútiw le angang ngeni?” Lupwen ka fangóló manawom ngeni Jiowa me papatais, epwe pwisin wor óm riri ngeni i. Ina popun, minne ka féri fán iten Jiowa itá esap lóngólóng wóón semom kewe me inom are pwal emén. Óm manaweni eú manaw mi pin me óm nónnóm fán nemenien Kot a pwáraatá óm pwisin lúkúlúk pwe ka fen nónnóm lón ewe enlet me ka mochen álleasochisi án Kot kewe allúk. Ekiseló, epwe fich ngonuk óm kopwe papatais.
ÓM MEEFI KILISOU
16, 17. (a) Met itá epwe amwékútú emén an epwe wiliti emén Chón Kraist? (b) Ifa eú kapas áwewe sia tongeni eáni ren ewe kilisou itá sipwe meefi fán iten ewe méén kepich?
16 Eú rán, emén mwán mi sileéchú ewe Allúkún Moses a eisini Jesus: “Sense, meni allük a kon aüchea seni meinisin?” Jesus a pélúweni: “Kopwe echeni ewe Samol om Kot ren unusen lelukom, ren unusen ngünum pwal ren unusen ekiekum.” (Mat. 22:35-37) Jesus a áweweei pwe tong ngeni Jiowa itá epwe ina met epwe amwékútú emén an epwe papatais me wiliti emén Chón Kraist. Eú mettóch epwe fókkun álilliséch ngonuk pwe kopwe apéchékkúla óm tong ngeni Jiowa, ina óm ekiekifichi ewe méén kepich, án Kot we liffang mi lap seni meinisin ngeni aramas. (Álleani 2 Korint 5:14, 15; 1 Johannes 4:9, 19.) Lupwen ka féri ena, kopwe mochen pwári óm kilisou ren ena liffang mi echipwér.
17 Sia tongeni eáni ei kapas áwewe ren met kopwe meefi pokiten ewe méén kepich: Anchangei pwe ka kokotiw lemataw nge emén a selánuk. Kopwe itá ló ngeni imwom we me ápwasak me ménúkaaló met ena emén a fér ngonuk? Aapw! Kopwe chék meefi kilisou lón unusen manawom ngeni ena emén mi selánuk. Pwal ina chék usun, itá sipwe meefi kilisou ngeni Jiowa me Jesus ren ewe méén kepich. Ika esap pwúnúúr, ese wor ápilúkúlúkún manawach. Iir ra selánikich seni tipis me máló. Pokiten ar tongekich, iei a wor ach ápilúkúlúkún kúna manaw lón Paratis wóón fénúfan tori feilfeiló chék!
18, 19. (a) Pwata kosap niwokkus ren óm kopwe nóm fán nemenien Jiowa? (b) Ifa usun óm angang ngeni Jiowa epwe ámúrinnééló manawom?
18 En mi meefi kilisou ren met Jiowa a fen féri fán itom? Ika ina, iwe, mi fich óm kopwe fangóló manawom me papatais. Óm fangóló manawom ina eú pwon ngeni Kot pwe kopwe féri letipan tori feilfeiló chék. Nge met, itá kopwe niwokkus óm kopwe féri ena esin pwon? Aapw! Jiowa a mochen minne mi fókkun múrinné fán itom, me epwe efeiéchú ekkewe aramas mi féri letipan. (Ipru 11:6) Lupwen ka fangóló manawom ngeni Kot me papatais, manawom epwe pwapwa me núkúnúkéch! Emén Chón Kraist alúwél 24 ierin mi papatais me mwen an tori ierin teenage, a apasa: “Pwúngún pwe ika a fen watte ieri lón ena atun, epwe fen watte ai weweiti ewe enlet. Nge ai filatá le fangóló manawei ngeni Jiowa a túmúnúei ai usap fitaaló mwékútúkútún ei fénúfan.”
19 Jiowa a mochen minne mi fókkun múrinné fán itom. Iwe nge, Satan a chék kútta pwisin mochenin me ese ekiekiuk. Ese tongeni awora ngonuk och mettóch mi múrinné ika ka fiti i. Ifa usun epwe tongeni ngonuk och mettóch ese nóm ren? Ese nóm ren och pwóróus mi múrinné, me ese nóm ren ápilúkúlúk. A chék nóm ren ápilúkúlúkúngaw, iwe ina chék met a tongeni ngonuk!—Pwär. 20:10.
20. Met emén kúkkún are sáráfé a tongeni féri pwe epwe feffeitá pwe epwe tongeni fangóló manawan me papatais? (Pwal ppii ewe pwóór “Álillis pwe Kopwe Feffeitá lón Pekin Lúkú.”)
20 Óm fangóló manawom ngeni Jiowa, ina ewe kefil mi múrinné seni meinisin. Ka mmólnetá le féri ena? Ika ka mmólnetá, kosap niwokkus le féri ena kefil. Nge ika ka meefi pwe kesaamwo mmólnetá, áeá ekkeei kapasen pesepes lón ei lesen le feffeitá. Paulus a ereni pwiin kewe Chón Kraist lón Filipi ar repwe sópweló ar feffeitá. (Fil. 3:16) Ika ka fiti ena kapasen emmwen, ekiseló kopwe mochen fangóló manawom ngeni Jiowa me papatais.
^ [1] (parakraf 13) Ewe kinikin lón pekin taropwe 308 me 309 lón ewe puk Questions Young People Ask—Answers That Work, Volume 2 a fen álisi ekkóch kúkkún me sáráfé.