Nöünöüfichi Nöüch kewe Leenien Mas

Sa tongeni älisi aramas mi letip wenechar le feiöch seni Ewe Leenien Mas? Ewer, sia tongeni ika sia nöünöüfichi nöüch kewe Leenien Mas. Met epwe tongeni älisikich? Sipwe ppii ekkeei kapasen pesepes:

◼ Älleani Ekkewe Leenien Mas: Älleani ekkewe Leenien Mas minen eü me eü maram. Atun ka älleani eü me eü lesen, pwisin eisinuk, ‘Iö kewe repwe aücheani ei pworaus, ekkewe inelap, ekkewe mwän, ekkewe säräfö?’ Lon pwisin noum we kapi, esissilla eü are ruu pworaus ka tongeni nöünöü atun ka anöünöü ewe Leenien Mas. Iwe mwirin, ekieki ifa usun kopwe föri an epwe amwasangasang ena pworaus lon chök eü are ruu sentence.

◼ Sa Tongeni Alapaalo Ach Anöünöü Ekkewe Leenien Mas?: Iei a lapolo nöün eü me eü mwichefel Leenien Mas lap seni me loom. Ka tongeni alapaalo om älillis lon ewe angangen anöünöü Leenien Mas?

◼ Akkotalo eü Rän fän iten Anöünöüün Leenien Mas: Chommong mwichefel ra filalo eü rän fän iten chök anöünöüün Leenien Mas. Ka tongeni älisatä än ewe mwichefel ränin anöünöü Leenien Mas? Ika kese tongeni, achocho le äeä och om fansoun afalafal le anöünöü ekkewe Leenien Mas atun ka afalafal imw me imw me chuursefäli aramas.

◼ Ukkuwei Ekkewe Leenien Mas: Atun ka lo ngeni pwal eü leeni are shopping, ukkuwei ekkewe Leenien Mas. Anöünöü lupwen ka fos ngeni chienom kewe chon angang, chon sukul, sense me chon orum. Iteitan, ekkoch säräfö ra ukkuwei ngeni sukul ekkewe Leenien Mas ra meefi pwe nöür kewe sense are chiener kewe chon sukul repwe pwapwaitiir. Uwei ekkewe Leenien Mas atun ka lo föri och angang pwe kopwe anöünöü. Iteitan sia kan kakkamö kas, iwe, pwata sise anöünöü ewe Leenien Mas ngeni ekkewe chon amömö kas? Epwe nom reom ekkewe Leenien Mas pwe kopwe anöünöüü aramasom kewe ra chuuruk, atun ka fiti waa, are atun ka witiwiti om kopwe chuuri emön. Ka ekieki pwal ekkoch fansoun ra fich?

Ewe Leenien Mas ese aücheangawolo, inaamwo ika sise anöünöü lon eü ika ruu maram seni ewe atun a kerän katowu. Ese kükkünülo lamoten ekkewe pworaus lon Ewe Leenien Mas, inaamwo ika a lu seni ewe fansoun a katowu. Epwe fen öch sipwe achocho le anöünöü ngeni chokkewe mi pwapwaiti, lap seni ach isonaalo ekkewe ra minen loom me mönükiirelo. Eü alen ach sipwe föri ei, ren ach likiti ekkewe Leenien Mas ra minen loom ppen asamen ekkewe imw ese wor aramas lon.