Kopwe Emön Chon Afalafal mi Feffeitä
1 Semach we lon läng a pwapwa lupwen nöün kewe chon angang ra feffeitä lon pekin ngün. Mi pachelong an epwe äsimaüolo me lipwäköchülo lon wisan we ussun emön chon afalafala ewe kapas allim. Paul a apöchökküla Timoti, emön elter, pwe epwe achocho le apwönüetä met a käeö pwe an “feffeitä epwe pwapwalo.” (1 Tim. 4:13-15) Kich meinisin sipwe tinikken le amürinnölo ach afalafal, pwal mwo ekkewe chon afalafal mi fen angangöch me watte ar sile.
2 Isetiu Met Kopwe Achocho Ngeni: Ren ach sipwe feffeitä, a lamot sipwe isetiu met sipwe achocho le apwönüetä. Ikkefa ekkoch mettoch sipwe tongeni isetiu fan asengesich? Eli sipwe achocho ngeni ach sipwe angöch le nöünöü nöüch we ketilas lon pekin ngün, ina ewe Paipel. (Ef. 6:17) Eli mei wor och kinikinin ewe angangen afalafal epwe lamot sipwe angangöchülo lon, choweän ach äfänniöchü ewe chon imw, are makkei ewe imw esor aramas lon me liwinitiir. Neman, sipwe angang woon ach sipwe lipwäköchülo le föri return visit. Pwal och mettoch sipwe achocho ngeni, ina ach sipwe amürinnölo ach tufichin poputäni me käeö ngeni aramas ewe Paipel.
3 Ekkewe Minen Älillis: Ekkewe mwich, äkkäeüin ewe Sukulen Afalafal me ewe Service Meeting, ra förütä pwe repwe älisikich pwe sipwe feffeitä lon ach angangen afalafal. Watteloon ach tinikken le ammolnatä me fiffiti ekkewe mwich me apwönüetä ekkewe pesepes mi katowu, pwal ina chök watteloon ewe feiöch sipwe kini.—2 Kor. 9:6.
4 Mi pwal lamot ach sipwe älillisfengen pwe sipwe feffeitä. (SalF. 27:17) Atun sia mwin le afalafal, ach aüselingöch ngeni än chienach we afalafal epwe älipwäköchükich. Pwal och, ewe chon emmweni ewe puk study epwe tongeni akkota pwe emön epwe älisikich. Met ren watteen ewe feiöch epwe torikich ren än emön pioneer are chon afalafal mi angangöch älisikich pwe sipwe lipwäköchülo me küna watteen pwapwa seni ach angangen afalafal! Mei wor emön chon afalafal mi kerän fiti ach we puk study? Neman epwe öch ach sipwe etiwa i pwe epwe fitikich le lo afalafal.
5 Ewe angang mi kon watte aüchean lap seni meinisin, iei ewe angangen afalafal. Atun sia ngeni Jiowa ach “asoren mwareiti,” sia mochen ngeni ükükün ach tufich mi mürinnö seni meinisin. (Ipru 13:15) Ika pwe sia achocho ngeni ach sipwe feffeitä lon ewe angangen afalafal, sipwe ussun emön chon angang “esap saueiti och mettoch, emon mi forfichi lon an anganga ewe kapas mi enlet.”—2 Tim. 2:15.