A Meseik Napanapen ewe Mineféén Tract!
1. Ikkefa ekkewe mineféén napanap minen álillis lón ewe angangen afalafal a ámmeseik?
1 Nimaché mineféén tract ra katowu lón ewe 2013 “Án Kot Kapas Mi Enlet!” Mwichelap lón Summer. Me lúkún ena, a pwal wor ewe Kingdom News Na. 38, itelapan “Ekkewe mi Máló Repwe Tongeni Wesewesen Manawsefál?” A meseik ewe mineféén napanapan ekkena wonaché tract. Met popun a ffér ewe minefé napanap? Atun sia anéúnéúr lón imw me imw, ifa usun sipwe tongeni áeáéchú napanaper?
2. Met popun an a kawor ewe mineféén napanap ren ena tract?
2 Pwata a Minefé Napanapan?: Ewe sókkun afalafal mi sópwéch lón ewe angangen imw me imw, lap ngeni a kapachelong ekkeei rúáánú mettóch: (1) Eáni eú kapas eis mi efisi án chón imw epwe uwawu meefian le poputááni eú pwóróusfengen. (2) Áeá eú wokisin seni Paipel. (3) Anéúnéú puk ewe chón imw epwe álleani. (4) Likiti eú kapas eis pwe kopwe pélúweni atun ka liwin me akkóta óm liwinsefál. Ewe mineféén napanapen ekkena tract a ámecheresikich le apwénúetá ekkena rúáánú mettóch.
3. Ifa usun sipwe anéúnéú eú me lein ekkewe mineféén tract lón ewe angangen afalafal?
3 Ifa Usun Néúnéún: (1) Mwirin óm kapong ngeni ewe chón imw, áiti ngeni ewe kapas eis mi múrinné mi nóm lúkúnpéén ewe tract. A wor úlúngát mettóch epwe tongeni pélúweni ena kapas eis me eisini ewe chón imw meefian. (2) Suuki ewe tract me pwóróus wóón “Met ewe Paipel A Apasa.” Álleani ewe wokisin seni ewe Paipel ika mi tufich. Ika ewe chón imw a wor an fansoun, pwóróus wóón “Ifa Usun ena Pwóróus Epwe Álisuk.” (3) Anéúnéú ewe tract me pesei le álleani ewe lusun atun a tawe. (4) Mwen kopwe ló, áiti ngeni ewe kapas eis lúkúnúppen ewe tract fán “Mettóch Kopwe Ekieki” me akkóta óm kopwe liwin me pwóróus wóón met pélúwan seni Paipel.
4. Ifa usun sipwe néúnéú ekkewe mineféén tract lón ewe angangen chuursefáli aramas?
4 A pwal mecheres ren ewe angangen chuursefáli aramas. Áeá ekkewe wokisin lón ewe lúkúnúppen ewe tract pwe epwe pélúweni ena kapas eis ka eppiietá lesópwólóón óm sáingoon le chuuri ena emén. Mwen kopwe ló, áiti ngeni liosun ewe puk Pwóróus Allim, eppii ngeni ewe brochure me ewe lesen ren pwal ekkóch pwóróus mi weneiti met oua pwóróusfengen wóón me anéúnéú ngeni ewe brochure. Ika a angei, akkóta le liwinsefál me pwóróus usun wóón ewe brochure atun ka liwin. Ren ena ka fen poputááni eú káéén Paipel! Are anéúnéú pwal eché tract me akkóta le liwinsefál pwe oupwe pwóróusfengen wóón me ewe chón imw.
5. Met aúchean ekkewe tract lón ach we angangen afalafal?
5 Sia fen nénnéúnéú ekkewe tract lón ewe angangen afalafal lón lap seni 130 ier. Inaamwo ika ra kawor ren sókkópaten saisin me napanap nge ra fókkun álilliséch lón ach we angangen afalafal. Amwo itá sipwe áeáfichi ei mineféén napanap le achéúfetálei ewe silei lón Paipel wóón unusen fénúfan.—SalF. 15:7a.