“Ousipwe Ásimawóló”

1. Met Jiowa a mochen ach sipwe féri?

EÚ ME lein ekkewe fansoun mi kon apwapwa ngeni rúúemén pwúpwúlú, ina atun a uputiw emén néúr. Iwe nge, inaamwo iká ra tongei néúr na upwufé mi aúchea, nge saminne repwe mochen an epwe chék mémménúkol. Ren enletin, repwe fókkun lólilen iká néúr na ese mámmááritá. Pwal ina ussun ren Jiowa, a pwapwa atun sia poputá le káé ussun i, nge ese mochen ach sipwe chék mémménúkol lón pekin ngún. (1 Kor. 3:1) Nge a erenikich ach sipwe emén Chón Kraist mi “ásimaw.”—1 Kor. 14:20.

2. Met sipwe káé lón ei lesen?

² Ifa ussun ekiekin me féfférún emén Chón Kraist mi ásimaw? Met a lamot sipwe féri pwe sipwe wiliiti emén Chón Kraist mi ásimaw? Ifa ussun ekkewe mwéngé péchékkúl lón pekin ngún ra tongeni álisikich le feffeitá lón ach riri ngeni Jiowa? Me pwata a lamot ach sisap ekieki pwe sia fen ásimaw me ese pwal lamot ach sipwe angang wóón ach riri ngeni Jiowa? Lón ei lesen, sipwe pélúweni ekkena kapas eis.

MET WEWEEN ACH WILIITI CHÓN KRAIST MI ÁSIMAW?

3. Met weween án emén wiliiti Chón Kraist mi ásimaw?

³ Lón ewe Paipel, ewe kapasen Krik mi wewe ngeni ásimaw a pwal tongeni wewe ngeni “emén mi mwukóló.”a (1 Kor. 2:6) Emén ménúkol a kan mámmááritá tori an wiliiti emén mi mwukóló. Ina ussun ren kich, sia pwal mámmááritá lón ach riri ngeni Jiowa. Me ikena ie, sia wiliiti emén Chón Kraist mi ásimaw. Ewer, inaamwo iká sia fen ásimaw, nge sipwe chék sópweeló le feffeitá lón pekin ngún. (1 Tim. 4:15) Kich meinisin, kapachelong ekkewe iir mi chék kúkkún, sia tongeni ásimaw lón pekin ngún. Nge ifa ussun sipwe silei iká sia ásimaw?

4. Ifa ussun kopwe esilla emén Chón Kraist mi ásimaw?

⁴ Emén Chón Kraist mi ásimaw, i emén mi féri mettóch meinisin Jiowa a allúkú ngeni. Esap chék féri ekkewe mettóch a mochen féri. Ewer, pokiten i ese unuséch, a tongeni mwáálliló. Iwe nge, iteiten rán a fókkun achocho úkúúkún an tongeni le eáni ekiek me féffér mi fich ngeni letipen Jiowa. A eáni manaw mi fé me sópweeló le achocho le ákkeáni ekiekin Jiowa. (Efi. 4:​22-24) A káé le féri kefil mi múrinné ren an ekkekieki án Jiowa kewe allúk me kapasen emmwen. Ina minne, ese pwal lamot ngeni chómmóng allúk pwe epwe silei met a lamot an epwe féri. Atun a féri kefil, a fókkun achocho le apwénúetá minne a filaatá.—1 Kor. 9:​26, 27.

5. Met a tongeni fis ngeni emén Chón Kraist ese mwo ásimaw? (Efisus 4:​14, 15)

⁵ Nge, emén Chón Kraist ese feffeitá ngeni ásimaw, a tongeni mwittir tupuló ren “án aramas kewe asukul mi chofona iir kewe mi otupu aramas.” A tongeni mwittir lúkú chókkewe mi achéúfetálei pwóróus ese pwúng wóón media. Are pwal mwo nge tup ren ekkewe chón rikiló.b (Álleani Efisus 4:​14, 15.) Eli epwe lólówóiti ekkewe ekkóch, osukosuk ngeniir, are mwittir song rer. Me atun a tori sóssót, epwe chék féri minne mi ngaw.—1 Kor. 3:3.

6. Pwata sia tongeni alélléfengeni ach ásimawóló ngeni án emén semirit mámmááritá? (Pwal ppii ewe sasing.)

⁶ Ussun met sia fen pwóróus ussun me mwan, ewe Paipel a alélléfengeni mámmááritáán emén lón pekin ngún ngeni mámmááritáán emén ménúkol tori an a mwukóló. Mi chómmóng met emén semirit ese silei, ina minne a lamot ngeni án emén watte túmún me emmwen. Áwewe chék, eli emén inelap epwe ereni néún we nengngin pwe epwe kémwéch péún atun ra cross ewe al. Atun ena nengngin a mámmááritá, eli inan we epwe mut ngeni an epwe pwisin cross ewe al, nge epwe chúen áchchema ngeni néún na an epwe nengeni iká ese wor waa mi ssá me rúúepek. Atun ena naw a watte, epwe fen silei ifa ussun epwe túmúnú seni ekkena esin feiengaw. A lamot án ekkewe mi mwukóló álillis ngeni ekkewe semirit pwe resap feiengaw, iwe a pwal ina ussun ren ekkewe Chón Kraist resaamwo ásimaw, epwe pwal lamot ngeniir án ekkewe mi ásimaw álillis pwe repwe kúna túmún seni ekkewe mettóch mi tongeni angawaaló ar riri ngeni Jiowa, me repwe pwal féri kefil mi múrinné. Nge atun emén Chón Kraist mi ásimaw epwe féri kefil, epwe ekilonei met ewe Paipel a apasa pwe epwe silei meefien Kot ussun. Iwe a tongeni féri minne mi pwúng.

7. Mi lamot ngeni ekkewe Chón Kraist mi ásimaw álillis seni ekkewe ekkóch?

⁷ Itá a wewe ngeni pwe ese fókkun lamot ngeni emén Chón Kraist mi fen ásimaw án ekkewe ekkóch álillis? Aapw, fán ekkóch a pwal lamot ngeni ekkewe mi ásimaw álillis. Nge emén ese ásimaw, eli epwe mochen án ekkewe ekkóch repwe ereni met epwe féri are wisen féri kefil fán itan. Iwe nge, emén Chón Kraist mi ásimaw a sókkóló seni, pwe iká epwe kútta álillis seni ekkewe ekkóch mi watte seni me watte sileer lap seni, iwe a silei pwe wisan an epwe pwisin féri kefil me “epwe pwisin mwárei osan.”—Kal. 6:5.

8. Ifa ussun ekkewe mi ásimaw ra sókkofesen?

⁸ Ese léllé napanapen inisin aramas meinisin, iwe a pwal ina ussun ren ekkewe Chón Kraist mi ásimaw, ese pwal léllé napanaper kewe. Áwewe chék, ekkóch ra fókkun tipáchem, me ekkóch ra mmen tipepwora. Ekkóch ra kisáséú, me ekkóch ra mwittir meefi meefien ekkewe ekkóch. Pwal och, atun a tori rúúemén Chón Kraist mi ásimaw eú chék sókkun sóssót, eli a tongeni sókkofesen met repwe apwúngaló, nge a chúen tipeeú ngeni ewe Paipel. Lape ngeni a kan fiffis ena pokiten ra féri kefil mi lóngólóng wóón mwelien letiper. Ina minne, rese kan apwúngúfengeniir iká a sókkofesen met ra filaatá. Nge ra achocho le chék tipeeúfengen.—Rom 14:10; 1 Kor. 1:10.

MINNE SIPWE FÉRI PWE SIPWE WILIITI CHÓN KRAIST MI ÁSIMAW

9. A tongeni chék automatic ach wiliiti emén Chón Kraist mi ásimaw? Áweweei.

⁹ Mwirin fitu fansoun, emén semirit epwe pwisin mámmááritá. Nge mámmááritáán emén lón an riri ngeni Jiowa, ese automatic. Áwewe chék, ekkewe Chón Kraist lón Korint ra etiwa ewe kapas allim, papatais, angei ewe ngún mi fel me káé chómmóng seni met aposel Paul a áiti ngeniir. (Féf. 18:​8-11) Iwe nge, fitu ier mwirin ar papatais, ekkóch me leir rese mwo ásimaw. (1 Kor. 3:2) Met sipwe féri pwe esap fis ngenikich ena?

10. Met a lamot sipwe féri pwe sipwe ásimawóló? (Juta 20)

¹⁰ Ren ach sipwe feffeitá ngeni ásimaw, a lamot ach sipwe ámááraatá ach mochen wiliiti emén mi ásimaw. Chókkewe iir mi ‘efich le nonom lon ar wewemang,’ ra chék mochen mémménúkol lón pekin ngún, iwe resap fókkun feffeitá. (SalF. 1:22) Sise mochen ussun chókkewe mi fen mwukóló, nge ra chúen lúkúlúk wóón án semer kewe me iner repwe féri kefil fán iter. Nge sia mochen pwisin féri met sipwe feffeitá ren lón ach riri ngeni Jiowa. (Álleani Juta 20.) Iká ka chúen anganga met kopwe ásimawóló ren, iótek ngeni Jiowa an epwe fang ngonuk “ewe mochen me ewe tufichin angang.”—Fil. 2:13.

11. Met Jiowa a fang ngenikich pwe epwe álisikich le feffeitá ngeni ásimaw? (Efisus 4:​11-13)

¹¹ Jiowa ese menei senikich ach sipwe ásimawóló wóón pwisin ach. Chókkewe mi wisen túmúnúkich me asukulakich lón ekkewe mwichefel, ra mmólnetá le álisikich le “ásimawóló” pwe epwe péchékkúleló ach riri ngeni Jiowa, me sipwe “ussun chék Kraist.” (Álleani Efisus 4:​11-13.) Jiowa a pwal fang ngenikich an we ngún mi fel pwe epwe álisikich le eáni “án Kraist ekiek.” (1 Kor. 2:​14-16) Pwal och, Kot a emmweni makken ekkewe rúáánú Puken Kapas Allim pwe epwe áiti ngenikich ussun án Jises ekiek, kapas, me an féffér atun a nóm fénúfan. Atun ka áppirú án Jises ekiek me féffér, ka tongeni tikeri met ka mochen achocho ngeni, ina óm wiliiti emén Chón Kraist mi ásimaw.

AÚCHEAN MWÉNGÉ PÉCHÉKKÚL LÓN PEKIN NGÚN

12. Ikkefa “ekkewe asukul sia akkomw káé ussun ewe Kraist”?

¹² Ren ach sipwe ásimawóló, a lamot ach sipwe pwal alapaaló ach káé lap seni met sia fen silei seni “ekkewe asukul sia akkomw káé ussun ewe Kraist.” Áwewe chék, ekkóch me lein ekkewe mettóch sia akkomw káé, ina ussun áier, lúkú, papatais, me manawsefál. (Ipru 6:​1, 2) Ikkena ekkóch me lein ekkewe asukul meinisin Chón Kraist ra lúkú. Ina minne atun Piter a afalafal ngeni ekkewe aramas lón ewe fansoun Pentikos, a fós ussun ekkena mettóch. (Féf. 2:​32-35, 38) A lamot ach sipwe etiwa ekkena afalafalen lepopun ren ach sipwe wiliiti chón tapweló mwirin Kraist. Áwewe chék, Paul a áiti ngenikich pwe iká sise lúkú ewe manawsefál, iwe sise tongeni apasa pwe kich Chón Kraist mi enlet. (1 Kor. 15:​12-14) Iwe nge, a lamot ach sisap chék menemenéch ren ach silei ekkewe afalafalen lepopun.

13. Met a lamot sipwe féri pwe sipwe feiéch seni ekkewe mwéngé péchékkúl lón pekin ngún Ipru 5:14 a fós ussun? (Pwal ppii ewe sasing.)

¹³ Ekkewe afalafalen lepopun ra sókko seni ekkewe mwéngé péchékkúl pwe a kapachelong lón ekkena mwéngé péchékkúl án Jiowa kewe allúk me kapasen emmwen mi álisikich le weweiti an ekiek. Ren ach sipwe kúna feiéch seni ekkena sókkun mwéngé, a lamot sipwe káé, ekilon, me achocho le apwénúetá masouen án Kot we Kapas. Iká sia féri ena, sia káé le féri kefil mi apwapwaai Jiowa.c—Álleani Ipru 5:14.

14. Ifa ussun Paul a álisi ekkewe chón Korint ar repwe ásimawóló?

¹⁴ A weires ngeni ekkewe Chón Kraist rese ásimaw ar repwe eáni kefil mi éch atun ese wor allúk mi tichik lón ewe Paipel. Iká ese wor allúk lón Paipel ussun met ra kútta, iwe eli ekkóch repwe meefi pwe ra tongeni chék féri met ra mochen. Eli ekkóch repwe pwal kútta eú allúk inaamwo iká ese pwal wor eú allúk mi lamot. Áwewe chék, ekkewe Chón Kraist lón Korint eli ra eisini Paul ussun eú allúk iká ra tongeni mwéngé ekkewe mwéngé mi piin asor ngeni anúmwáál. Paul ese ereniir met repwe féri, nge a áwewe ngeniir pwe a wor án emén me emén “pwúngún filaatá” met epwe féri alóngólóng wóón mwelien letipan. A ereniir ekkóch án Paipel kapasen emmwen mi tongeni álisiir le féri kefil esap osukosuka mwelien letiper me áchepeteki ekkewe ekkóch. (1 Kor. 8:​4, 7-9) Paul a álisi ekkewe chón Korint ar repwe néúnéú ewe Taropwe mi Pin le féri pwisin ar kefil pwe repwe tongeni áeá ar tufichin ekiek lap seni ar lóngólóng wóón ekkewe ekkóch are kútta pwal ekkóch allúk. An féri ena, a álisiir le ásimawóló.

15. Ifa ussun Paul a álisi ekkewe Chón Kraist iir chón Ipru le feffeitá lón pekin ngún?

¹⁵ Sia káé eú lesen mi aúchea seni met Paul a makkeei ngeni ekkewe Chón Kraist iir chón Ipru. Ekkóch rese sópweeló le mámmááritá lón pekin ngún. Ren enletin, ra “wiliiti emén mi lamot ngeni milik, nge esap mwéngé péchékkúl [mwéngé lón pekin ngún].” (Ipru 5:12) Rese káé me etiwa ekkewe pwóróus minefé Jiowa a áiti ngeniir me ren ewe mwichefel. (SalF. 4:18) Áwewe chék, chómmóng ekkewe Chón Kraist iir chón Jus ra chúen álisaatá ewe Allúkún Moses inaamwo iká a fen 30 ier me mwirin an a kamwóóló ewe Allúkún Moses ren án Kraist asor. (Rom. 10:4; Tait. 1:10) Ekkena 30 ier a awora naféchún fansoun ngeniir le weweiti pwe ese chúen lamot ar repwe fiti ewe Allúk! Meinisin mi álleani néún Paul we taropwe ngeni ekkewe chón Ipru, ra tongeni apasa pwe ena taropwe a masou ren mwéngé péchékkúl lón pekin ngún. Ina met a wesewesen lamot ngeni ekkewe Chón Kraist ren ar repwe apéchékkúlaló ar lúkú wóón án Chón Kraist we kókkótun fel mi kon múrinné, me apworar le sópweeló le afalafal inaamwo iká ekkewe chón Jus ra ú ngeniir.—Ipru 10:​19-23.

LAMOTEN ACH SÓPWEELÓ LE ÁKKÁSIMAWÓLÓ

16. Met a pwal lamot sipwe féri me lúkún ach sópweeló le ásimawóló?

¹⁶ A lamot ach sipwe fókkun achocho le wiliiti emén Chón Kraist mi ásimaw me sópweeló le féfféri ena. Ina minne a lamot ach sipwe túmúnú pwe site ekieki pwe sia fen ásimawóló me ese chúen lamot ngenikich ach sipwe sópweeló le apéchékkúlaló ach riri ngeni Jiowa. (1 Kor. 10:12) A lamot sipwe kan ‘sóssótunikich’ pwe sipwe silei iká sia chúen sópweeló le feffeitá.—2 Kor. 13:5.

17. Ifa ussun néún Paul we taropwe ngeni ekkewe chón Kolose a pwáári lamoten ach sipwe sópweeló le ákkásimawóló?

¹⁷ Lón néún Paul we taropwe ngeni ekkewe chón Kolose, a pwal pwáári lamoten ach sipwe ákkásimawóló. Inaamwo iká ekkena chón Kolose ra fen ásimaw, nge Paul a ereniir ar repwe fókkun túmúnú ar resap tupuló ren ekiekin ei fénúfan. (Kol. 2:​6-10) Epafras, ewe mi sileéchú chókkana lón ewe mwichefel, a ikkiótek iteitan pwe repwe “sópwósópwoló le úppós,” are ásimawóló. (Kol. 4:12) Met sia tongeni káé seni? Paul me Epafras ra weweiti pwe ren án emén epwe sópweeló le ásimawóló, a lamot ngeni achocho me án Kot álillis. Ra mochen pwe ekkewe chón Kolose repwe sópweeló le ásimawóló inaamwo iká epwe toriir sókkun weires.

18. Met a tongeni fis ngeni emén Chón Kraist mi ásimaw? (Pwal ppii ewe sasing.)

¹⁸ Paul a éúréúra ekkewe chón Ipru pwe iká emén Chón Kraist mi ásimaw ese túmúnúéch, iwe epwe tongeni péút fóchófóch seni i án Kot chen. Iká a tunaaló le aúseling ngeni Jiowa, iwe a tongeni towawoló seni, iwe esap chúen tongeni áier, me esap kúna omusomusen an tipis me ren Kot. Sia kilisou pwe ekkewe chón Ipru rese mwo tori ena kaúkún. (Ipru 6:​4-9) Nge ifa ussun ren chókkewe lón ei fansoun iir mi patapateló are katowu nge mwirin ra áier? Iká ra tipetekison le áier, ra pwáári pwe rese ussun chókkewe Paul a makkeei ussur. Iwe nge, atun ra liwiniti Jiowa, a lamot ngeniir ewe álillis a awora. (Is. 34:​15, 16) Eli ekkewe mwán mi ásimaw repwe akkóta án emén Chón Pwáraatá mi lipwákéch epwe álisiir le péchékkúlsefál lón pekin ngún.

19. Ifa ewe mettóch a lamot sipwe achocho ngeni?

¹⁹ Iká ka akkachocho le wiliiti emén Chón Kraist mi ásimaw, ka tongeni tikeri met ena ka achocho ngeni! Sópweeló le kákkáé ekkewe pwóróus mi enlet me alóllóól lón ewe Paipel me ákkeáni ekiekin Jiowa. Me iká ka fen ásimawóló, sópweeló chék le ákkásimawóló iei tori feilfeiló.