Ifa Ussun Sipwe Awora Kapasen Éúréúr?

1. Ié epwe wisen awora kapasen éúréúr, me pwata?

KA SANI le éúréúra ekkewe ekkóch? Ekkóch ra sani, nge ekkóch rese kinamwe are ra pireir le féri ena. Ese lifilifil met, nge a lamot ngenikich meinisin ach sipwe awora kapasen éúréúr fán ekkóch. Pwata? Pún ina eú alen ach sipwe pwáári ach tongei chienach kewe Chón Kraist. Jises a erá pwe mi lamot ach sipwe tongfengen lefilach iká sia mochen wiliiti néún chón káé. (Jon 13:35) Pwal och, ewe Paipel a apépééi eú “kapasen fön seni eman mi mirit” ngeni eú liffang mi aúchea mi ellinga ewe chón etiwa.—SalF. 25:12.

2. Met ekkewe mwán mi ásimaw ra tongeni féri, me pwata? (Pwal ppii ewe pwóór “Kapasen Fén Atun ewe Mwiich lón Weekday.”)

² A lamot ngeni ekkewe mwán mi ásimaw ar repwe silei ifa ussun repwe awora kapasen fén. Jiowa me Jises ra ewisa ngeni ekkena mwán ar repwe wisen túmúnú ewe mwichefel. (1 Pit. 5:​2, 3) Eú alen ar féri ena, ina ren ar awora kapasen emmwen seni Paipel atun ra eáni ar kewe kinikin lón mwiich. Ra pwal éúréúrakich atun a lamot ngenikich, me ra pwal álisi chókkewe mi likitaaló Jiowa le liwiniti ewe mwichefel. Ifa ussun ekkewe mwán mi ásimaw me oukich meinisin sia tongeni awora kapasen éúréúr?

3. (a) Ifa ussun sia tongeni káé ach sipwe emén souéúréúr mi múrinné? (Aisea 9:6; pwal ppii ewe pwóór “Áppirú Jises Atun Sia Awora Kapasen Emmwen.”) (b) Met sipwele káé lón ei lesen?

³ Sia tongeni káé ifa ussun sipwe awora kapasen éúréúr mi múrinné ren ach káé seni pwóróusen ekkóch lón Paipel, nge ákkáeúin seni Jises. Eú me lein ekkewe itelap Jises a iteni, ina “Souéúréúr mi Tipáchem.” (Álleani Aisea 9:6 seni ewe footnote.)a Lón ei lesen sipwe káé met sia tongeni féri atun emén a kútta éúréúr senikich, me met sia tongeni féri atun a lamot ach sipwe éúréúra emén inaamwo iká ese tingor ach sipwe éúréúra. Sipwe pwal ppii lamoten ach sipwe awora kapasen éúréúr lón fansoun fich me lón ewe napanap mi pwúng.

ATUN EMÉN A KÚTTA ÉÚRÉÚR SENIKICH

4-5. Ifa ewe kapas eis sipwe pwisin eisinikich atun emén a tingorekich kapasen éúréúr? Eáni eú kapas áwewe.

⁴ Atun emén a tingorekich ach sipwe ngeni kapasen éúréúr, met sia kan meefi me akkomwan? Eli sia pwapwa me mochen mwittir álisi. Nge mi lamot sipwe akkomw eisini pwisinkich, ‘A fich ngeniei ái úpwe awora éúréúr wóón ei sókkun mettóch?’ Fán ekkóch, epwe fen kon álilliséch iká sia emmweni i ngeni emén mi fich an epwe wisen awora ngeni emmwen wóón ena mettóch.

⁵ Ekieki ei kapas áwewe. A úri emén chiechiom eú semmwen mi chou. A erenuk pwe a poputá le kúkkútta pwóróusen ekkewe sáfei mi wor, iwe mwirin a eisinuk iká menni leir ka meefi pwe a éch me reom. Inaamwo iká eli ka sani eú me leir, nge esap en emén tokter me ese wor óm sile lón pekin sáfeien ena esin semmwen. Iká a fis ena, iwe epwe fen kon éch iká kopwe álisi le kútta emén mi sileéchú sáfeien ena semmwen.

6. Met a éch sipwe féri me mwen ach sipwe awora kapasen éúréúr?

⁶ Inaamwo iká sia meefi pwe a wor ach tufich le awora kapasen éúréúr ngeni emén ussun eú mettóch, nge eli epwe fen éch ach sisap mwittir awora ngeni kapasen éúréúr. Pwata? Än Salomon Fos 15:28 a apasa pwe “ekewe chon pwüng ra akomwen ekieköchü mine repwe pälüeni ngeni kapas.” Inaamwo iká sia ekieki pwe sia silei met sipwe apasa, nge eli a fen éch ach sipwe mwo research, iótek, me ekiekifichi met sókkun kapasen emmwen sipwe awora. Iká sia féri ena, iwe ach kapasen éúréúr epwe wesewesen tipeeú ngeni met Jiowa a mochen ach sipwe apasa. Sipwele ppii pwóróusen ewe soufós Natan.

7. Met ka káé seni pwóróusen ewe soufós Natan?

⁷ King Tafit a ereni ewe soufós Natan pwe a mochen aúetá eú imwenfel fán iten Jiowa. Natan a mwittir ereni an epwe féri. Nge itá mi lamot án Natan epwe akkomw angei meefien Jiowa. Pwata? Pún Jiowa ese mochen án Tafit epwe wisen aúetá ewe imwenfel. (1 Kron. 17:​1-4) Sia káé seni ena pwóróus pwe atun emén a tingorekich kapasen éúréúr, epwe eú alen tipáchem ach sipwe “mmang ngeni kapas.”—Jem. 1:19.

8. Ifa pwal eú popun mi lamot ach sipwe túmúnúéch atun sipwe awora kapasen emmwen?

⁸ Pwal iei eú popun pwata a lamot ach sipwe túmúnúéch atun sipwe awora kapasen emmwen. Iká sia awora ngeni emén eú kapasen emmwen ese pwúng, nge iká a fis ngeni och mettóch me mwirin, iwe sia pwal tipis ngeni. Ina popun, a fókkun lamot ach sipwe ekiekifichi me mwen ach sipwe awora kapasen éúréúr.

AWORA ÉÚRÉÚR INAAMWO IKÁ EWE EMÉN ESE TINGOR

9. Met a lamot ekkewe mwán mi ásimaw repwe sileéchú me mwen ar repwe awora kapasen éúréúr? (Kalesia 6:1)

⁹ Fán ekkóch, a lamot án ekkewe mwán mi ásimaw repwe éúréúra emén Chón Kraist mwán are fefin mi “ttur lón tipis.” (Álleani Kalesia 6:1.) Eli emén a féri ekkóch kefil ese pwúng mi tongeni emmwen ngeni an epwe féri tipis mi chou. Ekkewe mwán mi ásimaw ra achocho le álisi le sópweeló le fetál wóón ewe al mi ale ngeni manaw esemuch. (Jem. 5:​19, 20) Iwe nge, ren an epwe sópwéch án ekkena mwán mi ásimaw kapasen emmwen, a lamot ar repwe akkomw sileéchú iká mi pwúng pwe ena emén a wesewesen féri eú tipis. Jiowa a mut ngenikich meinisin ach sipwe féri ach kefil mi lóngólóng wóón en me mwelien letipan. (Rom 14:​1-4) Iwe nge, iká ekkewe mwán mi ásimaw ra esilla pwe emén a féri och mettóch mi tongeni atai an riri ngeni Jiowa, iwe ifa ussun ra tongeni éúréúra?

10-12. Met a lamot emén mwán mi ásimaw epwe féri atun a éúréúra emén ese pwal tingor álillis? Eáni eú kapas áwewe. (Pwal ppii ekkewe sasing.)

¹⁰ Ese mecheres án ekkewe mwán mi ásimaw repwe awora ngeni emén kapasen fén nge ena emén ese tingor álillis seniir. Pwata? Ewe aposel Paul a erá pwe eli ena emén ese tepereni pwe a fen féri eú tipis. Ina popun, me mwen án ekkewe mwán mi ásimaw repwe éúréúra, a wor fitu mettóch a lamot repwe féri pwe epwe ámecheresi an epwe aúseling ngeni ar éúréúr.

¹¹ Ekieki ei kapas áwewe. Emén chón atake a achocho le ámáári fótan irá lón eú pwúl mi péchékkúl. Me mwen an epwe poputá le fót fótan irá, a kan akkomw féri an we pwúl. A akkomw ápweteteei, iwe mwirin epwap amwora fótan kewe pwikil. Iwe, a kan étútúúr pwe repwe mámmááritá. Ina pwal ussun ren án emén mwán mi ásimaw awora kapasen éúréúr ngeni emén ese tingor álillis. Áwewe chék, ewe mwán mi ásimaw epwe alúkúlúkú ewe emén pwe a tongei me ereni pwe a wor eú mettóch a mochen fós ngeni ussun. Iká emén souéúréúr a sil pwe i emén mi tong me kirekiréch, iwe epwe ámecheresi án ekkewe ekkóch repwe etiwa an kapasen éúréúr.

¹² Atun án ewe mwán mi ásimaw me emén pwóróusfengen, a tongeni ámecheresi an epwe etiwa an kapasen éúréúr ren an áchchema ngeni pwe kich meinisin sia kan mwámmwáálliló. (Rom 3:23) Lón ngingiin mi kinamwe me fiti súfél, a tongeni affata ngeni seni ewe Paipel pwe i a féri eú tipis. Lupwen ena emén a mirititi pwe mi pwúng pwe a mwáálliló, ussun itá ena mwán mi ásimaw a amwora ewe féún pwikil ren an áwewe ngeni lón kapas mi mecheres met a lamot epwe féri. Iwe ussun itá ena mwán mi ásimaw a étútúúi ewe pwikil ren an ereni ussun ekkewe mettóch mi múrinné a féfféri me ren ar iótekfengen.—Jem. 5:15.

13. Ifa ussun ekkewe mwán mi ásimaw repwe silei iká ewe emén a weweiti ewe kapasen emmwen ra ngeni?

¹³ Fán ekkóch, a sókkofesen minne ewe souéúréúr a apasa me met ewe chón aúseling a weweiti. Met ekkewe mwán mi ásimaw repwe féri pwe esap fis ena? Fán súfél, ra tongeni eisini ena emén iká a weweiti ewe kapasen emmwen me silei met epwe féri pwe epwe apwénúetá.—SalAf. 12:11.

AWORA ÉÚRÉÚR LÓN FANSOUN FICH ME LÓN EWE NAPANAP MI PWÚNG

14. Pwata sisap awora kapasen éúréúr atun sia song?

¹⁴ Kich meinisin sise unuséch, ina popun fán ekkóch sia kan féri are apasa met mi eletipengawa ekkewe ekkóch. (Kol. 3:13) Án Kot we Kapas a apasa pwe fán ekkóch sia pwal mwo nge efisi án emén epwe song. (Efi. 4:26) Nge, sisap awora kapasen éúréúr atun sia song. Pwata? Pún “án emén song esap aworato án Kot pwúng.” (Jem. 1:20) Iká sia awora kapasen éúréúr atun sia song, epwe fen alapaaló ewe osukosuk. Iwe nge, esap weween pwe sisap chúen pwáári meefiach me ekiekich ngeni ewe emén mi asongakich. Nge a lamot sipwe witi an epwe masésétiw meefiach, iwe sipwap fós ngeni ena emén. Sia tongeni káé seni Elihu, ewe emén mi awora ngeni Jop kapasen éúréúr.

15. Met sia káé seni Elihu? (Pwal ppii ewe sasing.)

¹⁵ Ren fitu rán, Jop a sótun áwena ekkewe mettóch mi mwáál chienan kewe ra apasa ussun i. Elihu a meefi an tongei Jop. Nge a pwal fókkun song pún Jop a apasa och mettóch mi mwáál ussun Jiowa me a kon nefótófót wóón pwisin i. Ikáámwo ina, nge Elihu a witiwiti an fansoun le fós me a apwúngú Jop fán mosonoson me súfél. (Hiop 32:2; 33:​1-7) Án Elihu leenien áppirú a áiti ngenikich eú mettóch mi fókkun aúchea. A fókkun múrinné iká sipwe éúréúra emén atun mi kinamwe ekiekich me sipwe féri fán súfél me tong.—SalAf. 3:​1, 7.

SÓPWEELÓ LE AWORA ÉÚRÉÚR ME ETIWA

16. Met ka káé seni Kölfel 32:8?

¹⁶ Jiowa a apasa lón Kölfel 32:​8, TF: “Upwe aiti ngonuk o afalafala ngonuk ewe al kopwe fetal lon; mesei epwe nonnom wom lupwen ua afalafalok.” Weween pwe Jiowa epwe sópweeló le ákkálisikich. A pwonei pwe epwe awora ngenikich kapasen éúréúr me álisikich le apwénúetá. Sia tongeni áppirú Jiowa! Atun sia awora kapasen éúréúr ngeni ekkewe ekkóch, sia pwal tongeni sópweeló le peseer me álisiir ar repwe féri kefil mi múrinné.

17. Ekkewe mwán mi ásimaw mi awora kapasen emmwen seni Paipel, iir ra ussun met? Áweweei. (Aisea 32:​1, 2)

¹⁷ A fen kon lamot lón ach ei fansoun ach sipwe awora kapasen emmwen me etiwa. (2 Tim. 3:1) Ekkewe mwán mi ásimaw mi awora kapasen emmwen seni Paipel mi fichiitikich, ra “usun chök chanpupu lon eu leni mi pwasapwas.” (Álleani Aisea 32:​1, 2.) Chiechiach kewe mi silei met sia mochen rong nge ra erenikich met mi lamot ach sipwe rong, ussun itá ra liffang ngenikich eú liffang mi aúchea “usun chök ekewe föün ringo mi oleol usun kolt mi nom lon eu sepi.” (SalF. 25:11) Amwo oukich meinisin sipwe sópweeló le ámááraatá ewe tipáchem mi lamot ngenikich le awora kapasen emmwen me etiwa.