Ifa Usun Iótek A Tongeni Álisuk?

Pamela a kútta álillis fán iten an we semmwen mi chou. Iwe nge, a pwal iótek ngeni Kot pwe epwe tufichin likiitú fán an na weires. Itá iótek a álisi?

Iei met Pamela a erá: “Atun ua sáfei fán iten ai we kanser, ua fókkun niwokkus. Nge atun ua iótek ngeni Jiowa Kot, ua meefi kinamwe mwirin, me a ffat ekieki. Ua chúen riáfféú ren watteen meteki, nge iótek a álisiei le eáni ekiek mi pwúng. Atun aramas ra eisiniei ika ifa usui, ua ereniir, ‘Ngang mi apwangapwang, nge ua chúen pwapwa!’”

Pwúngún pwe ese lamot ach sipwe witi an epwe úrikich och semmwen mi chou iwe sipwap iótek. Oukich meinisin sia kúna weires, ese lifilifil ika kúkkún are watte, me fán chómmóng a lamot ngenikich álillis pwe sipwe tongeni likiitú. Nge iótek a tongeni álisikich?

Ewe Paipel a erá: “Kopwe monätä won ewe Samol mi Lapalap om weires, pwe i epwe tümwünuk. Esap fokun mwütätä pwe ewe chon pwüng epwe kuf.” (Kölfel 55:22) A ifan me oururun letipach ren ena! Iwe, ifa usun iótek a tongeni álisuk? Atun ka iótek ngeni Kot lón ewe napanap mi fich me ren, epwe ngonuk minne mi lamot ngonuk pwe kopwe tongeni likiitú fán óm kewe weires.—Ppii ewe pwóór “Minne Iótek A Tongeni Atoto Ngonuk.”

Minne Iótek A Tongeni Atoto Ngonuk

Kinamween ekiek

“Oupwe tüngor fansoun meinisin fän kilisou. Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi lon Kraist Jesus.” (Filipi 4:6, 7) Atun ka ereni Kot minne ka lólileniesini, epwe álisuk le eáni kinamween ekiek me kopwe kefiléch fán weires.

Tipachem seni Kot

“Are eman leimi a osun tipachem, epwe tüngor ngeni Kot, iwe, i epwe fang ngeni, pun Kot a fangafangöch ngeni aramas meinisin, nge esap laleiti eman.” (James 1:5) Atun sia nóm fán weires, fán ekkóch sia kan kefilingaw. Ika ka tingorei Kot an tipachem, epwe tongeni áchema ngonuk chómmóng an kewe kapasen emmwen lón an we Kapas, ewe Paipel.

Péchékkúl me ourur

“Ngang mi tufich ren mettoch meinisin lon ewe emon mi apochokkulaei.” (Filipi 4:13, Testament Mi Fö) Pokiten Jiowa i ewe mi Unusen Manaman, iwe a tongeni ngonuk ewe péchékkúl mi lamot pwe kopwe tongeni likiitú fán óm kewe weires are elikiituk fán óm kewe sóssót. (Aisea 40:29) Ewe Paipel a pwal erá pwe Jiowa, i ewe “Kot mi echipakich lon mettoch meinisin.” A tongeni oururukich lón “ach riaföü meinisin.”—2 Korint 1:3, 4.

KA MOCHEN PWE ÓM IÓTEK EPWE ÁLISUK?

Jiowa ese echchimwok óm kopwe iótek ngeni. Nge a fen etiwok fán tong óm kopwe iótek ngeni. (Jeremaia 29:11, 12) Nge, ifa usun ika me lóóm, ka meefi pwe ese pélúweni óm kewe iótek? Kosap letipengaw are lichippúng. Eli ekkewe sam me in mi tong, resap álisi néúr kewe lón ewe esin napanap me lón ewe atun néúr kewe ra wesewesen mochen. Eli ekkena sam me in, ra fen sile mwen néúr kewe kataween minne néúr kana ra mochen. Nge iei eú mettóch sia lúkúlúkú, ekkewe sam me in mi tong ra fókkun álisi néúr kewe.

Jiowa Kot, i emén sam mi tong seni meinisin, me a pwal mochen álisuk. Ika ka apwénúetáfichi ekkewe emmwen sia fen pwóróus usun seni ewe Paipel me achocho úkúkún óm tufich le apwénúretá, iwe Kot epwe pélúweni óm kewe iótek lón ewe napanap mi amwarar seni meinisin!—Kölfel 34:15; Mateus 7:7-11.