Ifa Ussun ewe Mwichefel A Tongeni Áppirú án Jiowa Ekiek Ussun Emén mi Féri Tipis?

1. Met Jiowa a mochen fán iten aramas meinisin?

JIOWA a féraatá aramas fengen me ar tufichin pwisin filaatá. Ka áeá ena liffang iteiten rán atun ka féri óm kefil. Nge ewe kefil mi lamot seni meinisin emén a tongeni eáni, ina an filaatá an epwe fangoló manawan ngeni Jiowa me pachelong lein chón an we familien chón fel ngeni. Jiowa a mochen án meinisin repwe féri ena. Pwata? Pún a tongei aramas me a mochen minne mi múrinné seni meinisin fán iter. A mochen ar repwe chiechiéch ngeni me kúna manaw tori feilfeiló.—Tut. 30:​19, 20; Kal. 6:​7, 8.

2. Met meefien Jiowa ussun chókkewe mi féri tipis nge rese áier? (1 Jon 2:1)

² Iwe nge, Jiowa ese echchimwa emén an epwe angang ngeni. A mut ngeni emén me emén ar repwe pwisin filaatá met repwe féri. Nge ifa ussun iká emén Chón Kraist a féri eú tipis mi chou? Iká ese áier, iwe a lamot an epwe katowu seni ewe mwichefel. (1 Kor. 5:13) Ikáámwo ina, nge Jiowa a fókkun mochen án ena emén epwe liwiniti. Ren enletin, ina ewe popun mi aúchea a awora ewe méén kepich, pwe epwe musoló tipisin ewe chón tipis mi áier. (Álleani 1 Jon 2:1.) Ach we Kot mi tong a pesei chókkewe mi féri tipis mi chou ar repwe áier.—Sek. 1:3; Rom 2:4; Jem. 4:8.

3. Met sipwele káé lón ei lesen?

³ Jiowa a mochen ach sipwe eáni an ekiek ussun ewe mettóch tipis me chókkewe mi féri tipis. Sipwe káé lón ei lesen ifa ussun sia tongeni féri ena. Atun kopwe álleani ei pwóróus, ppii (1) ifa ussun ewe mwichefel lón Korint a angang wóón eú tipis mi chou lón ewe mwichefel, (2) met aposel Paul a eáni kapasen emmwen atun ewe mi féri tipis a áier, me (3) met ei pwóróus a pwáári ussun meefien Jiowa ngeni emén Chón Kraist mi féri eú tipis mi chou.

MINNE A FIS ATUN EMÉN A FÉRI EÚ TIPIS MI CHOU

4. Met a fis lón ewe mwichefel lón Korint? (1 Korint 5:​1, 2)

⁴ Álleani 1 Korint 5:​1, 2. Lón án Paul aúlúngátin sái lón an angangen misineri, a rong ussun eú pwóróus mi alólilen mi fis lón ewe mineféén mwichefel lón Korint. Emén mwán chón lón ena mwichefel a lisowumwáál ngeni pwúlúwen seman we. Ena sókkun féffér a fókkun ámáirú me a “kon ngaw seni met aramasen ekkewe ekkóch mwú ra féri”! Nge me ren chón ena mwichefel pwe ese wor ngawen án ena mwán epwe chúen nóm lón ewe mwichefel. Eli ekkóch leir ra ekieki pwe ra pwáári úméúméch ussun chék Jiowa ngeni emén mi féri tipis. Nge Jiowa ese tipeeú ngeni an epwe wor angangen tipis lein néún kewe aramas. Án ena mwán eáni ena esin féffér mi ássáw, a eitengawa ewe mwichefel. Eli a pwal etipetipa ekkewe Chón Kraist mi chiechi ngeni. Iwe, met Paul a ereni chón ewe mwichefel ar repwe féri?

5. Met Paul a ereni chón ewe mwichefel ar repwe féri, me met weween alon na? (1 Korint 5:13) (Pwal ppii ewe sasing.)

⁵ Álleani 1 Korint 5:13. Fán án Kot emmwen, Paul a makkeei eché taropwe ngeni ewe mwichefel me áweweei pwe mi lamot repwe atowu ewe emén mi féri tipis ese áier. Itá epwe ifa féfférún ekkena Chón Kraist ngeni ena emén? Paul a ereniir ar repwe “úkútiw le chichchiechi ngeni.” Met weween alon na? Paul a áweweei pwe a kapachelong lón ena allúk ar resap “mwo nge mwéngé ren ena esin aramas.” (1 Kor. 5:11) Ach mwéngéfengen me emén, a kan efisi ach sipwe chiechifengen. Iwe, a ffat weween alon Paul na, chón ewe mwichefel resap chiechi ngeni ena mwán. Ena mettóch epwe túmúnú ewe mwichefel seni etipetip mi ngaw. (1 Kor. 5:​5-7) Pwal och, ar rese chiechi ngeni, eli a tongeni álisi an epwe mirititi úkúúkún an eletipechowu Jiowa, iwe eli epwe meefi niamam me mochen áiersefál.

6. Met chón ewe mwichefel ra féri atun a toriir néún Paul we taropwe, me met ewe mi tipis a féri?

⁶ Mwirin án Paul tiinaaló néún we taropwe ngeni ekkewe Chón Kraist lón Korint, a poputá le ekieki epwe met meefier ussun. Ló, ló, ló, Taitos a uweato pwóróus mi apwapwaai. Chón ewe mwichefel ra apwénúetá masouen néún Paul we taropwe. (2 Kor. 7:​6, 7) Ra álleasochisi an kapasen emmwen. Pwal och, ese pwal ttam me mwirin néún Paul we taropwe, nge ewe mwán mi tipis a áier! A ekkesiwili féfférún me ekiekin, iwe a poputá le álleasochisi án Jiowa allúk mi pwúng. (2 Kor. 7:​8-11) Iwe, met Paul a ereni chón ewe mwichefel ar repwele féri?

FÉFFÉRÚN CHÓN EWE MWICHEFEL NGENI EWE MI TIPIS MI ÁIER

7. Met ewe mwán a féri mwirin an katowu seni ewe mwichefel? (2 Korint 2:​5-8)

⁷ Álleani 2 Korint 2:​5-8. Paul a erá: “A naf ei kapasen apwúng ei esin aramas a angei seni chómmóng me leimi.” Weween pwe mwirin án ewe mi féri tipis katowu seni ewe mwichefel, a mirititi lamoten an epwe áier. Iwe pokiten a áier, ese chúen lamot an epwe sópwósópwoló ewe angangen kapwúng.—Ipru 12:11.

8. Met Paul a pwal ereni chón ewe mwichefel ar repwe féri?

⁸ Ina minne, iei met Paul a éúréúra ngeni ewe mwichefel: “Oupwele kirekiréch le omusaaló tipisin me oururu” ewe chón tipis mi áier, me “oupwe alúkúlúkú ngeni pwe oua tongei.” Nengeni pwe Paul a mochen án chón ewe mwichefel resap chék mut ngeni ewe mwán an epwe liwinsefálilong lein néún Jiowa kewe aramas, nge a pwal mochen ar repwe anúkúnúkú ngeni lón ar kapas, napanap, me féffér pwe ra enletin omusaaló tipisin me ra tongei. Ar féri ena, a affata pwe ra pwapwa ren án ena mwán liwiniti ewe mwichefel.

9. Pwata a weires án ekkóch repwe omusaaló tipisin ewe chón tipis mi áier?

⁹ Mi wor chón ewe mwichefel rese pwapwa ren án ewe mwán liwiniti ewe mwichefel? Ese pwal mak ena lón ewe pwóróus, nge a tongeni wor. Eli ekkóch ra chúen song ren an efisi osukosuk lón ewe mwichefel. Me pwal eli ekkóch ra chúen meefi weires ren an eletipengawer. Chón ewe mwichefel ra fókkun achocho le akkamwéchú liméchún manawer, ina popun eli ekkóch leir ra meefi pwe ese pwúng an mumu ngeni ena mwán mi féri tipis mi chou epwe liwinsefál ngeni ewe mwichefel. (Apépé ngeni Luk 15:​28-30.) Iwe nge, pwata a lamot án chón ewe mwichefel repwe pwáári ar enletin tongei chiener na mi liwinsefál?

10-11. Met a tongeni fis iká ekkewe mwán mi ásimaw rese mochen omusaaló tipisin emén mi áier?

¹⁰ Anchangei met a tongeni fis iká ekkewe mwán mi ásimaw rese mut ngeni ena mwán mi enletin áier an epwe liwiniti ewe mwichefel, are iká chón ewe mwichefel rese pwáári ar tongei mwirin an liwinsefál. A tongeni “kokotiw lón watteen letipechou.” A tongeni meefi pwe ese chúen tongeni angangsefál ngeni Jiowa. Eli epwe pwal mwo nge fangetá lón an achocho le ririéchsefál ngeni Kot.

¹¹ Nge ewe a fen kon ngaw seni ena, iká ekkóch lón ewe mwichefel rese mochen omusaaló tipisin ewe mwán mi áier, a tongeni angawaaló ar riri ngeni Jiowa. Pwata? Pokiten ra áppirú án Setan kirikiringaw me an ese eáni úméúméch, nge rese fen áppirú Jiowa lón an omusaaló tipisin emén mi áier. Ra mut ngeni ewe Tefil an epwe néúnéú iir le aúkatiw án ewe mwán angang ngeni Jiowa.—2 Kor. 2:​10, 11; Efi. 4:27.

12. Ifa ussun chón ewe mwichefel ra tongeni áppirú Jiowa?

¹² Iwe, ifa ussun chón ewe mwichefel lón Korint ra tongeni áppirú Jiowa nge esap Setan? Ren ar eáni féfférún Jiowa ngeni chókkewe mi áier. Iei met ekkóch chón makkeei Paipel ra apasa ussun Jiowa. Tafit a apasa pwe I a “kirikiröch o amusala tipis.” (Kölf. 86:5) Mika a apasa: ‘Esap wor eman Kot usun en. Ka amusala tipis o apichala pupungau.’ (Mik. 7:18) Me Aisea a erá: “Chon föföringau repwe likitala ar föför, nge chon pwüngingau kana repwe siwili ar ekiek. Repwe liwiniti ewe Samol mi Lapalap pwe epwe tongeäsiniir. Repwe kuliti ach Kot, pun a müttir le amusala tipis.”—Ais. 55:7.

13. Pwata a fich án ewe mwán mi áier katolongsefál lón ewe mwichefel? (Ppii ewe pwóór “Ineet ewe Mwán lón Korint A Katolongsefál?”)

¹³ Ren án chón ewe mwichefel lón Korint repwe áppirú Jiowa, a lamot ar repwe etiwasefáli ewe mwán mi áier, me alúkúlúkú ngeni pwe ra tongei. Án chón ewe mwichefel álleasochisi án Paul kapasen emmwen ar repwe etiwasefáli ewe mwán, a pwáári pwe ra “álleasochis lón mettóch meinisin.” (2 Kor. 2:9) Inaamwo iká a katowu ren fitu chék maram, nge ewe angangen apwúng a sópwéch pún a áier. Ina minne, ekkewe mwán mi ásimaw rese ammanga ar atolongasefáli lón ewe mwichefel.

ÁPPIRÚ ÁN JIOWA PWÚNGIÉCH ME ÚMÉÚMÉCH

14-15. Met sia káé seni minne a fis lón Korint? (2 Piter 3:9) (Pwal ppii ewe sasing.)

¹⁴ Pwóróusen minne a fis lón ewe mwichefel lón Korint, a makketiw lón ewe Paipel ‘pwe sipwe káé seni.’ (Rom 15:4) Sia káé seni ena pwóróus pwe Jiowa ese mut ngeni tipis mi chou an epwe wor lein néún kewe aramas. Ekkóch ra ekieki pwe pokiten Jiowa a úméúméch, iwe epwe mut ngeni emén ese áier an epwe nóm lón ewe mwichefel, nge esap ina ussun án Jiowa pwáári úméúméch. Inaamwo iká Jiowa mi úméúméch, nge esap meinisin sókkun féffér a ketiw me ren. An allúk ussun minne mi pwúng me mwáál ese siwil. (Juta 4) Iká Jiowa epwe mut ngeni ekkewe chón tipis rese áier ar repwe nóm lón ewe mwichefel, iwe esap ina eú féfférún úméúméch pún a tongeni efeiengawa ewe mwichefel.—SalF. 13:20; 1 Kor. 15:33.

¹⁵ Iwe nge, sia káé pwe Jiowa ese mochen án emén epwe máló. A mochen seláni aramas iká mi tufich. A pwáári án úméúméch ngeni chókkewe mi ekkesiwili ekiekiir me féfférúr me mochen ririéchsefál ngeni. (Is. 33:11; álleani 2 Piter 3:9.) Ina popun, atun ewe mwán lón Korint a áier me kul seni an féfférún tipis, Jiowa a néúnéú Paul le áweweei ngeni chón ewe mwichefel lamoten ar repwe omusaaló tipisin me etiwasefáli.

16. Met meefiom ren minne mi fis lón ewe mwichefel lón Korint?

¹⁶ Pwóróusen met mi fis lón ewe mwichefel lón Korint, a áiti ngenikich pwe Jiowa mi fókkun tong, pwúng, me pwúngiéch. (Kölf. 33:5) Sia mwareiti Jiowa ren napanapan kena mi amwarar. Sia fókkun kilisou ren an úméúméch, pún kich meinisin chón tipis me a lamot ngenikich an epwe omusaaló tipisich. Emén me emén kich, a wor popun ach sipwe kilisou ngeni Jiowa ren an awora ewe méén kepich pwe epwe tongeni omusaaló ach tipis. Sia fókkun meefi oururun letipach ren ach silei pwe Jiowa a enletin tongei néún aramas me mochen met mi múrinné seni meinisin fán iter.

17. Met sipwe pwóróusfengen wóón lón ekkewe lesen mwirin ei?

¹⁷ Iká emén a féri eú tipis mi chou lón ei fansoun, ifa ussun ekkewe mwán mi ásimaw lón ewe mwichefel ra tongeni áppirú án Jiowa tong me álisi an epwe áier? Epwe itá ifa meefien chón mwichefel iká ekkewe mwán mi ásimaw ra apwúngaló katowuun emén seni ewe mwichefel are eliwinalóng? Sipwe káé ussun ekkena kapas eis me lón ekkewe lesen mwirin ei.