Túmúnú Mwelien Letipom

1. Ifa itelapen ewe eú ránin mwichelap fán iten ewe 2013 service ier, me met popun a kawor ena prokram?

¹ Iteiten rán, sia kúkkúna ekkewe mettóch mi tongeni etipetipakich le angawa mwelien letipach. Ina popun epwe iei itelapen ewe eú ránin mwichelap: “Túmúnú ‘Mwelien Letipom,’” fán iten ewe 2013 service ier, epwe poputá September 1, 2012. (1 Tim. 1:19) Ewe prokram a fen kkótóló pwe epwe álisi emén me emén kich le ekiekifichi ifa usun sia kan ákkáeá ena liffang mi fókkun aúchea me ren ewe Chón Férikich.

2. Ikkefa ekkewe kapas eis mi lamot repwe pélú atun ewe prokram?

² Aúseling Ngeni Ekkeei Pwóróus: Ewe prokram epwe pélúweni fisu kapas eis mi lamot usun mwelien letip:

• Met epwe angawa ewe mwelien letip?

• Ifa usun sipwe emiriti mwelien letipach?

• Met epwe atufichikich ach sisap eáni tipisin án aramas péútmwááliló?

• Ach ekiek me féffér wóón án Paipel kewe kapasen emmwen a pwáraaló met usuch?

• Ifa usun sipwe túmúnú pwe site ekinasa mwelien letipen ekkewe ekkóch?

• Ámi kana sáráfé, ifa usun oupwe tongeni úppos fán etipetipaen ekkewe ekkóch?

• Ikkefa ekkewe feiéch epwe tori chókkewe mi álleasochisi mwelien letiper mi káit me ren Kot?

3. Ifa usun ewe prokram epwe álisikich?

³ Ren álillisin Jiowa sia tongeni úkkú ngeni án Satan akkachocho le angawa mwelien letipach. Ren án Semach we mi tong lón láng Kapas me an we mwicheich, a erenikich ei: “Iei ewe al oupwe aleni.” (Ais. 30:21) Ena prokram ina eú me lein alen án Jiowa awora ena sókkun emmwen. Ina popun, kopwe akkóta pwe kopwe fiti unusen ewe prokram. Aúselingéch, me ekieki ifa usun kopwe pwisin apwénúetá ekkewe pwóróus. Pwóróusfengen me óm famili usun ewe prokram. Ach akkapwénúetá ekkewe kapasen emmwen sia angei, repwe apéchékkúlakich le sópweló le ‘alimelimochu [mwelien letipach],’ me álisikich ach sisap rikiló ren ekkewe minen apwapwa mi mwittir móróló lón án Satan ei ótót.​—1 Pet. 3:16, TF.