Ifa Ussun Ewe Kotun Puk Study lon Mwichefel Epwe Älisikich
1. Ifa ussun ach kewe nimu mwich ra älisikich?
1 A sokkolo napanapen me popun ach kewe nimu mwich. Iwe nge, ir meinisin ra älisikich pwe “sipwe ekiekifichi usun ach sipwe apochokkula emon me emon lefilach lon tong o fofor-murinno.” (Ipru 10:24, 25) Ikkefa ekkewe napanap mi mürinnö a asokkalo ei kotun Puk Study lon Mwichefel seni ekkoch mwich?
2. Met sokkun feiöch a pop seni ach fiti ewe kükkün kumi fän iten ewe puk study?
2 Epwe Älisikich le Feffeitä lon Pekin Ngün: Choochoon chon fiti ewe puk study a kisikis seni choochoon aramas mi fiti pwal ekkewe ekkoch mwich. Lon ei kükkün kumi, a mecheres ach sipwe ämääraalo eü sokkun chiechi epwe älisikich lon pekin ngün. (SalF. 18:24) Ka fen sotuni le silefichi emön me emön lon om puk study, awewe chök ren om etiwer pwe oupwe mwin le afalafal? Ei kotun puk study a pwal atufichi ewe puk study overseer an epwe silei urusoun are nonnomun emön me emön lon ena kumi pwe epwe tongeni awora minen pesepes ngeniir.—SalF. 27:23.
3. Ifa ussun ewe kotun puk study a apöchökkülakich le uwawu meefiach me a pwal atufichi ekkewe chon käeö ar repwe fiti?
3 Ka fen etiwa noum kewe chon käeö le fituk lon ewe puk study? Aramas mi etiwa ewe kapas allim nge ra pireir le fiti ekkewe mwich mi watte, rese kon pireir le fiti eü kükkün mwich fän iten ewe käeöön Paipel, lapaloon lon imwan chök emön. Pokiten ewe sokkun chiechiöch a nom woon ei kükkün mwich, a mecheres ngeni ekkewe kükkün me chokkewe ra kerän fiffiti ar repwe uwawu meefier. Iwe, a pwal wor chommong fansoun ach sipwe uwawu meefiach me mwareiti Jiowa.—Kölf. 111:1.
4. Lon menni napanap a mürinnö ewe kotun puk study?
4 Ekkewe puk study ra kan fis lon ekkewe leeni a mecheres ngeni chon afalafal ar repwe tikeri. Inaamwo ika ese tufich ngeni meinisin pwe epwe choni eü puk study mi kan ngeni imwan, nge ese kon weires ach sipwe tikeri ewe leenien puk study sia choni. Sia kan pwal mwichfengen ikewe ie me mwen ach sipwe feilo afalafal.
5. Ifa ussun sipwe angei älillis fän iten ewe angangen afalafal seni ewe puk study overseer?
5 Epwe Älisikich lon Ach Angangen Afalafal: Ewe puk study overseer a pwapwaiti le älisi emön me emön ar repwe fiffiti, sopwöch me pwapwa lon ewe angangen afalafal. A achocho an epwe fiti emön me emön lon ena kumi, me älisiir lon ekkewe sokkopaten kinikinin ewe angang. Ina minne, ika ka küna pwe mi aweires ngonuk om kopwe föri eü kinikinin ewe angangen afalafal, awewe chök ren om chuurisefälli emön, esilei ngeni noum we puk study overseer. I mi tongeni akkota om kopwe angangfengen me emön chon afalafal mi lipwäköch lon om we puk study. Om tufichin käeö ngeni emön epwe mürinnölo ren om nengenifichi napanapen an ewe puk study overseer asukul atun an emmweni ewe puk study.—1 Kor. 4:17.
6. Pwata sipwe unusen küna feiöch seni ei kokkotun puk study?
6 Ewe kotun Puk Study lon Mwichefel eü wesewesen feiöch seni Jiowa! Ei kokkot mi fiti tong a älisikich ach sipwe nüküchchäretiu lon pekin ngün lon ekkeei fansoun mi aweires sia manau lon.—Kölf. 26:12.