1 | Iótek “Oupwe Likiti Ngeni Kot Ämi Öürek Meinisin”

PAIPEL A APASA: “Oupwe likiti ngeni Kot ämi öürek meinisin, pun i a ekieki met oupwe feiöch ren.”—1 PETRUS 5:7.

Met Weween Ena?

Jiowa Kot a etiwakich ach sipwe fós ngeni usun sókkun weires mi aosukosuka ekiekich me letipach. (Kölfel 55:22) Ese lifilifil ika ach kewe osukosuk ra watte are kisikis, sia tongeni iótek usun. Ika sia kon ekieki ach kewe osukosuk, iwe Jiowa a pwal ekieki pún i a chúngúkich me ekieki meefiach. Ach iótek ngeni, ina eú mettóch mi fókkun lamot pwe epwe ekinamwei ekiekich.—Filipi 4:6, 7.

Ifa Usun A Tongeni Álisikich?

Atun sia weires ren ach semwenin ekiek, eli sipwe meefi pwe sia chék áláemén. Ekkóch aramas resap fókkun weweiti met a fiffis ngenikich. (Än Salomon Fos 14:10) Nge atun sia wenechar le ereni Kot lón iótek meefiach, iwe fán kirekiréch, epwe aúseling ngenikich me weweitikich. Jiowa a kúnakich me silei ach kewe weires me osukosuk, me i a mochen ach sipwe iótek ngeni usun ese lifilifil met sia eáni aúrek.—2 Kronika 6:29, 30.

Ach fóffós ngeni Jiowa lón iótek, a apéchékkúla ach lúkúlúk pwe a tongekich. Sia tongeni meefi meefien ewe soumakken kélfel lón an ei iótek: “Ka küna ai riaföü o silei ai kewe weires.” (Kölfel 31:7) Ach chék silei pwe Jiowa a áfánni met sia nónnóm fan, a tongeni álisikich le likiitú fán ach kewe weires. Nge me lúkún an áfánnikich, a wor met a pwal féri. I chék a unusen weweiti met sia nónnóm fan me a álisikich le kúna ourur me apéchékkúl seni ewe Paipel.

Usun Álilliséchún ewe Paipel—Julian

Usun án Aúrek Áweiresiei

“A úriei semwenin aúrek me ewe semmwen itan obsessive-compulsive disorder (OCD). Ena semwenin aúrek a kan chék weiweitá an toriei. Eú atun ua meefi kinamwe, nge mwirin ua meefi och sókkun aúrek mi kon ssenúk nge ese wor popun. Ua ákkáeúin meefi ena atun ua nóm lein aramas. Ua kon ekieki met ekkena aramas repwe ekieki usi.

“Chiechiei kewe mi silei ai na samau, ra mmen álilliséch. Nge fán ekkóch, ra apasa met ese álilliséch. Nge ua kilisou pún ra achocho le álisiei.

“Fán ekkóch ai kana samau ra áweiresi ai upwe iótek. A lamot ai upwe fókkun achocho le nefótófót wóón ai fós ngeni Jiowa lón iótek. A fókkun mwittir sissiwil met ua kan ekieki, ina popun ua kan rukoruk. Atun use tongeni nemeni met ua ekieki, a weires ai upwe áweweei ngeni Jiowa ekieki me meefiei.”

Usun án Paipel Álisiei

“Ua silei seni ai káé Paipel pwe ese pwal lamot an epwe ttam are ai upwe néúnéú ekkewe kapas mi fókkun múrinné lón ai iótek pwe Kot epwe etiwa. Fán ekkóch, ika use tongeni ereni Jiowa met ua meefi, ua chék ereni: ‘Jiowa, kese mochen kopwe álisiei.’ Iwe, pwal mwo ren ena, ua meefi pwe Jiowa a weweitiei me pélúweniei ren met a lamot ngeniei lón ena atun. Me lúkún iótek, ua pwal kútta álillis seni tokter. Ua pwapwa me kilisou ren iir me ruu ekkena álillis, ua meefi pwe a échúló nónnómui. Inaamwo ika a lamot ai upwe fókkun angang weires le tingor án Semei we lón láng álillis, nge ua féri pún ua lúkúlúk pwe a tongeei me mochen álisiei.”