“Kopwe Nóm Rei lón Paratis”

1. Me mwen án Jesus epwele máló, met a ereni ewe chón féfféringaw mi nóm únúkkún? (Lukas 23:39-43)

JESUS me ekkewe rúúemén chón féfféringaw mi nóm únúkkún, ra riáfféú atun a feffetál ngeni an epwele muchúló manawer. (Luk. 23:32, 33) Iir me rúúemén ekkena chón féfféringaw ra fen esiita Jesus, iwe a ffat pwe esap iir néún chón káé. (Mat. 27:44; Mark. 15:32) Nge, emén me leir a siwililó. A erá: “Jesus, kose mochen chechemeniei lupwen om kopwe tolong lon mwumw.” Jesus a pélúweni: “Enlet úa erenuk ikenái, kopwe nóm rei lón Paratis.” (Luk. 23:43, NW; álleani Lukas 23:39-42.) Ese wor pwóróus mi ánneta pwe ena chón féfféringaw a etiwa ewe pwóróus usun ewe “muun lang,” ewe Jesus a afalafala usun atun an angangen afalafal. Me Jesus ese fókkun erá pwe ena mwán epwe tolong lón ewe Mwú. (Mat. 4:17) Jesus a fós usun ewe Paratis wóón fénúfan epwe feito. Pwata sia tongeni erá ena?

2. Met a pwári pwe ewe chón féfféringaw mi aier i emén chón Jus?

² Ewe chón féfféringaw mi aier, eli i emén chón Jus pún a ereni ewe emén chón féfféringaw: “Ifa usun, kosap niuokusiti Kot? A pwüngüla om kopwe mäli ei sokun mäla usun chök i.” (Luk. 23:40) Ekkewe chón Jus ra kan fel ngeni emén chék Kot, nge aramasen ekkewe pwal ekkóch mwú ra lúkú chómmóng kot. (Eks. 20:2, 3; 1 Kor. 8:5, 6) Ika ekkena chón féfféringaw iir aramasen ekkewe ekkóch mwú, iwe itá epwe iei itiitin án ena emén kapas eis, “Ifa usun, kosap niwokkusiti ekkewe kot?” Pwal och, Jesus ese tiitiito fán iten aramasen ekkewe ekkóch mwú, nge fán iten “ekewe sip mi mwalechela, ir ekewe aramasen Israel.” (Mat. 15:24) Kot a pwár ngeni chón Israel pwe i epwe amanawasefáli ekkewe mi máló. Ese mwáál, ewe chón féfféringaw mi aier a silei ena pwe a pwá ren alon we pwe Jiowa epwe amanawasefáli Jesus me nemenem lón ewe Mwú. Eli ena mwán a ápilúkúlúk pwe Kot epwe pwal amanawasefáli.

3. Eli met ewe chón féfféringaw a ekieki atun Jesus a fós usun Paratis? Áweweei. (Keneses 2:15)

³ Ika ewe chón féfféringaw i emén chón Jus, iwe eli a silei pwóróusen Atam me Efa me ewe Paratis Jiowa a eleenier lón. Ina popun eli a weweiti pwe ewe Paratis Jesus a fósun, ina eú tánipi mi lingéch wóón ei fénúfan.​—Álleani Keneses 2:15.

4. Met alon Jesus kewe ngeni ewe chón féfféringaw epwe amwékútúkich le ekieki?

⁴ Alon Jesus kewe ngeni ewe chón féfféringaw, a amwékútúkich le ekieki usun napanapen manawach lón ewe Paratis. Ren enletin, sia tongeni káé eú mettóch usun ewe Paratis seni án King Salomon nemenem fán kinamwe. Ewe Paipel a apasa pwe Jesus a lapalap seni Salomon. Me sia tongeni ésúkúsúkú pwe iir me chienan kewe le nemenem repwe angangfengen le ewili ei fénúfan ngeni eú Paratis mi lingéch. (Mat. 12:42) A ffat pwe ekkewe ‘ekoch sip’ repwe mochen silei met a lamot repwe féri pwe epwe fich ngeniir ar repwe manaw tori feilfeiló chék lón ewe Paratis.​—Joh. 10:16.

EPWE IFA USUN MANAWACH LÓN EWE PARATIS?

5. Óm ekiek nge epwe ifa usun manawach lón ewe Paratis?

⁵ Met a ppiitá lón ekiekum atun ka ekieki usun manawach lón ewe Paratis? Eli ka ekieki eú málámál mi lingéch, usun chék ewe tánipiin Eten. (Ken. 2:7-9) Eli ka chemeni án Mika we oesini usun án néún Kot kewe aramas repwe nóm fán ar ‘tanipin wain me fän ar irä fiik.’ (Mik. 4:3, 4) Eli ka pwal chemeni ekkewe wokisin mi fósun an epwe wor chómmóng mwéngé. (Kölf. 72:16; Ais. 65:21, 22) Iwe eli ka tongeni anchangei pwe ka nóm lón eú tánipi mi lingéch me mómmóót ren eú cheepel mi ur ren mwéngé mi anné. Eli ka pwal anchangei pwóéchchún ewe ásepwál ren pwonen ekkewe irá me péén irá. Ese mwáál, ka anchangei án chón óm we famili me chiechiom kewe tattakirfengen, kapachelong ekkewe mi manawsefál, me ar nónnómfengen fán pwapwa. Meinisin ekkena mettóch, esap chék eú ttan. Sia tongeni lúkúlúk pwe meinisin ekkena mettóch repwe fis wóón fénúfan. Iwe nge, manawach lón ewe Paratis, a pwal kapachelong ach sipwe eáni angang mi apwapwa.

6. Met sókkun angang sipwe féri lón ewe Paratis? (Ppii ewe sasing.)

⁶ Jiowa a férikichetá fengen me ach tufichin pwapwaiti ach angang. (SalAf. 2:24) Epwe fókkun chómmóng ach angang atun án Kraist Nemenem Úkúkún Engeréú Ier. A lamot úf, mwéngé, me imw, fán iten chókkewe repwe manawewu seni ewe riáfféú mi lapalap me pwal fán iten ekkewe fite million repwe manawsefál. Ren ach sipwe awora ekkena mettóch, a lamot ach sipwe féri chómmóng angang mi apwapwa. Atam me Efa ra atakeni ewe pwúl, iwe pwal kich, sipwe eáni angang mi apwapwa le ewili ei fénúfan ngeni eú Paratis. Pwal anchangei úkúkún pwapwaach le asukula ekkewe fite million repwe manawsefál, chókkewe rese kon silei Jiowa me letipan. Me apwapwaan ach álisi chókkewe mi tuppwél, iir kewe mi manaw mwen fansoun Jesus, ar repwe silei ekkewe mettóch a fis mwirin ar máló!

7. Met sia tongeni lúkúlúkú, me pwata?

⁷ Sia tongeni lúkúlúk pwe atun sia nóm lón Paratis, sipwe manaw fán kinamwe, epwe wor meinisin met a lamot ngenikich, me epwe kókkótéch manawach. Pwata? Pún Jiowa a fen ékúna ngenikich epwe ifa usun manawach fán án Néún we nemenem. Sia tongeni kúna ena seni pwóróusen án King Salomon nemenem.

MANAWACH LÓN PARATIS A PWÁ REN ÁN KING SALOMON NEMENEM

8. Ifa usun Kölfel 37:10, 11, 29 a pwénúetá mwirin án King Tafit makkeei? (Ppii ewe “Kapas Eis Seni Chón Állea” lón ei puk.)

⁸ King Tafit a makkeei fán emmwenien ewe ngún mi fel epwe ifa usun manawen aramas atun emén king mi tipachem me tuppwél epwe nemenem. (Álleani Kölfel 37:10, 11, 29.) Fán chómmóng, sia kan álleani ngeni aramas Kölfel 37:11 atun sia fós usun ewe Paratis epwe feito. A wor popun mi múrinné ach féri ena, pokiten Jesus a aloni alon ena wokisin lón an we Afalafal Wóón ewe Chuuk, me a pwári pwe epwe pwénúetá lón fansoun mwach. (Mat. 5:5) Nge alon Tafit na, a pwal pwári usun manawen aramas lón fansoun King Salomon we. Atun Salomon a nemeni Israel, néún Kot kewe aramas ra nóm fán kinamwe me nónnóméch lón ewe fénú mi “pwülüöch o fanüeräs.” Kot a apasa: “Are oupwe apwönüetä ai kewe pwüüng . . . , üpwe fang ngenikemi kinamwe lon ewe fanü, oupwe konola o annut, nge esap wor eman epwe eniwokusukemi.” (Lif. 20:24; 26:3, 6) A pwénútá ekkena pwon atun Salomon a nemenem. (1 Kron. 22:9; 29:26-28) Me Jiowa a pwonei pwe ekkewe aramas mi ngaw “resap chüen nom.” (Kölf. 37:10) Ina popun, minne a mak lón Kölfel 37:10, 11, 29, a pwénúetá lón fansoun lóóm me epwe pwal pwénútá lón mwachkkan.

9. Met ewe kiwinen Sepa a erá usun án King Salomon nemenem?

⁹ Ewe kiwinen Sepa a rong pwóróusen kinamween me nónnóméchún chón Israel fán án Salomon nemenem. Ena kiwin a sái seni towau ngeni Jerusalem pwe epwe pwisin kúna. (1 King 10:1) Mwirin an kúna mwúún Salomon we, a erá: “Ra chök apworausa ngeniei esopun pworausom. . . . Feiöchün noum kei chon angang mi nom reöm iteiten fansoun o rongorong ngeni om tipachem.” (1 King 10:6-8) Nge nónnómun aramas fán án Salomon nemenem a chék liosuetá met Jiowa epwe féri ngeni aramas fán án Néún we, Jesus, nemenem.

10. Ifa usun Jesus a lapalap seni Salomon?

¹⁰ Jesus a lapalap seni Salomon lón mettóch meinisin. Salomon i emén mwán ese unuséch, me a chómmóng met a mwáálliló wóón mi atoto riáfféún néún Kot kewe aramas mwirin och fansoun. Iwe nge, Jesus, i emén Sounemenem mi unuséch, ese wor mwáállin. (Luk. 1:32; Ipru 4:14, 15) Inaamwo ika a kúna watteen sóssót seni Satan mi fókkun áweires, nge a akkamwéchú an tuppwél ngeni Kot. Kraist a ánneta pwe i ese tongeni féri tipis are féri och mettóch epwe efeiengawa chókkewe mi nóm fán an nemenem. A ina eú watteen feiéch an epwe néúch King.

11. Ié kewe repwe fiti Jesus le nemenem?

¹¹ Epwe wor chienen Jesus le nemenem, iir 144,000 repwe álillisfengen le túmúnú aramas me apwénúetá met Kot a tipeni fán iten fénúfan. (Pwär. 14:1-3) Chókkana ra likiitú fán chómmóng sóssót me weires atun ra nóm fénúfan, ina minne ra weweiti nónnómun chókkewe mi nóm fán nemenier. Epwe ifa wisen chienen Jesus kana le nemenem?

EPWE IFA WISEN EKKEWE MI KEPIT?

12. Ifa ewe angang Jiowa a ewisa ngeni ekkewe 144,000?

¹² Wisen Jesus me chienan kewe le nemenem, a fókkun watte seni wisen Salomon. A lamot án ena kingen Israel epwe túmúnú fite million aramas lón chék eú fénú. Iwe nge, chókkewe repwe nemenem lón án Kot we Mwú, repwe álillis le túmúnú fite billion aramas wóón unusen fénúfan. A ifa me aúchean wisen ekkena 144,000 me ren Jiowa!

13. Ifa ewe wis mi aúchea chienen Jesus kewe le nemenem repwe wiseni?

¹³ Ekkewe 144,000 repwe wiseni ewe wis king me souasor usun chék Jesus. (Pwär. 5:10) Fán ewe Allúkún Moses, ekkewe souasor iir ra kan wisen mesemes wóón túmúnún aramas lón pekin inis me lón ar riri ngeni Jiowa. Ena Allúk ina chék “ngünüen ekewe mettoch mi mürina repwe feito,” ina minne sia tongeni apasa pwe chienen Jesus kewe le nemenem repwe álisi néún Jiowa kewe aramas ar repwe meefi péchékkúl lón pekin inis me ririéch ngeni I. (Ipru 10:1) Sise mwo silei iei ika ifa usun ekkena king me souasor repwe pwóróusfengen me chókkewe wóón fénúfan, iir mi nóm fán ewe Mwú. Ese lifilifil met Jiowa a akkóta, nge sia tongeni lúkúlúk pwe lón ewe Paratis epwe feito, epwe tori aramasen fénúfan kapasen emmwen mi lamot ngeniir.​—Pwär. 21:3, 4.

MET EKKEWE ‘EKOCH SIP’ REPWE FÉRI PWE EPWE FICH AR REPWE MANAW LÓN PARATIS?

14. Ifa usun ekkewe ‘ekoch sip’ me ewe “mwich mi kisikis” ra tipeeúfengen?

¹⁴ Jesus a eita ngeni chókkewe repwe fiti le nemenem, eú “mwich mi kisikis.” (Luk. 12:32) A pwal fós usun ewe oruuen kúmi, a eita ngeniir ‘ekoch sip.’ Ekkena ruu kúmi, iir chón lón ewe mwichen siip. (Joh. 10:16) Iir me ruu ekkena kúmi ra akkangangfengen iei, me repwe sópweló le angangfengen atun ei fénúfan epwe wiliti eú Paratis. Lón ena atun, chón lón ewe “mwich mi kisikis” repwele fen nóm láng, nge ekkewe ‘ekoch sip,’ repwe eáni ewe ápilúkúlúkún manaw tori feilfeiló wóón fénúfan. Nge a wor met a lamot án ekkewe ‘ekoch sip’ repwe féri iei pwe epwe fich ngeniir ar repwe nóm lón ewe Paratis.

15. (a) Ifa usun ekkewe ‘ekoch sip’ ra angangfengen me pwiin Kraist kewe? (b) Ifa usun ka tongeni áppirú met ei Chón Kraist mwán a féri lón ei sitowa? (Ppii ewe sasing.)

¹⁵ Ewe chón féfféringaw mi aier a fen máló me mwen an epwe suuk ngeni an epwe pwári an kilisou ren met Kraist a féri fán itan. Iwe nge kich ekkewe ‘ekoch sip,’ a chómmóng alen ach sipwe pwári iei úkúkún meefiach ren met Jesus a féri. Áwewe chék, sia pwári pwe sia tongei ren féfférúch ngeni pwiin kewe mi kepit. Jesus a apasa pwe epwe apwúngú ekkewe siip ren féfférúr ngeni pwiin kewe. (Mat. 25:31-40) Sia tongeni álisatá pwiin Kraist kewe ren ach tinikken lón ewe angangen afalafal me álisi aramas le wiliti néún chón káé. (Mat. 28:18-20) Ina popun sia mochen néúnéúéchú ekkewe minen álillisin káéén Paipel ra awora ngenikich, áwewe chék ren ewe puk, Eáni Manaw mi Pwapwa Tori Feilfeiló! Ika esaamwo wor ié ka káé ngeni, kopwe achocho le eisini chómmóng ika ra mochen káé Paipel.

16. Met sia tongeni féri iei pwe sipwe mmólnetá le nóm fán nemenien án Kot we Mwú?

¹⁶ Ese pwal lamot ach sipwe witi ach sipwe nóm lón ewe Paratis iwe sipwap wiliti ewe sókkun aramas Jiowa a mochen ar repwe nóm ikena. Sia tongeni achocho iei le wenechar lón ach kapas me féffér, me eáni itepék me rúúepek lón manawach. Me sia tongeni tuppwél ngeni Jiowa, ngeni pwúlúwach, me ngeni chienach kewe Chón Kraist. Ika sia álleasochisi Jiowa lón ei fénúfan mi ngaw, iwe epwe mecheres ach sipwe álleasochisi lón ewe Paratis. Sia pwal tongeni ámááraatá tufichich kewe lón pekin angang me ekkewe napanap mi pwári pwe sia mómmólnetá iei le nóm lón ewe Paratis. Ppii ewe lesen lón ei puk itelapan, “Ka Mmólnetá le ‘Fanüeni Fanüfan’?”

17. Pwata sisap letipechou ren tipisich kewe me lóóm? Áweweei.

¹⁷ A pwal lamot ach sipwe achocho le úkútiw seni ach mengiringir ren ekkewe tipis watte sia féri me lóóm. Ewer, sisap fókkun ekieki pwe ewe méén kepich, epwe ámecheresi ach sipwe “chök sopwela le föri tipis.” (Ipru 10:26-31) Nge sia tongeni lúkúlúk pwe ika sia enletin aier seni ach tipis watte, kútta álillis seni Jiowa me ekkewe mwán mi ásimaw, me siwili féfférúch, iwe Jiowa epwe unusen omusakicheló. (Ais. 55:7; Föf. 3:19) Sipwe chemeni alon Jesus ei ngeni ekkewe Farisi: “Ngang üsap feito pwe üpwe kökköri ekewe chon pwüng, pwe fen ekewe chon tipis.” (Mat. 9:13) A fókkun manaman ewe méén kepich pwe a tongeni pwélúoló tipisich kewe meinisin.

KA TONGENI MANAW LÓN PARATIS TORI FEILFEILÓ

18. Met ka mochen eisini ewe chón féfféringaw mi nóm únúkkún Jesus?

¹⁸ Ka tongeni anchangei óm nóm lón ewe paratis me fós ngeni ewe chón féfféringaw mi kapas ngeni Jesus? Ese mwáál ámi me rúúemén oupwe fósun ámi kilisou ren án Jesus asor. Eli kopwe tingorei an epwe apwóróusa ngonuk met a fis mwen án Jesus epwele muchúló, me met a meefi atun Jesus a pélúweni an we tingor. Iwe nge, neman epwe pwal eisinuk ifa usun manawom atun lesópwólóón án Satan ei ótót. A ifa me feiéchúch ach sipwe káé ngeni chókkewe mi usun chék ena mwán!​—Ef. 4:22-24.

19. Pwata esap echchipwang manawach lón ewe Paratis? (Ppii ewe sasing wóón péén.)

¹⁹ Manawach lón ewe Paratis esap fókkun echchipwang. Fansoun meinisin, epwe wor sókkopaten aramas sipwe mochen fós ngeniir me sókkun angang mi apwapwa sipwe féri. Nge lap seni meinisin, iteiten rán epwe lallapóló ach silei usun Semach we lón láng me pwapwa ren met a fen awora. Esap ikkit met sia tongeni káé usun i, me epwe chómmóng met sipwe káé usun férian kewe. Ttattamolóón manawach, epwe pwal ina lalapólóón ach tongei Kot. A ifa me kilisouch ren minne Jiowa me Jesus ra pwonei ngenikich ach sipwe tongeni manaw lón ewe Paratis tori feilfeiló!