Sia Enletin Tongei Jiowa, Semach We

1-2. Pwata Jiowa a suuki ngenikich alen ach sipwe tongeni chóni an we famili, me ifa usun a féri ena?

JIOWA a etiwakich le fiti ewe familien chón fel ngeni. A ifa me amwararen ena etiwetiw! Chókkewe mi chóni ach ei famili iir chókkewe mi fen fangóló manawer ngeni Kot me anganga ar lúkú wóón án Néún we méén kepich. Kich eú famili mi pwapwa. Mi aúchea manawach iei, me sia mwétéresiti ach sipwe kúna manaw esemuch, ese lifilifil ika epwe fis ena lón láng are lón ewe Paratis wóón fénúfan.

² Jiowa a suuki alen ach sipwe tongeni chóni an famili pokiten watteen an tong, inaamwo ika a fókkun lap met a fangóló ren an epwe féri ena. (Joh. 3:16) Kot ‘a mönikich ren eu liwin.’ (1 Kor. 6:20) Jiowa a áeá ewe méén kepich ren an epwe atufichikich le ririéch ngeni i. A watte feiéchúch ach sia tongeni kér ngeni Kot Semach, ewe mi kon tekia seni meinisin wóón unuselapen láng me fénúfan. Me Jiowa i ewe Sam mi múrinné seni meinisin, usun met sia fen káé lón ewe lesen mwen ei.

3. Ikkefa ekkóch kapas eis sia tongeni eáni? (Pwal ppii ewe pwóór itelapan “Jiowa A Áfánniei?”)

³ Neman sia meefieni meefien emén soumakken Paipel ei: “Met üpwe liwini ngeni ewe Samol mi Lapalap ren ekewe feiöch meinisin a ngeniei?” (Kölf. 116:12) Pélúwan, sise fókkun tongeni liwini ngeni Semach we lón láng minne a fen féri fán itach. Iwe nge, sia chúen mochen pwári ach tongei. Ewe aposel Johannes a makkeei: “Sia eäni chen, pun Kot a akomwen echenikich.” (1 Joh. 4:19) Ifa usun sia tongeni pwári ngeni Semach we lón láng pwe sia tongei?

AKKARAP NGENI JIOWA

4. Me ren James 4:8, pwata sipwe achocho le arap ngeni Jiowa?

⁴ Jiowa a mochen ach sipwe arap ngeni me pwóppwóróus ngeni. (Álleani James 4:8.) A pesekich le “iotek fansoun meinisin.” (Rom 12:12) Esap fán eú an epwe tawengaw are pekkus le aúseling ngenikich. Nge kich sia tongeni aúseling ngeni i ren ach álleani an we Kapas, ewe Paipel, me pwal ekkewe puk mi álisikich le weweiti ewe Paipel. Sia pwal aúseling ngeni i ren ach aúselingéch atun ach kewe mwich. Ach pwóppwóróusfengen me Jiowa a álisikich le arap ngeni, usun chék ren án ekkewe nau pwóppwóróusfengen me semer kewe me iner mi álisiir le arap ngeniir.

5. Ifa usun sia tongeni ámúrinnééló ach kewe iótek?

⁵ Ekieki usun óm kewe iótek. Jiowa a mochen ach sipwe iinaawu masouen letipach ngeni i lón iótek. (Kölf. 62:8) Mi éch sipwe pwisin eisinikich ei kapas eis: ‘Ai kewe iótek ra wesewesen feito seni alóllóólun letipei are ua kan chék epinipiniir?’ Ese mwáál, ka fókkun tongei Jiowa, me ka mochen pwe óm riri ngeni epwe péppéchékkúl. Ika ina, iwe mi lamot kopwe pwóppwóróus ngeni iteitan. Pwári ngeni monomonun letipom. Ereni usun meefiom kewe lupwen ka pwapwa me lupwen ka weires. Kopwe lúkúlúk wóón pwe ka tongeni tingorei an álillis.

6. Met a lamot sipwe féri pwe sipwe akkarap ngeni Semach we lón láng?

⁶ Ren ach sipwe akkarap ngeni Semach we lón láng, mi lamot sipwe chék kikkilisou ngeni. Sia tipeeú ngeni ewe soumakken kélfel mi erá: “Ai Samol mi Lapalap ai Kot, ka föri chomong föför mi amwarar me om akot ngenikem, esap wor eman a wewe ngonuk. Are üpwe asilefeiliir o apworausa usur, repwe chomong seni ai üpwe tongeni aleaniir.” (Kölf. 40:5) Sisap chék meefi kilisou, nge sipwe pwal pwári ach kilisou ngeni Jiowa lón kapas me féffér. Ena mettóch a asókkakicheló seni chómmóng aramas lón ei fénúfan. Sia nónnóm lón ei fénúfan mi ur ren chókkewe rese kilisou ngeni Kot ren meinisin minne a féri fán iter. Ren enletin, eú pisekin ánnet pwe sia nónnóm lón “ekewe ränin lesopolan,” ina án aramas rese sile kilisou. (2 Tim. 3:1, 2) Amwo sisap fókkun ina usun!

7. Met Jiowa a mochen ach sipwe féri, me pwata?

⁷ Ekkewe sam me in rese mochen pwe néúr kewe repwe áninifengen nge repwe fen chiechiéchfengen. Pwal ina usun ren Jiowa, a mochen pwe meinisin néún kewe repwe chiechiéchfengen. Nge ewe tongfengen lefilach ina esissillen Chón Kraist mi enlet. (Joh. 13:35) Sia tipeeú ngeni alon ewe soumakken kélfel ei: “Nengeni usun mürinan me apwapwan, lupwen pwipwi ra nonomfengen fän tipeeu.” (Kölf. 133:1) Lupwen sia tongei chienach kewe Chón Kraist, sia ánnetatá ngeni Jiowa pwe sia tongei. (1 Joh. 4:20) A ifa me apwapwaan ach chóni ei familien Chón Kraist mi ‘kirikiröch o leluköch lefiler’!​—Ef. 4:32.

PWÁRI ÓM TONG REN ÓM ÁLLEASOCHIS

8. Me ren 1 Johannes 5:3, ifa ewe nampa eú popun sia álleasochisi Jiowa?

⁸ Jiowa a mochen pwe ekkewe nau repwe álleasochisi semer kewe me iner, me a pwal mochen ach sipwe álleasochisi i. (Ef. 6:1) Mi fich ngeni Jiowa ach sipwe álleasochisi pún i ewe Chón Férikichetá, ewe mi akkawora sópwósópwólóón manawach, me i ewe Sam mi tipachem seni meinisin. Iwe nge, ewe nampa eú popun sia álleasochisi Jiowa pún sia tongei. (Álleani 1 Johannes 5:3.) Inaamwo ika a wor chómmóng popun ach sipwe álleasochisi Jiowa, nge i ese echchimwakich le álleasochisi. Jiowa a ngenikich ewe liffangen tufichin pwisin filatá, iwe a pwapwa lupwen sia pwisin filatá le álleasochisi pokiten sia tongei.

9-10. Pwata a lamot ach sipwe silei án Jiowa kewe allúk me álleasochisiir?

⁹ Ekkewe sam me in ra mochen pwe néúr kewe repwe núkúnúkéch. Ina popun ra féri allúk fán iten néúr kewe. Lupwen ekkewe nau ra álleasochisi ekkena allúk, ra pwári pwe ra lúkúlúk wóón semer kewe me iner me ra súfélitiir. Iwe, a fen kon lap lamoten ach sipwe silei án Semach we lón láng kewe allúk me álleasochisiir. Lupwen sia ina usun, sia pwári ngeni Jiowa pwe sia tongei me súféliti, me sia pwal kúna feiéch. (Ais. 48:17, 18) Iwe nge, chókkewe mi tunaló Jiowa me an kewe allúk ra chék pwisin efeiengawer.​—Kal. 6:7, 8.

¹⁰ Lupwen sia manaweni ewe sókkun manaw mi apwapwaai Jiowa, a túmúnúkich seni minne mi efeiengaw, eletipengaw, me met a tongeni atai ach riri ngeni i. Jiowa a silei met a kon échitikich. Emén fefin mi nóm lón Merika itan Aurora a erá, “Ua silei pwe ach álleasochisi Jiowa epwe chék emmwen ngeni ewe sókkun manaw mi múrinné seni meinisin.” A pwal ina usun ren oukich meinisin. Ka fen kúna feiéch seni óm álleasochisi án Jiowa emmwen mi fiti tong?

11. Ifa usun iótek a tongeni álisikich?

¹¹ Iótek a tongeni álisikich le álleasochis, pwal mwo nge lupwen a weires. Fán ekkóch, epwe weires ngenikich ach sipwe álleasochisi Jiowa pokiten apwangapwangen tipis, nge a lamot sipwe akkachocho ach sisap álleasolapa. Ewe soumakken kélfel a tingormaú ngeni Kot: “Kopwe atufichiei pwe üpwe aleasochis ngonuk.” (Kölf. 51:12) Emén regular pioneer itan Denise a erá, “Ika a weires ngeniei ai upwe álleasochisi eú án Jiowa kewe allúk, ua ióteki ewe péchékkúl le féri met mi pwúng.” Sia tongeni lúkúlúk pwe Jiowa epwe fókkun pélúweni ena sókkun tingor.​—Luk. 11:9-13.

ÁLISI EKKEWE EKKÓCH LE TONGEI SEMACH WE

12. Me ren Efisos 5:1, met sipwe féri?

¹² Álleani Efisos 5:1. Pokiten kich “nöün Kot mi achengicheng,” sia achocho úkúkún ach tufich le áppirú i. Sia áppirú napanapan kewe ren ach pwári tong, kirekiréch, me omusaaló tipisin aramas. Lupwen chókkewe rese silei Kot ra kúna féfférúch mi múrinné, neman repwe mochen silei usun i. (1 Pet. 2:12) Sam me in Chón Kraist repwe áppirú Jiowa lón féfférúr ngeni néúr kewe. Lupwen ra féri ena, neman néúr kewe repwe mochen pwisin chiechi ngeni Semach we mi tong.

13. Met a lamot sipwe nefótófót wóón?

¹³ Emén semirit a kan einga seman we me pwapwa le fós usun. Pwal ina chék usun, sia einga féfférún Semach we lón láng, Jiowa, me sia mochen án ekkewe ekkóch repwe pwal sissilei i. Lón letipach, meefiach a usun chék meefien King Tafit, ewe mi erá: “Ngang üpwe aingaing won ewe Samol mi Lapalap.” (Kölf. 34:2) Nge ifa usun ika sia kan pireir? Ifa usun sipwe tongeni tipepwora? A kan lapóló ach tipepwora lupwen sia ekieki usun án Jiowa pwapwa ren ach fós usun me usun án aramas repwe fókkun feiéch lupwen ra sissilei i. Jiowa epwe ngenikich ewe pwora mi lamot ngenikich. A álisi pwiich kewe lón fansoun ekkewe aposel ar repwe tipepwora, me epwe pwal álisikich.​—1 Tes. 2:2.

14. Ikkefa ekkóch popun mi lamot sipwe achocho le álisi aramas le wiliti néún Kraist chón káé?

¹⁴ Jiowa ese lifilifil aramas, me a pwapwa lupwen a kúna ach pwári tong ngeni aramas ese lifilifil ar lewo. (Föf. 10:34, 35) Ach afalafala ngeniir ewe kapas allim, ina nampa eú alen ach pwári pwe sia tongeer. (Mat. 28:19, 20) Met sókkun feiéch ena angang epwe atoto? Chókkewe mi aúseling ngenikich ra tongeni ámúrinnééló manawer iei me eáni ewe ápilúkúlúkún manaw esemuch lón mwachkkan.—1 Tim. 4:16.

TONGEI SEMACH WE ME KOPWE PWAPWA

15-16. Ikkefa ekkewe popun sia tongeni pwapwa?

¹⁵ Jiowa emén Sam mi tong, iwe a mochen pwe chón an we famili repwe pwapwa. (Ais. 65:14) A wor chómmóng popun sia tongeni pwapwa iei, inaamwo ika neman sia kúna weires. Áwewe chék, sia lúkúlúk pwe Semach we lón láng a fókkun tongekich. Sia weweéchúti án Kot we Kapas, ewe Paipel. (Jer. 15:16) Me sia chóni eú famili ese wor táppin, chón lón ra tongei Jiowa, aúcheani an kewe allúk usun minne mi pwúng me mwáál, me ra tongefengeniir.​—Kölf. 106:4, 5.

¹⁶ Sia tongeni pwappwapwa pokiten sia eáni ewe ápilúkúlúk mi núkúchar pwe manawach epwe múrinnéló lón mwachkkan. Sia silei pwe ekiseló chék Jiowa epwe arosaló meinisin ekkewe aramas mi ngaw, me fán emmwenien an we Mwú, ei fénúfan epwe wilisefáliiti Paratis. Sia pwal eáni ewe ápilúkúlúk allim pwe ekkewe mi máló repwe manawsefál me chuurisefáli ar famili me chiener. (Joh. 5:28, 29) Epwele ia me apwapwaan ena fansoun! Nge lap seni meinisin, sia lúkúlúk pwe ekiseló chék, meinisin lón láng me wóón fénúfan repwe asamolu, mwareiti, me fel ngeni Semach we mi tong, usun minne a fókkun fich ngeni.