Eú Liffang Ese Wor Táppin

EWE seisein pin napen mwoota lepéún Jordan usun ese pwal kon aúchea. Nge ina eú me lein pisekin kewe a kon aúcheani. Jordan a erá: “Russell emén chinnap, chiechien ám famili a ngeniei ena seisein pin me lekúkkúni.” Mwirin án Russell máló, Jordan a kerán silei pwe a watte ewe álillis a ngeni seman we chinnap me seman kewe me inan, pwe a ákkálisiir lón fansoun weires. Jordan a pwal apasa: “Pokiten met ua kerán silei usun Russell, iwe ei kúkkún liffang a fókkun aúchea ngeniei lap seni lóóm.”

Sia káé seni pwóróusen Jordan we pwe mi wor liffang, neman ngeni ekkewe ekkóch ese wor lamotan. Nge me ren ewe emén mi echeni ena liffang, mi fókkun aúchea. Pwal mwo nge me ren, ese wor emén epwe tufichin mééni. Ewe Paipel a apasa usun ei liffang pwe ese wor a tongeni mééni ren kon méwatteen. Iei itiitin me lón ekkeei kapas mi iteféúló: “Pwe a chok iei usun an Kot tongei fonufan, pwe a fangelo Noun we Alaemon pwe iteiten aramas meinisin mi luku i esap poutmwalilo, nge epwe kuna manau esemuch.”​—Johannes 3:16, Testament Mi Fö.

Ena liffang a atoto ngeni emén manaw esemuch! Mi wor pwal eú liffang mi lap seni ena? Neman ekkóch rese mirititi múrinnéén ena liffang nge me ren Chón Kraist mi fókkun “aüchea.” (Kölfel 49:8; 1 Petrus 1:18, 19) Nge pwata Kot a fangóló Néún we usun eú liffang fán iten chón fénúfan?

Ewe aposel Paulus a áweweei pwata ren ekkeei kapas: “Ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin.” (Rom 5:12) Atam, ewe áeménún mwán a féri tipis nge a silei pwe féfférún a álleasolapa Kot, iwe mwirilóón a kúna kapwúngún máló. Pokiten Atam, máló a tori mwirimwirin kewe meinisin, weween aramas meinisin.

“Pun liwinin tipis mäla, nge än Kot lifang manau esemüch lon Kraist Jesus ach Samol.” (Rom 6:23) Ren án aramas repwe ngas seni kapwúngún máló, Kot a tiinaato Néún we Jesus Kraist ngeni fénúfan pwe epwe asoresini manawan we mi unuséch. Ren ena asor mi pwal iteni méén kepich, iir meinisin mi lúkúlúk wóón Jesus repwe eáni manaw esemuch.​—Rom 3:24.

Iei met Paulus a apasa usun ekkewe feiéch meinisin Kot epwe awora me ren Jesus Kraist fán iten chókkewe mi fel ngeni: “Ousipwe kilisou ngeni Kot ren an we lifang ngenikich, esap tufich ach sipwe awewei lon ach kapas.” (2 Korint 9:15) Ewer, ewe méén kepich a kon lapalap, iwe ese tufich ach sipwe tongeni áweweei lón kapas. Pwata ewe méén kepich a kon múrinné seni liffang meinisin Kot a awora ngeni aramas? Pwata mi kkóló seni án Kot kewe liffang meinisin?a Nge ifa usun sipwe liiwini? Ám aua etiwok le álleani ifa usun ewe Paipel a pélúweni ekkena kapas eis lón ekkewe ruu lesen mwirin ei.