Mwareiti Jiowa ren ach Uwawu Meefiach lon ekkewe Mwich
1. Met sipwe tongeni föri lon ekkewe mwich, me ifa ach ekiek ussun?
1 Lon ekkewe mwich sipwe tongeni pwäratä ach lükü me apöchökküla ekkoch ren ach uwawu meefiach. (SalF. 20:15; Ipru 10:23, 24) Ach uwawu meefiach ina eü wis mi aüchea sipwe achocho le föri iteitan. Ifa ussun sipwe lipwäköch le uwawu ach memmeef?
2. (a) Met sokkun memmeef ra kon mürinnö? (b) Met sokkun memmeef sipwe tümünü seni?
2 Ekkewe memmeef mi kon mürinnö repwe ffat me mwochomwoch, mecheres me longolong woon ewe puk sia käkkäeö. Ewe emön epwe akkomw pölüweni epwe chök pölüweni ewe kapas eis, me likiti ngeni ekkoch ar repwe uwawu pwal ekkoch pworaus. Piiöchü pwe ach memmeef ese kon ttam mi ekkenniwil pwe ekkoch rese chüen tongeni uwawu meefier pun ese naf fansoun. Apasawu om memmeef lon pwisin om fos nge a mürinnö ika kosap älleani unusen ekkewe kapas lon ewe puk. Ekkoch ra tongeni menlapei ekkewe wokisin lon Paipel. Aüselingöch ngeni met ekkoch ra fen uwawu pwe kosap apasasefäli met ra fen apasa.
3. (a) Ifa ekiekin ekkoch lupwen ekkewe säräfö me ekkewe mi minefö ra uwawu meefier? (b) Ifa ekiekin Jiowa me Jises ussun ei mettoch?
3 Ekkoch ra ekieki pwe ekkewe kükkün ra süfölüngaüeiti ekkewe watte ika repwe uwawu meefier mwen meser. Pwal mwo ekkewe mi fen watte ra meefi pwe ekkewe mi chinnap me silelap repwe pölüweni akkot. Nge esap ina meefian Jises. Lupwen ekkoch ra song ngeni ekkewe kükkün ren ar kökkö me mwareiti ewe Messaia, Jises a pölüweniir: “Ousamwo aleani mine a mak lon ekewe Toropwe mi Pin? ‘En ka föri pwe än ekkewe semirit me mönükol kölün mwareituk epwe unusöch.’” (Mt. 21:15, 16) Meefien ekkewe kükkün me ekkewe ra kerän tolong lon ewe enlet fän chommong ra apöchökküla ekkewe mi watte, äkkäeüin ika ra pölüweni lon pwisin ar fos. Ei sokkun memmeef ra wesewesen elingalo Jiowa.
4. Sopwöchün ach kewe mwich a longolong woon met?
4 A lamot kich meinisin sipwe achocho le ammolnatäöchü pwe sia tongeni uwawu meefiach atun ach kewe mwich. Chechchemeni pwe sopwöchün ekkewe mwich fän chommong mi longolong woon tipemecheresin me lipwäköchün chon ewe mwichefel le uwawu meefier.—Kölf. 26:12.