Ka Tongeni Alapalo Om Angangen Afalafal?
1. Met ewe a fokkun atapwalapwal lon ewe angangen afalafal me pwata?
1 Lupwen Jises a küna ewe mwichen aramas mi chommong ra pwapwaiti le rongorong kapas allimen ewe Mwu, a ereni nöün kewe chon käeö ar repwe “tüngorei ewe Samolun räs pwe epwe tinala chon angang pwe repwe angang ngeni ewe räs.” (Mt. 9:37, 38) Pokiten a arapakkan epwele much ewe angangen räs, a mmen atapwalapwal ach angang lap seni me loom. Ina popun mi lamot ach sipwe iotek ngeni Kot me ekiekifichi ifa usun sipwe tongeni alapalo ach fiti ewe angangen afalafal.—Jon 14:13, 14.
2. Ifa usun ekkoch ra etiwa ewe tingor fän iten chommongoloon chon angang lon ewe angangen afalafal?
2 Alapalo Om Fiti ewe Angangen Afalafal: Ren än Jiowa emmwen me älillis, chommong ra tufichin poputä le fiti ewe angangen pioneer. (Kölf. 26:2, 3; Fil. 4:6) Ekkoch ra akkotaöchü ar repwe fiti auxiliary pioneer eü maram are lap seni, lon eü ier. Ina ewe mettoch mi mürinnö a atufichiir le alapalo ar angangen afalafal. Ewe pwapwa chommong ra küna seni ar auxiliary pioneer a älisiir ar repwe wiliti regular pioneer.—Fof. 20:35.
3. Ika ka fen pin pioneer me loom, iwe eli met kopwe ekiekiöchü iei?
3 Ka Tongeni Fitisefäli ewe Angangen Pioneer?: Ika ka fen pin fiti ewe angangen pioneer, ese mwääl ka chechchemeniöchü ena fansoun. Ka iotek pwe kopwe pwal fitisefäli ewe angangen pioneer? Neman ewe popun om ükütiw seni ese chüen wor. Iwe, eli iei ewe fansoun kopwe le pwapwa le fitisefäli ei angangen pioneer mi aüchea.—1 Jon 5:14, 15.
4. Ifa ewe angang mi kkolo aüchean mi suuk ngenikich meinisin?
4 Sia nonnom lon ei fansoun angangen räs nge a arapakkan an epwele much. (Jon 4:35, 36) Amwo, kich meinisin sipwe etittina ach kewe kokkot iei me pii ika mi tufich ach sipwe tongeni siwiliir pwe sipwe alapalo ach fiti ewe angangen afalafal. Ika sia pwisin küna pwe sise tongeni alapalo ach angang, iwe, pwata sise achocho le lipwäköchülo lon ach angang? (Mark 12:41-44) A ifa me feiöchün chokkewe mi tufichin fiti ei angang me mut ngeni Jiowa an epwe nöünöü iir lon ewe angangen pioneer mi kkolo aüchean!—Kölf. 110:3.