Sipwe Mosonottam lon Ach Angangen Afalafal
1. Ifa usun Jiowa a pwäri an mosonottam ngeni aramas?
1 Kot a mosonottam ngeni aramas. (Eks. 34:6; Kölf. 106:41-45; 2 Pit. 3:9) A pwäri an mosonottam mi fiti tong ren ewe angangen afalafal woon unusen fönüfan. A fen arapakkan 2,000 ier än Jiowa achocho le luki chokkewe mi mochen ririöch ngeni, nge a chüen sopwosopwolo an föri ena tori ikenäi. (Jon 6:44) Ifa usun sipwe äppirü än Jiowa mosonottam lon ach angangen afalafal?
2. Ifa usun sipwe pwäri mosonottam lon ach kewe leenien afalafal?
2 Afalafal Imw me Imw: Sia äppirü mosonottamen Jiowa ren ach sisap “ukutiu” le afalafal lon ekkewe leeni aramas rese mochen aüseling. (Fofor 5:42) Sia mosonottam ngeni chokkewe mi tanechepwak, turunufaseei me ü ngeni ach angangen afalafal. (Mark 13:12, 13) Sia pwal pwäri mosonottam ren ach likiitü le achöchönü pwikilin ewe enlet, inaamwo ika a weires ach sipwe chuuri chokkewe mi mochen aüseling lon imwer kewe.
3. Atun sia chuursefäli aramas me käkkäeö ngeniir, pwata a lamot mosonottam?
3 Käeöön Paipel: A lamot ngeni chon ämääri irä repwe mosonottam. Sia tongeni tümünü efoch irä, nge sise tongeni emwittiri määrin. (Jem. 5:7) Pwal ina chök usun, än emön määritä lon pekin lükü epwe fis ekis me ekis, me a wor tettelin an määr. (Mark 4:28) Eli epwe weires ngeni ekkewe chon käeö repwe likitalo ar kewe lükü mi chofona are eöreni rese tipeeü ngeni ewe Paipel. Sisap sotun emwittiri feffeitään nöüch kewe chon käeö ren ach oumwesiir le siwili napanapen manauer. A lamot mosonottam pwe sipwe mut ngeni än Kot manaman an epwe pwisin angang woon letipen ewe chon käeö.−1 Kor. 3:6, 7.
4. Ifa usun mosonottam epwe älisikich le lipwäköchülo lon ach afalafal ngeni märärich kewe rese lükü?
4 Märärich Rese Fiti Ach Lükü: Sia fokkun mochen pwe märärich kewe repwe käeö ewe enlet, iwe, sipwe mosonottam le witiwiti fansoun mi fich le fos ngeniir usun ach lükü. Sipwe pwal tümünü pwe sisap kon achommonga met sia äiti ngeniir. (SalAf. 3:1, 7) Atun sia wikkitiwit, föfförüch epwe affata ika kich met sokkun aramas pokiten ewe enlet. Sipwe mmolnetä le kapas usun ach lükü fän mosonoson me mennin. (1 Pit. 3:1, 15, TF) Pwüngün, ach mosonottam lon ewe angangen afalafal epwe uwaöch me apwapwaai Semach we lon läng.