“Ewe Maun än ewe Samol mi Lapalap”

Lón ewe ier 1999, ewe mwúún France a allúkú ewe keangen ofesilap ikena ar repwe méénatiw takises fán iten ekkewe asor mi tolong lefilen ekkewe ier 1993 me 1996. Áúa sótun le féri kapwúng nge ese sópwéch. Áúa tingorer iká repwe tongeni siwili minne ra apwúngaló nge rese pwal mochen, iwe ewe mwú a angei $6,300,000 seni ach we keangen ofesilap. Eú sáingoon mettóch áúa tongeni féri ren ám áúpwe angeisefáli ena moni, ina ám uwei ám we case ngeni ewe ECHR. Nge mwen ar repwe féri kapwúng wóón ám na case, ewe ECHR a mochen áúpwe chuuri ekkewe lawyer seni ewe mwúún France me emén chón tupuni ewe European Court pwe repwe ppii iká áúa tongeni ataweei ewe osukosuk mwen ar repwe féri kapwúng wóón ám we case.

Áúa ekieki pwe ena chón tupuni ena European Court epwe péchéú le erenikem ám áúpwe ngeni ewe mwúún France och moni. Iwe nge, áúa fókkun weweiti pwe iká áúa méénatiw och moni iwe epwe atai án Paipel kewe kapasen emmwen. Chienach kewe ra asor pwe repwe álisaatá angangen ewe Mwúún Kot, ina popun ese fich án ena moni epwe ló ngeni ewe mwú. (Mat. 22:21) Iwe nge, áúa chúen fiti ewe mwiich pwe áúpwe pwáári ám álleasochisi allúkún ewe European Court.

Iwe, áúa chufengen fán iten ewe mwiich lón eú me lein án ewe imwen kapwúng kewe leenien mwiich mi ling. Mwittir chék, ena chón tupuni ewe European Court a apasa pwe a lamot án Chón Pwáraatá Jiowa repwe méénatiw ekkóch ekkewe takises France a ereniir repwe méénatiw. Án Jiowa we ngún mi fel a amwékútúkem le eisini, “Ka fen silei pwe ewe mwú a fen angei $6,300,000 seni ám bank account?”

A fókkun máirú. Iwe a siwili an ekiek wóón ám we case atun ekkena lawyer ra erá pwe ra féri ena. A song ngeniir me a mwittir asopwaló ewe mwiich. Úa kúna pwe Jiowa a álisikem pwe áúpwe tongeni winneni ewe case. Áúa fókkun pwapwa mwirin wesin ám na mwiich me áúse fókkun lúkú met a fis.

Lón June 30, 2011, ewe ECHR a apwúngaló pwe mi mwáál minne ewe mwúún France a féri. A apasa pwe án France angei ewe moni a atai allúk me a allúkú ar repwe eliwini ewe moni ra angei me apachaatá manawan! Minne ra apwúngaló a chúen túmúnú fel mi enlet lón France tori iei. Ám na kapas eis áúa eppiietá, a ussun chék ewe eféú faw mi nieló Koliat pokiten a unusen siwili ewe case. Pwata áúa win? Pún ussun chék met Tafit a ereni Koliat pwe, “ewe maun än ewe Samol mi Lapalap.”—1 Sam. 17:​45-47.

Esap chék iei ewe atun áúa win lón kapwúng. Inaamwo iká ekkewe mwú mi péchékkúl me lamalam ra ú ngenikich nge áúa winneni 1,225 case lón ekkewe kapwúng tekia lón 70 fénú me pwal ekkóch imwen kapwúng. Ám winneni ekkena case a ánneta pwe mi wor ach pwúúng, áwewe chék ren ach pwúúng le féri ach fel, fiti ewe angangen afalafal, ach sisap fiti mwékútúkútún fénúfan, me ach sisap angei chcha.

Pwata úa álillis wóón ewe kapwúng lón Iurop nge úa angang lón án Chón Pwáraatá Jiowa we ofesilap lón New York, U.S.A.?

ÚA KÁÉ SENI ÁN SEMEI ME INEI TINIKKEN LE AFALAFAL

Semei kewe me inei, George me Lucille, ra sochungio seni ewe engol me oruuen sukulen Gilead me ra álillis lón Ethiopia atun úa uputiw lón ewe ier 1956. Iwe ra eita ngeniei Philip iten ewe chón esilefeili pwóróus allim lón fansoun ekkewe aposel. (Féf. 21:8) Mwirin ena ier, ewe mwú a pinei ewe angang. Inaamwo iká úa chúen kúkkún lón ena atun nge úa chechchemeni ái we famili ra kan féri ar fel lemonomon. Lekúkkúni a mmen ámmeseik me rei! Iwe nge a mmen elichippúng pwe ekkewe néúwisin mwú ra eriánikem ám áúpwe towu seni ena leeni lón ewe ier 1960.

Áúa mwékút ngeni Wichita, Kansas, U.S.A., nge semei kewe me inei rese úkútiw le aúcheani ewe angangen afalafal ussun chék atun ra misineri. Ra áiti ngenikem me fefinei we watte Judy, me pwii we kúkkún Leslie, iir mi pwal uputiw Ethiopia ám áúpwe tongei Jiowa me angang ngeni ren unusen letipem. Úa papatais atun a 13 ieri. Mwirin úlúngát ier, áúa mwékút ngeni eú leeni mi osupwangen chón afalafal ie lón Arequipa, Peru.

Lón ewe ier 1974 atun a 18 ieri, ewe keangen ofesilap lón Peru a ewisa ngeniei me pwal fémén mwán ám áúpwe special pioneer. Áúa kewis le afalafal lón ewe Central Andes Mountains ina wóón ekkewe chuuk mi chukuchukutá aramas resaamwo piin afalafal ie. Áúa pwal afalafal ngeni ekkewe chón Quechua me Aymara. Áúa kan wawa efóch tarakú mi watte mi ussun eú imw áúa eita ngeni Ewe Waimw, pokiten a napen pwóór. Úa aúcheani ekkewe fansoun úa áiti ngeni aramas ekkewe pwon lón Paipel pwe Jiowa epwe áwesaaló osupwang, semmwen, me máló. (Pwár. 21:​3, 4) Chómmóng ra etiwa kapas allimen ewe Mwú.

ÚA KEWIS LE ANGANG LÓN EWE OFESILAP NEW YORK

Atun Albert Schroeder, emén seni ewe Mwichen Soupwúngúpwúng a etto Peru lón ewe ier 1977, a peseei ái úpwe apply le angang lón ewe ofesilap New York. Iwe, ina met úa féri. Ekiseló mwirin, lón June 17, 1977, úa poputá angang lón ewe ofesilap lón Brooklyn. Ren úkúúkún rúáánú ier, úa kan álillis le elimelim me túmúnú ewe ofesilap.

Lón ewe June 1978, úa chuuri Elizabeth Avallone atun ewe international mwichelap lón New Orleans, Louisiana. Seman kewe me inan ra angang ngeni Jiowa ussun chék semei kewe me inei. Lón ena atun, Elizabeth a pioneer ren úkúúkún rúáánú ier me a mochen angang ngeni Jiowa full-time lón ánein manawan. Áúa sópweeló ám chiechifengen me ló, ló, ló, áúa fókkun tongfengen. Iwe lón October 20, 1979 áúa pwúpwúlú, me a fitiei le angang lón Bethel.

Pwiich kewe lón ám we áeúin mwichefel lón Brooklyn Spanish, ra fókkun tongekem. Áúa álillis lón pwal úlúngát mwichefel iir mi fókkun etiwaéchúkem me ra apéchékkúlakem le sópweeló lón ám angangen Bethel. Áúa fókkun aúcheani ar álillis, me pwal án chienem kewe me ám famili álillis le túmúnú semem kewe me inem atun ra chinnap.

ÁI ANGANG LÓN EWE LEGAL DEPARTMENT

Úa máirú atun ra ewisa ngeniei le álillis lón ewe Legal Department lón Bethel lón January 1982. Úlúngát ier mwirin, Bethel a ereniei ái úpwe fiti sukul tekia pwe úpwe wiliiti emén lawyer. Atun úa sukul, úa máirú atun úa káé pwe pokiten án Chón Pwáraatá Jiowa winneni chómmóng case iwe a mumu ngeni aramas lón Merika me pwal ekkóch fénú ar repwe féri chómmóng mettóch. Áúa káéfichi ekkena case mi lamot lón ái sukul.

Lón ewe ier 1986 atun a 30 ieri, a kewis ngeniei ái úpwe emén chónemmwen lón ewe Legal Department. Úa pwapwa ren án Bethel lúkúlúk wóói inaamwo iká úa chúen emén alúwél. Nge úa pwal aúrek pokiten a chómmóng mettóch úse silei, me úa silei pwe esap mecheres ei angang.

Lón ewe ier 1988, úa wiliiti emén lawyer me úa esilla pwe ena sukul a kkúú ái riri ngeni Jiowa. Sukul tekia a tongeni efisi án emén epwe mochen tekia me ekieki pwe a múrinné seni ekkewe ekkóch. Elizabeth a álisiei le liwiniti ekkewe mettóch úa kan féri me mwan ren ái úpwe apéchékkúlasefáli ái riri ngeni Jiowa. Lo, lo, lo, úa péchékkúlsefál lón pekin ngún. Úa káé pwe án emén áwatteei an sile esap ina met mi fókkun aúchea lón manawan. Ewe a kon aúchea lón manawach ina ach riri ngeni Jiowa me ach fókkun tongei i me néún kewe aramas.

PENAATÁ EWE KAPAS ALLIM PWE EPWE WOR ACH PWÚÚNG LE AFALAFAL

Mwirin ái wes le fiti sukul tekia, úa poputá le nefótófót wóón ái álillis lón ewe Legal Department lón Bethel me túmúnú án Jiowa mwicheich me ach pwúúng le afalafala ewe kapas allim. Ái angang a fókkun apwapwa nge a pwal weires pún a mwittir wor ekkesiwil lón ach mwicheich. Áwewe chék, me akkomw néúch kewe puk mi kan kamé, nge lón ewe ier 1991, ewe Legal Department a angei emmwen ar repwe siwili ena kókkót ren ar repwe úkútiw le féri ena. Mwirin ena, Chón Pwáraatá Jiowa ra anéúnéú ekkewe puk nge ese chúen kamé. Ei a ámecheresi ewe angang lón Bethel me ewe angangen afalafal me ra túmúnú ar resap osukosuk le méénatiw takises. Ekkóch ra ekieki pwe ena siwil epwe efisi an epwe iteló moni, iwe esap naf ekkewe puk áúpwe anéúnéú ngeni chókkewe mi mochen aúseling me esap chúen chómmóng repwe mochen káé ussun Jiowa. Nge ese fen fis ena. Chóchóón chókkewe mi angang ngeni Jiowa seni ewe ier 1990 a fen kon lapóló chóchóór, me iei aramas ra tongeni káé me angei ekkewe mwéngé lón pekin ngún nge rese pwal kamé. Úa káé pwe ekkewe watteen siwil lón ach mwicheich a chék tongeni sópwéch pokiten án Jiowa álillis me ewe emmwen sia angei seni ewe chón angang mi túppwél me tipáchem.—Eks. 15:2; Mat. 24:45.

Áúse kan win lón ekkewe case lón kapwúng pokiten a wor néúch lawyer mi angangéch. Fán chómmóng, féfféréchún néún Jiowa kewe aramas ina met a amwékútú ekkewe néúwisin mwú ar repwe álisikich. Áwewe chék, lón ewe ier 1998 úlúmén seni ewe Mwichen Soupwúngúpwúng me pwúlúwer kewe ra fiti ekkewe mwichelap mi aúchea lón Cuba. Ar pwáári kirekiréch me súfél ngeni ekkewe néúwis a fen kon alúkúlúkúúr pwe sise kan angolong lón pekin politics lap seni met áúa ereniir lón ám mwiich ngeniir.

Iwe nge, fán ekkóch áúa chék tongeni ataweei eú case, ren ám ‘penaatá ewe kapas allim me . . . fós ngeni ekkewe néúwisin mwú pwe epwe wor ach pwúúng le afalafal’ lón imwen kapwúng. (Fil. 1:7) Áwewe chék, ren fite fite ier ekkewe néúwisin mwú lón Iurop me South Korea rese mut ngenikich ach sipwe féri pwal och sókkun angang nge ese álisaatá maun. Ina popun, ina epwe 18,000 mwán Chón Kraist lón Iurop me lap seni 19,000 lón South Korea ra kalapus pokiten rese mochen fiti angangen soufiu.

Iwe lón July 7, 2011, ewe ECHR a apwúngaló lón ewe case Bayatyan v. Armenia pwe meinisin ekkewe fénú lón Iurop repwe mut ngeni chókkewe rese fiti angangen soufiu ar repwe féri pwal och sókkun angang nge ese álisaatá maun. Iwe, lón eú imwen kapwúng lón South Korea, ra pwal féri ena esin allúk lón June 28, 2018. Iká ekkóch alúwél Chón Kraist ra fangetá lón ar túppwél, iwe eli áúsapw win lón ekkena ruu case.

Ekkewe legal department lón ewe ofesilap New York me lón ekkewe pwal ekkóch keangen ofesilap wóón unusen fénúfan ra angang weires le penaatá angangen ewe Mwú. Áúa fókkun pwapwa le peni me álisi pwiich kewe mi kúna riáfféúmwáál seni ekkewe mwú ra nóm faar. Inaamwo iká áúse win lón kapwúng nge áúa afalafal ngeni ekkewe governor, king, me ekkewe mwú ussun Jiowa. (Mat. 10:18) A lamot án ekkewe soukapwúng, néúwisin mwú, chón angang wóón TV, reitio, me Internet repwe ekieki ussun ekkewe wokisin áúa apachaalong lón néúm kewe taropween allúk me minne áúa apasa lón ewe imwen kapwúng. Chókkewe mi letipwenechar ra káé ussum me ra kúna pwe ám lúkú a lóngólóng wóón ewe Paipel. Ekkóch me leir ra wiliiti chienach.

KILISOU JIOWA!

Atun ekkewe 40 ier a ló, a mmen eú feiéch ái angangfengen me ekkewe ekkóch keangen ofesilap wóón unusen fénúfan lón pekin kapwúng me pwal ái útá mwen chómmóng soukapwúng tekia me néúwisin mwú. Úa aúcheani chienei kewe lón ewe Legal Department lón ewe ofesilap New York me ekkewe pwal ekkóch legal department wóón unusen fénúfan. Úa kúna watteen feiéch me pwapwa lón manawei.

Ren úkúúkún 45 ier, Elizabeth a túppwél ngeniei me tongeei lón fansoun éch me ngaw. Úa fókkun aúcheani pokiten a álisiei inaamwo iká a watte an semmwen me a kan apwangapwang ren.

Áúa kúna pwe ach péchékkúl me win ese feito seni pwisin ach tufich. Ussun chék met Tafit a apasa, “Ewe Samol mi Lapalap i än nöün aramas pöchökül.” (Kölf. 28:8) Ewer, “ewe maun än ewe Samol mi Lapalap.”