Älisi ewe Chon Imw an Epwe Weweöch
1. Menni napanapen afalafal a mürinnö?
1 Menni lein ekkeei ruu napanapen afalafal a mürinnö, ach sipwe chök ereni ewe chon imw minne a pwüng are ach sipwe älisi an epwe weweöch pwe epwe pwisin küna ewe pworaus mi pwüng? Lupwen ewe aposel Paul a afalafal ngeni ekkewe chon Jus lon Tesalonika, a älisiir le weweöch, ina popun “ekoch me lein ekewe aramas ra lükü.” (Fof. 17:2-4) Ifa usun sipwe älisi aramas ar repwe weweöch?
2. Ifa usun sipwe äppirü Paul atun sia afalafal?
2 Äfänni Meefier me Nonnomur: Ach weweiti met aramas ra lükü epwe älisikich le silei ifa usun sipwe älisiir le weweöch. Paul a poputääni an afalafal ngeni ekkewe chon Kris lon ewe Areopakus woon ekkewe mettoch ra fen silei me lükü. (Fof. 17:22-31) Ina minne, atun ka ammolnatä met kopwe eäni afalafal, kopwe akkomw ekieki met aramas lon ewe leeni ra lükü are rese lükü. (1 Kor. 9:19-22) Ika ewe chon imw a epiietä och kapasen eppet, sotun apasa minne epwe tipeeü ngeni, pwe epwe ina met oupwe pworausfengen woon.
3. Ifa usun sipwe nöünöüöchü kapas eis le äweweei pworaus ngeni aramas?
3 Lipwäköch le Nöünöü Kapas Eis: Sise tongeni ereni emön ifa usun epwe tikeri ikewe a mochen lo ie ika sise akkomw silei ia we emönnewe a nom ie. Pwal ina chök usun, kich sise tongeni älisi emön chon imw le weweöch me eäni ekiek pwüng ika sise akkomw silei met a ekieki me lükü. Fän chommong, me mwen än Jises äweweöchü och pworaus ngeni emön, a akkomw kapas eis pwe epwe silei ekiekin. Äwewe chök, emön mwän a eisini Jises, “Met ngang üpwe föri pwe üpwe manaueni manau esemuch?” Iwe, me mwen än Jises pölüweni, a akkomw kapas eis ngeni. (Luk 10:25-28) Lon eü fansoun, a mwääl än Piter pölüweni eü kapas eis, iwe, Jises a lipwäköch le nöünöü kapas eis le äwenechara an ekiek. (Mt. 17:24-26) Ina minne, ika emön chon imw a kapas eis are uwawu meefian nge mi mwääl, sipwe tongeni nöünöü kapas eis le älisi an epwe weweöch.
4. Pwata sipwe achocho le älisi ewe chon imw an epwe weweöch?
4 Atun sia älisi emön chon imw an epwe weweöchüti och pworaus, sia äppirü ewe Sense mi Lapalap, Jises, me pwal ekkoch chon afalafal me loom mi lipwäköch. A ina usun sia pwäratä süföl me mennin ngeni ewe chon imw. (1 Pit. 3:15) Iwe mwiriloon, eli epwe mut ngenikich ach sipwe liwinsefäliti.