2 | Kapasen Ourur Seni Paipel

PAIPEL A APASA: “Meinisin mine a mak lon ekewe Toropwe mi Pin a mak fän iten ach sipwe kaiö seni, pwe epwe wor ach apilükülüköch ren ach likitü pwal ren ach küna pöchökülen letipach mi torikich seni ekewe Toropwe mi Pin.”—ROM 15:4.

Met Weween Ena?

Ewe Paipel a masou ren kapasen ourur mi tongeni apéchékkúlakich me elikiitúkich atun sia eáni ekiek ese pwúng. Ewe pwóróus lón Paipel a pwal ngenikich ewe ápilúkúlúk pwe ekiseló chék sisap chúen meefi metekin letipach.

Ifa Usun A Tongeni Álisikich?

Fán ekkóch, kich meinisin sia kan meefi letipengaw, nge chókkewe mi meefi weires pokiten a úriir semwenin letipechou are aúrek, eli ra meefi metekin letiper fansoun meinisin. Ifa usun ewe Paipel a tongeni álisi ekkena esin aramas?

Ewe Paipel a awora chómmóng pwóróus mi múrinné mi tongeni ekkesiwili ach ekiek ese pwúng. (Filipi 4:8) A wesewesen tongeni amasoua ekiekich ren pwóróus mi oururukich me ekinamwekich epwe álisikich le nemeni meefiach.—Kölfel 94:18, 19.
Ewe Paipel a tongeni álisikich ach sipwe úkútiw le ekieki pwe ese wor aúcheach.—Lukas 12:6, 7.
Chómmóng wokisin lón Paipel ra anúkúnúkú ngenikich pwe sise chék áláemén, me Kot, ewe Chón Férikich, a unusen weweiti meefiach.—Kölfel 34:18; 1 Johannes 3:19, 20.
Ewe Paipel a pwonei pwe Kot epwe amóeló ekkewe mettóch mi fis mi ámeteki letipach. (Aisea 65:17; Pwärätä 21:4) Atun sia weires ren ekkewe esin ekiek me memmeef mi aosukosukakich, eli sipwe kúna pwe ena pwon a apéchékkúlakich le likiitú.

Usun Álilliséchún ewe Paipel—Jessica

Usun án Letipechou Áweiresiei

“Lupwen a 25 ieri, a poputá ai use chúen tongeni féri ekkewe mettóch ú kan féfféri iteitan. Tokter a ereniei pwe a úriei letipechou mi kon ssenúk. Ua pwal weires ren ai use tongeni nemeni ai chemesefáli met ekkewe mi áweires mi fis ngeniei me lóóm. Tokter ra álisiei le weweiti pwe ai letipechou mi kon ssenúk a riri ngeni ai eáni ekiek ese pwúng mi ppiitá ren ekkewe mettóch mi áweires mi fis lón manawei. Me lúkún ai ún sáfei mi lamot ngeniei, a pwal lamot ngeniei álillisin pioing pwe upwe esilla me apwúngú ai ekiek ese pwúng.”

Usun án Paipel Álisiei

“Atun a fókkun ssenúk ai letipechou, ua meefi watteen niwokkus, aúrek mi kon ssenúk, me use tongeni annut. Lape ngeni lepwin, ua kon choutiw ren ai lólilen use tongeni nemeni. Kölfel 94:19 a affata pwe Kot a tongeni oururukich me ekinamwekich atun sia choutiw ren aúrek. Ina popun ua kan onómu únúkkún ai we bed nei we Paipel me eú notebook mi masou ren wokisin mi apéchékkúl. Atun use tongeni méúr, ua álleani ekkóch wokisin mi atolonga ekiekin Kot lón ekieki me a oururuei.

“Ewe Paipel a pesekich ach sipwe otursenikich ekkewe sókkun ekiek ese tipeeú ngeni met sia silei usun Kot. Me lóóm, ua lúkú pwe ese wor aúcheai, ese wor tongei, me ua lamotongaw. Nge ua káé pwe ekkena esin lúkú rese tipeeú ngeni met Paipel a apasa usun Kot pwe i emén mi tong me emén Sam mi kirekiréch, ewe mi chúngú emén me emén kich. Ekis me ekis ua tongeni nemeni ai ekiek lap seni ai mut ngeni an epwe nemeniei. Ua káé le eáni ekiekin Kot usi. Ina eú mettóch mi aúchea mi álisiei le oturseniei ai ekiek ese pwúng usun pwisin ngang.

“Ua mwétéresiti ewe fansoun atun epwe morolo meinisin sókkun ekiek mi efeiengaw me ai chemeni ekkewe mettóch mi áweiresiei me lóóm. Ua silei pwe lón fansoun mwach esap chúen wor semwenin ekiek. Ena mettóch a álisiei le likiitú lón ei fansoun me mwétéresiti met epwe fis lón fansoun mwach, atun esap chúen wor ai semwenin letipechou.”