Repwe Chchüng Ren Minne Ra Küna me Rong
1. Me lükün ewe afalafal, met epwe pwal achchüngü chokkewe mi fiti ewe Ächechchem? Äweweei.
1 Ineet? Lon ewe pwinin Ächechchem. Sia fen achocho le etiwa aramas le fitikich. Eli ekkewe chon fiti resap chök mwar ren met ra rongorong. Emön fefin a erä pwe mwirin an fiti ewe Ächechchem, a mwar ren an küna chiechiöchün chon fiti me limelimöchün ewe leenien mwich chon kinrosi ra aüetä me tüttümünü. Ina minne, esap chök wisen ewe chon afalafal nge wisach meinisin le achchüngü ekkewe chon fiti ewe Ächechchem, ewe rän mi aüchea seni meinisin lon ei ier.—Ef. 4:16.
2. Ifa usun emön me emön leich epwe achchüngü chokkewe mi fiti ewe Ächechchem?
2 Etiwaöchü Chon Fiti ewe Ächechchem: Ach emelimel fiti mwasangasang le kapong ngeni ekkewe ra etto fiti epwe pwal achchüngüür. (Jon 13:35) Inaamwo ika kese tufichin fos ngeni meinisin, nge ka chüen tongeni ereni chokkewe mi nom unukum itom. (Ipru 13:1, 2) Änenna chokkewe rese sissilei chon lon ewe mwich. Neman, emön a chök ngeniir ewe taropween etiwetiw. Eli ka tongeni eisiniir: “Iei äkkäeüin ämi fiti ei mwich?” Etiwer pwe repwe mot reom, me ereniir pwe ika a wor ar kapas eis, iwe, ka tongeni pölüweni. Ika chon om we mwichefel repwe mwittir lo seni ewe leenien mwich pwe pwal eü mwichefel epwe äeä, iwe, eli ka tongeni ereniir: “Ua mochen silei ämi ekiek usun ewe mwich. Ifa usun sipwe tongeni chufengensefäl?”
3. Ifa usun sipwe etiwaöchü chokkewe rese chüen akkafalafal?
3 Etiwaöchü ekkewe Rese Chüen Akkafalafal: Eli ekkoch rese chüen akkafalafal repwe fiti ewe Ächechchem, kapachelong ekkoch ra fiti ewe chök ächechchem iteiten ier. Etiwaöchüür me ämmeef ngeniir pwe ka wesewesen pwapwa le küner. (Rom 15:7) Ekkewe elter ra tongeni mwittir lo chuuriir lon imwer me peseer le sopwelo ar chiechi ngeni chon ewe mwichefel. Sia iotek pwe ar fiti ewe Ächechchem epwe amwökütüür le elingaalo Kot, esap chök ren met ra rong nge pwal ren met ra küna seni ach “föför mürina.”—1 Pit. 2:12.