Osukosuk Wóón Unusen Fénúfan Usun Pekin Ekiek
“Ua kan aúrek iteitan, pwal mwo nge atun ua chék mómmóót ákkáláemén lón eú ruumw.”
“Atun ua fókkun meefi péchékkúl, ua meefi lólilen. Ua kúna seni met a fis lón manawei pwe atun ua fókkun pwapwa, iwe ekiseló mwirin upwe fókkun letipechou.”
“Ua achocho le nefótófót wóón met a fiffis lón eú me eú rán. Nge fán ekkóch, a chék mwittir ppiitá ai aúreki chómmóng mettóch.”
Ikkena meefien chókkewe mi weires ren osukosuken tupwuer. A fis ngonuk ekkena esin memmeef are ngeni emén attongeom?
Kopwe lúkúlúk pwe esap chék en ka meefi ena esin weires. Chómmóng aramas lón ei fansoun ra kúna weires ren ena mettóch, ese lifilifil ika pwisin iir a úriir are a úri attongeer kewe.
Ese wor tipemwaramwar pwe iei sia nóm lón “ekewe ränin lesopolan” mi áweires me atoto chómmóng sókkun riáfféú. (2 Timoty 3:1) Eú pekin káé a apacha úkúkún aramas wóón unusen fénúfan me a kúna pwe a wor emén me lein iteiten walimén aramas a weires ren osukosuken tupwu. Pokiten ewe COVID-19 pandemic, lón ewe 2020 a lapóló wóón ina epwe 26 persent aramas mi riáfféú ren aúrek lap seni lón ewe 2019. Me a pwal lapóló wóón 28 persent chókkewe mi weires ren watteen semwenin letipechou lap seni lón ewe 2019.
A aúchea ach sipwe silei fitemén aramas lón ei fansoun iir mi riáfféú ren aúrek me semwenin letipechou. Nge a kon aúchea ach sipwe silei ifa usun en me attongeom kewe oupwe meefi péchékkúl lón ámi nónnóm.
Met weween nónnómun emén lón pekin ekiek?
Atun a múrinné nónnómum lón pekin ekiek, lape ngeni ka meefi kinamwe me ka tongeni mwékútúkút fetál. Ka tongeni likiitú fán aúrek, epwe fisiéch óm angang, me kopwe meefi menemenéch.
Osukosuken tupwu . . .
ESE FIS seni pwisin óm kewe apwangapwang.
INA eú semmwen mi tongeni efisi watteen riáfféú me aosukosuka ekiekin emén, nemeni an memmeef me napanapan.
Fán chómmóng a tongeni áweiresi emén an epwe chiechi ngeni ekkewe ekkóch, me áweiresi an epwe ataweei ekkewe angang mi weneiti manawan iteiten rán.
A tongeni tori aramas ese lifilifil ieriir, ar eéreni, einang, lamalam, me ese lifilifil úkúkún ar sukul, are iir mi wéúch are wéúngaw.
Kútta álillis ika a osukosuk lón tupwuom
Fán ekkóch a mwittir poputá le sókkóló féfférún me meefien emén. A tongeni poputá le mochen chék akkannut are nafangaw an annut, mwéngémmong are fen kisikisiló anan, are meefi watteen aúrek are letipechou. Ika a fis ekkena mettóch, eli epwe lamot ngeni eménna an epwe kútta álillis seni emén mi silei pekin pioing an epwe álisi le weweiti met a efisi ekkena mettóch me ifa usun epwe pwákini. Nge, ia a tongeni kútta me ie álillis?
Jesus Kraist, ewe mwán mi tipachem seni meinisin mi manaw, a apasa: “Eman sousafei esap lomot ngeni aramas mi pöchökül, pwe a lomot ngeni chök ekewe chon samau.” (Mateus 9:12) Chókkewe mi weires ren nónnómun inisiir iir mi angei álillis seni pioing mi fichitiir me nóm wóón sáfei, ra tongeni ekisikisaaló met ra kan memmeefi me angei álillisin ar repwe eáni eú manaw mi sópwéch me pwapwa. A eú alen tipachem án ekkena esin aramas resap ammanga ar kútta álillis seni pioing ika a ttam are chou met ra kan memmeefi.a
Inaamwo ika ewe Paipel esap eú puken sáfei, nge masouan a álilliséch ngeni nónnómuch lón pekin ekiek. Aua peseok le káé ekkewe lesen mwirin ei mi áweweei ifa usun ewe Paipel a tongeni álisikich le pworacho ngeni osukosuken tupwu.
a Ewe Leenien Mas ese erenikich sókkun álillisin sáfei sipwe angei. Pwisin emén me emén epwe ekiekiéchú met a tongeni féri mwen an epwe féri an kefil.